صفحة التعليق على العركة الزجلية(حسان&شامخ)

بعد المداولات بين اعضاء مجلس الادارة قررنا اخذ اقتراح مشرف قسم الفلسفة و الدين الاب: حنا المحترم
و نقل التعليقات الى هذة الصفحة

Hanna
مشرف قسم الفلسفة

أولاً: نطلب من مدير المنتدى نقل التعليقات إلى صفحة خاصة بها،

لماذا

لنرى ونلتذ بهذه المباراة بين حسان وشامخ، ولا نخفيكم أننا اشتقنا إلى طلة شامخ، له في ميدان الشعر صولات وجولات.
لقد اشتاقت آذاننا إلى كلمتك الرنانة، واشتاق جبيننا أن يشمخ معك في كلمة تنزل على الفؤاد نزول الغيث يسقي تربة عطشت له.
لا بد في طوال غيابك ايها الشاعر الألمعي شامخ تأجج شوقنا لكمة شاعر تهز المشاعر.
وسلام للشاعرين.

المدير العام سليمان طراد

خيي شامخ ما ألك حق حسّان نطرك اكتر من تلات تيّام وانت ما رديّت القانون بيقول اذا الشاعر ما بيرد خلال 24 ساعة بيقدر الشاعر يرد وبتنحسب نقطة لصالحو من هيك بنتمنى عليك تكمل المحاورة والا بنعتبرك انسحبت من العركي وتحياتي
ورائع يا حسّان

شامخ

يا اخ سليمان حضرتك مشرف كبير بمنتدى الزجل اللبناني وعندك محاورات بعدة منتديات و بفتكر اول محاورة عملتها بحياتي كانت مع حضرتك(اكيد ضمن المنتديات) وانت بتعرف منيح القوانيني و الاعراف المتبعة في المنتديات و انا بطلب تحكيم العقلاء بالمنتدى و انا راضي بحكمهن

مدير عام سليمان طراد

يا اخ شامخ ليش عم تهرب من الموضوع الأساسي انتي مشرف قسم القرادة والموشح ليش انتي بدك تتطلع عن القانون الرد 24 ساعة واذا بالكتيري 48 شوف رد الشاعر حسّان من يوم الخميس بعتقد صرلك اكتر من اربع تيام بدون مبرر
مش عزر انك عم تحاور بو زكي كان فيك تقول اعزرني بدي غيب عنك شوي كنا بنقبلها وبعدان ما صار شي رد عا البيتين
مسمحلك حسّان عمل الأصول ورد لمنّي ما شافك رديّت لذلك ننتظر ردك عا الموضوع تحياتي
مدير عام سليمان طراد

emile hanna karam
عضو جديد

بحيي شاعرنا حسان****** عا تهذيبو و اخلاقو
ومدير الندوي سليمان******بو زكي يلاّ لاقو
وما تواسطنا بأبن فلان******وشامخ كفّي ما داقو
راجع عالندوي ندمان*****هالمرة سكتنا عن جد
المرة التانيي في ترجّي

[center]

المدير العام سليمان طراد

حلووووووووووووووووووووووووووووووووووووووووووووووووو يا أميل وينك يا خيي شامخ وين رحت فرجينا مراجلك

elie trad
المدير العام

حلو يا اميل يا ملك و الله طقيت السبع بعرينو وينك يا شامخ يلي عاملي حالك ملك بمملكتك طلاع و فرجينا المراجل

copilo
عضو جديد

مننا من شباب الرخوي +++++ منهجم حتى نتحددَى
الشعر إِصالة مش شهوي +++++ الأبيات البدنا نعددَى
ميل الهمي والنخوي +++++ وشامخ فيها ومن قددى
ولي بيربح يا أخوي +++++ بنعملو دبكة شبان
وع الندا الندا الندا

حلو يا شباب بس بترجى من الشعراء استعمال كلمات اقل خشونة منشان ما تضطر الأدارة تحذف
وخصوصا بين حسّان وشامخ العركي حاميي حلو القسا بس ضمن الأدب
حلووو يا حسان وحلووو يا شامخ انا محتار مع مين الدفي
ساعة بقول حسّان سكت ساعة بقول شامخ غاب نحنا في الأنتظار

سلام

شو حلوي هالقوافي +++++ بعضا عا بعضا بينقاس
بدي قلن عوافي +++++ أرهفتو فينا الاحساس
المعني يا شامخ كافي +++++ ويا محمد عندك أساس
بدي اشرب عالصافي +++++ كاس الحسان الشاعر
واسكر من أشعار الكاس

