حوار ضحك وبكي بين طوني شلهوب وهاني ناصيف

طوني شلهوب

يا نفس طوني ، من الهنا عم تضحكي
ويا نفس هاني ما منعرف شو بكي

حاجي يا هاني من همومك تشتكي
بيكفيك إنّك شاعر كبير انحكي

رح علمك في معهدي عالتكتكة
وقلّك بحالة واحدة بيبكي الزّكي

فقعلك شي ضحكة وضل عيدا وزيدها
كتر الضحك بينزل دموع البكي

هاني ناصيف

تنبه يا طوني الشعر لولا هون دار
بتروح غبرة بين هبات الغبار

وما بين ضحك ودمع لولا البحث صار
رح جاوبك عا كلمتك بالاختصار

بضحك عا شاعر ما فهم مغزى الحوار
بضحك عا شاعر ما قدر عالاختبار

وببكي قهر عا موقع الشعر البديع
الخلا الزغار يحاورو عقول الكبار

طوني شلهوب

لمّا يا هاني بتلتقي بالعملقة
غزول شعرك متل غزل الشرنقة

كلما الرّبيع يطلّ .. لوحة منسّقة
بيضحك النهر وصوت ضحكو سقسقة

دموع ومآسي وهمّ ... بيكفّي بقا
شو باك عايش لا صفاوة ولا نقا

متل اللي عامل مع سنينو مسابقة
وبدّو عَ آخر درب عمرو يسبقا

وتا نقول فيك الهمّ يا هاني التقى
وظلم الحياة مدوّقك طعم الشّقا

لازم بدل ما تفجّر دموع النّحيب
تصير تضحك عالحياة بمهزقة

هاني ناصيف

لما بكي نهر التدفق عالبحور
غزا الدني عظمة و فرح غبطة و سرور

و لما بكي الورد وسقي العالم عطور
تدلدق نقاوة وصلت صوب الصدور

ووقت البكي هاك القلم فوق السطور
خلد رجال كبار عا مر العصور

هيدا الفرق ما بيننا بحيثك انت
ما بتعرف الدمعة ولا عندك شعور

طوني شلهوب

الشّاعر مبكّي قلام حبر الموهبة
تا يصير يضحك عا رفوف المكتبة

ولمّا الهوا زكـزك ورود المسكبة
ضحكت ... ولهثت عطر بكماما ربي

عيب البكي عا رجال حرّة مشوربة
دخلك إنت رجّال ؟ أم بعدك صبي ؟

وكل ما يا هاني بيعزموك عْلى الفرح
بتنظم قصيدة ندب يمّا حوربة ؟

هاني ناصيف

لوما دموع الام تنزل حنجلي
ما تزوجوا الاولاد و المبسم حلي

ولما الشاعر ينحت الشعر الطلي
من دمع قلبو بيكتب الشعر العلي

فعل البكي احساس نارو شاعلي
ومش هم لولا تهمتني بقصة الي

مجبور ابكي كتير عا شكل الولاد
لما انت تنزل عا ساحة بوعلي

طوني شلهوب

أرجوك لا تبكّي الشّعر ما بريد هيك
بريد إضحك بسّ ما إضحك عليك

حرفك ببيت الشعر منحسّو دويك
ضايع ما بين السّطر والرّيشة بيديك

مظبوط بالميدان كل ما بروح ليك
بتصير لما تشوفني تبكي عينيك

ولولا ما كانت دمعتك دمعة فزع
ما تبلـّـل البنطال ... ما سكـّـوا اجريك

هاني ناصيف

مش هم لولا بوعلي بيبكي اكيد
ويفزع عا منبر دابحو شاعر زهيد

ببكي على مقاوم سقط عنا شهيد
من ضحكة الجلاد او ضحك الحديد

المن دمع جسمو خلص تراب الوطن
وخلا الدني تضحك للبنان الجديد

طوني شلهوب

