عدنان سعيد والبحر غنا وفقر

وحدو محكشوووووون الارض بيقدر يهز شعور خيينا الملك عدنان
حوار مهضوم كتير بين ملوك الارتجالي ألشاعر سليمان طراد و Adnan R. Saeed
وب قول سليمان
اووف اووف
التاج موجود بس الملك وين
يا شعر بدي بس اتفقد وشوف
عدنان كيفو طمّنوني بهالظروف
صرلي شي شهر ونص مش قاري إلو
معقول متلي بطّل يجمع حروف
عدنان
كنت بغيابي ناطر رفوف الأجل
حتى زهقت و عملت فرّان الدجل
عجنت الهوا و قرّصت غيم المرتجل
و شلحتها بالجو تمشي بلا وَجل
و هلّيت غيمه دف صارت عا عجل
و غيمه تخبّي منبر الصابو خجل
و غيمه تشتّي شعر تا طافو النهور
و عملو بحر معروف بِ بحر الزجل
سليمان
مرشة حياتك ما بقا تقذف حمام
ولا عدت قادر بالسما تطيرحمام
ختيرت وتأخرت تا تضرب فرام
وبعدك متل ما بعرفك عالي المقام
نهار السبت بتروح تسهر مع سهام
ويوم الأحد بتروح ترقص مع هيام
واللي بيشفع فيك بتحب الصلا
لكن بدين الحب ما بتعرف صيام
الزوده
ما زال عمري داخل الخمسين عام
يا عمر حاجي من زماني انتقام
عدنان
بسبت و أحد تا نارنا تغلي غلي
كنّا نروح نبوس إيد الصيدلي
و ندفع مصاري تا نخلّي المرجلي
تجنّن البنت الناعمه و الأرملي
و اليوم عم إبكي عا ماضي الهوشلي
و عا آخره عملت لقلبي مشكلي
و لمّا قلت رح صوم عن شم الهوا
الكانو إلي يا بحر ما عادو إلي
الزوده
رح زيدها تا يفرفح محمد علي
و تا جان شوفو كيّف و صوتو عِلي
و تا قول للبحر و ربيعو المخملي
والله اشتقنا للشعر و الترغلي
سليمان
الكانو الي الكانو إلك ما بسألك
بعرف جنونك بس بجهل مشكلك
اللي جننك هوّي بزاتو العقلّك
وقلك كفاك جنون اعقل يا ملك
بتعرف البحر بيفهم بعلم الفلك
لو الكل كفلك بالسما ما بكفلك
هههه
حتى اذا بتروح بالجنه تنام
بتخت السما التوب العا جسمك مش إلك
ههههههههههههههههههههههههههههههههههههه
سامحنا يا بو عيد
ههههههههههههههههههه
عدنان
يا غبن ما الخيّاط بِ ثوبي اعتنا
و عارف آخرتو مجعلك بتخت الهنا
ثوبي جسد و الروح تا تنال المنى
دابت بِ روز و سوسن و ليلى و رنا
و من بعد ما تحمّلت آلام و ضنا
و عرفت بيتي البالسما الله بنا
كبّيت ثوب الروح بتراب الفنا
و وصلت عا باب السما من دون عَـنا
وعا قد ما فيي تأهّل ربّنا
بلا مواخذي ما عرفت حالي مين انا
سليمان
يا بو جسد عرقان حاجي مشوره
عا بساط حلم العاطفه والفرفره
عامل ملاك الحب..؟قلي يا ترى..!
يأيّا تخت بتحب سرك ينقرا
ههههه
زرت السما والرب رب المقدره
سألتو شو بدك تا تنال المغفره
قلّك تا اغفر ذنبك وترجع تتوب
لازم تنام بتخت ما بيعرف مرا
ههههههههههههه
عدنان
تخوت السما توابيت ما بتهمّني
و ما بيشبهو تخوت الدني البتحبّني
فوق الحواري العند الله مؤمني
و ما بيفهمو بدلق الندي و الشيطني
يعني يا الله يا إله السلطني
ان حبّيت فيي و بحياتي تعتني
خلّي لكل الناس نسوان السما
و راضي أنا بتلتين نسوان الدني
سليمان
يا ريت كانت فرشتك مدة حصير.
وحرام عشقك عاصفه او زمهرير...
