فادي فياض بحر الزجل ثوره وفوره

بحر الزجل
اشتقنا ل بو ملك
يا بو ملك ..مشتاق ابعتلك سلام
ع جناح طير الشوق وجناح الحمام
انتي وانا اصحاب من عشرين عام
لا كنت نام ولا كنت انتي تنام
شعر وتحدي مضحك ونتفة غرام
اعطيك بالقنطار وتردن غرام
تركتك شي خمس سنين تنهي الجامعه
وراجع تا امضي شهادتك ..جيب القلام
فادي فياض
عالنت لما يا بحر فتحت عين
بحرك غنيتو بدفق فياض اليدين
ومني عا برحليون صارو زيارتين
ولليوم عا بشتفين ما رديت دين
وبيناتنا مش بس جولة وجولتين
وبيشهدوا علينا شوادي الموقعين
ومن عادتي تا صون ذوق المنبرين
قنطار تقل الدم ردو وقيتين....
صاروا شهاداتي بيملوا ساحتين
وصعبي شهادة نسر يمضي البوحنين
شهادة ولادة وبعدها شهادة وفاة
بيطلع الك بالعمر بس شهادتين
بحر الزجل
رجنا انا وعدنان عا مطعم /سما/
الباروك ..قلنا بناخدك عا ها الحما
دقيّت... وحكيتك..! تزكّر إنمّا
تحججت في عندك زياره للحما
ههههههههه
عا كل حال بوقتها كنا كما
بيسرق الوقت.. وحابب يشوف السما
انشالله بتجي الإيام ..ويعم السلام
بركي يا فادي بناخدك عا سينما
هههههههههههههههههههه
فادي فياض
اكتب شعر من روعتو يوعى الفنا
وشيلك من التنكيت يا بحر الضنا
عطيتك دهب اتقل عيار من الغنى
بسوق الدهب جايي تبيع الكستنا
وانت وانا وعدنان انوار السنا
وعالسينما ان رحنا بجد واعتنى
عدنان هوي المنتج بيطلع اكيد
وانت الفيلم بتكون والمخرج انا
ألشاعر سليمان طراد
عم تنتقدني بالمزح..! ميـن الحكي!
وين الجريمه ...حاج تلعب عا الحكي
بحب القصيده تكون بسمه مضحكي
شبعنا بوطنا حزن ..ودموع وبكي..
ما زال مخرج صرت لا بق تشتكي
لبنّان فيلمك ..والمصيبه يا زكي
محطّاتنا عا البطل عم يتنافسو
التسويق بين الأيرني والأتركي
هههههههههههههههههه
فادي فياض
لبنان فيلم العز وخلود الضمير
وغير هيك يا بحر الزجل مش رح يصير
انتج فصولو الأرز والتلج الغزير
والاخرجو جبران ونعيمي القدير
وفيروز مع نصري ومع الصافي الشهير
أبطال هالفلم ال صبح وضعو خطير
جايي جنون الإيرني الضاغط كتير
ومتلو الجنون الاتركي يغير مصير
لكن ابن لبنان لو عايش فقير
بيرفض المس بفلم لبنان الكبير
وبدو شهر تشرين يقضي عالعدا
بثورة شعب رح تكتب الفصل الاخير
بحر الزجل سليمان طراد
لا تنتخي بثورات دعم الخارجي
بتنصاب بالصدمه بظروف المحرجي
شو ها الشعارات الغريبه المزعجي
مجرم ..حرامي...انتهازي..وبلطجي
لا منهجك رح يسمح ولا منهجي
في اصول حتى مع عدو المنهجي
من جهتي بخجل بثورات الشعوب
التمويلها من غير موطن عم يجي
فادي فياض
عطيني شي ثورة شعوبها بيتمولوا
حتى بكحل الأجنبي يتكحلو
بتونس بثورة بو عزيزي تماثلوا
مشعل الثورة بجسم عاري شعلو
وعن مصر عن ام الدني الكون اسألو
ميدان تحرير لمبارك نزلو
وشوف بسوريا والعراق تدخلوا
كل المحاور تا الحصص يتعادلوا
بلبنان في ثورة شعب عم تاكلو
ذياب الحكم حق الدوا مش حاملو
بترضى الضحيي وما رضي جلادها
احني لثورة شعبك وصلي الو
بحر الزجل
يا خجلة الثوّار ..من تديّنها
بها الرد يا فادي انت بتدينها
ثورة سوريا ضاعت عناوينها
واللي دعمها كان حارق دينها
وثورة مصر من وين جابو طحينها
تا تأخونت ..وتساهم بتخوينها
وقلّي بجبل لبنان ثورات الجياع
مين اللي موّل طانيوس شاهينها


فادي فياض

شو باك ما بعلمي في عندك موهبة
صاير خلف اصبع رفيع بتختبي
مش كل حر بيقبض من الأجنبي
تا ينتفض عالذل اعقل يا صبي
مين اللي مول بالهند غاندي الأبي
ومول ميرابو القال يا فرنسا اغضبي
الثورة رفض اخضاع من كافر غبي
فيها ابتدا الفادي ونبينا اليعربي
مين اللي مول ثورة الفادي المسيح
ومول الثورة ألقادها طه النبي


