يلا يا محمد وينك

أنا مش ضيف لافي يا عنيّي = وَلا قاعِد وبستنّى الصّنيّة
ولا بَدّي تقولولي تفضّل = ع مَسْرَح للجَريمة الشّاعريّة
*** = ***
أنا لمّا الأمِر يحتاج بنزَل = تَ صون الأمنْ .. تا صون الرّعيّة
سوط الحَقّ عا جَنْبي مْجَدّل = وكَلَفْشات القوافي مشتهيّة
*** = ***
بْرَمِت عا كل ضيعة وصِرْت إسأل = مين الناقص شوالو وقيّة
كَمَشْت اليَوم كَم تاجر مبَهْدَل = عَم بيتاجرو بصَنْعة دنيّة
*** = ***
البَعض ع السلّم الخَلْفي تعَرْقَل = وبقي كَم مجرم وفلّو البَقِيّة
ويَ ويل اللي افتَكَر نفسو تمَرْجَل = وعِلِق عَلْقة حياتو بين ديّي
*** = ***
يَ سْليمان كبرك كبر جَحْفَل = مَ عندو سْلاح .. وْلا خطّة ذكيّة
انزويت بمنتدى في رُكْن مهمَل =عَم تْزَعْبِر على غَيْري وعَلَيّي
صِرِت للجامعة شْهادات تِعْمَل = ومَعَك ما في شهادة مَدْرَسيّة
وصِرِت تقطَع هويّة يا مدلّل = و عَ حسْب المَصْلَحَة تحطّ الوصيّة
وإِنِت بدّك هويّة .. تْفوت مَدْخل = قَصْر من السّما أعلى شْوَيّة
*** = ***
يَ ليلى مين تاني ومين أوّل = ما بدها دراسة فلسفيّة
القصيدو مهتري ضارب معطّل = بضَعْفو سَدّ نفس الأبجَديّة
شُ دَورو جَنْب إبداعي المفصّل = الفَرَك في كلّ ليلة راس حيّة
*** = ***
و عَ سيرة منتدى للشّعر مَغْزَل = كان .. وجَرْحَتو الدّكتاتُوريّة
وأنانيّة أكم شاعر تَوَصّل = لإشْرافو بحيلة وسوء نيّة
شاهَدْنا طْيورو عَم بْتِرْحَل = وتترك قَشّها وتترك الميّة
مَ عَم أغتاب في الظّهر ولا بِقْبَل = دَنّي المستوى .. مش هيك هيّي
أنا غيرة على الشّعر المأصّل = عَم بذكر حقايق واقعيّة
*** = ***
وعلي عامر حبيبي بْخاف يِزْعَل = معَزّة كلمتو تِذْكار فيّي
منعمل بالشّعر مليون مَشْكَل = منتصايَح عَلى أصغَر قضيّة
إذا بحكي غَلَبْتو بأيّ مَنْزَل = تحدّي .. والتحدّي معنويّة
رياضيّة أنا روحي ومُنْزَل = علَيّي حُبّ إخواني .. يَ خَيّي !
*** = ***
رجعِت عن قرْب تابَعْت المُسَلْسَل = هالحَلْقة الأخيرة منتهيّة
عَ حالك يا إبن طَرّاد إخْجَل = الشّعِر مش إنتقام مْن البَرِيّة
حكيتلّك أنا بالحَرْب مَعْقَل = هَوني لغم هوني مدفعيّة
استَحْكَمْنا على جيشَك الأهْبَل = وجنودي مْطَوّقينو للمنيّة
بالبْوَيك اللّغم طار و تَفَسْكَل = وأجا الجَنْط بولاية أمريكيّة
*** = ***
وإذا بَحثَك عن الأعماق طَوّل = تتقبل بالزّجَل نبقى سويّة
رَح تضلّك مدى عمرَك بمَعْزَل = وأنا رَح ضَلّ سيد العَبقَريّة
هَوِيّتي للزّجل جزؤه المكمّل = إذا بْتِمضي عَليها اليَوم بدّي
بوِجْهَك مَزّع وْراق الهَوّيّة =

هاتو مِتِل أبياتنا هاتو = يَمّا الجريح بْزيد آهاتو
يا حَرْف طلّ من المَجَرّة نْزال = الإنسان بينوّع برحلاتو
لَ تْضَل مركي فوق عال العال = في ناس هوني عالأرِض ماتو
*** = ***
يا ريت ماتو ميتة العقّال = وعَ فْراش شِعْر ومَوْهبة باتو
انقَبْرو برَمْل المَوت منّو سال = بتهدّ حيل الفيل لَسْعاتو
بتقابلو التّحذير بالإهمال ! = تلقّو جهاد وعُنْف ضَرْباتو
تَع طلّ لمّا عَصّب الزِّلزال = وْ وصْلَت ع برحليون موجاتو
نَزّل جْبال العَنْجَهِيّة رمال = وطَلّع من الرّمل اقتناءاتو
*** = ***
نحنا الصّلابة بشعْرنا راسمال = ودَمّ الزّجَل نحنا كريّاتو
يا علّة اللازملها استئصال = كنّا بوحدة صار عنّا " تو "
*** = ***
بالإرتجال رجال قوّة ومال = وسْلاح مَ بتنشاف طَلْقاتو
قَطّع مسافات الزّمان وقال = خلّو البَيْت يضبّ ستّاتو
وَقْت الزّبالة حضرتك زَبّال = وْوَقْت الأكِل بِتلِمّ سفراتو
ووَقْت الأنا بَدّي بهَيْك مْجال = بَعْطي مَجال تذوق خُبْزاتو
*** = ***
وَيْنَك يَ سَبْع المَرْجلة الرّئبال = صِنْفَك غَريبة كتير صَفْناتو
نِحْنا سْباع الجبن منها انشال = الواحد بترعِب جَيْش زَأراتو
ياما نَحَر باب العَرين جْمال = ووَزّع على لضباع عَضْماتو
وإنتو سْباع السّيرك والأطْفال = إنْتو سْباع عْلى القَفَص فاتو
بوجوهكن عملولكن أشكال = فيكم الواحد طول يومو نوم
وْ عا رقبتو بِتْلِفّ حَشْراتو =