الشّعب ، ما بيجوز يعمل إنقلاب
وتبكي جروحو دمّ تا تسقي التراب

إلاّ انفقد حرّيتو والحقّ غاب
وصار الهنا شهقة مرارة وإكتئاب

ووقت الضحك لبنان من قبل المصاب
سويسرا الشّرق سمّوه ، فيه العيش طاب

ولمّا بكي وتلوّع وداق العذاب
صار .. فقر وجوع ... هجرة وإغتراب

انشالله يا هاني يعود لبنان القديم
حتّى يعودوا بعودتو كلّ الشباب

هاني ناصيف

لما بكي لبنان خلى الملهمين
تغزي الدني فكر و فصاحة خالدين

وابن الغرب لما تضحك يا جنين
خلى الشرق مليان عنات و انين

وحتى الوطن يعمر على مر سنين
مش بس برجوع الشباب الطيبين

بدك عزم صوان مش ممكن يلين
وقوة و صلابة و مقدرة و خبرة فطين

وما فيك يا انطون تا تبني وطن
الا ما تنزل دمعتك فوق الجبين

طوني شلهوب

من الجوع كلما بيدمعوا ولاد الزغار
بتشوف دمع جبين ربّ البيت فار

ومن حين شبعوا .. تضحّكوا .. والبيّ صار
يضحك وينسى شو تعب طول النّهار

الفلاّح عندو جبين دمعاتو كتار
بتوقع بِـ تلمو فوق حبّات البدار

لازم لِ ناس تبحبحوا يبيع الغمار
وتضحك جيابو تا يعيد الإختبار

ومهما المواطن بالشّقى علاّ العمار
ورصّع حجارو بكل بيت وكل دار

انما قال أهلا وما تضحّك للضيوف
بيدفن تراث بلادنا بين الحجار

هاني ناصيف

عطيتك جواب محط درس و اختبار
جاوبت متل الاخوت بطرح الخبار

تا تعرف السر المعي بالاختصار
ادرس كتابي بتنجح بسير الحوار

ووقت الحرايق دارت بارض الكبار
لو ما بكي الخرطوم راح الاخضرار

الله خلق هالارض نور و ميل نار
و خلا ابن ادم كومة من الغبار

ودى الغيوم الطيبة داير مدار
تبكي مطر تا الزرع يتبسم غمار

ووقت الي شاف الكون فاضي بهالمدار
خلا بكي العمار يتكون عمار

ولبنان لما كان جنة للجوار
و اتبسمو اهلو و عبوا هالجرار

لوما العقل يدمع ذكا و الدم فار
ويحمو حدودو بكل عزم و افتخار

كان انتهى لبنان من ماضي السنين
و ما ضل عنا حجار تعمر عا حجار

طوني شلهوب

عـملت الـزكـا دمـعة عـقـول المـلهـمـيـن !!
مـبـيـّـن يـا هـانـي عـلـيـك سـيـد الـعـارفـيـن

نــاقـص تـقـلــّي , وبـالسـّخـافـة تـسـتـعـين
إنـّو الـضـحـك دمـعـة شـفـاف الـضـاحـكـيـن !!

ولك كيف الـبـيـبكـي مـن الـوجـع شـفـتـو فـطـيـن
ومـشـلـول عـقـلـو مـن الـبـنـج والـمـورفـيـن ...

ولـبـنـان عــايــش أزمـتـو صـرلـو سـنـيـن
مـن هـيـك صـار الـشـعـب يـئســان وحــزيــن

وأهــل الـسـيـاســة تـجـمـّـعـوا مـن كـلّ ديــن
تــا يــمــســحــوا عـن وجــنـتــو دمــوع الأنــيــن

ولــمـّـا مــا قـدروا يـــرجــّــعــو الــضــحــكــة إلـــو
صـــارو الأهـــالـــي يــنــقـمـــوا عـالــحـاكــمـيــن

