ضوئيات بو شربل

Hace 20 horas
.رح ضل حبّك حبر عا وراقي
واغمر الكيبورد خوف مني يضيع
وبّوس قلام الشوق بالصابيع
بركي بعد ما غيب عنك شهر
تلبوس عيونك زهر عا فراقي

وتتفرفط زهورك على وراقي

لا تصدّقيني ..!!بعدني مغروم..
وبحلف ما فيني عيش من دونك
... بتخايل المنحوت والمبروم
وبرجع بصفّي الرسم بعيونك

وبقوووول يا جنيّتي وراقي
بحر الزجل عا النت مجنونك

بهرب تا ارجع شوفك من جديد
بركي ...من الألهام بتروحي..؟
وكلما بفكّر يوم اني بعيد
بخبّط بحالي بحس بجروحي

وبقوول بعدك عايش بروحي

بجر الزجل مغروم

طلوع الروح.!!

طالع عا بالي .طق..بركي بروق
وبرتاح منّك..يا ورق عمري
وبحمل قلامي عا سطر مبروق
وبحس روحي هم عا غمري

وبمشي حفا تا يحترق جمري

وبشلح وجع ..وبلملم جروحي
من أرض فيها مفرّخ القندول
وبلبس حرير الضو من روحي
وبطل عا تاني سما وبشوف

جنيّـــة وراقي عا غيم النول

بفرفك عيوني..بشد عا جفوني
بحمل مرايي ..بروح اتمرّا
بلاقي السهر بيمص بعيوني
وصورة حبيبي طالعة البرا

بيسوّد قلبي كلما بتبيّض
بوجي الدني .بعينين محمّرة

كذّاب

بتحبّني..وبتغار؟ يا كذّاب!!
صاروا البيحبوا قلال..جرحوني
عم ياخد عليي دوا الاعصاب
تا صدّقك ..قرّب ..ل صوبي شوي
تّطلع بوجي..هون بعيون

قلي بحبك..قولها ولا تخاف
ما بيسمعك الا صدى روحي
دقة قلب ..غمرة جمر وشفاف
بتعيش متل الحلم ..وبتوحي

قلّي الحقيقة .وقطّب جروحي

بتحب غيري...؟حب لا تهتم
عا شرط قلبك دشرو ملكي
الا معك ..زهري عطر ما انشم
عرفت الحقيقة بعدني الملكة

اياك تسأل كيف قلبي حس
اسمعتك بتحكي بخط لاسلكي

بحر الزجل

طالع ..عا بالي

طالع عا بالي ..قطّفك بوسات
وضمّك عا صدري .وغيب
من ها الدني تا جيب
أحلام وحكيات
فيها جمال وطيب
..

طالع عا بالي قطّفك متل الكرز
... بالتم مش بالإيد
لكن يا حسرة بعيد
والهم انفرز
والجوع عم بيزيد

طالع عا بالي برّمك كل الدني
واسهر معك...!! بالبيت
عا الشعر..مش عا الكاس؟
وكلما كتبتي بيت
يتحرّك الأحساس
عا مسافة سنة

طالع عا بالي ..زت اشواقي
ومشور معك بالروح
ولم القصيدة جروح
بركي الوجع بيروح
مشتاق...!! يا جنيّة وراقي

...
مشتاق فيكي حقق طومحي
وطفي لهيب النار بجروحي
وكلما تحسي في بحر مشتاق
روحي عا شطي ورجّعي روحي

انتي قصيدة شاعر بتوحي

صلاحك شعر رايح عا الشغل

Hace 11 horas
قضيّت كل الليل بالتفكير
تا طيور نومي من القلق طاروا
مدري انا مغروم فيكي كتير
مدري العمر قرّب عا مهوار

مرّقت ايدي عا شفافي ..وصرت
بوّس صابيعي وشد عا شفافي
واسأل ضميري...؟طيب..!! ولو كبرت
ممنوع حتى آكل كنافي

لميّت حالي ورحت عا الفرشة
وقلت المصيبي كيف بدي نام
ما زال ما بحلق ولا بفرشي
وهربان من حالي ومن الحمّام
هههههههههه
قررت اتحمم ...وارجع نام
ههههههههه

