شادي موسى وبحر الزجل موضوع الضياع

شادي موسى وبحر الزجل

تحمم يا حرف القافيه بحبر الوحي
وأرفع على قبة الزرقا مسرحي
شادي نطق..!هان الإداره وما اعتذر
بطالب بطردو..ها الوقح ما بيستحي

الشاعر شادي موسى
..........
وين الاهانه بشمس انقى من العياد
لما باصبع نور دلت عالفساد؟
وعاسيرة الطرد ال باسمك لاففك
منك وفيك الطرد كلو ياطراد

ألشاعر سليمان طراد
من طلتي يا شمس خايف تنأزي
ان شفتي البحر بالشعر نفسو معززي
طردي مفاعل قافية وطاقة .. وحي
ويا ويلك ان ضاعفت طردي. المركزي

الشاعر شادي موسى
ساعة بحر.. ساعة الوحي من طاقتك
ساعة مفاعل والدنه ما طاقتك
داعيك طاقة الكون منها بينوحي
اتفضل وفجّر هون كامل طاقتك..

ألشاعر سليمان طراد
من شعاع طاقة بتلمح النور السني
وانتي تلصلص ع طواق الولدني
ع تلات طواق بكلمتي معنى البعد
تسلح بكلمي قلتها وشوف الدني

عمّق وخلي الحج بدر يشرحلك

الشاعر شادي موسى
لاتضل بطواقك مقوقع بالجواب
وتاتطير مابَعد المدى خلف الغياب
وتاتشوف بالابداع ابعاد الدنه
سكّر الطاقة وافتح على الكون باب

وسع خيالك يلا...

ألشاعر سليمان طراد
لوما الطاقه للدني ما في وجود
وان كان قصدك لا نهايه ولا حدود
ان خمدت يا شادي طاقتي بها الدني
الله بوجي مشرع بواب الخلود

الشاعر شادي موسى
ارسيلك عاشي مطرح تانعرف منهلك!
ومازال عاخلدك الهك وصلك
باب الخلود موسعة بيفتح الي
وطاقةت " خُلد" بالارض رح يفتح الك..

ألشاعر سليمان طراد
نحنا الخلود بأرض خلده والحما
زرعنا الجسد بأرضها حتى نما
ويا مار شادي لنفسك انسبت الخلود
مين الي عاطيك مفتاح السما

الشاعر شادي موسى
خلده اللي خلّدها.. البطوله بساحها
مش خلد عم يبحش ارض فلاحها 😁
سر الشعر.. .. سر السما وارواحها
خلودين دنيا ودين سري باحها
خلود السما.. مفتاحها هلال وصليب
خلود القصايد.. كلمتي مفتاحها..

ألشاعر سليمان طراد
حاجي الحقيقه بالجهاله تزيحها
خلود القصايد عا الورق تنقيحها
بواب الصلا مفاتيحها تسابيحها
وعالم بتطلع عا السما بمنيحها
لكن بواب الآخره وسر الخلود
الله دخيلو مضيّع مفاتيحها

الشاعر شادي موسى
قصدان بو روكز الخلدها الزمان
مش عالورق.. باللحن..وبآاااخ الحنان
ضيّعت عن ايمانك برب المكان
تاتقول ضيّعها لمفاتيح الامان
مش بس ضاعت هيبتك.. ضاع الوعي
وضيّعت ياسليمان عقلاتك كمان خخخخخ

الشاعر سليمان طراد

ضايع انا وبغربة المره ضياع
متل البيهجر عا المدينه من الضياع
م العمر فرصة ضايعة بعالم خداع
كف رح تواجه ربنا ولابس قناع
فلسطين ضاعت بين قمه واجتماع
والكل ضايع صار يا شادي قناع
وضيّعت عقلي كتر ما مفتّش عليك
والشاهده فيروز شادي أمس ضاع

الشاعر شادي موسى
......
ضاع شادي بحرب وبتلج الودى
واسمو بنغم فيروز لمعة عالندى

ضاعت النخوة والعرب خاووا العدا
تاضاعت فلسطين صوت بلا صدى

واهلك انت ربوك كل شبر بفدا
تعبوا وشقيوا تاصرت قد المدا
يعني اذا بتمشي على دروب الضَياع
بيضيع عالفاضي تعب اهلك سدى

ألشاعر سليمان طراد
يا مفكّر بتربح بضربه قاضيه
عليي قبل ما تموت إمي راضيه
بتضيع منا الزاكرى المتغاضيه
وما ضاع زكر من الرؤوس الفاضيه
يا ما دول رغم القلام الماضيه
ضاعت بجهل شعوبها المش راضيه
من بلادنا حتى وطنا ما يضيع
ضاعت يا شادي حروب سودا ماضيه

الشاعر شادي موسى
.....

