رواد شرف الدين و ابراهيم ياسين في جولة تحدي (حوار)

لبنان وضعو صار عالحفة حزين ........وغافي وكل الناس متلو نايمين

عم يبرمو عا حلم ضايع من سنين........والحلم ما بيموت والسر الدفين

رح ينكشف عا شرط نبقى ميقظين........ونحقق الأحلام نحنا وواعيين

ونعيش يقظة عقل مش يقظة عيون.......واننام والعقلات يبقو فايقين

[/center]

يا شعر إرفع صوتك و دق النفير.....جايي الأمير يدرّع حصون الأمير
بلادي قلم و كتاب و شراع و سفير.....و أكتر من الأفلاك كوكبها منير
و كرمالها بدفن سريري بالأخير.....و بحط المخدة بلاطة عالسرير
من حيثني عين الضمير عْلى الوطن....لو نمت بينامو الكراسي عالضمير

حلو يا رواد ، وقويي يا ابراهيم

بأيا أمير العين حبك حارسة .......خليك عا بواب القصر يا حارسي
متيقظ عليي وعا عليلة مؤنسة........تا نام مرتاح الضمير بمجلسي
تركلي بنامي بنت حلمي الفارسة........عا خيلها وتقول ذبت بفارسي
وتا نقول انت حملت فكرة محمسي.......وواعي و عقلك عالوطن مرة رسي
خليك كرسة واعية قبال الوطن........فضل الكراسي الشعب بعدو ما نسي

مع بنت حلمك فارسة إفرش و نام----و عا جنبها بوصّيك لا تشخر حرام
و رح ضل عم إسهر عليك و عالأنام----بيقظة متل يقظة اللبوة عالتمام
البيكون عندو عالكراسي إلتزام----كرسي الرخام بتحملو فوق الرخام
بس العلى شكلك تحت باطو حرام----ما بيعتليها غير صدفة بالمنام
ولا تفزع تضل بمنامك فاضية----بهزلّك و "بدبحلك طيور الحمام"

البينام مرتاح القلب بالمختصر........مش رح تشوفو يا ذكي مرة شخر
بتسهر سهار وعيش ايامك سكر.......ولبوة بسكرها تزوجت نمر الذكر
بغفى عا كرسة قش عا نغمة وتر.......ولا بالرخامة شوف حالي عالبشر
مرتاح بغفى ويوم ما بهاب الخطر........وبعيش جوهر عا حلا النسمة فطر
تركني عقد غفيان عاصدر الحبيب……. وطعمي عيونك غنج من جوع النظر

اتركني أرز واعي بدربك يا هوا----ما بعبّر شخيرك إذا شخيرك دوا
و نمر ال حرس أفريقيا بيقظة قوى----تشرقط نيابي حد لفح الإستوا
و مازال بعدك للغفى رافع لوا----يا حضرة السلسال عاجيد النوى
ليش الصبية ان فتّحو جفون الهوى----بتلبس بيقظتها حبوبك و الغوى
و ليش صعبة تكون يا سلسالها----انت و قميص النوم..عالرقبة سوا

سلسال بغفى بليلها ونهارها........عا شرط ابقى بقرب شعلة نارها
و عا خصرها نايم متل زنارها .......تا تشتهي بوعّْيك تبوس جمارها
انفيقت عينك عا حلا أسرارها .......بزنارها بتقدر بتاخذ ثارها
بغفى بأرضي بشم عطر قمارها .......نحّات حلمو يذوب بين حجارها
وكلما بغفّي مطرقة عا زميلها....... عم ضيف منحوتة على آثارها

لما الغواني بتنسقى بالشيطنة---بيتنزنّر الخصر بأفاعي ملوّنة

في وقتها إغفى عليه و إنحني---مطرح ما غافي ألف بلوة مبطّنة

و خدلك عن الآثار صورة و بيّنة---و فضل الصحو عالنحت كيف بينبني

ضل النحت بالكهف يبري و يعتني--و ماصار منحوتة وطوش نص الدني

لوما اللي كانو عالحجارة نايمين---يفيقو بعد نومة خمسمية سنة

شو دخّل الحلم بمنامي الألمعي.......بوهم اللي عشتو بوعيّك و جد السعي

وعالكهف لولا قلت يا بنت ارجعي ....... ما منسهر ومنقول يا أفعى السعي

يا قالب الموضوع هزل بمرتعي.......مين الخمسمية سنة نام ووعي

أفضل عليي نام نومة منجعي .......ولا ضل واعي بوهم متلك اتدعي

وما زال مش نايم بقصر الأصمعي.......وبتحب توعى بسجن مفتاحو معي

المجرم ما فيه ينام مرتاح الضمير.......بيعيش كابوس بوعي وبلا وعي

المجرم رمى حالو على بئس المصير----راجع حسابو نص مرّة بالكتير

ضْروري الغفا من طاقة عيونو يطير----و يعيش كابوس التجنّي عالضمير

و متلو انت صرلك عهالحالة كتير----و كل ما عاجولة شعر دقّينا النفير

شو كنت عاجناح الغضب و الزمهرير----إطلعلك بكابوس عم بزئر زئير

و لوما إنت توعى على مْنبّه قدير----كان بعدك مكمّش بجنبات السرير

تفرفر متل سمكة انشلحت عالتراب----و بالبدّوْر عم يِرقو إلك "رامي" و" سمير"

