بو خليل وسامر خوري

مطلوب رأس بو خليل من قبل سامر خوري

خيالي يا بو الخلّ ان قصدتو استسمحو--بلكي سمحلك بالبصيره تلمحو
المطمحو بالفلسفه يوصّل ألو--من الاّ نهايي يشيد سلّم مطمحو

الاّ واقعييِ قدْ ما تبني صروح *** بتضّلها متل الجسد من دون روح
من الاّ نهاية ما حَضر بو الخل خاف *** لولا إجا يا سامر الخوري تروح

واقع أنت بالواقع وما بتنحسد--الواقع ظبي بالشّعر وخيالي الأسد
ومش فلسفه تكوّن جسد من واقعك--الفلسفه تكوّن من خيالك جسد

خيــَالك أســَدْ مَعرُوض بسوق الكـَسدْ *** بقـْفــَاص فلسفتك وعمرو ما انطـَلقْ
البـِعَيّن مـَعرفتو عم بيخلق جـــَســـدْ *** الفضَلْ ؟ للمَخلوق إما للخـــَلــَقْ

لوما وحي نور الألوهيّه صحي--بخيال الله كان كل شي بينمحي
المخلوق طينو مي وشويّة تراب--والخالق تكوّن من خيال ووحي

خيــال ووحي بيصَوّرو بيلـَوّنو *** لوحة. يا سامر والصَعب تا هــَوّنو
ما زال من لا شئ كوّن كاينــة *** تفلسف وقلي مين؟ يللي كــــــَوّنو

دخلك أنت مين الفكرك أوهمو--راح تفهم الكوّن خيالي وألهمو
ما زال ما عم تفهم الّي كوّنك--كيف الكوّني أنا راح تفهمو؟

يا سامر الخوري. ب الكنيسي الباب؟؟ *** كيف ما تدّق الباب بيرد الجَواب
وأنت عجزت يا شاعر وما عرفت كيف *** لابس خيال الروح يا إبن التراب

لا تواخذني خيو شنو أعياد ومشغول
ميلاد مجيد وعيد سعيد ع الجميع

يا خيال تا أقدر عا ثمّي أنبسك--مثل المسيح بجسم فاني بحبسك
وأنتي على المنبر ما راح تصبح مسيح--وبعمرها روح الشّعر ما بتلبسك

ينعاد عليك وعا حبايبك بو الخل, وكمان عا حبايب الموقع
كل عام وأنتو بخير

عيسى يا سامر طالع العَهد القديـــم *** أحيا المَيـِّت كيف بيصفي رميـــم
وما زال بالتــالوت عِندك إعتقـاد *** ليش؟ لابس روح شيطان الرجيم

الثّالوث بيعيش بنفوس مآمنه--تا تضلّ من سوء النّوايا آمنه
وكيف بدها آمنه تعيش النّفوس--وروحك ملاني بالنّوايا الكامنه

روحي وديعة ب جسد بيفوح طيـــب *** بعدو ما نشَّف دم كفّو ع الصليب
ومنشان تسمَّى الروح تالوت الصلا *** آب وأبن والروح!! عا جسم الحبيب

يلّي عا خشبات الفدا دمّو نثر--بيضل عايش لو عا جسمو ما انعثر
وعا خشبة المنبر أنت عندك جسد--بس لخيالك ما عمنلاقي أثر

حلووووووو يا سامر
اعذرني بو خليل بيت حلوو

يا

سامر الخوري بساحات النـــِزَال *** لوما مواقفها شو قيمتها الرجـــال
وأكبر مذلة وعار عا منبر زجـل *** ينقال عن رجـَّال هاجم ع خيـال

[color=red]مو على راسي حلوي طبعا color]

شكرا

خيالي كشف فيك المعاني المخجله--وواقع فقر حالك معي بيّن جلي
الما بيقدر يفاخر بمرجلة الخيال--بيبلّش يفاخر بسيف المرجله

العاباب خيبر سيف مَقدرتو حمل *** من الفقر غيّر واقعو وجرحو دمل
ويا خيال صحرا بنعيم الآخـره *** الأنسان ما بينقاس إلا بالـــعَمـــــــل