كنت ارتحت من زيزقة هاك السرير
وارتحت من ريش النواعم والحرير
ههههه
كنا اقتنعنا وكل ها الجمع الغفير
انك بترضى بالقليل من الكتير
بنصدقك راضي بنسوان الدني
لما بنعمة ربنا بيرضى الففير
ههههه
عدنان
فقر الجرس ما بينزع الصوت الشهير
و النحل من فقرو اغتنى جوع القفير
و من جهتي راضي بفقري للأخير
و بنعمة الرب الغناني بالضمير
تا صرت شوفك يا بحر شاعر كبير
وما خسرت مرّه بيشهد الجمع الغفير
و غير شكل عنّي بخسر قبال الحرير
الما بيقبل يفلفش جمالو عالحصير
تا صار فقري بيشبه ثياب المرا
و جوعي ما يشبع غير من لبس القصير
سليمان
بالعمر فقر الدم بيسبب وجاع
وفقر العقل بيعودك عا الإنصياع
لما ابتدو اسعارنا بالارتفاع
حس الفقير ..خطيتو تبهدل وجاع
شوف بوطنا الناس عاشت بالضياع
لا بالمدن عم تشبع ولا بالضياع
موجة غلا الأسعار كسرت ضهرنا
هلق فهمنا....!!الفقر جنزير السباع
عدنان قصيد ختام
انا شاعر فقير خسرت جاهي
و عا تمّي حرّمو أكل المشاهي
و سرقو كنز عمري الما دقرتو
بغفله عن ذكايي و انتباهي
و صرت راعي بيحلمس عا بقرتو
تا منها يشيل قوتو بعزم واهي
و بعد ما كنت للفقر احتقرتو
صرت البحص فوق النار طاهي
و بعد ما العشق عا تختي احتكرتو
و جبت نسوان من أفخم مقاهي
صرت فتّش بِ شي مرعى نكرتو
على شي راعيه تشعر بِ آهي
و انت يا مجرم النبعي عكرتو
صرت نيرون بِ غدرك تضاهي
و رحت دستورنا تزوّر فقرتو
حتى الشعب حرّمتو الملاهي
و حنيتو و صارت تزيزق فقرتو
بفعل ما بتعملو الروس الدواهي
و بحقدك و بظلم قلبك فقرتو
تا صفّا للملح مضطر يشحد
إلهي ينتقم منّك إلهي
سليمان قصيد ختام
أووف أووف
انا زنكيل وجيابي وقاري
وما بعطي ل غير مالي اعتباري
فتح كفّي السخي ما عاد سكّر
كتر ما صارف بعمري مصاري
انا يا بــو بهــاء بحب اسهر
ع عد المال تا يطلع نهاري.
هههههه
واذا بتفيق مرتي بجن اكتر
ما بدي تشوف ديناري ودولاري
هههههههه
انا ربّي الغنا وكنز المجوهر
ما بؤمن يالدفا بتوب لعياري
لأني بخاف يوما مـــا افقر
صرت بها الزمن قطّب كماري
انا بالحب قلبي متل بيدر
كريــم وبالغنا فالش بداري
ولأني كنت ببلادي مشحّر
لحقت القرش والهجره خياري
ولأنو غربتي كانت معسكر
جمعت بها العمر غلّه مساري
فرحت بثروتي وبلشت اكبر
وحتى المال نسّاني شحاري
وبايام الفقر بيي المعتر
كان يروح يشقا بالبراري
وما كان بيتنا رز ولا سكر
وعندي اليوم gran center تجاري
يا عدنان صار الوضع اخطر
بغابه كلها وحوش وضواري
الشعب رح يرجع.يشوبش لزنهر
ولا بالحلم رح يركب فيراري
وانا بفنزولا كنت احزر
التشاؤم ما دخل عتبة دياري
الفقر بيترك دماغك مسكر
الغنا بيفتّح عيونك يا جاري
الفقر ببلادنا غابات صحّر
وشوّه وجه لبنان الحضاري
وكتر المال بالبيداء شجّر
وقطعه من السما صارو الصحاري
وبردك متل نواب المظفر
عم تدافع عن الفقر وما داري
سمعت شو قال حيدرنا الموقر
الفقر غربه بوطن بايع وشاري
غنا الغربه وطن تاني بمهجر
ان ما كنت مصدق بتسأل زغاري
ما بدن يرجعو عا بلاد افقر
ما فيها كهربا وصرف ومجاري
ولاني شاعر وفكري مجوهر
عندي مال وقصور وجواري
اذا بتخرب الدنيا او بتعمر
ما برجع للفقر ..تفنا الخليقه
وما ينبت عشب بعدك يا حماري
وجهة نظر يا شباب للحوار حكمتني دافع عنها