هاني ناصيف

وحياة رب الكون يا فكرة زعلي
من هيك شاعر وصلك للبهدلي

انطون لا تحور بكلمة مبكلي
و تعمل ذكي قدام رب المرجلي

و مازال قصتنا يا خيي مخجلي
ابكي عا واقع وصلك للبهدلي

و صلي لرب الكون حتى تنجلي
غيمة السودا عن وطنا تعتلي

وهلق انت يا شاعر كبير و علي
قلي فضيلة ضحكتك شو مفضلي

ما بين ضحكة مهزلي تحت الصليب
و دمعة مسيحك فوق درب الجلجلة

طوني شلهوب

مازال من الوجع منّك مبالي
لا تبعد .. ضلّ يا هاني قبالي

وما بدّي تلومني انخـلـّـيـت تسرح
فوق خدودك دموع المقالي

يا هاوي الآخ وجروح البتنضح
بإبن صهيون ذكّرت الأهالي

شو رأيك شي طفل بالمهد تدبح
تا تخنق ضحكتي ودمعي يلالي

وشو رأيك طالب العلم البيطمح
بشهادة يفرح وبمقام عالي

كرامة خاطرك ما يعود ينجح
ويبكي حسرتو بعتم الجهالة

إنت كانون لـفّ الغيم مشلح
نهارك متل عتمات الليالي

وأنا نيسان والعطر التمرجح
ونسيم الـناغـش زهور الحقالي

مهما غيمك بهمّو توشّح
وشربت دمعتو كروم الدوالي

ما كان الحبّ بالعنقود لوّح
لوما الشمس تضحك بالأعالي

الضحكة شعب تا يجني بيكدح
الدمعة شعب عانى من البطالة

الحرقة بنت محكمة البتجرح
الفرحة بنت محكمة العدالة

ويسـوعـك قبل ما عـنـّـا تجرّح
لأنّو الجلجلة مش كاس حالي

لبيّو قال : يا ريتك بتسمح
تـبـيـعـد كاس صلبي عن مجالي

ولأنو ربنا بيريد نفرح
حمل جروحنا وخلّى الجنّة
نعيم لآخرة عبد المثالي

هاني ناصيف

اعتلي وأرفع جبينك يا زماني
أنا فارس الشعر الأولاني
بشعري بو علي وللحرب عنتر
انحجب صنين من غبرة حصاني

اعذرني يا بن شلهوب الزغيّر
إذا ببكي عا حظي بظرف جاني
طلبت سباع تلقاني عا منبر
لقيتك طفل بصفوف الحضاني

ما بيضحك قمر نيسان أحمر
بلا ما يشرب دموع العياني
ونسيم الفجر تا يفوّح العنبر
بكي دمعة الفجر عالبيلساني

وإفهم قدر ما العنقود يكبر
وعا ضحك الشمس يصبح أشقراني
لوما بكركتي حبّو تقطر
دمع بالكاس ما صان الاماني

وتا تعرف قيمة الدمع المخمّر
عا نار الحب بيقلك حناني
دمعة من الحبيبي بخد أسمر
بتسوى قهقهة ضحك الغواني

الشمع متلي احترق قلبو تا نوّر
دروب الخير والطهر المصاني
وبشعنينة الرب بعيد أطهر
بكي شمع الصلا عا شمعداني

ولأنو فكرك المحدود أقصر
من تنانير أجسام الخياني
شفت الضحك برغيف المقمر
بجلسة عامرة وسفرة ملاني
وما شفت الدمع عا جبين المغبر
اللي نقى القمح من عار الزواني

وشفت المكتبي بتضحك وتفخر
وتملي عينك بكتب الملاني
وما شفت دموع ريشي وفكر يسهر
ووقلب ينزف شعر من جرح قاني

البكي أبلغ من الضحك المصور
فوق شفاف ما فيها رصاني
السعادي بدمعة الإم البتحضر
زفاف الإبن تا تقبل تهاني

ومن مغارة جعيتا خود منظر
صخر منحوت بدموع التفاني
دمعة بتحفر بصخر المختير
ودمعة بتغسل الصخر المعاني

أنا منك يا بن شلهوب أشعر
الشعر فرّق مكانك عن مكاني
وبطون الشعر والفن المجوهر
متل طوني بتعطي كل ساعة
وما بتعطي المنابر متل هاني

» حوار بين طوني شلهوب وأمير الزّجل
» شعر حديث - طوني شلهوب
» أهلا بالشاعر طوني شلهوب
» طوني شلهوب واياد قحوش
» عصام يوسف طوني شلهوب