شوية خرطشة مع رواد شرف الدين

رواد شرف الدين

أهلا وسهلا بكل يلي زارنا........عالسمقانية وشعشعت أنوارنا
قلنالكن تترقبو موضوعنا.......وهلق بدينا ! تسمعوا أخبارنا

جايي يا بن ناصيف ايام الدروس ........تا علمك تمشي مع كبار النفوس
و تبطل تبيض بأشعارك فلوس .......وتزور بيت السبع والمتروس روس
وجيبك لصوبي وقول ايدي خوذ بوس ....... ومن درب أعوج سلكك درب الجلوس
وبيت الحرام بعرسنا ارضو تدوس......وتعطي البركة للعريس و للعروس
و ساعة ما بدي راس كعب بوقفك.......و ساعة ما بدي بقول يا واقف جلوس

هاني ناصيف :

حلو يا رواد حلو
وين الطاولة و المازة يلا قول الله

اهلا و سهلا جيت يا رورو تعا
لاكن تنبه ما منقبل مرتعا

مشيك متل وحدة عجوز مكرتعا
وقاصد عليي تهّول بهالموقعا

عا منبري غير القوي ما بيندعا
ولوللا اندعا بيكون ما في منفعا

و انت الحكيتو زوبعا بفنجاننا
وهاني يا قلبي ما بيهاب الزوبعا

رواد شرف الدين

لو شفتني ماشي وضهري منحني........غلطان تشبيهك مار حب بيذمني
هاي حنوة سيوف المعنى الساكنة.........قصور العدل والحاكمة قصور الدني
و المنفعة منك ما رح بتهمني.......وتا توصل على منبري مش هيني
حاكم أنا عا مصرف الشعر الهني.........بمثل بنوك مسوكرة ومأمنة
بدك ربع كرسي عاخشبة مسرحي.........لازم تقسط عمرك لمية سنة

هاني ناصيف

عرفتك يا عاشق هالدني و الانحنا
لا سيفك بيحرز و لا منو جنا

و هاني و انا بالكون اسياد الغنا
لاكن بفقر المال واقعنا انبنا

عنا غنا بالحوربة و الميجانا
و عنا بقلب العقل يا رورو غنا

لاكن انت دين المرابي مذهبك
ومن هيك مالي حظ بوجودك انا

رواد شرف الدين

لما اجا و بموطني الخطاف طاف.......دين المرابي صار عا حالو يخاف
و الله ما شفتو بعينك بعقلك انشاف........و نحنا ما جينا تا نعيش الانحراف
بشعري أنا لبّست للغيمة لحاف........ونور الشمس بقدر بشيلو عالكتاف
بعشق دني وبنخ لسياد النضاف........وسيد الما عندو حظ عقلاتو خفاف
بديني الروح بتطلع تزور السما .........بتحب روحك تطلع قبالي وقاف

هاني ناصيف

عملتك مرابي ليش غيررت الجواب
و ركضت تندب حظك برد الخطاب

الروح الابية بتطلع بيوم الحساب
و المتل روحك ولعت بنار العذاب

و بيني و بينك هون هالموضوع طاب
تسلح بفكرة طيبي و دق البواب

ما بين ارزةنطحت سحاب السما
وخلد اللي عايش كل عمرو بالتراب

حلو يا رواد هيدي مدرسة سمير بيك يلا

رواد شرف الدين

اللي بيسمعك بيقول يا هاني ملاك........ومتنكر بهيبة نبي وبدك وراك
نمشي ونتبع كل خطوة من خطاك........وما انت الا داء وبايدي دواك
مع احترامي لكل أرزة عا رباك ......... بقدر بقدرة ربنا سبب بلاك
ولو كنت خلد و من ذكى الفطرة ذكاك........شو جاب هيبة مستوايي لمستواك
اكسب رضايي ورحمتي وخوفي عليك.........بتشوف كل الناس عم تطلب رضاك

خيي هاني بالفعل طاب الموضوع زيد الطخ ههههههه

هاني ناصيف :

