مجد الشعر وبحر الزجل

دفتر غزل
عدنان ..حضّر كل ما عندك قوا
جايي هوا تشرين يعبث بالرصيف
خبّي بجيابك دفترك ضغط الهوا
بدّو عليك يأثر بفصل الخريف

مجد الشعر
تأمل بي وجهي منيح يا شب النبيه
موسى أنا و الشعر سماني نبيه
بقلب الخوابي اليوم و بذات العصا
جايي تا شق البحر عن بكرة ابيه


ألشاعر سليمان طراد
تركلي الديانه والعصا..وبلّش سباح
الشاعر ما عندو غير كلماتو سلاح
ان كنت جايي تفتح جروح المسيح
يا مجد عنّي فل يسعد ها الصباح

مجد الشعر
صوبك أنا بالشعر جديت السعي
حتى الخوابي تشوف فورة منبعي
و عنك اذا فليت بدك عالندم
تركض ورايي العمر تا تغني معي

ألشاعر سليمان طراد
شو جيت صوبي تا تسجل انتصار
لنّك عدوّي وبالشعر مش طاعجك
مبلّش ركض من قبل ما تعمل حوار
غنيّت ما غنيّت شولّي زاعجك

مجد الشعر
بحربك أنا يا طراد حققت المراد
و بلطت بحرك متل ما فكري أراد
البقوة بحياتك رحت من قبل الحوار
راكض تا دق جراس دفنك يا طراد

ألشاعر سليمان طراد
بلّطت بحري ..بلطجي واخد قياس
ومن بعد ما تصلب البحر وتقتلو
بقلّك متل ما زغيب قلّو لبو الياس
\رجعوا بيوم قيامتو سجدوا الو/

مجد الشعر
مبارح سرقني النوم يا بحر العري
و نام اليراع بتخت شعري و دفتري
و مش عيب اسجد حد رهبة منبري
سجدة قلم تا يعيش بدو ينبري
و بعد البري و الاخ افتح عنبري
و سَبٍّح ببحر الشعر فكري العبقري
و قلك بضحكة متل عمي بو ربيع
" هَي حجة الحية اللي بدها تفتري

ألشاعر سليمان طراد
ما يوم عا الشعّار أخلاقي افتروا
بالعكس..كنت بخاف حدي يخسروا
وبالعمق بفرح كلما بيتطوروا
وبيشمخوا متل الصنوبر والسرو
الشاعر اذا متلك بيصلب دفترو
وبيسهّرو عا الشمع ما بيبخّرو
بعطيه مجدي وبرفعو عا منبري
عا شرط يحفظ بس قيمة منبرو

مجد الشعر
كرهت الأنا بالشعر و عروض الغنا
و رهبنت حَرفي وزاد عسنيني غنى
و لما عبحرك طرِف اسطولي دَنا
شفتك جبل جبار عمرو ما نحنى
و عا منبرك بتقول تا احصد جنى
بترفع بي هام المجد عنو بالغِنا
تركني انا بمجهود ذاتي بالحياة
اوصل بِفضل نبوغ كلماتي أنا

ألشاعر سليمان طراد
عارف منيح وفاهمك بس الثبور
بيفرض عليك تكون تا توصل صبور
ما قلت جايي ارفعك تا تصير طور
قلت حابب ارفعك تا تشع نور
الشاعر يا مجد محمم بحس الشعور
وسر النجاح بطيبتو وبعد الأمور
ما بتنكشف إلا بحروف قصايدو
ولب القوافي بنفضحو انشلنا القشور

مجد الشعر
المشكل على الاعلان كذب المطبعة
رافع وجوه ملَتمي و مصَنّعَة
و جمهورنا بالغش عينو ممتّعَة
بيزقُف لناس موصلة و مقطعة
زيح القشور و هوج يا بحر الصواب
و عن هالة الشعار زيح الأقنعة




