بشير فغاضل وبحر الزجل

بشير ..فاضل ..
تفضّل عا الخوابي
سليمان
اووف اووف
يا فاضل الجمهور ناطر عا الهدى
يقرا شعر.. بيضيق بحروفو المدا
تا تصير شاعر فوت عا ها المنتدى
ودشّر النهضه ..والمواقع عا حدى
بعرف رنين قصايدك تارك صدا
لا تنفعل وتقول.. قهّار العدا
لما الغنا بيصير صوت..وانفعال
بيضيع حق الشعر ما بيفهم حدا
بشير
يا طراد فاضل طل افرشلو البساط
وحضر جنابك للعصي ولفح السياط
شعري عياط وانفعالي ارتباط
متل البرق والرعد وبذات النشاط
حروفي برق وبانفعالي بقب باط
فوق الارض وعياط رعدي انضباط
وساعة ما شفت ال" يابسة" متل البلاط
مسيطر عليها آب ما بتعرف شباط
جمعت الغيوم الثابتة والاحتياط
ونزلت دمعي فوقها متل المشاط
ولما تصير اليابسة مش يابسة
بتصير تفهم انفعالي والعياط
سليمان
لا تنفعل يا ريح ..وتطيّر وراق
روّق معي ..وتعلّم تحبّر وراق
شوف الجنون بليبيا وشوف العراق
وبالشام يا فاضل اذا بدك امراق
بتقشع شعوب مشردّه وشوق وفراق
من أنفعال الحاكم العكر مراق
سلمي رواق وانفعالك كارثه
ومين البيبقى..حي بعد الاحتراق
بشير
يا ليل خيطلي من نجومك تياب
ومن شان اخفي "البحر" وسعلي الجياب
طراد انفعل من ردتي وعرفو الشباب
ولو ما انفعل ما بيقدر يلاقي جواب
ولما القدر ع حدودنا الارهاب جاب
وع تراب ارز بلادنا حام الغراب
لوما انفعال الجيش ع حدود الوطن
يبست الأرزة وما بقي حبة تراب
سليمان
يا فاضل الموضوع مش قصة عناد
تا تنفعل وتصير تكبس عا الزناد
حب، الوطن مش عنجهيه واعتماد
عا راس حامي وزند... روقوا يا ولاد
بعرف وطنا غارق بموجة حداد
وجيش الوطن صمّام بوجود العماد
كانت الفتنه خرّبت أمن الوطن
لوما القياده الواعيي راح البلاد
بشير
لما الوطن يا جيشنا شفتو جريح
بالأنفعال حميتنا ونلت المديح
ويا طراد حتى يكون موقفنا صريح
بهيكل مسيح الناصري وفعلو المليح
حضرة جنابك كنت قاعد مستريح
تبيع الحمام وكم نعجة للدبيح
لوما مسيحك ينفعل في وقتها
كنتو بهيكل والدو بعتو المسيح
سليمان
ما تقول عن يسوع عصّب واشتعل
لا يصير بيني وبينك الليله زعل
التاجر الفاجر بعد ما الهيكل جعل
سوق ومغاره..!! مشكل كبير افتعل
ما تحاسبو وتقول من هذا الفعل
وتنسا الشمس بتغيب لو قح وسعل
هيدا المسيح الناصري العا الجلجله
سامح يا فاضل صالبينو وما انفعل
بشير
يا طراد حتى تصير تفهم بالوما
فاضل بكلمة(ت) منطقو جهلك رمى
يسوع سامح صالبينو انما
دمع القسا عا وجنتو سال وهما
ولما على الخشبات فادينا ارتما
ورد الأماني على السما وقدرو سما
بواب السما والأرض عاشو الانفعال
انشقت الأرض وفسخو بواب السما
سليمان
لما المرا بتصير تلعب، بالمزاج
وبتنفعل متل، العواصف والمواج
بتخرب يا فاضل بيتها وبتقول حاج
ما عاد، بدي ساير بيكفي غناج
معقول هوني، ينفضح سر الزواج
وسر، الزواج مقدس، وع الراس تاج
وحتى السعاده عا، الديارتردها
بتصير تبرم بالفتيله والسراج
بشير
من 17 عام بالظرف المرير
تحرر جنوب بلادنا ودق النفير
وتتشوفني بعين الأمومة عم بطير
شوف انفعال الأم برجوع الأسير
وعن هالمرا اللي مشيت بعكس المسير
رح جاوبك بلكي بجوابي بتستنير
تنقول فلت والنحل عاف القفير
وتركت بكي اطفالها جنب السرير
بدو الرواق بهيك حالة يردها
يما انفعال الروح برجوع الضمير؟
سليمان
مهما العواطف فيك جاشو وغررو
جهلك ما فيك بأنفعال تبررو
عنّك يا فاضل من قبل ما تحرروا
درسو الملف.. واغتيالك قرروا
ليش بحرب عرسال أسرى تضرروا
وكفّار داعش ها الجريمه مرروا
لو كان في قائد حكيم بوقتها
كانوا ما ماتوا يا بشير تحرروا
بشير
يا طراد فيق وعالجهل لا تقودنا
شرود الوحي نقطة ببحر شرودنا
من عودنا ما سمعت نغمة(ت) جودنا
لوما الأنامل تنفعل عا عودنا
ومنشان تعرف شو السبب عا حدودنا
الخلى الشهادة من نصيب جنودنا
هيدا رواق وطول بال الحاكمين
تسبب بموت جنودنا بجرودنا
سليمان
يا انفعالي سآل يلّي بيفهموا
لوما الخطط ما في جنود تقدمّوا
وموظفين بلادنا ما بيحتموا
الا بدمعة انفعال ..بموسموا
وكل البسرعه موازنتنا قدّموا
كانوا على نتف المعتر يرسموا
لولا تروّوا شوي يا مستر بشير
ما في سبب كانوا معشك يخصمو