ألشاعر سليمان طراد

تركلي الاسامي.. وشوف سوريا وفيق
الاوطان ما بتتحرر بكتر الزعيق
لبنان صار مطو أف ومشهد دقيق
وكل دوله بتركض بتدعم فريق
يعني..البيصرخ جوع..وبيلبس عقيق
كيف بدك اقتنع ثاير عتيق
يلي بيركب رنج وبيحرق بلد
ما عاد ثوري بينحسب قاطع طريق


فادي فياض

ثورة شهر تشرين ضد الارتهان
مين اللي طيفها سوا حاكم جبان
وعقلك ان كنو اكبر من الكشتبان
بيفهم بانو الفرس حد الأمركان
حتى مصالحهن بقي الها ضمان
قوو الزعيم فلان عا خييو فلان
وراحت عاهالشعب الفقد أمن وأمان
وذل البطالة لبس جبينو الهوان
في ست زعما بدون دعم الخارجي
كان الشعب شطب عليهن من زمان

ألشاعر سليمان طراد
ختام
ي ثوري لا تفاوض عا الهويه
وتجلد ذاتك وتعمل ضحيه
تأمّل بوطنا كيف صاير
رديّتو لعصر الجاهليه
يا فادي ثورتك ثورة عشاير
انحقنت بالحقد والعنصريه
وعلى قوّادها علق غباير
من نسمات دوله اجنبيه
انت بتقول انك شعب ثاير
عا طبقه فاسده.. بلا طائفيه
واذا بتلمح زعيمك تا تساير
دربو بتفتحو وبطيب نيه
على كل حال يا مسخّر ضماير
انا ما بصدّقك مني وعليي
لأنك عا الشحاده صرت داير
تنقل من سفاره ل قنصليه
يا راكب رينج ومعصب وطاير
تطالب بالحقوق الشعبويه
قلي منين يا بو دم فاير
الثروه جمعتها ...من كيس بيي
سبعه آب ثوره وكل ثاير
انرش كتير بخراطيم ميي
وما حمل سلاح ما سكّر دواير
تا بقيت ثورتو بيضا ونقيي
وبساحات الحراك بكل داير
المسنه نزّلوها والصبيه
تا يجتمعو على لف السكاير
وعلى الشاشات ينعرضو سويي
ولأنو المفتن بيبعت اشاير
وعدكن بالدعم عن سوء نيي
وقسّم شرقنا متل الفطاير
وهجّر شعب سوريا الابيه
وعمل بمصرنا ثورة يناير
والإخوان وصلّهن مطيي
وعلى شعب العراق بحقد غاير
فتح جبهات حرب جهنميي
قوي تمدح الثوره بالجزاير
وناسي شو جرى بالاشرفيي
اعترف انو الغرب للشرق عاير
تياب مفصله من الفضويي
وانا من جهتّي بلبس ذخاير
ضد التفرقه وضد الأذيّه
لكن في هدف عندي مغاير
عن الثّوار ..ما بيع القضيه
وفلسطين بتضل القضيه
فادي فياض
icono de la insignia
بلادي العالمصالح قسموها
مش ابناءها اللي دمروها
كرامتها بتنزف معنويي
من سيوف الدمى العم يحكموها
عا ثورة شهر تشرين الأبيي
في طفلة وعود حرة نزلوها
حملت لون ورد المزهريي
تا تلون سنين الكبروها
وبنيترات الامونيوم من عشيي
لما الضبضبوها فجروها
البراءة والحلم راحوا ضحيي
بأشلاء الضحايا اللملموها
ولا حاكم حس عا دمو شويي
اعتذر من امها ولوعة ابوها
بمار مخايل وبالأشرفيي
استحي من إم ثكلى هجروها
وشباب البالصفوف الجامعيي
لأنوبالبطالة عطلوها
نزلوا يطالبوا بحل القضيي
برصاص وقنابل جاوبوها
وقضاء العدل صفا مسرحيي
لأنو للوقايع زوروها
ولوما حضرتك قابض شويي
فضحت دياب ارضي الهشموها
متل بعض الصحافيي الغبيي
الصور أهل الزعامي لمعوها
ومع حسابات برا مصرفيي
المليارات منا جمّعوها
مين الجاب دولة اجنبيي
سوى زعما الكرسي سخروها
واحد منتمي للفارسيي
تا ايرنة النظام يعمموها
وواحد منتمي للأميركيي
لقوانيننا تا يأمركوها
وواحد منتمي للسعوديي
تا ارزة وطنا يسعودوها
وحتى يخنقوا الثورة القويي
صاروا كل ساحة يخرقوها
وهيكي بكل دولة يعربيي
ذات الأسطواني بيلعبوها
وبزرع التفرقة والطائفيي
تيجان وكراسي بيحصدوها
وبفلسطين هالأرض الوفيي
الياما وعود صفرا شبعوها
بعدو شعبها حامل قضيي
ومقاوم بالحجر تا يرجعوها
بس الحاكمين بسوء نيي
نشالله حد كوشنير المصهين
قضية قدسنا ما يضيعوها