قصايد بحر الزجل

شيطانه...وقديس
ما فيك تجبرني تا تمك بوس
ان ما تقمص الشيطان بشفافي
بعرف..بإنك ..منقهر..مفقوس
وعارف بإني كتير شفّافي
بعشق ملاك تشيطن وما بحب
قديّس حدي جامد وغافي
+++++
تحلحص..وقرّب حبني اكدشني
ومتل الورد عا الصدر فلفشني
وتا حبّك وتا ضل مغرومي
متل السبع بزنودك اكمشني
عا شرط اوعا نهار تغمشني
++++
لا تخاف ..هيدا الحب ها الايام
مش بس كلمه صادقه وبسمه
شو قصّتك .ما بتحضر الأفلام
وبتشوف فيها مشاهد الدسمه
تفرّج وتابع ..كل شي معروض
عا شرط اوعا..تضيّع بأسمي
+++++++
ما بحب تبقا معتر وقديس
وحامل زهورك تا تقدمّلي
بحبك شيطان وبعشقك أبليس
وتعرف عا تمي تقول ها الجمله
بحبّك بحبّك تا الشفاف تقول
بحبّك ونحكي الحب بالجمله




كب الهموم وفل من حالك
حتى الدني تتضحك قبالك
وخبي بقلبك فرحتك تا تشوف
نجوم السما بتقول نيالك



21 de julio a las 22:26 ·
لما الشعر بيصير لتّقويل
وبيكون وزن الكاتبو برميل
لا تقول في زحّاف تقطيعو
قول انكسر لا تقول وزنو تقيل
>>>>>>>>>>>>>>
بيت الشعر تا توزنو مسموح
بالحس أو بالقلب او بالروح
ان ما قدرت تسمع من الشاعر بيت
دشّر الحفله يا حبيبي وروح
>>>>>>>>>>>
بيتفلسفو بالوزن مدري كيف
تا يبيّنوا انو الشعر اعجاز
وبيلعبوا بالوزن بالتحريف
وبيراشقوني من بيوت قزاز
>>>>>>>>
الشاعر إله الأنبيا قوافيه
لأعلى سما بيضل يتجلّى
وبيت الما فيها الروح تفرح فيه
ما بينوزن لو قايلو الله
>>>>>>>>
بيت الشعر مدماك مش متراس
من نص دين العاطفه مسلوخ
ان بيسكر من الذوق والأحساس
ما في خمر بيسكّرو تا يدوخ


سلّم بالعرض
-------
كل الدني
بتصير صيّاده
لما الشرق بيصير
مرج طيور
وبيغزلو
من الدم سجّاده
وبيبلشو يصلّو شهود الزور
وشو بيعمل
الدستور يابلادي
مازال فيكي
رصاصة العميان
بتمشي بلا شرع وبلا دستور
وجع

سألت البحر ليش السما زرقا
ونجوم الله مجمّعه فيها
وليش الغيوم المارقه مرقه
طيور الفضا بالكاد تحكيها
وريح الوحي بتنهّت بالسرقه
لما بتعصر من دواليها
الموجه بتصرخ آآآخ وبحرقه
لون السما ما عاد يغريها
بطلّت فضي الروح عا الورقه
ما ضل عندي قلام ابريها




21 de julio a las 10:45 ·
لما الوجع بيصير ..قلبك ينفضو
بتعرف ..بأنو الحب قسمه مش نصيب
من الصعب جرحك لو موزّم ترفضو
جرح الهوى بيطيب من دمع الحبيب
يا ريت جرحي بعيد عني مش قريب


ليش السما بتسوّد وبتزرق
شو قولكن ..؟عم تعتب علينا
ومعقول عرفت كيف مات الحق
وابنو انصلب ..قدّام عينينا
نحنا خطينا بحق موطنا
وما بينضفوا من الدم ايدينا



