ضربة مهده ..من السما

قصيدة الشاعر سايد كرم بمناسبة عمادة ولادي التوأم
في مطعم وادينا عا كتف وادي قنوبين من هيك اسم القصيدة هيك

ضربة مهده... من السما

من ها الدني ثروات ما بدي***من الساقية ما بيشرب الشلّال
من العمر فيي جرح بيأدي***من الحبس..؟ شو متأمل المرسال

ببيت القصيدة بعيش عا قدّي***بعمّر دني ...!!بحر..وسما..وجبال
بقوّس القدح بالعاصفة بهدّي***ولعند الله..!!بطلع بموّال

وبعدو جبيني عطر بيندّي***وعا دمعتي بيتمرجح الخيّال
وضو القمر بيطل من حدّي***وعا دعستي ما بيوصل الزلزال

ولو صارت الأيام مسوّدي***والضو بعيوني بيطلع فال
بشوف الشمس نمشي على خدي***ونجمة الصبح برقبتي مودال

وقرنة السودا واقفي ضدي***وسهل البقاع لبيت الله مجال
ووادي المقدس ضربة مهدي***وقلعة بعلبك للسما تمثال

وصوت الجرس للروح بيودّي***وأرزة بلادي للمسيح خيال
وغيم الشتي تريّات مجرّدي***وتوب الضبابي لكتف أمي شال

ولو شاب شعري كتير ها المدي***والوقت عا شبوبيتي بيحتال
سيف الدهب مش ممكن يصدّي***وبالعتم ما بيتشمّس الرجّال

ولو صارت الآهات محتدّي***وما ضل عندي غير شغل البال
وصار الشعر عا الحبس بيودّي***وجرح القصيدة بالقلب قتّال
من كل قلبي بقول ها الردة***بلا ها العمادة ملايكتنا قلال
وروح القدس مشتاق للأطفال

سايد كرم

» خبز السما ..!!!
» جبين السما
» شبابيك السما
» مصروف السما
» جبين السما