جوقه فادي فياض الجديده

هيثم بريئ وطيّب وحبّوب
ومهتار قلبو بيشبه القشطه
وفادي خلق فشّاط مش محبوب
فشّط على نخّول كم فشطه
وما عرفت جريس ليش يا احباب
قاشط مع المضروب ها القشطه

فادي فياض

بين النحل يا زرقطة أشعار
لا نمد معقوصك تا تعقصنا
اربعة نحنا متل أعصار
زدنا عا منبرنا ما نقّصنا
نحنا بجوقة أربعة شعار
ورأيك ما كان نهار ناقصنا
بس ناقصنا يجينا نهار
من لسانك المبري يخلصنا
هههههههههههههههه

ألشاعر سليمان طراد

لو كنت هيثم أو كنت نخّول
ما كنت برضى فيك متريّس
ما الكل عارف انت عرض وطول
دروب الضجر بالصيف بتقيّس
نزّلت حفله من شهر ايلول
والناس قالو شعرك كويّس
ومن يومها لليوم مش معقول
بعدك بتعرض حفلتك عا طول
عليها يا فادي بعدك متيّس

فادي فياض

بين اللقاء وبين جوقة حسوب !!
مغني عشر حفلات تسلايي
ولو كنت متفرغ ... بقي مكتوب
إسمي بكل ضيعة مضوايي
نوعية الحفلات يا مضروب
بتخلد الشاعر متل رايي
افتح يا جاهل صفحة اليوتيوب
لو كنت متجرد من الغايي
نحنا بجوقتنا مش المطلوب
نطنطن بإعلاناتنا كفايي
لكن انت مفتن شعر محسوب
بليس تاني عالدني جايي
كل حكيك صار بالمقلوب
مع كل شخص بتلون حروفك
تا صرت يا سليمان حربايي


ألشاعر سليمان طراد

يا ريتني بلبنان حتى تشوف
قديش حجمك حد ابداعي
وحتى اذا بغني انا بالشوف
رح صير حاكم شعر اقطاعي
وبحمل حنين جروح قلبي دفوف
تا يضل جفن الموهبه واعي
وفوق السطور بدق روحي حروف
ومهما عليي تكرفت دواعي
نهر الحبر رح ينفجر ويطوف
وينزل شتي الدهسشه من نخاعي
في وقتها خواريف مش خاروف
رح تندبح كرمال بحر الشعر
واحمل سلال المجد بكواعي



فادي فياض

بتقول بدك تحمل السلة
ومن مجد زايف تقطع القلة
هي سلتك بالشعر يا مجنون
من تحت باطك طلعت مسلة
بالشوف يما بارض برحليون
انت مش شاعر انت علة
لسانك بقي متل الرمح مسنون
وانسان من شرو مش مخلي
بتقدر مهرج حد منا تكون
حتى طفالا المنبر تسلي
يما حكواتي على المضمون
شعرك حكايي وفكرك مجلة
وبالرغم ما برصك مع الزيتون
ما كنت مرة سفرتي تحلي
ما استغربت انك العشرة تخون
حل عني وفل يا سليمان
براسك ما بدي تطلع الفلة


ألشاعر سليمان طراد

هيهات منّك آخ يا فادي
يا مدّعي بالشعر يا مغرور
يا ريت موسى كبّك بوادي
ولا عربشك عا الموز والزعرور
خليك قاعد هيك عا حيادي
صوتك نشاز بيشبه الزمور
غنّي معك ..!! ؟ ما بقبل ولادي
ولادن ..يخلّوا...و يسمعوك...؟ بثور
بتنزع الحس الشاعري وعادي
تفشل وترجع عا الكبار تدور
هيثم ابن خيّو لبو شادي
وجريس قبل تا يساعدك مشكور
من بعد سالم لونك رمادي
مع نسر كنت تحلق ومسرور
واليوم انجق تلحق العصفور
هههههههههه


فادي فياض

سخّر ضميرك هيك ضلك عيش
عالحرتقة والجهل والتلطيش
الما بيعرفك عن جد يا سليمان
بيقول شاعر هيّن ودرويش
لما جناحي عالمجرة كان
جناحك وبر كان وما صفاّ ريش
صوتي نشاز بذينة الطرشان
وشعري عدم بعيون لخفافيش
شو بدك بموسى وابن حمدان
منهن ما رح بتحصّل التجييش
انت يا شاعر بربع لسان
حكيك عا صفحات الشعر تقطيش
بتحكي عن رفاقي بقلب مليان
وبتضل بملفاتنا تفتيش
من لسانك المبري استحو النسوان
يلي اشتغلو بفرن لمناقيش
مدري الحسد بعيونك العميان
ضاربك مدري صرت يا بحر
عايش على المشروب والتحشيش


ألشاعر سليمان طراد

طيّب اعزرني ما بقا بدي
افتح ملفك وسّخت يدي
من قلبك الاسود هرب سلّوم
ومش مزح والله ها الحكي جدّي
تركتو من الشهره عمر محروم
وعارف جناحو الفوق بتودّي
تا تحرقو بالجوق ما في لزوم
انشالله بلاه بتقدر تهدّي
نخّول بعرف داعمك تا تقوم
وهيثم مجوهر صار ها المده
ومهتار مركب سمعتو بيعوم
ببحور فوق الغيم ممتدي
وانتي بقيت بجوقتك مشؤوم
وبدك شهر تا تكتوب الرده
بس الحقيقه بحبك ومهضوم
عا شرط اوعى تنتخي ضدي
بخليك من غبرة عروق التوم
تطير بسما الألهام يا فادي
والا عا كتف الريح ما تهدي



