لقاء مع الدكتور المغترب إياد قحوش

لقاء مع الدكتور المغترب إياد قحوش بمناسبة إصدار مجلّة السايح
الكاتب: Rami Khoury | التعليقات: 26 تعليقات
Monday, Apr 19, 2010 5:01 PM - نسخة للطباعة | (2664) مشاهدة


لقاء مع الدكتور المغترب إياد قحوش بمناسبة إصدار العدد الأول من مجلّة السايح الألكترونية للشعر باللغة المحكيّة وللزجل
-------------------
شو هوّي الشعر ؟
- مافينا نحدّد الشعر .. كل مالبّسناه طقم بيكبر عليه وبيشقشقو


• شو الفرق بين اللغه الفصحى و اللغه المحكيّه ؟


- اللغه المحكيّه بتعربش معنا عالسجر و بتطلع عالجبال وبتسهر معنا بالشتويي
ومنشوفها مع الولاد عالبيادر ومع الفرحانين بالأعراس ومع المحزونين بالمقبره
أنا كل أحلامي باللغه المحكيّه
اللغه الفصحى بتعرّم عالورق




• شو الغايه من تأسيس مجلة السايح ؟


- الغلّه كبيره ومابيسوا نضلّ نضمّن الشعر باللغه المحكيّه لغيرنا




• من وين إجا اسم المجله ؟


- من السايح هالجبل الكبير ل بتشمّ ريحة السما من عندو و قاعد قعده عربيّه بنص وادينا




• مين معكون بالمجله ؟


- معنا غوّاصين كل ماشكّو ع سواحلنا بيرجعو بكمشة درر




• هل المجله بتقتصر عالشعر باللغه المحكيّه وعالزجل ؟


- شعر و زجل و و قصص و دراسات عن الشعر باللغه المحكيّه وعن الزجل وعن الشعرا




• شو بتحبّ تقول لشعرا اللغه الفصحى ؟


- بقللهم في حلاوه ببعلبك وبغير بعلبك
الشعر باللغه المحكيّه تثقف و دار بلدان .. ونحنا عم نعجقو بالصور وبالخيال وفتحنالو شبابيك عالفكر .
بشعرنا منحكي عن الخيال للي بينكسر , والصوت للي فيك تمسكو , والضو البتسمعو
نحنا فتنا عالموت وبحبشنا بخزانتو
مشينا بعكس الوقت
دوّرنا الأرض ع إصبع ولد زغير




• مينا نحنا ؟


- شلّه من الشعرا بيكتبو شعر اللغه المحكيّه والزجل داقو طعمة الملكوت وعم يحكو عنها




• أكيد في صعوبات قدامكن .


- طريق المجد دائما طلوع




• منلاحظ إنكون عطيتو لقب للمجله ت تكون للشعر باللغه المحكيّه وللزجل . يعني فصلتو شعر اللغه المحكيه عن الزجل .


- الزجل بابو وسيع ومرحباني وفي ع عتبتو نضوة فرس
الشعر بابو ديّق بس سقفو عالي .. وقلال بيفوتو من الباب الديّق
تيلاقو الملك




• ومين هوّي الملك ؟


- السرّ الكبير





• بمين تأثرت من الشعرا ؟


- بألله




• ليش الله شاعر؟


- الله هوّي الشاعر الأكبر .. هوي شاعر الشتي و الألوان و الوقت والحلم




• وشو أحلى قصيده لألله ؟


- القيامه





• بتآمن بالقيامه ؟


- القيامه حلم للناس ل بتصلي .. بس للشاعر الكبير القيامه ذكرى




• من أيمت بلّشت تكتب شعر؟


- من يوم المرق من حدّي الموت وجفّلني .. وبعدني جفلان




• وأيمت بتكتب ؟


- أنا ع طول عم أشعر ماعدا وقت البكون عم أكتب شعر




• كيف يعني ؟


- يعني الشاعر بتكون حواسو عم تعبّي طول الوقت
و وقت بيكتب بيفضّي من الخزّان




• شو عمل فيك الشعر ؟


- قدّسني





• بتحكي عن المحبّه كتير شو إلها علاقه المحبّه بالشعر ؟


- قللي صديقي الشاعر المشتاوي الكبير عصام يوسف .. وقت بتقول لحدا بحبّك كأنّك عم تقللو مارح تموت . المحبّه بتخلّد الشعر




• شو مهمتكم بهالمجلّه ؟


- إنو نعبّر خيط الروح بإبرة الكلمه




• وشو ناويين تعملو بالخيط ؟


- يانغزل طقس صافي تانقدر نشوف الملايكه الشفّافه يا نلفّو كبكوبه بلكي بتصير كوكب جديد




• ومين بتحب من الشعرا ؟


- بحبّهن كلّهن لأنو المحبّة الحقيقية بتطلع من القلب مابتنفرض من برّا




• كلمه أخيره


- بتشكّرك وبحب نوّه بجهود الأخوة جهاد ابراهيم و جورج حنا ( أبو اسبر) بإخراج مجلّة السايح وبشكر ضيعتي و وادينا يللي دايما بيشجعو الأعمال الثقافية الجميلة وبوجّه تحيّه لكل زملائي شعرا المجله من سوريا ولبنان