لا تواخذونا نزلت على لبنان كم يوم وشغل وضروف صعبة

أطلعي بمطلع خيالي يا طليعه—طلوع التّاج عا الجبهه الرّفيعه

أقطعي الدّنيه الوسيعه بقلب راسي—عا دنيه ثانيه أكثر وسيعه

أنا عندي دني جبال ورواسي—الطّبيعه بحضنها طفله وديعه

كلما بيلتقي شرودي بحواسي—بيخلق من رحم فكري طبيعه

شو بدّي بكون ضيّق عا قياسي—مجالو ما طلع شرده سريعه

ورصيدو هموم ودموع وتعاسي—ومآسي بلا شفيع ولا شفيعه

وأبو الخل الأجا يجرّب مراسي—وقع وقعه قويّه بهالوقيعه

أنا راح ذكّرو لو كان ناسي—الدّني خلقت من خيالي رضيعه

بلا جبريلنا البالحلم راسي—وبلا الوحي العطي طهه الشّريعه

لا كان بينولد فادي القداسي—ولا انعطيت لهادي الدّين بيعه

وبلا خيال الرّسم لوحة مآسي—وتماثيل النّحت منها بديعه

وبلا خيال العلم ما في فراسي—وبلا خيال النّغم روحو صريعه

ويا بو الخلّ هالواقع القاسي—المنّو بتطعم سطورك قطيعه

عيفو وحطّ كاسك تحت كاسي—تا صبلّك من خيالي ونبوغي

ألف صوره وألف حجّه وذريعه

عدل سابقا من قبل سامر خوري في السبت 8 يناير 2011 - 8:49 عدل 2 مرات

عيفو وحطّ كاسك تحت كاسي—تا صبلّك من خيالي ونبوغي

ألف صوره وألف حجّه وذريعه

صديقي العزيز أبو خليل
كان لي الشّرف حاورك, ولو كنت حابب أعرف أكثر عنّك, كونك شاعر متمرّس وقوي
هيدا قصيدي وبترك ختام الموضوع لألك على أمل نتحاور مرّه ثانيه بالمستقبل
ألى اللقاء

يا بو سمرا بدون معلميي *** نصيحة حاج تتمرجل عليــي
أنا الجسم وأنت خلفي خبالي *** ومهما ركضت ما بتوصال ليي

ورغم ما الشعر بالمعنى خَيالي *** وبدونك ما منعرف شاعريي
ما فيك تخُط ع الصفحة مقالـي *** لوما ذاكره بتعيش فيـــــي

إذا قلت الطبيعة راس مالـــي *** تا قلّك عن حقايق واقـــعيي
الطبيعة مش وهم وتراب بالي *** الطبيعة متل جسمي ماديـــي

اذا بتعيشها بالوهم حــــالي *** ويا توما إذا زغزغت نـــيـِي
بجسمي حُط أصبع لا تبالي *** تا تعرف جروحي وين هيــي

أنت يا خيال عايش من خلالي *** تا أصفح عنّك وأمحي الخَطيي
لبست الشَوك ع جبيني العالي *** وصليب الهَمْ رافع عا يديــــي

أنت يا خيال لجسمي كمالي *** أنا الأصل وأنت مني عَطيي
إذا بتغضب شويي إنفعالي *** وأذا بتروق رومنسي شويي

أنت صاير متل زيز الحقالي *** عم يرندح قصايد عاطفيــي
مهما يكون رومنسي ومثالي *** بيبقى مطمحو جسم الصَبيي

وأنا الجسم اللي لبس النور هالي *** وعم تصّلي لاسمي وأسم بيي
قبل ما تشّوهو صورة كمالــي *** أنا المن بين مخلوقات ألله
بجسمو بارك الجنة العَلــــــييِ

هلا بو سمرا تشرفت فيك ولا تواخذني على التأخير
يا هلا فيك وبكل شعّار فلسطين الحبيبة انا بصراحة
طلّاتي قلال ع النت وصلت للنصف نهائي من أول حوار
بتمنى تكمل مع الشباب حرف عمار كوثراني ناصيف طراد كرم شامخ عامر الخ كلهن فيهن البركة متل حضرتك
محبتي وتقديري لشخصك الكريم .. بو خليل