سعيد بو الزور وبحر الزجل هجر وبقاء

14 de mayo a las 11:19

سعيد بو الزور..لا ترد بالزور
بعرف صبي موهوب..علّق قلعتو
بين السما والأرض ..عا حدود الحياة
ولما وقع ..عا السطر حبّر أمسيات
والكل صاروا يضحكو عا وقعتو
شو قولكن بو الزور..من سنتين مات؟


Saed Abou Zour

علقّت جرحي عَ صليب الموهبِه
بين السّما والأرض مرجوحِة دموع!
عيوني كنيسِة حلم ورموشي شموع
فْتحت الغياب وقلت يا سطور اكتبي
من هيك صارت صفنتي توقع طلوع


سليمان طلاع لعاب مع جيالاتك

ألشاعر سليمان طراد

لما الهبل بالشعر..تعتبرو طلوع
وتوقع دموع الحبر عا سطور الضلوع
معناتها جروحك بوهم معلّقه
ما بتنربط الا بحبل المشنقه
من هيك يا بو الزور...لا تخاف الوقوع

ما بتوقّع الأوهام ..الا بالدموع
ههههه


Saed Abou Zour
هيك قالوا عن مسيح النّاصرَه
اللي علّقوا شوك الوهم عَ قامتو
والعرس فايح من جرح نمنامتو
طلعِت مساميرُن بِ كفّو قاصرَه
ودقّت جراس العيد بعد قيامتو

ألشاعر سليمان طراد
علّقت حالك بعد ما الحرف انزنق
ووهمك جدلّك مشنقه وتنبّهوا
حروفك على داخون بالريح انخنق
ازكرت المسيح ..وكان قصدك تشبهو
ليش ما زكرت يوضاس بالتيني انشنق

دين المسيحي..تفرّجوا..سعيد اعتنق
ههههههههههه


Saed Abou Zour
اشنقني انا بخّور زيّاح القصيد
دخان حبري همس ع شفاف الضباب
قماشي قصايد شرنقة سطوري جياب
خلّي الجمر يغزل حنيني من النهيد
تَ تصير بنت الموهبِه تلبس تياب
وداخون عطري يدوِّخ عيون الغياب

لك يا صبي قلتلك ما تلعب معي انا زعلي بيوجع


ألشاعر سليمان طراد
لما الوهم ..بعروق موهبتك سري
تراجعت متل الخوف ..عزمك ما دري
دخّنت غيم الذوق تا تعبّو العروق
انشالله بعد ما تدخّن بترجع تزوق
وتطبّق رواياك من سم الهري

شاعر لا تعمل ..روح واعمل بيطري
ههههههههههههههههه

Saed Abou Zour
شو هالشعر يا طراد خيّبت الظنون
بتعرف سعيد نبيد فكرو قافرو
واسمو على جبين الليالي حافرو
لمّا ..... الشعر قيقب عالجنون
قلَبتو وراس وكعب خلّيتو يكون
وبيطَرت من جلدو المقشّب حافرو


ههههه

ألشاعر سليمان طراد
حمار السعيد ..الموج فكري قافرو
راسم قصيده..جهشني عا حافرو
ياما عليه تنقلّوا اجدادنا
تا يعيّشونا ..ويرفضو استعبادنا
السافر بيهرب من حمير بلادنا
وبس الحمير من الوطن ما سافرو

مين يا علي...عليي سعيد..الدافرو؟


Saed Abou Zour
امك بنت هالارض يا جيل النحيب
احلا قصيده مجد الله جابها
عمشِق وفاك المستحي ع َ تيابها
وبكرا بعد ما ترجع بتوب الغريب
وب ترابها تقشع مسكر بابها
استغفر النّهدِه ونخّ بوس ترابها



قول شعر راقي يا سليمان او ما بقى غني معك


ألشاعر سليمان طراد
أمي وأمك..مين قلّك يا فطين
ما سافرو بطيّارة الفيها حنين
لوما التراب يشدّهن والزكريات
كانو ورا احلامهن والأمنيات
هجروا...وما سألوا..بس هني مؤمنين

