نتالي والبحر ....

--------------------------------------------------------------------------------------

انْوعْدت نتالي عالبحر مشوار ...... عشرين عام بتحلم تشوفو
بس القدر خلا الوعد ماصار ....... بحكم الزمان وقسوة ظروفو

وتْ بسّم الحظ بيوم صيفيهِ ........ ت يكون في وعدو لها وافي
ورقْصِت متل ألحان غنيّهِ ........ انعزفت ع قيثارة حلم غافي

ووصْلِت نتالي ع البحر بكير ....... ومشْيِت ع رمل الشاطئ قبالو
تاصار يبعت موجتو مْشاوير ........ تبوّس الدعسات ع رمالو

ونزلت البحر ب توبها الشفاف ........ والبحر لاقاها بموجاتو
مايوم سَبْحِت .. بس مابتخاف ......... من حبها ال حلمت ب مياتو

وقالت إلو : شو بكيت تالاقيك ........ بحبك انا والبُعد قاهرني
ياريت تاخدني ت إغرق فيك ........ وتضل طول العمر غامرني

والحب وعّا بينهن أسرار ........ ب خضرة عيونا وخضرة مواجو
وصار البحر عاشق حلاها وصار ..... ساعة لقاها يروّق هياجو

وقرّب الصيف تنام أيامو ......... ورحلة نتالي تدْوب شمعتها
وركعت تودع بحرها النامو ........ مواجو ع شطّو قبال ركعتها
غافي .. وخافي ملوحة كمامو ....... ل انمزجت ملحات دمعتها
وراحت وتركت بس ...قدّامو ....... بوسة على الرملات طبعتها

وطل الخريف وزاد فيه هياج ....... لموج البحر مع ريح شتويهِ
وموجة حزن عم تلطم ... وأمواج ....... تسأل الشاطي وينها هيّ

ومن نار حبّو صار غيمة وطار ....... تاتحملو ريح العشق ليها
ووقت القشعها بأرض هاك الدار ....... تحوّل شتي زخ.. وهْدي عليها.......



--------------------------------------------------------------------------

شادي موسى....