دخيلك نيميني يا ليالي .......دقيقة عا صدر أغلى الغوالي
ما عندي غير حضنو حضن دافي.......وبلا هموم الوعي من دون غالي

وما بدّي ينام الا عا كتافي .......وما يوعى غير بالحلم الخيالي
خيالو الحقو والليل طافي.......وبذات الحلم يلحقلي خيالي

وبيقظة ونوم موضوع الثقافي.......اذا تغربل بشعر الارتجالي
لوما الحرف عال كلمات غافي.......القصيدة ما بتوعى بفكر غالي

أنا البدر الغفي بحب و رهافي......غصب عنّي رجعت وعّيت حالي
تأعطي حضرتك نور العوافي....... ونكرت جميل عال نجمات عالي

أنا القمح النمت بالأرض وافي.......غمرني ترابها وواسع مجالي
بتغفى عيونكن جوع وتجافي........اذا ما غفيت بسهول الحقالي

أنا غصون الدوالي عالضفافي.......بعرف خشّة مقص الشحالي
وبغفى بالخوابي نبيد صافي.......تتعرف طعم عنقود الدوالي

الوعي واجب وحتّى يكون شافي.......ضروري اتطعمو بنوم الأصالة
ويا بن ياسين بالوقت الإضافي ......عمرك كمبيالة بوضع حالي

وضروري تنام عا نعش الخلافي.......لأنك انت ماضي ع الكفالة
وما رح فيك ترجع ع المضافة.......بعد عمر الطويل من الجهالة

الكمبيالة ضروري تكون وافي.......وتا بالك ريحو ويرتاح بالي
إذا ما وفيتها والدين نافي ........بوعيك وبمنامك جيت قلك

دفعت عمرك يا ابني كمبيالة

يا شوق قلبي... غل بخيالي..----و لملم عن الإحساس مرسلي
و انت و عادربك عطّر المرسال----بدموع عينيّ و بموّالي

شو قصتك يا بوكرم و سلال----و مقض بيدلّك على الدالي
لأرزاق غفيو و المطر سيّال----و السهل أخضر و القمح عالي
و كل شي تغفّى بالتراب غلال----مجبور يوعى و أحصد غلالي
والما بيوعى بدعسة الغلّال ----بيوعى على دعسات الحدالة

و مهما الدني.. زلزالها القتّال----يغفّي السقالة فوق السقالة
ببقى أنا الصخر الما رح ينشال----شدّيت حالي من عزم حالي
و هزّات يلي نيّمت العيال...----ردّيتها عالسان عمّالي:
إلا ما إرجع فيق يا زلزال----و يهرّ زلزالك... عازلزالي!!

تأمل اليقظة شو لها رسمال----إلها ألف صورة على بالي
إلها صباح النور كيف الحال----و ترد قوّالي عاقوّالي
إلها بالخزانة تياب تقال----واسأل شيوخك من جبل غالي
مين الغفي بلفّة على شروال----مين اللي صلّى عاحلم عالي

و ليك الشهامة واعية بأشبال----بترد بالآلة بطش آلة
و لما بتوعى نخوة الأجيال----هالة بتلبسها ورا هالة
و ليك الكرامة معبد الآمال----عابابها حطّيت آمالي
ان وعْيت بعودك بقشعك رجّال----ان نامت بشوفك..طقم رجّالي

و ليك الربيع و رنة الموّال----و نيسان عاضفّة عم يلالي
و شلال يكرج عاورد ميّال----فتّح بإيدو زرار تحلالي
و حتى الحبق و اللوز و الصلصال----فتّح عاإيد الأسمر الغالي
و كل عين يحضن جفنها عرزال----عابابهن رمشين وزّالي
انشاء الله يفتّح أكتر الوزال----و يدق عرزالو...بعرزالي

و ليك بوطنّا قلّة العقّال----شو جابت كوابيس قتّالي
بيكفي غفا بيكفي حكي و جدال----و إلا ما نوعى مارح نبالي
نوعى على اللي ورّتونا قْتال----عالفرّقونا من عهد خالي
نوعى على الفوضى على الإهمال----عاشلّة عْصابات نقّالي
نوعى على المجرم على النشّال----عالبحر عالجو و عالحْقالي
و توعى على حالك متل الرْجال----و حالك يوعّيني على حالي
و إلا ما رح نوعى على الأحوال----مطرح ما نحنا بهالوطن بنضل
------حالك و حالي و حالتو...حالة

يلـــله يا بو شربل سوى نكـــــفّي
بموقعك ت ترجـــح الــــــــكــفـي
بحبْ الغفا بحب الشرف والــــدين
وعـــىً غفا عينـــي إبــن ياســــــين
وخايف عيوني ترّف شي رَفّـــــــي
******
وهداب عيني للنحت إزْمـــــــيل
ممنـــوع تغفا يا كحل عاالمـيــل
عيني على السهرات معتــــادي
ومنشــــان تبقى سيرة بــــــلادي
وخايف عليـــها روح مِـــــتوفي

» جولة تحدي...ابراهيم و هاني
» تحدي راس السنة-إبراهيم ياسين و فادي فياض
» شوية خرطشة مع رواد شرف الدين
» وينك يا ياسين
» تحدي غير شكل ههههههههههههه