لا البحر عندو وقت يسال عالغريق
و لا الماس مستجدي من الفحمة بريق

و المي ما بتل للانسان ريق
خصوصوي اللي ماشي مضيع مجال البريق

فتح عيونك فيق من هالنوم فيق
مينك انت يا مدعي بحق و حقيق

اوعى قبل ما تطوف بمجال الحريق
اوعى قبل ما يبلعك هون المضيق

ارزي بعمر لبنان من ماضي عتيق
ارزي بطهارة عامل الحر العريق

والارز يا حبوب بكل الظروف
ما برهن وجودو لعليق الطريق

رواد شرف الدين :

ما في على المنبر بحور تغلها .......... الا أنا بحر المنابر كلها
والساقية ان فجرتها بمحلها........ما فيك الا عالمضيق تدلها
وعليقتي تعاليق منها بشلها .........وفيها بعلق رقبتك وبشلها
بغفى بفية ارزتك وبقلها........واعيلها عقلي لفية ظلها
انضاع البريق الشفتك بيبلها........بتقدر القصة من بريقي تحلها
ومش مدّعي بالمحكمة الا عليك........سارق طهارة شعرنا المنجلها

هاني ناصيف

يا قمة الالهام من شعري اشبعي
وموجي و عا عرش الالهات تربعي

وشوفي عميد الجهل عالمنبر وعي
و بلش يلخبط بالوعي و للاوعي

و يا دهور كلما عالصمود بتسمعي
من منهل الارزة ملاحم اطبعي

و هلق يا رورو روق موضوعك كعي
و اللص طل على منابر للوعي

كرمال يسرق روحك بهيدا الحوار
ويقضي على انسان متلك مدعي

رواد شرف الدين :

كلما سرق شي لص منّي معلّقة.......بتقشع رقبتو حد مني معلقة
و تارك شبابيك المعنّى مغلقة.......للمتل فضلك لص خلصني بقى
من شان ما تتسلل على المنطقة ........وتسرق الاه الشعر عن عرش التقى
المطلقة منّك برورو معلقة........و بعدك بتسأل شو السبب تا مطلقة
واللص عزرائيل لو فيي التقى........بيشوف مشنقتو معي بأول لقى
ولو كنت عزرائيل يا هاني ناصيف........ما فيك تهرب من حبال المشنقة

ممنوع تغلط مع امام المكرمات
يا بحولك يا صغير عالمنبر رفات

بسرق رحيق الزهر من ارض الابات
كرمال خرطش عشق عا خدود البنات

بسرق حبر من عبقة كهوف الدواة
و بسقي ورق عطشان فوق المكتبات

و ما زال متستر و عندك واجبات
و عا قصف عمري جيت تعمل ابهات

رح افتح اللية بعقلك يا حلو
طاقة تحتى دوقك مر الحياة

رواد شرف الدين

كلمة حرامي انت يلي تبعتها.......وبقيت بايدك ما بعمرك بعتها
ولبستها فيك وغلط شبعتها....... وكبرتها وغنجتها ودلعتها
وعمايلك ربّك أمرني بنعتها.......لبقتلك وبدلة عليك قشعتها
وايدك قبل ما تمدها ولعتها......ومن كتفك الغالي عليك خلعتها
فكاري البراسي ما قدرت نزعتها......من كبر عقلي طاقتو وسعتها
يا سارق الزهرة البدمعي زرعتها......بتسرق جمل ايدك ما فيك ردعتها
و ياما بمحكمتي مشنق مجرمين......وياما نعاوي كتبتها ووزعتها

هاني ناصيف

وراق المناعي زتها و ضلك كبير
و كل ما علقت ما تروح عالدرب الاخير

تركني حرامي الفلسفة وشاعر خطير
بنهب فكر تا علمك عا شكسبير

بنهب من الافلاك و البدر المنير
مقعد مقدس للحبيبي يا ضرير

وبسرق حلا من شفافها وبسرق كتير
بوسات فيها الحب بينقّط عبير

و بسرق من منابر زجلنا الطيبي
كرسي ت حتى قعدك جنب الامير

رواد شرف الدين :

رح ضل عايش بالكرامة يا عليل .....و بكتب مناعي للكريم وللبخيل
و بعيش مرتاح الضمير و ما بشيل.....أرزاق غيري وعيش بالدنيا ذليل
لو سرقت نور البدر ما بتشفي الغليل.....بتحرم عيون الناس هالنور الجميل
وعندي كراسي عالمنابر والزميل......زين و ابن حمدان وزغيب الأصيل
بغني و ما بسرق شكسبير و مستحيل ......احمل كتاب الفلسفة وربّح جميل
السرقة ما بدها لا حساب ولا كفيل.....آخرتك بسجن المأبد لا بديل
ومن كل عقلك صرت تسرق فلسفي....و ناقص تقلي بعد عم تسرق خليل