الغيرة...والصديق

أمّنت فيك...غدرتني وحبيّتها
وما سألت عنّي سرقتها وغنيّتها
ولو كنت عارف شعرها أملس طويل
ما كنت فشخة قرّبت عا بيتها

بتحبّها..وغيران منّك ...؟ها الحكي
ضحكة ...؟انا ما بحبّها ..!!قلبي زكي
ومن كتر ما قضيّت يا رفيقي بكي
قررت اتركها ...!! ويخرب بيتها

هيدي قصيدة حروفها متل السيوف
بتشرب حبر هربان من لون الحروف
وكلما السعادة تحرقصك حك الكفوف
ومرّق الصورة قبال عينك تا تشوف
حلمك وهم...وقصايدك ي ريتها
خلقت قبل..ما تقرّب على بيتها

بحر الأحساس

سهران...عا الصورة!!

حطيّت كاسي ..وجبت صورتها
ومديّت ايدي امسحت دمعتها
وقلّتلها ليش الحزن يا روح
لقيت الوجع برواز نهدتها

صبيّت محبرتي على وراقي
وقلت القصيدة اليوم سهرتها

ما شفت الا بتزعل قلامي
بتنزل دموع الحبر عا الورقة
بتخلق قصيدة ضو قدّامي
جابت وجعها من السما الزرقا

بقفّي همومي بكاس ألهامي
وبتفز روحي تبوسها بحرقة

بتلّت قلامي بصب فيها جروح
بقطّر أمل هربان من زاتي
بنشّف دموعي برد ليها الروح
بفلفش حنيني بين ديّاتي

وبسكب دموع الحبر عا الورقة
تا تصير ألفيّات ورقاتي

بلاقي القصيدة بنت زغتورة
عم تختبر ألهامها المصلوب
والنهر كلمة العين شختورة
والكاس بعدو من التعب مطبوب

والبحر عم يسكر على الصورة
والضو مطفي ...وداير الحاسوب

بحر الشعر المشهدي

قاعد...عاقل

بطّلت احكي..وعاقد جفوني
وما عدت حرتق..قررت اعقل
وخليّت حبري يشرب جنوني
وشويت قلبي ضو عا المنقل

وما بين حوريّة وجنيّه
ضلّت قلامي هم تتنقّل

اوووف اوووف أخ اخ

مجروح منها ضحكت عليي
وقالت إلي يا بحر كرمالو
بقبل...!! وصعبي وكان ما فيي
ارفض طلب ..وبموت عا خيالو

بحبّو ...؟وما قالت بنجرح منها
وبيناتنا ها الشب نيّالو

بطلّت حركش قلت حلي روق
وما تخيب بعد اليوم ..آمالي
وزهر الما فيني شم ...!! كيف بدوق؟
مفروض عاقل ضل احلالي

وكيف البحر بيروق قولولي
وجنيّتي عم تسهر قبالي

بحر الزجل

معتقل..؟احلام

بعدو البحر مغروم...لا تخافي
ولا تخافي من بحر مغروم
وكلما الورد بتزهّر شفافي
نحل القصيدة عا الحرف بيحوم

بحبك انا..حاجي تعدي نجوم

شميّت فيكي ريحة الزيتون
تا تفرفطوا الأحلام عا المدّه
وكلما بحلمي بشوف برحليون
بحسك قريبي وقاعدي حدي

وتا تصدّقيني....؟ قصايدي عدّي

عصافير احلامي ما فيها تطير
ومنقاد بازك ..حوّم عليي
يا بدوّخو بالشعر حتى يصير
متل العجينة ...واكمشو بديي

يا بتتركي الحرقة بعينيي

طيّب اذا ...بتفلّتي المحبوس
وبتتركيني ...نقود الاحلام
بحرر مزارع شبعتي ووبوس
مطرح ما ورد العاطفة بينام