ألشاعر سليمان طراد
منشان ما نظلم حدا بمقاربه
عندك بعد شعّار شعله شاهبه..!
بس الفرق بالموهبه وبالتجربه
في موهبة صمت وبلاغه صاخبه
وتا نكون ميزان الحقيقه الثاقبه
موضوعنا عنهن اليوم مساقبي
هنّي على الأعلام حطوا الإتكال
ونحنا اتكلنا عا الشعر والموهبه

مجد الشعر
يمكن ما قصدي كان عمم بالحكي
عندك شباب كتار خرج المعركة
و عندك ذكي ..بالشعر لكن مش ذكي
بحنكة تا يوصل فوق غيرو بيتكي
العصمة بي يًدّك قوم عَرِّب بالنُخَب
و ابني بزجل لبنان اكبر مملكي

ألشاعر سليمان طراد
شوف بزجل لبنان ما بتقدر تقول
كانت النخبه ثابته بكل الفصول
عندك جحاش بيمرقو..وعندك خيول
وعليك انت بعين معرفتك تجول
في جيل طالع متل وردات الحقول
وفي جيل كان يجفّلو صوت الطبول
وما بين جيل وجيل في جيل الورق
وونحنا بخوابي الشعر قدّمنا الحلول

مجد الشعر
تأمل معي أجيال مرقت بالورا
بطابع ذكوري الشعر كَمَّل بهورا
بس المرا بالبيت قطعة مجوهرة
دم الشعر من قلب ثدييها جرى
و حتى المنابر تشبه بيوت الحياة
لازم عا جوق الشعر تنزاد المرا

يا مجد الشعر اشفق عا عذابي
ولا تحكي بالمرا..بفقد صوابي
المرا كانت بجنّه وعند الله
وبلا ما نهينها..بتفهم جوابي

الشعرتاريخ راح ومجد ولّى
المرا شو عطيتو غيرالكآبي؟
الرجل يا صاحبي وحدو تولّى
زمام المنبر بعزم وصلابي

طليع بنغمتو الأشعار حلّى
وبعمرو زغيب ما ضيّع اصابي
وزين شعيب مارد دخل الله
حضورو المنبري سطوه واهابي

وعن الزغلول ببكي حق الله
لما بزكرو بترجف ركابي
وخليل شحرور ها النسر المعلّى
شاعر منبري وشاعر كتابي

وموسى عا العا جبل عالي تجلّى
زلمي مش مرا ..وحتى الصحابي
رجال.. بن علي طالب تولّى
نشر قرآنا وجاد الكتابه

المرا مش شاطره يا مجد ألا
بفن النقنقه وفن العتابي
يمكن شاطره بطبخ البازلا
سمالله بالمحاشي وبالزلابي

وأذا بجنتو ادم تجلا
وقلتلو الضيافي ع حسابي
ما زالو عن ضلع منو تخلا
بأيا عين جايي ضلع قاصر
يتمرجل ع شعار الخوأبي

مجد الشعر
قبل ما تدخل لرهبة مدايي
تعا يا بحر سجل هالرواية
انا بنت القصيدة الروكزية
تا حلي منبرك عالشعر جايي

انا الإم اللي عاشت يا بنيي
ببيت الظُل تا تتنال الرعاية
عا منبر شعر مستكتر عليي
بكرسي رابعة تحقق رجايي

بحقي حكيت بلسان البقية
ذكرت كتار خنقوا مستوايي
وبدل ما تقول عاشوا عالخطية
بحق الشعر عم تعمل جنايي

انا حوى انا الحلوي الفتية
نحتني الرب و بعين العناية
بضلع السحر هندسني برويي
تا داخ الحرف من روعة حلايي

عمنبر شعر لا تكبل يديي
و بكتر النق لا تفلق سمايي
و عتخت الحب و السفرة الشهية
ما فيك تعيش يا آدم بلايي

لا تهجي روعتي بكذبة غبية
عكرسي الشعر خايف عالعباية
ما فيك تزيد نكهة انثوية
و عا منبر شعر عارف وقت اطلع
خوابي الشعر رح تزحف ورايي