وهلق انت...!!كلما بتعمل أمسيات..؟
بتضل واقف مطرحك ..حاني الجبين

يمّا بتترك صفنتك تشرد سنين

Saed Abou Zour
سافِر يا طفل الطّيش ع بلاد الغروب
وتشرّدوا أنت ومشاوير الضَّياع
و كبّ الهويِه وظل من جلدَك طلاع
وعَ سيرة الشعر المحبّر بالقلوب
مهما تسافر صفنتَك خلف الهبوب
الكلمه عَ راس السطر بتقلّك رجاع
ريحة الموت مغمّسه بصوت الوداع

ألشاعر سليمان طراد
مسافر انا وأحلام مش ممكن تبوخ
مهما بسما الألهام علّو وحلّقوا
بفرجيك.. يا بو الزور بكفوفي الفسوخ
تا بعد منها عا الهجر ما تعلّقو
نحنا رفضنا الذل ورفضنا الرضوخ
واحلامنا عا جبال هم تسلّقو
وشلوشنا بترابنا بيتعلّقوا
لما الجزع بيطلّق دموع الصموخ

بهجّر حنيني من الوطن وبطلّقو


Saed Abou Zour
شو آخذك عَ أرض حامض كاسها
جَلغَم ضميرو الوقت لمّا باسها
خليك شجرة خالدِه سيوفك رموش
شبّاك مجدَك شِقّ ع رديف الدّغوش
لمّا بوداع الأرض بتفلّ الشلوش
عيبي على الأغصان ترفع راسها

ألشاعر سليمان طراد
ألشاعر سليمان طراد
يا بو الزور الشعر مش إدراك
ولا غيم منو طالعه الدخنه
الشعر تفتح عا السما شبّاك
الشعر كلمه من القلب سخنه

الشعر بيشرقط بلا اسلاك
الشعر مش رشتا ولا يخني
الشعر كلمه بتنخر الأفلاك
وجسر قلعه معملقه ..تخني

قصيده
بحر الزجل

الشعر مش عا نول عادي انحاك
مغزول .عا الإبداع دودخني
الشعر فكر مشيطن النسّاك
وعن عيلتي بالزور سالخني

يا سعيد الحظ .ديك فراك
حطوك ضدي الدهر بردخني
ويا شعر شو معذّب انا وياك
ان قصّرت ما بقبل توبّخني

الله نفخ بتراب ناس سماك
آدم وحوا.وليش ينسخني
عنهن ما زال بجنتو ملّاك
من هيك يا بو الزور بطلب رب
عا جناح أرز الرب ينفخني


سعيد

Saed Abou Zour
Saed Abou Zour
سليمان من قلبي ما سَفّرتَك
ولا فلّت من البال باخرتَك
شفت روحَك عاشقه الترحال
كعيت وانا ردّك عَ ذاكرتَك
شفتك نسيم تزين ب موّال
رجعت الصدى المارق ع قنطَرتك
شفتك الشرده الطالعه من البال
بحبر القصيده رجعت ذكّرتك
سافرت من ارضك ع ارض المال
اياك تنسى هون آخرتك
بدك غصيبِه ترد حالك حال
وتعزم على البخّور مبخرتك
معقول انك هيك هادي البال
وراهنت بالغربه على كرتك
بكرا الفنى لو عا جروحك مال
وذابو بغيابك اهلك ومرتك
كل الدني والحلم والآمال
مش قد جفن زغير عم يبكي
بارض الوطن ع تراب مقبرتك

مع اني قلتلك ما رح رد ختاميه لاني متفق انا وياك بلا ختاميات بس ما فيي زعلك


بحر الزجل قصيد


ألشاعر سليمان طراد
ألشاعر سليمان طراد
يا بو الزور بحكم معرفتي
لا راهب بيمنع ولا مفتي
تلفتت صوبي بالشعر صفيّت
سافر مع الدهشه ومع اللفته

شفتك أرز بشلوحك تهديّت
تا يروق فيي جنون عاصفتي
روّضت أعصابي القلب هديّت
وبعين عقلي لجمت عاطفتي