و الله يا حسان لوما انك فتحت ردي و قافية جديدة ما كنت رديت لان القوافي المستعملة تدل على ضعف الشاعر و عدم خبرته شو هيدي مغنجي و متلجي ايه و الله برمت شي الف و خمسميت منجد و نص و ما كنت لاقي شو معناتها نصيحة اخوية تقنا باختيار القوفي

شامخمعمحبتي

أبو أنطونيوس

والله يا جار عم بتقول حضرتك انك ابن ضيعة ,وحسب معلوماتي انو ابن الضيعة بيعرف تمام المعرفة كلمة غنّوج, وكلمة ثلج, وهو هل الكلمتين من مشتقات الافعال 0 وفهمك كفاية, ولو كان في قاموس للغة العربية الدارجة لكنت شفتن بأم عينك0 انا استعين في بعض الاحيان بالرائد قاموس عربي عربي,على أمل اللقاء من تلة لتلة وخلّي الصدى ال ب لوديان يحكم بيناتنا

مع محبتي أبو أنطونيوس

Hanna
مشرف قسم الفلسفة

إلى الشاعرين العزيزين

بالحقيقة إنكما بتوقفكما عن هذه المحاورة الجميلة و"العركة الشعرية"، قد جعلتمونا نخسر التمتع بأبياتكما الجميلة، أما قاموس اللغة الدارجة فهو موجود يا عزيزي حسان في ذاكرتنا الشعبية الغزيرة، ولا يلام عزيزنا شامخ فربما لم تكن هاتان اللفظتان من مفردات اللهجة العامية في قريته وهذا جائز، ولا أخفيك القول أن الكلمتان صحيحتان، فنحن نقول في كلامنا: " الدني متلجي" اشارة إلى قرب موعد تساقط التلج، ونفهم تشديد جرف الجيم للضرورة الشعرية. كذلك لفظة عنوج.
لا نرى ايها الشاعرين العزيزين هذه القضية مهمة لحرماننا من شعركما الجميل. والدليل على طول باعكما في الشعر اختياركما لقافية صعبة وكلماتها قليلة،
نحن بانتظار عودة الأميرين إلى الحلبة..

لا يترجل الأميرعن جواده ولا يرمي سيفه من يده.

يا حبيب القلب رجعنالك و تفضينالك انا ابن ضيعة ابا عن جد و ست اذا بدك
و هيدي الكلمات يمكن كانت موجدي عند جدودنا و ستاتنا بس كانو يروحو يملوا عن العين بس بالشعر في تلج و غنج و سرج والخ الخ الخ بس المشتقات و حتى و لو فيك بالنثر تحكيهن ما بيستعملو بالمحاورات هودي بتقولن بالضيعة انت و عن بتحطب او انت و عن بتسلق بس بالمنتديات و عالمنابر مش مستحبين كتير

سكر على الموضوع و تحذير للجميع ان القسم المسؤل انا عنه هو للشعر و ليس لنثر و من الان و صاعدا كل الذين يحبون ان يتحفوننا بنثرهم فليتفضلوا الى صفحة التعليق

كل ما يكتب في هذه الصفحة غير الشعر يعتبر محذوف دون مناقشة

شامخمشرفقسمالقرادوالموشحمعمحبتي

لقد اعجبني جدا الموضوع في باب "المشرف بقسمو ملك" وخاصة أنه موضوع مميز وفيه صعوبة " وحك ركاب" تبرز مقدرة الشاعر. وإعتقد أن شاعرنا الكبير شامخ تبنى موضوع "القِصَر"، والشاعر العزيز حسان تبنى موضوع "الطول"- إذا لم أكن مخطأً. لقد قرأينا للشاعر شامخ ردة جميلة مدافعا عن القِصَر هاجيا الطول، ولا نخفيكم أننا ننتظر من الشاعر حسان ردة دفاعية عن الطول يبين لنا فيها حسناته وسيئات القِصَر.

هل أنتم متحمسين مثلي يا شباب لهذا الموضوع الشيق?

كما وأعتقد أيضا أنه يجب أن تكون الموضوعات المتنازع شعريا عليها غير شخصية، والشاعر الفذ هو الذي لا يخرج عن الموضوع.

هيا يا أبطال الشعر جولوا وصولوا، وخليها تكون " تكسير روس" بالشعر بس.

» صفحة التعليق على المحاورة بين شامخ ومحمد الخطيب
» صفحة التعليق بين كامل وأميل حنا كرم
» صفحة التعليق على صفحة "صيف الضيعة"
» صفحة التعليق على الشاعرين جهاد وشامخ
» يا حسان...