هاني ناصيف

دخلك مأبد قوم و احبسني قوام
ولا شوف فرخ زغير فوق الارض حام
احبسني عدمني و الامر يا طفل هام
و خلي الامير ينام عا رياش النعام
و شو بدك بامجاد روكز يا غلام
روكز بعيد كتير عنك يا سلام
اتركني حرامي العشق عا ورود الخزام
بسرق رحيق العطر من قلب الكمام
اتركني حمامة نوح وقت الطوف عام
اسرق غصن زيتون مشعال السلام
و ضلك ملحف بالوراق و لا تفيق
وراق المناعي عليك بتغفي الكلام

رواد شرف الدين

ما بدي اختم الجولة تهاني......يجي وبخسارتو يقدم تهاني
الدني فيها ربح فيها خسارة......اعترف بخسارتك أشرف ضماني

حقي المرتبة الأولى بجدارة......و حقي كون مارد مرجلاني
خسرت بجولتك حب الغيارى......نشالله بتربح بجولات تاني

قبل كم يوم حملتك منارة......و أماني تحافظ عليها بتفاني
عملت فيها تجارة بلا ادارة......المنارة بعتها و خنت الأماني

منارة شعرنا مش للتجارة......و مش تا تبيعها بسوق الصواني
و فيها تحط بسطة عالمنارة......وسعرا بسعر خمر الب لقناني

تفرج بالقدس طفل الحجارة.......الوصية الغالية أرضو المصاني
بيقدر بالحجارة يصد غارة.......تا يحفظ عهد جدو الأولاني

بحب تكون أول بالصدارة......و جنبي تشيّد بشعرك مباني
و جار تكون و تغازل الجارة......وتنسى هموم و ترندح غناني

واذا مريت بشوية مرارة ......لا تسمح تخرب العمر بثواني
بدي ياك ريس كل حارة......تكتب للأبد أجمل معاني

و تبرم من امارة عا امارة......ونعمل بالدني عزايم تقاني
ونرقص عا لحن أجمل قيثارة......ونسكر للحبيب الأسمراني

العمر غفلة بيمرق بالمهارة......بسرعة و شعر شايب ضهر حاني
و انسى كل شي بعمرك توارى......بكفّي تعيش عمرك عم تعاني

باقي كم سنة بعمر الحضارة.....حنانك هات تا تربح حناني
ضروي نعيشها بحب و طهارة......ونمضي عمرنا متل القصيدة

المطلع حر والقفلة ملاني

انا السراق لا ما بتجهلوني
انا مفتّح على السرقة عيوني
و عا سرقة روح هالشب المهرهر
نويت و صعب انتو تمنعوني

انا نسمة هوا عا شعر اشقر
بجي و بروح عالشعر بليوني
سرقت الشال عن عنق المجوهر
تا مطرح ما سرقتو يشنقوني

انا الغنجة على الخد المجمّر
و حبيبي اللي خدودو بيقبروني
سرقت بوسة من الخد المقمر
تالمتلك يا رورو يحسدوني

انا ايد الطبيب بكل محضر
و مخلّص بالحياة بتقشعوني
سرقت الاخ من عاجز مختير
بعد ما قويت عليه السخوني

انا نحلة على الورد المعطر
بكزدر فوق وردات الحنوني
سرقت الشهد من ورد الزغير
تا اعطي لبيتك الجوعان موني

انا ريشة و دواية و حبر اغبر
و يا ما بالمعاجم صوروني
سرقت الفكر و طبعتو عا دفتر
واذا مخطي ما بدي ترحموني

و يا رورو بحثنا الليلة تظهر
و قبل ما اختم شوية اسمعوني
وانا بشعرك يا خيي اليوم بكبر
انت سرقت قلبي سرقت عقلي
واذا عم بكذب الليلة ارجموني

» شوية خرطشة غزل
» رواد شرف الدين و ابراهيم ياسين في جولة تحدي (حوار)
» شوية نكت للتسلية
» الدين والحضاره الانسانيه
» هل يناقض العلم الدين?