ما كان بدي هاجر من البيت
لوما بدموعي غسلت منشفتي
ولولا الفقر ولآخ والليا ريت
ما في ولا بسمه فارقت شفتي

لا تظّنّي بقدر الوطن حطيّت
يمّي عليي من الحرب خفتي
بحلف عند ما سمعت أولبريت.!
بوضع الوطن غيّرت فلسفتي

يا بلادنا المن ظلمها عانيت
الفرق بين الناس ما شفتي
في ناس بسمنه وناس بزيت
يا ريت كنتي الكل أنصفتي

غامرت .. ما غرّرت.. ما انغرّيت
ولما بنجاحي قتلت عجرفتي
من هيك عشت بغربتي وبنيت
ولو ضلّ عايش بالوطن ضليّت
لاحق زعيمي وأهل طايفتي

استفزيتني


Saed Abou Zour
Saed Abou Zour
سليمان عن بستانَك المسحور
شيل السياج بيسرح الدبّور
مش حلّ تترك ضحكِة البستان
...غصّة بلا نحل وبلا ناطور
سفِّر الذكرى بيرجع النسيان
يفيّق صدى تذكارَك المقهور
سفّر الشمس وهجّر الالوان
وخلّي العتم يلْطي عَ باب السّور
بترجَعلَك من الليل بالفستان
ترقص على مراية صباح النور
سَفّر الغَيمِه بْ عَبسِة الدخان
بتبقى جنينِة أمنياتَك بور
سفِّر القطبِه بتنزع الخيطان
سفّر الوعد بيوقع المحضور
تخايل عَ مذبح نذرَك الشعلان
مافي شمع منّو العذاب يثور
شو بينفعك نذرك الأخرَس كان
لوما على المذبح شمع منذور
سفّر الصّبر بيقلق الإيمان
سفّر العدل بيخوت الدستور
معليش لازم قول يا سليمان
يا بحر صار بغربتو محشور
مش عذر تتكبر على لبنان
وتمضي بموجاتك شهايد زور
لبنان يا سليمان للأنسان
ريحة عذابو بتشبه البخّور
لبنان مهما تعربَس الميزان
ولَبّس المَعبَد عيبِة الماخور
بيظل شطّو للهوى دوزان
وعرس السّما ب كبّايتو معصور
من هيك ت يظل اللقا حليان
وبَسمة المينا تكشّح الديجور
ما بيفرح ترابو ولا بينصان
الا ما ضلع الشط يتشرّع
ويشلح الغربِه ويغمر البابور

لك يخرب بيتك جبرتني رد



بحر الزجل


ألشاعر سليمان طراد
ألشاعر سليمان طراد
يا بستان الشعر يا قرص محلي
قَبل ما تشرّن ..ويا سنين محلي
قبل ما تشمتي ذبلت زهورك
أنا ما ببخل بعطري عا نحلة

ويا بو الزور قلّي جيت زورك
من البستان مستحلي اسمحلي
بشيل السور تا ارضي غرورك
وأوعى تقول قلبو ما فتحلي

ويا بستان العكتف الغيم سورك
كلما للعتم بتقول زحلي
يا وج الصبح ما بيشع نورك
لوما العتم عامل كان رحلي

يا بستان الكلام ال ع تمورك
اتكّل موسم قصيدك لا تنحلي
تا فيك تدوقها سفّر شعورك
حتى يا قوافي الشعر تحلي

وعا رمل الوهم يا باني قصورك
لا تزرع وردك على أرض ضحلة
السفر موج ببحر مصدر سرورك
وع جفني الجاذبييي متل كحلي

انا مركب تواضع من بحورك
ضميري ضل خاطي ما سمحلي
هجرتك تا صرت ابعد شرورك
وعملتلك بجنّة ذوق رحله

لقيتك يا جزع ملهي بقشورك
وباقي متل ما عرفتك ..اشرحلي
النبي جبران انكح من طيورك
سافر بالنبي وصدري شرحلي

ونبي الاسلام هاجر تا أمورك
يسّر بعد ما وصّى النجاشي
حديثو وقت ما بتفهم اشرحلي