شوباك كلما افكار شعري تنوّعوا؟
افكارك عا اسهل درب عم بيكوّعوا!
رح اسالك.. مين الوطنكن جوّعو؟
ومين لقماش التعايش زوّعو؟
ودبور حرب الطائفية فوّعو..
تاغصون ارز الرب منها تلوّعو
الجيش البقي بلبنان صمّام الأمان
يما السياسي ال " حق " شعبك ضوّعو!!

ألشاعر سليمان طراد

يا خيل الشوق شفتك عار كابي
بعد ما عجزت خلفي عا ركابي
ورغم ما حلم اشواقي كويتو
انا ما اعتدت إركع عا ركابي

عمري ضاع بالغربه ولقيتو
بكسرة خاطري ودمعة عذابي
ورغم ما دموع احلامي سقيتو
زهّر بس برعم من شبــــابي

الضياع بعالم الأجساد زيتو
طار وضاع من عالم ترابي
ولأنك خي يا شادي لقيتو
ما بدي تجرحك حجة جوابي

انتو بحرب سوريا انشويتو
تا عبّق جوكن عتم وضبابي
وعا حل يكون عادل ما التقيتو
حتى الحكم صفّى شرع غابي

وحلم الشعب ضاع وما اقتديتو
بإنو الحل سلمي وانتخابي
بدل ما تفاوضو رحتوا التهيتو
بحلف الفارسي وحلف الوهابي

ما تفهمني غلط إللي عنيتو
ضياع الحق بيولّد كآبي
واللي ما سقف بالصيف بيتو
ما فيه يحط لومو عا السحابه

الضياع بعالم الوجدان ريتو
بإسيد ونار ننهيلو العصابه
ولأنو البحر متربّى ببيتو
وهمك بهكلو حتى بغيابي
لحد اليوم شادي ما لقيتو
وشادي ضاع معنا عا المنابر
تا ضحكوا عليه شعّار الخوابي

الشاعر شادي موسى
......
استني ياخوابينا استني..
وانت ياطراد لم كنوز فني
الضَياع بيخلُق وجود الخفايا
وتاتقنع كيف!! اسمعني بتأني..

ضياع الموج عاشواطي عرايا
خلق سحر اللآلي ال افتتني
وضياع دموع غيماتو السخايا
عا خد الارض خلا الارض جنه
وضياع حبوب البذار الطرايا
عطي الفلاح موسم تا يجني
وضياع النبع بسْواقي القرايا
خلق واحة المي المستكني

البخل بيضيع تاتنال العطايا
من كفوف الكريم بدون منّه
الصبح بيضيع بجياب المسايا
تايخلق ليل سهرات التغني
وبيضيع الليل عاحفاف السمايا
تاصبح النور اوتارو تغني
ان ضعت بين الوصايا والخطايا
يعني الرب هيك بيمتحني..

وعلى سيرة وطنا وهالقضايا
اللي قبل اذكرتها وراجع تتنّي!
شوفو سهول وجبال و ودايا
انعجن فيي وبأمجادو عجني
شوفو متل برمودا المنايا
ضاعت فيه ثورات التجني
وضيع فتنة نفوس الشقايا
بحكمة ناس عارف مين هنه
تا دفنوا الطائفية والبلايا
اللي شعلت بين نصراني وسني..

تركني ضيع بعيون الصبايا
وعاصدرن ضيع وشم برسم حنه
وصوتي يضيع بقراني وزوايا
صدى تايخبر الحلوين عني
تركني حلم ضايع بالحنايا
بضياعي بيشعرو بسحر التمني
تركني عمر ضايع بالمرايا
تاعيش بحسرة عيون " المسنّه"..

وهلق بعد ما اظهرنا الخبايا
عالخوابي حسب ظنك وظني
بدها الناس تشهد عالمزايا
رنة شاعرية قبال رنة
انت ضيعت افكارك ضحايا
وانا ضوعة عبير بسكب فني
وضمير الحق يشهد بالوصايا
انا ضيعت وقتي حد منك
وانت ضيعت حالك حد مني...