يا شعر قلّي ..تا انا قلك
قديش حامل ..من هبل ها العصر
لو كنت والله واقف محلك
تا كنت علّي الذوق فوق الخصر
ما الشعر من لبنان مش من مصر


ليش الهوا ..بيضل خلقو مطلّعو
بينتف بشعر الأرز والشربين
وليش ..؟الغيوم عليه عم يطلّعو
مليان ..! قلبن يا هوا تخمين
فشو الخلق تا شيّبو صنين



الى روح نصري شمس الدين
عملاق مسرح شرقنا خلّد
وعاش بعصر ..اعلامنا العصري
تخلّا عن التقليد ما تقلّد
وقلّو يا عصر شراب من عصري
وسكرت بعلبك من نصر نصري
ضويّت فينا مغارة الأحساس
تا صارت النغمة طريق الضو
وصوتك سكرنا متل خمرة بكاس
... ونهرك جرفنا وحطنّا بالجو
وبقيت متل بعلبك بها الجو
غيّرت فينا .الذوق صرنا نحس
بطعمة الصوت الما ألو طعمة
وهمس الحكي لو كان عنا بس
كنا ما قلنا عصرنا معمي
لكن انت الله عطاك الصوت
نعمة ال بيعصرك عاش ها النعمة
لمتلك ما ماتوا خلّدو وعاشوا
فلعة عليها تشوهروا الأمجاد
وكل اللي كانوا يعيّشوا اعتاشوا
لعنة وطن والكرّموه ولاد
تجار فن وموتهن عاشو
غش الصحافة بذمة النقَّاد
يا شمس دين الفن ما بتنعاد
كل من شرب من صوتك تلبّك
واحتار شو بيكتب عن التاريخ
اللي بيكرهك قديّس..والحبّك
شيطان ..عاشوا مجد ما بيشيخ
يا مجد انتي مرافق بعلبك
تلاتين شهقة عطر ساكبلك
تلاتين دمعة شعر كاتبلك
وبتختصر بالفَّن يا نصري
ال بعدَّك إجو واللي إجو قبلك
.لروح العملاق نضري شمس الدين

طالع عبالي غيّر الأطباع
و قص القصيدة بحرف تنهيدي
خصلة وجع من فلذة الأبداع...
تسفّر النهدة عا دني بعيده
ومحّي عن الصفحة تلّات ارباع
واجدل معاني القافية بإيدي
وشيلك وحطك تا الوراق تساع
وما يضل فيكي غير بيت زغير
حامل قوافي قصايد جديدة
نكايي... فيكي


هيروديا....والمعمدان

ياصوت ب ليل العبوديي
كم كبش! عندو اليوم وضحية
صوتك بوّدي وكل برحليون
إبن الحلوّ بتهديك عيديي
قديش قادر ي زمّنا تخون
وع الهامش يحطك يا حريي
وتترك هيروديا ..بحقد وجنون
تقطع أمل ..وتقول مش هيي
بجنوبنا مين النسي شارون
لما هجم بجيوش وحشيه
وهبّط على روس الطفالى حصون
ودم الضحايا يسوح ليليي
ميلي يا سالومي الخصر موزون
وإيقاع. معزوفات... دينيي
بعدو اميرك. ع الجسر مدفون
وجبين. يوحنا.. ألوهيي
فم الذهب من ضيعتي بيكون
ولا تفكرّونا هون غربيه
لو كان قلبك من حجر باطون
ما بتقبلي راسو ع صينيي
وهيكي يا برحليون بالمضمون
راسك ضحية وسفرة السفاح
بآخر عشا!! بتزغزغ النيي


