سلمان سلمان وبحر الزجل

مبارح صار هالحوار الارتجالي بين شاعر الفتنة ألشاعر سليمان طراد والشاعر Salman Salman . غربلتو ونزلتو بدون التعليقات انشالله بيعجبكن .
سليمان طراد
سلمان يا سلمان خبّرني رجا
انّك فقير وما بقا منك رجا
لزقه ع كرسة منبرو ويا للأسف
لا بالمديح بتنفع ولا بالهجا
سلمان سلمان
بعرف رجى فيي ما بيذم الكلام
عالي مقامو بيحترم عالي المقام
كانو يقولو ب البحر كْبَ الحكي
تاري البحر ب يكْبَ ع الناس الحرام.
سليمان طراد
بتعرف رجى...!من وين قلّي يا حلو..؟
خيّك رجا شيطان..الله ما إلو
بينكر صديقو كل ما بيصيح ديك
محلّك أنا...!! ب غير ريّس ببدلو
سلمان سلمان
يمكن رجى شيطان يمكن ألمعي
ل مهم ريس جوق في عندو وعي
بذكر معو شيطانك الفتنه زرع
ما نجحت و هلق صعب تنجح معي..
سليمان طراد
عا ها الكلام الفج..لازم تستحي
وتركع نصب قدام خشبة مسرحي
بحر الزجل تاريخ صعبه ينمحي
وطقسو بجو الشاعريه ما صحي
مفتن بيقول الكل عني ..ومن وحي
اني خلقت شرير ..جاهل مربحي
رح ضل افتن بين شعّار الزجل
حتى المعارك تشعل بدنيا الوحي
سلمان سلمان
في فرق شاسع بين فتنه للحوار
و ما بين فتنه للمصايب و الدمار
أثبت ب إنك رمز إلهام و وقار
بتزرع وحي و أفكار ما بتكب نار
ما زال عامل بحر ع الشعار ثار
و مغرور بدك رايتك أحمل شعار
الفتنه أشد من القتل يا فيلسوف
أستنظر ملاك الموت آخرت النهار.
سليمان طراد
لما بشوفك شر عا الكلمه اعتدى
بشعل دني بطبق سما بخرب مدا
فاتح بواب الشر وبواب الهدى
وناطر ملاك الموت..جايي عا الغدا
لما الوجع بيصير صوت بلا صدا
وبيضيع مفهوم الأحبا والعدا
متل المرض رح فوت بين مفاصلك
بتحسّ فيي بس ما بتلمح حدا
سلمان سلمان
ما بحس ، ما بلمح شرورك ب السراب
مجرم أنت للشر فاتح الف باب
مات الشرف تا يعيش عهرك بالتياب
و الصدق مات و عاش كذبك بالكتاب
مات الوفا و غدرك سحبتو من القراب
و مات المريض و ضلّ سَمّكْ بالشراب
و مفاصلي بدها تكون الفاصلة
يلي ب تقضي عليك من بعد العذاب..
سليمان طراد
الفتنه اذا ما كانت بتوفي الغرض
بتصير يا سلمان اغلا من الغرض
لما علينا داء كورونا انفرض
ما في حدا من الناس عا الحكم اعترض
اقتلني حقيقه خوف انو تنعرض
واتعب ضميرك بعد ما الحق انقرض
عندك مرض انكار لوجود الكبار
وما في دوا بيشفيك من هيدا المرض
سلمان سلمان
رفقة كبار القوم من عقلي الكبير
ما عَقّدتني ، بالعكس فيها خبير
لكن أنت منك كبير و لا أمير
لا شايفك بحر ، و لا عم شوفك غدير
خفف كذب ع الناس ب الظرف المرير
شو نسيت إنو الكذب مفعولو قصير
إن كنت المرض عنا علاجك و الدوا
و غير هيك لا بتحرز و لا أمرك خطير..
سليمان طراد
أووف أووف أوف
يا ملحـق جوقة المنبـر ..تهـاني
من البحر استلمها بلا إهانـي
لأنك شاعر وكلّـك محبـه
بري إسمك على مبرد لسـانـي
انا ما كنت عـارف رح تلبّي
معي بالإرتجـالي والغناني
لـكن بحلف ووحيـاة ربّي
سريع النظم مضمون ومعاني
كنا نشوفك بجـوق المحبه
حد الفول قرمة سنديـاني
وصرت اليوم بالمنبـر معبّي
الكرسه ..شاعر وعندك مكاني
ولأنك ما بتعرفني مربي
لشعّار المنابر عا زماني
بدك تاكل الليله مسبه
الحق على رجى هوّي الدعاني
انا فتنه خطيره مستحبه
قبل هلق مأكد.. لم تراني
لأني بعمل من الحص قبّه
وللخسعان ...ما بيوقف.. تراني
انا بحب المشاكل ما بخبّي...!!
الثقه بالنفس عملتني أنـاني
بغب من الخـوابي وكل غبّه
بتسوى صوت حرتقة القنانـي
ولأنو موقع المنبـر محبه
ورجى شاعر برأيي أولاني
دعيتك ..بس راسك لا تقبّي
لأنو احترامي عليك واجب
احترمني ولا بقا تجرح حناني
سلمان سلمان
أنا مش ملحق و عم يلحقوني
القوافي و المعاني بيعشقوني
حروفي تَرْكَتها ب الشعر تخلق
تا عَلّقها ب بال الناس قونه
وقفت ع مفترق وأخترت مفرق
ع درب الخير بين الناصروني
و صرت كل ما عزمني الشعر أقلق
ما حَقّق حلم يَلّي أستنظروني
طلبني البحر حتى كُوْنَ زورق
ع مووجو سافر ب رحلة جنوني
أنا ب دمعة عيوني أعتدت أغرق
ما بَدي بحر فيه تْغَرّقوني..
مع سليمان ، مع شاعر الأعرق
أنا بحلم ب شخصوو تجمعوني
ت أتحرقص ، ت أتسرّسَب و إعرّق
و خلفوو صير شاعر تحسبوني
يا خيي يا سليمان المزوزق
ب أبيات الحلى ال عم يسحروني
لا تصّدق رجى حَطّك ب مأزق
ب رأيي ب العكس زادك ليونه
و معي ب أمر اللياقة طلعت أليّق
مُربي ، و شاعر ، و روحك حنونه
أنا مع جوق وادي التيم حَقّق
فؤادي أُمنية/ت رفقة مصونه
و رجى شاعر عريق ، الشعر أرفق
معو أجمل صور زادت فنوني
بشكركم ب عين و قلب أروّق
على فيض المشاعر يا عيوني
رجى طَوّق و متلو طراد طَوّق
حياتي ب الأخووي و الصداقة
من أطواقكن لا تخْلّصُوني..!!!