رجا يونس وبحر الزجل التتطرف والدمقراطيه

.
سليمان
سلمان وبنك روح حاور ه العجوز
ودشر الي يونس  تا احرقلو الفيوز
يجوز يحكم طالباني شرقنا
يما وطنا يا رجا.. او لا يجوز
رجا
يا طراد يا فتنة شعر ومآمرة
رح جاوبك حتى تبطل بهورة
بشرق الأصالة لو بيحكم طالبان
حبال التخلف رح تشدك لَ ورا
سليمان
تركلي التتطرف والتتطرف ملعبي
وجيبو على لبنان يحكم ي صبي
التنكيل والإذلال منو مطلبي
ولا داعشي يحكم وطنا وطالبي
يلّي بحضن الدمقراطيه ربي
شو جاب إلنا غير حكم الأجنبي
من هيك بدي حكم صارم يا رجا
ما يترك طرابيش تحكم أو عبي
رجا
يا ريت ماتت كلمتك عا تمها
ولا حكيت كلمة تقيل متلك دمها
تتعود أمتنا العظيمة تلمها
مش بالتطرف فيك تجلي همها
الوردة المفيها عطور اوعى تشمها
وناس الحكمها الجهل ضلك ذمها
وأفعى اذا ربيتها ببيتك سنين
جايك يوم بتنقتل من سمها
سليمان
يا ريتني ما سمعت منك ه الكلام
ولا حكيت ها الجمله ت وجّهلك ملام
ت تعود أمتنا ..!! عظيمه  .يا سلام
متل الكأنو واعدينك بالسلام
ها الشرق صرلن حاكمينو  ألف عام
وبعدو لهلق ..لا عداله ولا نظام
سم الأفاعي نشربو اشرفلنا
ولا يحكمو عا ولادنا ولاد الحرام
رجا
سليمان يابن طراد فتّح عينتيك
سكران يمكن انت حتى حكيت هيك
شو نسيت عبد الناصر الخلاك بيك
وناسي فؤاد شهاب علا جانحيك  
ونسيت شمعون اللي خلى منكبيك
يطالو السما والكون يركض ركض ليك
وما شفت الا شبيهك المُلا عمر
يا رب تشبع فيه ومبارك عليك
سليمان
الأوطان لما تفور من جواتها
بتكون عم تعمل الثوره بذاتها
بكابول امريكا رغم غاراتها
طالبان وقّفها عا حد خواتها
تنظيم دوله واضحه نياتها
ومصرّحه لكل الأمم  غاياتها
لكن وطنا مفخخ و يا للأسف
دوله زغيره لصوصها رجالاتها
رجا
حكامنا عم يسرقو رغيف الفقير
بدنا وعي تا نقدر نقرر مصير
شو عاجبك كابول والوضع الخطير
وأوباش خلو الناس عم ترعى الحمير
شفناهن بعرسال بالشوط الأخير
ومتلن بنهر البارد وصيدا كتير
بجيش البطل وبحكمة رجال القرار
ما ضل لا عبسي ولا نصرة ولا أسير
سليمان قصيد
انا انسان مني دبلوماسي
ولا مره اتقنت فن السياسي
انا بحكي الحقيقه وما بساير
حتى ن زعّلت اهلي وناسي
يا بو وليم لا تحكي بالأشاير
حتى ولو كنت صارم وقاسي
وافضح كل فاسد بالدواير
تا نقضي عا نهج دولي اختلاسي
انا مش فوضوي.. انسان ثاير
على حكّام دولتنا بشراسي
ولأنو من الحكم رأيي مغاير
هجرت من الوطن تا ارتاح راسي
ولأني بالوطن شايف شو صاير
وعارف مين كبّدنا المآسي
قبل ما اسكر بوهم الأشاير
ما لازم يغلب عليي حماسي
عنّا يا رجا في شعب داير
على طق الحنك سكر وأماسي
حتى يعيش أمنلو السجاير
وهيدا للأسف همو الأساسي
الثوره مش مناقيش وفطاير
وشتيمه  للرئيس وللرآسي
ولا بونبون زينه عا الصداير
ولا جهال ترقص عا الكراسي
الثوره بدها شباب وختاير
وشعب ما يكون متزّلم سياسي
ما بدها ورد بدها دم فاير
ما بدها ابهه وعالم clase كلاسي
الثوره منها هزة اساور
ولا ترفعلي نخب كاسك وكاسي
الشعب انصاع وتامل بشاير
من العم يلمعو متل النحاسي
اكتشفنا مين بيقرر مصاير
دول عم تسهر ليالي  اماسي
بدهن ها البلد بالون طاير
يغرق بالماسي و التعاسي
هز الخصر والثوره ضراير
الكره بيناتهن عامل اساسي
الثوره فلسفة وعالم مغاير
وبدها تضحيه وحنكه ودراسه
الجوار بيسخر ومنا وبيعاير
النهب  الي ضرب رقمو القياسي
طلعو عن جد عا المجلس وهاتو
وعلى قصر الشعب حتى بزاتو
وعلى قريطم.. ما قام بوجباتو
يا اولاد الزنا بيكفي خساير
ابن لبنان صار اليوم حاير
بيكفي شرشحه تعبنا وخساسي
والله اللي عمل لبنان جنه
ما بعرف ليش ت لبنان ناسي
رجا قصيد
أوف أوف أوف
يا ابن طراد يا شاعر عصامي
بعرف انت دمك دم حامي
الحقيقة قول وحكي بطيب نية
وعن الشيطان لا تعمل محامي
بعلمي جيت عم تحمل قضية
وحكم طالبان عنو عم تحامي
بلحظة صرت شيخ الثورجية
وعم تسبسب على رجال الزعامي
أنا مش متلك بهالمسرحية
أنا ثابت بخطي والتزامي
أنا قومي عروبي زرعت فيّي
عشق هالأرض تا صارت غرامي
أنا بيروت عشقي ومش خطية
لخليج اليعربي ببعت سلامي
ولشعب المغرب بودي تحية
وما بفرق بين مصري وبين شامي
أنا ما همني من الطائفية
ولا مرة رحت أعطيها علامي
المسيح بقدَسو وأحمد نبيّي
وأبو الحسنين والمهدي إمامي
أنا فلسطين حاضنها بيديّي
تإلنا ترجع بفصل الختامي
ما رح طبّع ولا بيع الهوية
باقي هيك تتقوم القيامي
وتنرجع للبداية بهالعشية
التطرف قلت عنو قدر سامي
بعلمي فيك شيخ الأشبهية
وما علمي صرت شاعر انهزامي
التطرف بينّا أصل البلية
سآل الحاربو بصف الأمامي
بجرد عرسال ذبَح عسكرية
وبتفجيرات خلى الجرح دامي
ورجال الحكم بالدولة العلية
الما خلو شعبنا يعيش بسلامي
بتحكمهن سفارة اجنبية
هني وداعش بنفس الأسامي
وبثورة رقوصة طلعت غبية
بدل ما تشيل عنا هالغمامي
بأحضان السفيرة مرتمية
انشالله تكون عم تفهم كلامي
أنا كفرت بوجودي وبالبقية
وإذا بكفر ما في عليَي ملامي
وما عادت هالقصص تمرق عليّي
لا ثورة ولا زعامي ولا عمايم
فقط بيهمني عيش بكرامي