يا شعر كلما فتّحت فيك العيون
من مقلعك بالصخر بتفجر عيون
وتا تقشع عيون الكفيفي مطلعي
من اللوّز بدي طعمّك يا زيزفون
وتا تقشع عيون الكفيفي مطلعي
بسقي الحلم كاسات من خمر الوعي
وكلما الدني بتشق باب القافية
بخلّي التعقل يرقص بعرس الجنون
ولما الصبح بيشق باب القافية
وبينسكب ع السطر خمره صافية
ما في ع تمي غير كلمة يا هلا
يا كون متلي يا شعر اوّ ما تكون
ما في ع تمي غير كلمة يا هلا
وغسلّت شيطتنطي وذنوبي بالصلا
الشاعر على سرج السما لولا اعتلى
تمّو إذا ع الشعر ما شتىّ حلا
بيكون شعرو متل محل الزيزفون
لا كان شاعر بالدني ولا رح يكون



5 de abril de 2014 ·
بعرف عليي كتير بتمونوا
ووين ما رحت بالقلب بتكونو
وبستان قلبي الريحتو بخّور
زهر القصيدة ضل عا غصونو
لا تعاتبوني بغربتي مقهور
التاجر تا يقدر يدفع ديونو
لازم يركّز ع الشغل مجبور
حتى القدر ما يقدر تخونو
يا شعر ودّي قصايدي ببابور
يوصل على بيروت داخونو
وفيّق حنين حبايبي ببنجور
وفرّح وطن عم تاكل شجونو
يا ريت قادر غير الدستور
صار الوطن عم يخسر دهونو
تا حط بالدستور خمس سطور
وامنع الهجرة واجبر السايح
ينسا المضافي وياخد عيونو
بحر الزجل..

طيخ..طاخ
يا شعر ..حاجي تشك قلبي سياخ
ما عاد فيي عيّشك عا الآخ
تركني بحالي ..نتّف بحالي
راسي على كتر المشاكل داخ
ما زال مش عم شوفك قبالي
الا وجع محفوف بالبرداخ
رح اتركك تا ينشغل بالي
وما همني لو صار طيخ وطاخ
هههههه
يا شعر حيطك شامخ وعالي
ما بيقمزك خيّال او فشّاخ
زعّلت مرتي وتارك عيالي
من نص بيتي سلختني يا شعر
ما ضل باقي غير جلدي اسلاخ

قص المسافه بتتعب الأيام
وقصّر طريقك والدرب كفّي
وتا تلتقي بجنيّه الاحلام
بالعتم ضوّي عيونك وطفّي
وخليّك فايق .عا الدني ولا تنام
ما العمر عم بيهزّ عا الحفي
حمم الورقه بمحبره وقلام
وعبّي خيّالك معرفه وقفّي
ولا تسأل الأوطان والحكّام
كنّو الخطيه صدر او شفّه
ونيّم الكلمه من بعد حمّام
وعلّم حروفك تغرف من الروح
وشعّل حنينك تا الهوى يطفّي

يا ليل يا مرجوحه جنوني
يا زورق النسيان بعيوني
كلما نجومك بالسما ترتاح
غفّي حنين الشوق بظنوني
عدنان يا عدنان يا سفّاح
تركني ما بدي عيّش فنوني
مرتي ببيتي مغيّره المفتاح
وحتى ولادي كتير كرهوني
والشعر متل الهم ما بينزاح
وبحري كريبي وموجتي بجوني
ارحمني يا الله وباب قبري افتاح
تا اسأل الاموات والأرواح
ايمتين بدها تخلص ديوني

نصيحه لوجه ىالله
خلّوا القصيده متل ما هيي
ولا تلعبوا بأوزانها بتبوخ
وضوّوا على مواضيع شعريي
بركي الزمان بيسكر وبيدوخ
وما تهربوا عا حروف وهميي
ولاد الخطيي ناصبين فخوخ
جيبوا المعاني بدون منيي
ولا تفرّقوا بين القصر والكوخ
ملكه الشعر بحور حريي
بتطلع من جروح القلب صاروخ
بتكسر جدار الصوت هي هيي
الدهشه الحقيقيه وجع مسلوخ