حسان البسطاطي وبحر الزجل كورونا

سليمان طراد
حسان اوعى تجاوب بدين وزكا
الشعب عالحكام بالكون اشتكى
قصة كورونا الكافر عليها اتكى
وعا هيك ازمه يا صديقي بينبكى
بس السؤال بكل سوريا انشكى
معقول ما انصابت ؟ لا نضحك عا الزكا
وما يكون فيها ولا اصابه بحلفك
تحكي اذا الاعلام مانع ينحكى

حسان بسطاطي
يا شاعر الحامل ألف بقجة عزاب
و تارك وطن يزحط ع حفة إغتراب
الإعلام عنا بعد عهد الإنتداب
بعدو عم بيتلكش بقلب الضباب
الإعلام لما يقول في واحد مصاب
ع لسان شاعر منطقي خود الجواب
سوريا كلا نصابت بالمرض
و فيها " شخص واحد " لهلق ما نصاب

سليمان طراد
حدد جوابك ما توجه اتهام
القايد اذا بينصاب عا الدنيا السلام
سالتك اذا الاعلام عندو التزام
جاوبتني من دون شرح واهتمام
حسان احكي الحق وبشهر الصيام
قديش منصابين صار وب التمام
نحنا هدفنا نساعد ونبعت دوا
مش تا نودي جيوش تا تشيل النظام

حسان بسطاطي
بيوت الشعر بالنور مهما تنورنو
لا توحدو و لا تكتلكو و لا تمورنو
نحنا شعوب لغير الله ما رنو
كفوفنا مْن البرد ياما قورنو
من بعد ما بسوره عظيمي تسورنو
و تشوّمو و تأدلبو و تحورنو
جيوش الكورونا لو ع سوريا بتجي
بداء الشعر ع حدودها بيكورنو

سليمان طراد
شعوب الفقيره قد ما تعمل وقاء
ما بتقدر تحد التفشي بالوباء
بدك حكومه تقمع .. وبالاكتفاء
بتوصل لحد الانتشار بلا عناء
طيب شو رايك اطرح عليك بزكاء
حل فيك تطبقو عا الاغنياء
يتبرعو للشعب بتوابيت هيك
بتنحل مشكلة المآوي والدواء

حسان بسطاطي
بيت الشعر يا طراد حتى تكـيّسو
لا تورّقو و لا تبلّطو و لا تلـيّسو
التابوت ع قياس الشعب لا تقـيّسو
بالأدمغه لا تنزعو و لا تخـيّسو
الحكام مهما يعاندو و يتـيّسو
الشاعر بيبقى لو بيرحل ريّسو
مش بس عم بيسيّسو عنا اللقاح
حتى ال وبا ب بلادنا بيسيّسو

سليمان طراد
ان كان شعب مبقّر ومجدو محي
طيب شو فيها تعمل الدوله استحي
واجب عليك تقول للدوله اكسحي
لما الشعوب تصير تلعب باللحي
الموقف خطير كتير مش قصة جحي
والشعب بدو قايد ومش مسرحي
الغفران درجه من القداسه تحترم
ويمكن ضمير العالمي فاق وصحي

حسان بسطاطي
يا طراد صار الموت عم بيموتنا
نحنا لي وصلنا ل هون سكوتنا
التجار يلي زورو لاهوتنا
لليوم عم يتصارعو عا قوتنا
من بعد ما تفجعن علينا حوتنا
الحكام عم بينجرو تابوتنا
لولا الضمير العالمي عندو ضمير
ما كان حاصرنا المرض ب بيوتنا

سليمان طراد
نحنا شعوب مهددي وما في حدود
لا الاسلمي بتفيدنا ولا قرود سود
ولا النصرني لا الدروزي بتحمي الوجود
بس الخلقنا قادر يفك القيود
تأمل معي بالصين وبرغم الجهود
فيها انتشر والكل عا حكي شهود
لما تجبرنا على الرب العلي
يمكن بعت امراض تا لالله نعود

حسان بسطاطي
لما الشعب عا خالق الكون اعترض
تخلا عن عبادو على اتفه غرض
و نحنا قبل ما العقل قدراتو عرض
واجب علينا نآمن من المفترض
و الله العلينا عبادتو ياما فرض
لما بعينو شافنا عم ننقرض
ما عاد نلزملو بهالظرف العصيب
بيخاف منا ينعدى بذات المرض