------------------------------
من قصيدة ملاك النّار

وجْوانحو صحرا

كأنْها غيوم

صفرا

وقت بتقوم .. نص القيامه عالدني بتقوم

ولمّا بيرفّو بالفضا

بتفكّرو

واقف عم يهوّي على منقل نجوم


---------------------
منقول عن موقع ضيعتنا

عصام يوسف


يا نازل ..
و بعدك .. عم تعلّي
شو كان بدّك بالأرض
قلّي ؟؟
ما بتعرف الأرض
اللي منّا تراب
و إنت المدى
لْ من لون .. بيصلّي
....
فضّيت .. أحلامك
على السرساب
و كان الوقت تحتك
عم يملّي
و احتار
عا خْيالو
اللي كلّو غْياب
شو بيحمل ..
الجرّه أو السلّي ؟!
...
يا شاعر اللي قصايدك
غِيّاب
و فيهن إنت "سايح"
بهالطلّي
متل لْ كأنّو
مرمريتا كتاب ..
راح الجبل تا يوقّع
كتابك
زاح السما ..
وقّعللك .. "مْجلّي"

اياد


صوت القصيده
كل مَ بشمّو
وهوّي عم يلفّ المدا بكمّو
بشعر كأنّي طفل
كل ماجاع
للعاطفه .. بترضّعو إمّو
..
يابنت سعد
الريح مَ بتنباع
واللون عاكفّو حمل دمّو
والشعر
مهما ندور فيه كواع
مَ بينشف الزّيت ل على جبينو
ولا بتيبس الدحكه ل على تمّو





شاعر الجمال الأكبر عصام
**
درجة تجمّد هيبتك
درجه
من تحتها الأيّام مندرجه
بيغلي المجد فيها
وبيضلّ يقول
بدّي بعد عاسلّمك درجه
وإنتي يامعمرجي الكواكب
جول
عالمملكه للي عملتها فرجه
ومابين " واط" العبقريي
و " جول"
كرّجتها .. كرجه بعد كرجه
والكون صفّى بالعرض
والطّول
يقلّك أنا عطيتك تلات تيّام
اهدمني وعمّرني .. يامعمرجي
**
إياد



خْيالك ..
بِحقل الجّاذبيّه
فاح
لمّا وقِع
من سَجْرة التفّاح
مِدري
لأنّو حِبْرَك "الأطعوم" !!
مدري لأنّو كَفَّك ..
الفلاّح !!!
....
شوف السهر
عا طلّتك مَرسوم
هَيّي إلو
مْنِ المَرْغَريت ..
قْداح
و لو خَلّص
نبيد السما
المختوم
زيح الحجر..
و مْنِ القيامه .. فْتاح ..
....
و عـَ المنقل
لْ شعلان كلّو
نجوم
عم تِسْتِوي
الأجساد و الأرواح
آخر ضيوفك ..
في قمر معزوم ..
شو بْضيّفو ؟ ..
باقي صَدر و جْناح !!...



اياد

لشاعر الألوان المائية والضوئية عصام
**
ياحامل العرض .. وع سلّم طول
طالع
كأنّك آخ للزغلول
بكرا إذا 'عالأوف' رحت
الدّف
بيصير صينيّة عنب أيلول
وبيصير
خدّك كل ماينحفّ
يزقزق كأنّو غلول صابو غلول
بعرف إنت بالحب
كنت بصفّ
لاقى لمسألة الجنون حلول
وبعرف إنت بالبطش
عندك كفّ
خللى الرواح ل طالعين نزول
وبعرف وقت مَ الصبْح
نهرو خفّ
عطيتو من عيونك نهر مجدول
ولمّا الوحي
من الشاعريي جف
سقيتو خيالك 'ياظريف الطول'
والكون يللي دار فينا ولفّ
يالفّ خصلة ضو
ع جبينك
يالفّ عاإيدك قرص معمول

قصر الحساسنه
**
وجهك قصر للمجد
والمنجور
هيبه .. القفل عابابها منجور
من عبستك
بيطقّّ ضهر الريح
وعا دحكتك .. بيصبّحك بونجور
ياشاعر
بلوحاتك التلويح
إيدين : ضربت بالعصا العجّور
وعصرت كرم الله
بحر سبّيح
بتفكّرو ع مرايتك حنجور
خلّيك طالع
قصّ آخر زيح
تربّع على عرش المدا المهجور
و عبّيه أرز
وسنديان
و شيح
واسقيه
من طوفة أبد مفجور
ولوّن القبّه
من صلا التلميح
القدّيس بدّو كفر ت يصللي
وتايشمخ الإيمان
بدّو فْجور






الدكتور اياد

هيدا نشيدي
وهيك وجداني
قللي اكتبني تراب إنساني:
الروح لمّا
من جسد مفتوق
بتزرب يَ سالي عازمن تاني
بتتحرر
بتركد .. ت حتّى تدوق
نبيد الخلود .. ب كون مجّاني
شوفي الأرض
قدّيش فيها شقوق
هودي بقايا ناس عطشاني
شقّت بإيديها
دهر مغلوق
وفاتت بعالم شعر نوراني
ومش قادره تصبر
ت صوت البوق
يدحرج عن الشاطي البرتقاني
ومن وهج درفه
بابها مدقوق
بإيد السؤال الحامل صْواني
ومن حرش عالي
من شعر مفروق
عامجد
نزلت هيبتو عياني
بيلملم الشاعر ل قلبو حروق
وبيطهّر شفافو
بصليب الضو
وبيكب ع سطوح الدني غناني

اياد قحوش