شوية خرطشة غزل

قالت يا هاني ليش صاير تشتكي
مكتر بكي بهالليل و مخفف حكي
قلتلها يا جفن عين مدهدكي
يا مربعة على عرش قلبي و مالكي
حسنك جبرني دوب عا غيابك انا
و البعد عودلي عيوني عالبكي

قالت يا شاعر ليش بدموعك قسا
نهارك حزن دمعك مسيطر بالمسا
قلتلها معليش هيدي حالتي
الله لا يوقع حدا بكيد النسا

قالت يا هاني روق حاجي عم تدور
تمنّى شو بدك قول تا نحل الامور
قلتلها و حياة هالرب الغيور
بحبك متل ما الحق بيحب الظهور
بحبك متل ما البحر بيحب النهور
بحبك متل ما الليل بحب البدور
بحبك متل ما الارض بتحب البذور
بحبك متل ما الغصن بيحب الطيور
بحبك متل ما النخل بيحب التمور
بحبك متل ما السكر بيحب الخمور
بحبك متل ما الرب بيحب الدني
بحبك متل ما النحل بيبحب الزهور

يحبك برص عا ها الحب شو رأيك يا فادي ويا حسن ههههههههههههههههههههه

من غلال الحُبْ وحَبو .. إسأل كل اللي حَبّو
سآل مجرب يا سليمان .. كل الحَبو بيسبّــو

أحبك حب الكلب الى العضمة
حبك بقلبي شوك بلان
لبعت سلام بسطل مفخوت
خبط لزق يوصل للحباب

مش عاجبك حبي يا خنفوس الزجل
رح يعجبك كفي ماكد بالعجل
و مش بس كفي ضربتين صغيرين
يردوك يا سليمان عا ديار الاجل

يا حلوة خبي القبة
قدام الناس
القبة اللي بقلبها مخبي
در و الماس

مرة قصدتها للسمرة
عا هاك البيت
و لعت بقلبي الجمرة
و ما قدرت حكيت
ساعة بتلهبني الجمرة
ساعة الياريت
ساعة بتسكبني خمرا
بكاس الوسواس

قالو يا هاني تروى
الخمر بيأذيك
ممكن انك تتلوى
بأوجاع الفيك
قلت اللي بيعشق حوا
و الجسم الشيك
ما بيشفي قلبو جوا
غر خمر الكاس

قالت يا هاني تروى
بكفي خمر
قلتلها قلبي تلوى
من كيّ الجمر
يسلملي ربا لحوا
ووجنات السمر
متلن الله ما سوى
من بين الناس

ياما غنّيت مطالع = لعيون السمر

بالميسه قلبي والع = وضلوعي جمر

ليلي عجقات مقالع = وعيوني حمر

والدالع جرحي شالع = رحمه يا كاس

بوجودك قلبي تلوع
من كتر اللطف
مقضى ايامي موجع
من دون العطف

عينيكي بترشق مدفع
و جفونك خطف
و ما عاود فيي يشفع
غر مار الياس

قامت جابتلي بعيدي
وردة نوار
غارت هالوردة بايدي
من ست الدار

يا حلوة الرب الجبلك
رسمك عالقد
و نقى كل الانسبلك
و زين هالقد
و انتي والله بيلبقلك
يا حلو بجد
من ارض الرب انجبلك
اكليل الغار

مرة من الشفة الحمرا
Bonjour قالت
دغري جاوبت بنمرا
Mon amour يا
قامت فقعتني جقرا
Toujours و قالت
كلما تتلاقى بسمرا
بتعمل اخبار

على هالحلوة تجمعنا
اربع شبان
دفعنا كل اللي معنا
تا الضحكة تبان
و الرمان الوجعنا
بهاك البستان
بعدو والله ملوعنا
من هالمشوار

من حبك يا مجنوني
يما تعزبت
و عينيكي شو قهروني
تا قبالن دبت
و قالو كل لعرفوني
لو دقت علقت
خصوصي هاك الليموني
تحت الازرار

يا حلوة انجن جنونك
ما تقولي لو
خلي هاني مجنونك
عالي بالجو
بغني ليكي و لجفونك
لطلوع الضو
و كل ما بغني لعيونك
هالبدر يغار

انكنتي وحدي شوفية
الداعي من الشوف
و لو كنتي محمدية
بمكة رح طوف
و لو كنتي يا عينية
الكاس الملهوف
الداعي قاعد يومية
عند الخمار

ممتازة يا هاني

شكرا يا ليلى

لمّا حنّيتي عيّد = قلبي المجروح

والهمّ شراشو حيّد = عن حلم الروح

لا تقولي ليش مقيّد = فيكي وعم سوح

احساسي بصدرك شيّد = معبد اسرار

شفافك يا تمر الهندي
خدودك هليون
وخصرك عاطول بزندي
دافي ومحضون
ولما بتكوني عندي
قلبي بيكون
عم يمشي متل الجندي
عا خطوط النار

سألتي لولا بتحمّل = ع فراشك كن

مرّه للقدّ الأجمل = من سحر الجن

قلبي منسّك ومأمل = قدسيّة فن

لكن تنظيمك أهمل = من أهل النار

كنا سوى بهاك المسا و الخمر دار
حلوة و انا من عمر وردات الزغار
ومن بعد ما دار الخمر داير مدار
حسيت فية نار شعلة فوق نار
وصدفة اجانا راهب بتوب الوقار
قلي بكفة عربدة وكفر و دمار
تعقل يا ابني الشر اخرتو انهيار
وبتصير ضايع بين بار و بين بار
صلي لربك تا يمر الاختبار
بركي يا هاني تصير شاعر حب بار
غمرت الصبية و قلت الله يسامحك
شو قيمة الدنيي بلا قطف القمار

شفت البحر من سحر عينيكي انسرق
والبرق من بسمة على ثغرك برق
من وقتها صفيت اعشق هالبحور
وانزل عا بحرك قول يا محلا الغرق

» شوية خرطشة مع رواد شرف الدين
» شوية نكت للتسلية