سليمان طراد
حسنات الله ما بنقدر عدها
قد السما والارض يمكن قدها
وعا ها الكفر حسان ايدك مدها
منشان تاكل مسطره وتردها
الله بيحمل داء نفسك حدها
مظبوط لكن ها الاشاعه بصدها
داء المحبه حاملو الرب القدير
ويا للاسف عنا مناعه ضدها

حسان بسطاطي
لما الحقيقه جرحها ينزف دما
و الآلهه يصيرو بإيدينا دمى
و لما الشعب ما عاد للرب انتما
و ألّه زعيم الحزب و بحضنو ارتما
و الأوبئه بلشت حصاد بهل حما
بأمراض ريتو إسمها ما ينسما
طرقنا على باب السما لقينا الإله
عامل ع حالو حجر صحي بالسما

سليمان طراد
من قبل ما نجدد فيز بسبورنا
الله دخيلو حب هوي يزورنا
اول زياره راح صوب قبورنا
لاقى بقلبو معشعشين طيورنا
تاكد الكون بنخربو بمقدورنا
ومنشان يحمي ها الدني من شرورنا
حجر عا حالو وضل قابع بالسما
حتى يحنو حجارنا البصدورنا

حسان بسطاطي
من كتر ما فينا قلوب منقمي
صارت من السقم النفوس مسقمه
و بدال ما تكون الحروف مطقمي
صارت ع شط الموت فقمي مفقمي
من قبل ما تصير الخليقه مرقمي
و الأسلحه بصدر الشعوب ملقمي
حتى ما ينصابو ب فيروس الزجل
مْن الواجب تكون القصيدي معقمي
------

ختام سليمان طراد

يا جايي الرب تجرح كبرياؤ
وتحجر عا ملايكتو بسماؤ
تعلم من عبد مؤمن تعلم
الإله الحي ما بيحبس هواؤ

انا انسان للخالق مسلم
حياتي وربنا برفض هجاؤ
وانت خليك غوغائي تالم
عايش بالدني يقدس رياؤ

يا حسان بالماضي تكلم
مسيحك عن الشر وعن بلاؤ
وقلك بالصلا بتسلم وعلم
على الشيطان ..تا يفقد حياؤ

وتا نحكي عن كورونا ولو تسلم
قيادة كوننا اللي يوم شاؤ
يجنو ربح تاجر او معلم
مش رح يقدرو عا احتواؤ

انت كذاب ربك ما تظلم
لانو ما بيحكم عا هواؤ
العداله البالسما الله تسلم
ولانو العدل يا حسان شاؤو

بعت ابنو فدا الكون المظلم
هوا للكون يحييها وبماؤو
وبعد ما شاف شعبك ما تعلم
وكفر بالرب من كترة غباؤ
لها الاسباب تا شحل وقلم
بعت للمؤمن كتاب المقدس
وللاشرار ودالو وباؤ
-----

ختام حسان بسطاطي

مسا الشعر المرصع يا خوابي
انتي ل خمرة الشاعر خوابي
من نبيدك كتر ما شربونا
دخنا بالظواهر و الخوابي

الحبايب من عدا موعد لقونا
بسكره كلها شعر و غرابه
نسكبنا من قبل ما يسكبونا
متل نهر المشقلب عالروابي

بطاسة فلسفي خمر دلقونا
على مسرح وحي و سفرة صبابي
و قصيدي متلتي صك شربونا
و منا استزوقو طعم الطيابي

أنا و بحر الزجل لا تواخذونا
بلحظة انسكابو و انسكابي
بحجر شعري إذا رح تحجرونا
حجارو بتعرق و تنزف كآبي

ع قلب الصين لولا بتاخدونا
بمطرح ما لقو الفيروس رابي
بحوارية تحدي بيسمعونا
بيشفو بلا طبيب و لا طبابه

أنا و بحر الزجل تبقو ذكرونا
بنكهة إغترابو و إغترابي
إذا بيصيبنا داء الكورونا
شو بـِ أثر على الجسم الترابي

بتمتمة التراب بتسمعونا
نبع سقسق متل قوس الربابي
مهما بالكورونا خوفونا
ما بيهم الجسد ينصاب فيها
البهم الروح ما تطلع مصابي
-------