حوار الكيس شادي موسى وبحر الزجل

حوار تاريخي مع بو مياس بعد الختام ناطرين صوت وصوره

الشاعر شادي موسى
Moderador · 27 de enero

ضمير الحج صاحي..
.....................
ياطراد ..تا احكي ضميري واستريح
منك مليح ..وسيطك وفعلك قبيح
مبارح سألت الحج عنك ياطراد
وللصبح ضلو عليك يحكي بالمليح
......................
يلااااا تشتك تشتك

ألشاعر سليمان طراد

بتعرف يا بو مياس لو فاق المدير
كان شحطك او الردات انتقد
مين قال انو الحج ما عندو ضمير
عندو ضمير وبس وجدانو فقد

الشاعر شادي موسى

عدنان بيوافق معي بهالملتقى
إنك انت والحج لعبةت عنزقة
منلقيك ..لما نشوف وجدانو ب ضَيَاع
وبتضيع لما نشوف وجدانو التق

ألشاعر سليمان طراد
عا مين عم ترمي الغلط يا منطفي
ما الحج حج وصار رب المعرفه
بس الما قادر افهمو يوم اللقا
لما بيطل الحج ليش بتختفي
هههههههععع

الشاعر شادي موسى
مش كل "حجي " ..للطهارة منصرفو !
ومش كل شي " سليمان " ..حكمة بموقفو !
ومأكدة عالمرج لو طل الغراب
كل الشوادي ال عالغصون ..بيختفو

ألشاعر سليمان طراد
من وين ها الهفوات دخلك عم تجيب
وعارف انت بالحج ما عندك نصيب
الشيطان والابليس بدن يختفوا
لما عا وجي برسم اشارة صليب

الشاعر شادي موسى

قلبي الجمع بكنيستو زوّادتو
بيسألك تايقنعك عا عادتو
كم خوري بيرسم إشارةت صليب
وابليس عم يلعب تحت لبّادتو ؟!

ألشاعر سليمان طراد
لما بتحكي بلا أدب عن أبهات
بتكون عم تقصد يا شادي أب هات
بس الحمل عا كتاف جلجلتو الصليب
بيحمل هموم الناس عا دروب الحياة

الشاعر شادي موسى

الظاهر ما عم تفهم انت او منحشر
كلشي إلو نوعين بالدنيا انتشر
اللص ال عاذات الجلجلة حامل صليب
قول ! شو حامل من هموم البشر؟

ألشاعر سليمان طراد

لص اليمين تحمّل وذنبو انغفر
ولص الشمال بيشبهك جن وكفر
وهيك الأوادم بالطوائف عاملين
عا كتافهن صلبان شنتات السفر

الشاعر شادي موسى

ال حملو " شناتي " وسافرو ببحر انطوا
فيها وطن مصلوب وبنارو انكوى !
احكيلي على الصلْبو وطنا وسافرو
وحملو شناتي بالهوى ل شم الهوى !!

ألشاعر سليمان طراد
الصلبوا الوطن عا خشاب مسمرها الهوا
غير اللي ماتوا بس تا يجيبوا الدوا
يلي بيحمل كيس تا يفيد البشر
غير العا كيس الناس بيشم الهوى

الشاعر شادي موسى

مش كل حامل كيس... كامل بالحواس
وبيفيد ناس تهدم عليها الاساس !
تفلسف وقلي كيف عم بيفيدها
يلي حمل هالناس جوات الكياس ؟

ألشاعر سليمان طراد
ما زال مش قابض تمن حريّتك
ما فيك تهجي ناس دفعوا جنيّتك
صينيّة القدّاس كيس المؤمنين
بتحط فيها ..قد ثروة نيّتك

الشاعر شادي موسى

مابريد " فلس الارملة " بإحساسها
اتقلّدو بكنيستي وقدّاسها
ولا بريد فيها حط ..تا ما ضل شوف
رجال الكنيسة عم تعبي كياسها !!

ألشاعر سليمان طراد
رجال الكنيسه..خوارني وفقرا..حرام..!!
لا تهينهن احكي يا شادي بأحترام
رهبّانا اللي استشهدوا ودفعوا التمن
من كيسهن ..وبكيسهن ما في حرام

الشاعر شادي موسى

لِ استشهدو ..مش تضحية لشعبي الحزين
دفعو تمن انهن ل الله رجال دين
وبطركهن الراكب " بي إم " مفيّمة
من كيس الله جابها ؟ او كيس مين ؟

ألشاعر سليمان طراد
خطاب الشهير مطارنتنا اللي اكتفا
الأصبع يحطوا عا الجرح حتى الشفا
سيّارة البطرك الأنتي شفتها
هي تقدمه من كياس اصحاب الوفا

الشاعر شادي موسى
ها " التقدمة " للرب ..ندر ... من الشفا
لكن لغيرو ..." برطلة " إلها صِفا
والبطرك ال بالوجه اخد برطلة
الله بيعلم شو بياخد بالقفا !!

ألشاعر سليمان طراد
البطرك يا شادي بيحترم دستورنا
وقونة قداسه معلّقه عا صدورنا
كياس الأعاشه انسرقت وبحضورنا
اهربنا من الأوطان خلف بحورنا
والبرطله كلما سفير يزورنا
بيتدخل بأمن الوطن وأمورنا
يا ريت عنّا كياس بتساع الوطن
تا نحملو ونفل فوق ضهورنا

الشاعر شادي موسى

حمول الوطن ذكرى على كتاف الغياب
مش ناقصو يتفرفط بباقي الجناب !

الجولان راح بكيس... مجهول الحساب
واسكندرون بكيس... ربطةت انتداب
وللخلافة كيس... من دجلة انساب
وتاريخ تدمر كيس مدري وين غاب
تاصار متغرب على تراب المصاب
بكياس خشةت صوتها بعتم الجياب
لاتنقلو من اغتراب لاغتراب
وتحملو بكياس وتهرّو عذاب
كترت ما منها هرهر تراب الوطن
خايف مايبقى من الوطن قفةت تراب !!

ألشاعر سليمان طراد
كياس الوطن وكياسنا ورفاع كاس
تا نصير نبرم وين ضيعنا الحماس
ياما جمعنا كياس عا خطوط التماس
تا راح منا العمر خوف والتباس
جمعنا مصاري بالوطن للاحتراس
ومن خوفنا عا ولادنا كان الاساس
ومن كتر ما جمعنا كياس بها الوطن
تا نجيب كيس الدم فضينا الكياس

الشاعر شادي موسى
كياس الوطن..ل ذكرتها بمتراسها
بذات الكياس تمترست أنجاسها

رجال السياسة اللي طمعها ساسها
تكيّس مصاري وتدعي افلاسها
بكيس الحشيش تضل تشغل راسها
للناس تا تخدّر وعي انفاسها
وخبّت كياس طحين جوّع ناسها
وماوفّرت دم الغلي باحساسها
متل المصاري سرقت الدم الغلي
وصارت ب " بنك الدم " تحشي كياسها

ألشاعر سليمان طراد
كياس الفقير بتنتلي بمال الغني
ومن كيسنا عم ندفع العيش الهني
وشوف الفضا مشنشل كياس ملوني
نجوم المجرّه الحاملي النور السني
وتا خبّرك عا كياس عالم مؤمني
أمك وأمي الكفهن تعب وجني
كيسة اللبنه الروبّوها أهلنا
بتسوا كياس الكون وكنوز الدني