يا بتتركيني ...عيش بالأوهام

المصالحة

متل الدول..عم يعلقو عليي
وبيعرفوني بحبّهن ..تلبيس
بشعّل الحرب الباردة ..؟وفيي
شم الورد..بالصين او باريس

بيتشيطنوا عليي..!! وانا قديّس

ومن كتر ما عم تقشع عيوني
مسامير..؟ ما مشيّت دولابي
وعرفتهن ..بالشعر من دوني
بيتيّتموا عا النت بغيابي

وبوقتها بطلع من تيابي؟

بلّشت ارسم للسلم خطّة
وشغّل الهاتف ...ضاغطة ظروفي
ونط الوحي عا حاطري نطّة
تزكّرت عندي رفيق معروفي

بيقدر بيعمل بالصلح كوفي
ههههههههههه
الغايي دخل عا الخط..؟كفّو نضيف!!
وقرر يصالحهن ...!! ما بعرف كيف ؟
وقلّي انتبه يا بحر ..لا تحكي
ومحسوبكن اغنى من التعريف

ومن كتر ما ها الشب خبرني
ما قدرت كلمة عا كلامو ضيف

بلّش يقلي..قلوبهن بيضا
ما بيعرفو بالجقد يا سليمان
وتا يرفعولي راية البيضا
مش رح بدشّرهن مع النسيان

وبيناتنا يا بحر كعّوني
وضغطي علي يلعن ابو النسوان

هههههههههههههههههه

ضويّتها...وطفيّت!!

بتهزّ بمروج الحكي الأحساس
بتقيّم... الموتى ...اذا بتحكي
بتغل متل الشوق بالأنفاس
بتبكي ..بتتشيطن ..عا كل الناس
والسر ما بتفارقا...الضحكة

عا الحبر..باقي عندها نخوي
شيطانها ...بيدق عا بابي
ومن كتر منها دكّتي رخوي
مفروض فيي شد اعصابي

مش خوف منها ..؟بخاف عا تيابي

من دموعها...النزلوا متل شلّال
... حنيّت عندي طبع انساني
ومن كتر منّي مذوق ورجّال
فوّتتها عا قلب ل خزانه

ههه
منشانها ..!!لا تظن ..؟منشاني

تاري المرا بتتتشيطن عليي
صرخت افتحلي باب الخزانة
رح افطس من الشوب ..ما فيي
ابقا ولا تكة ...!! عرفت شيطاني

ومش عارفي ...بيفيق شيطاني

هوني انا بنجّت وجداني
ومديّت ايدي حملتها وشديّت
وقلتلها هلّق يا شيطاني
انتي وانا تنيناتنا بالبيت

لا تقرّبي بيفيق شيطاني
قالت ...!! يا ريت تفيّقو يا ريت

هوني انا ضوّيتها ...!!وطفيّت

هههههههههههه

الشتي ...جايي

كلما رحت مشوار..برجع شوف
لون الورد دبلان عا غيابي
بحس السما بتسوّد ..!!بدها تطوف
برجع عا بيتي بسكّر بوابي

برد القصيدة عا الورق وبغيب
بلاقي حروفي ماشية خلفي
بترك ورايي الشوق يجمع طيب
بركي العطر عا مروجها بيلفي

بيرجع الشك يجدد الخلفة

محتار شو بعمّلها تا تصير
تعرف الغلطة وترفع الرايي
وتركع ندم ..؟لكن عنيدة كتير
وجروحها.. بضحكة مخبّايي

ومش عارفي انو العمر هربان
والصيف رايح....والشتي جايي

بحر الزجل.

[center]
مشوار ...وصورة

قلبي حبستو بغربتي عصفور
ما عاش الا بحضن قضباني
وشيطان فكري راح همو يزور
صورة حبيسة... وهم بتعاني
فيها الوجع بركان عم بيثور
وعيون فيها جنون بركاني
وريحة وجعها فايحة بخور
وجران بالأحزان سكراني
سكّر بواب الحب طفّى النور
وقرر يموّت فرحتو بالشعر
وما يعيش مع احلام هرباني

بحر الزكا..[/center]