فادي فياض

كلما خيالي كلمتي نخّا
سليمان ضربة قاضيي توخى
كل شي بوجك بهدلة شتّيت
وبتقول من غيم السما زخا
دمك سميك واسمك من الزيت
وما فيك متلي تلبس الجخا
رشاش شعري من الفكر عبيت
وهلق براسك طلعت الطخا
ياما شنقتك بين بيت وبيت
وزندي عا عنقك حبلتو رخا
كنت افتكرتك بحر وتمنيت
شوفك بحر بالشعر عالمنبر
يا خجلتك طالعلنا بخة



ألشاعر سليمان طراد


ما كان بدي من كلامي تنجرح
كان قصدي دخّل ل قلبك مرح
لما حسابك ينجمع او ينطرح
بلاع الخساره وغبّها بصدر انشرح
سلّوم تركك بعد ما عاش الترح
وعليه والله ما اعرفت مين اقترح
يترك الجوقه تا يغني مع طليع
بس الحقيقه طار قلبي من الفرح
خخخخخخخخخخخخخخخ



فادي فياض

شو باك عامل متل ما عامل جحي
يا تجرة البيض الما فيها مربحي
يا بحر ليش داير عا تبويس اللحي
ما فيك مهما عليت تقعد مطرحي
سالم الغانم غرّد على مسرحي
خيي وحبيبي بالأصالة والوحي
يا بتفتتح موضوع يغني السامعين
يا خيّط بغير المسلة واستحي


ألشاعر سليمان طراد

ما بحب تزعل بعرفك عقلك خفيف
بلّش معي بموضوع فكري مش عنيف
بين القلب والراس في مشكل وكيف
بنجمع حلم مجنون مع واقع مخيف
بعرف انا أنسان متربّى شريف
بس الفقر يا صاحبي تركو نضيف
كيف شكل بدنا نحاسبو ان ابره سرق
وهوي يا فادي ما معو حق الرغيف


فادي فياض

بعطفك فقير الحال جايي تشملو
بدولة تا فيها يعيش راهن منزلو
تاجر انت عم تحتكر تا تنشلو
ما بتقدر تخدعو ولا تبرطلو
لولا سرق إبرة انا بزقف إلو
ما بيسرق الإبرة تا يغزل مغزلو
غير ما يقطب تمك بإبرة وخيط
ما بيقدر رغيف الكرامي ياكلو


ألشاعر سليمان طراد

تاجر انا وبغربتي متل الأسد
لا شايط رغيفي ولا بعمرو كسد
وملح الخميره كل عمرو ما فسد
ما همني من أمر فاسد لو فسد
شر الحسد آيي وحبل من مسد
حرفي كأنو روح طالع من جسد
اخجل عا حالك انت جتّه هامده
وموج البحر مخرز بعينين الحسد



فادي فياض

ما بحسدك عا قرشك وعا خيبتك
يا ريت فيني احسدك عا هيبتك ههههه
تاجر انت والشك عاش بريبتك
بقلع عيوني انفكرت في صيبتك
ذكرت الفقير اللي تمنى غيبتك
عالعيد لو زارك حلف في شيبتك
بتمنحو هديي جديدي من المحل
من قبل ما تحط المصاري بجيبتك ؟؟؟؟؟



ألشاعر سليمان طراد

عينك بإجرك ..حطّها وتا غايتك
تقدر تحقق ..اتعب من بدايتك
تأمل بحالك اوقف على مرايتك
برطلت حالك يا بليس غوايتك
فاجر أكل تاجر لأنو هوايتك
ع كتاف غيرك عم بترفع رايتك
مش هديه بجيب رح جبلو العصا
خصوصي اذا نصّاب متل حكايتك



فادي فياضo
التجار متلك انت اشباه الرجال
عم ياكلو رزق اليتاما من الغلال
فاجر بحقك لو بكون بهالمجال
بيتشكروني عاليمين وعالشمال
يا محتكر بالغش كل الراسمال
وبتنهب من الناس بسنين الطوال
منها جريمي ان جيت وسرقتك انا
النصبة من النصاب رزقة من الحلال

ألشاعر سليمان طراد

فادي النصب من آخرو لأولو
مره نصب علّي بنالو منزلو
وكل اللي غنو بأووف واللي زجلّو
عملوا الشحاده لمجد الله مدخلو
أنتو يا نصابين لا تتدللو
كسرتو أياديكن.. وتا تتسولو!
ال بيقبل النصب وبقصدو يحولو
للقاعده ..وبشرع الله يحللو
عا اسم الله بتاكلو مال اليتيم
وبتعرف الشحّاد الله ما الو
ههههههههههههههه


النصبة عن النصبة بتفرق يا زغير
اللمسات عم تنصب نعومة من الحرير
ومن أوف شو نصبنا بقلك يا ضرير
نصبنا لزجلنا حق إعلامي شهير
نصبنا متل نحلة عم بتنصب عبير
وبتروح بعد النصب تا تعبي القفير
عنا ضمير ومكرمة بنصباتنا
لكن انت تاجر ما في عندك ضمير


2015 24 اوكتوبر