شادي موسى وبحر الزجل موضوع انتحاري وشهيد

ألشاعر سليمان طراد
18 de diciembre de 2016 a las 17:53

قرار صائب بتعيين وزير مش وزيره ل شؤون المرأه

لماذا انا مع وزير مش وزيره تدير شؤون المرأه
للتصويت شعريا موقع خوابي الشعر

ألشاعر سليمان طراد
بصوّت انا مع..ها الوزير المعتني
ومش للوزيره الغدرت بمخلوقها
أول سبب هوّي الوحيد بها الدني
بيعرف حقيقه ..كيف صون حقوقها
ههههه
الشاعر شادي موسى
سليمان لاتغبّش حقيقة مجوهرة
وتخلط يمين الحق بالايد الشمال
كيف بدو يصون بحقوق المرة
المش قادر يحافظ على حق الرجال!؟

ألشاعر سليمان طراد
لما المرا تدبّللنا بعيونها
بنقول صعبه نعيش لحظه بدونها
وسر المرا لما الحبيب يخونها
بتصير حيّه بشكلها ومضمونها
الرجّال ما بيحمي بعمرو جنونها
وغير الغبي ما بيحترم قانونها
حوّا مرا خسرت حقوقا بهالحياه
والطاهره وحدو الشرف بيصونها



الشاعر شادي موسى
بعلمي كنت ناوي ب رد الاولي
تصوت ل رجال بصراحة مخجلي
رجعت ووصفتو بالغبي بهالمرحله
وقلت الشرف صان المرة المدللة
تأمل سناء محيدلي بالمرجله
وزنوبيا الخَلقت بروما زلزله
هيك المرة المفروض تحمل روحها
زنوبيا ونخوةت سناء محيدلي

ألشاعر سليمان طراد
لما الشعوب على الجروح بتنصلب
بيكون مات العدل والحق انسلب
حساس ها الموضوع وعليك انقلب
تاكد معي بالشعر بدك تنغلب
حجة سناء محيدله غب الطلب
التكفير منك جابها وامنك سلب
بنت الزغيره...الفجروها اهلها
هيدي..ضحيه؟ او شهيده ؟ في حلب

الشاعر شادي موسى
البنت ال انفجرت...جسمها بخور صار
هيدي ضحيةت غدر ... مش إلها القرار
ومحيدلي لعرس الشهادة بإختصار
بدلةت فرحها فصّلت بخيوط نار
عَكس ارهابي انتحر بالانفجار
بحزام ناسف لبّس بلادي دمار
غبنك انت مافرّقت بين ال 2
فعل الشهادة وبين فعل الانتحار !


ألشاعر سليمان طراد
التكفير لما فلسفة جهلو نشر
ّبيروت او بالشام ارهابو انتشر
في شعب مات بقصف في شعب انّشر
وكلّو بأسم الدين ووصايا العشر
ووحدو الشهيد الحي بالدق انحشر
وعا الانتحار انجر أو هج ودشر
فعل الشهاده ما بيلغي الانتحار
كل اللي ماتو بالحرب هودي بشر


الشاعر شادي موسى
الفجّر حياتو بأبريا.. وصارو شتات
مَنو بشر .. لاتحسبو ضحّى و مات!!
بس الهجر أرضو ولتاني بلاد فات
وشنطةت خيالو ضب فيها الذكريات
هيدا شهيد ..وما انتحر...حامل صفات
النبل .. المحبة ... التضحية .. ونكران ذات
ضحّى بحياتو العاشها بأول وطن
بتاني وطن تايمنح ولادو الحياة !!

ألشاعر سليمان طراد
لما تشوفوا الشعب بهمومو سبح
بيكون صوت الاخ خنّق وانكبح
والحرب موت ..الموت كيف؟ بينربح
وجايي ملاك الموت عا شكل الشبح
وبغربتو الانسان لو مهرو شبح
ليلو انتحر بمحل ما فجرو صبح
وتا يضل ناجح والنجاح مرافقو
حلم الصبا لازم بابدو يندبح