غدر

قطّعت قلبي برقّتك ونسيت
بحر الزجل ما بترحم مواجو
واغدرت فيي بلا سبب ومشيت
عا بلاد ما بيكفيه انتاجو

وكل اللي عاشوا بها البلد فقرا
وللبحر بدن يوم يحتاجوا

...
غدّار..جاهل قيمتي ..ومجنون
ورايح عا مطرح ..ما بيلبقلك
ضليّت تتغاوى بجوز عيون
بركي انا عا البعد بشتقلك

لا بحن ارجعلك عليك بحن!!
وبطلب يا الله.يردك ل عقلك

..
مسكين..يا ها القلب شو مسكين
فاتح بواب الهم عا الفرقة
وكاتب جروحك عا وراق التين
ومع كل نسمة بتوقع الورقة

وناسي الوفا متل البحر بيضل
يشرب صفاوي من السما الزرقا

بحر الزجل
..

تركت الهم..!!

تركت الشعر وقصايدي باخوا
وحرف الحكي موجوع من آخو
وعطر الشعر خيّل عا ضهر الريح
واشتاق جرحي يلّون سياخو
وقلبي تركني بغربتي عم صيح
من جرح منو عواطفي داخو
ومن بعد ما تعذّبت صرت منيح
مرّقت روحي عا الزمن تا صار
ناعم حنيني تحت برداخو

بحر الزجل

26 de Julio
عم حس . حالي مغيّر وزعلان
قلبي حملتو عا صحن ايدي
بشوف الشرق ..بجروحنا شعلان
والغرب ناطر عاصفة جديدة

والشّام صارت كلّها دخّان
والقتل فيها غير تقليدي
واللي قبض حق الغدر تا خان
عنّو الرحمة صارت بعيدي

والشعب كلو حامل الصلبان
ولون الوجع عا جبينا نبيدي
وكيف ما التفتنا الحق عا الطليان
ومع كل غصة آخ تنهيدة

وشفت البراءة بتلبس الأكفان
وحالة وطنّا صارت شديدة
والكل ايدو حطها بلبنان
وعكّر سمانا وفيّق الأحقاد
وغير الشعر شو طالع بأيدي

زجليات

الغدّارة...والبحر

يا بو خدود اللونها حنطي
ايّاك تحلم.. بالحلم شوفك
بتعمل متل بيلاطس البنطي
قبل الجريمة بتغسل كفوفك

سم الحكي طالع من حروفك

فكّرت... فيك تهدّم صروحي
وناسي صروحي المجد بانيها
عمّرتها بمدماك من روحي
وضليّت عايش قصتي فيها

وجنيّتي الجنّت على وراقي
طعم الفرح....!!قررت نسيّها

بتغار..آه...!! بتغار ما بتحكي
بتقرا الحكي الممحي...!! مش المكتوب
بتمحي عذاب مطعّم بضحكة
بتهرب ...وحيدة .. مشرّدتها دروب

بتندم...!! أكيدة.....بس ما بتوب؟

عا غرورها قررت ركّعها
تا تحس بالفرقة وغذاب الروح
وما يضل يوقف همّها معها
والبحر ينسا..وبالسلامة تروح!!

خلّي اللي معها اليوم...!! ينفعها

قلبي قسي

..

مرا...خاينة..!!

حطيّت زهر قصايدي عا النار
تا فاح عطر الشوق بجروحي
وحسيّت مني رماد عمري غار
حامل هواكي ..وطاير بروحي
وييلحقك مطرح ما بتروحي

لفيّت قلبي بورقة النسيان
وطويّت شرشف لهفتي وضبيّت
وقلت المرا ما بتشبه البستان
بتشلح ورقها ..الأخضر بنيسان
آه...تلبس مرا وتنضب جوّا بالبيت

يا ها المرا الما بتعرفي تعيشي
عم تعرضي تيابك بمعرض ريح
ورسمك طلع من بعد ما الريشة
بكيت عليكي تا اشربتي منيح
غلطة حبر..ما بتقبل التصليح

قديّش فيكي جنّ ألهامي
تا تطلعي بالرسم جنيّة
انكرتي الحبر تا زعلت قلامي
وتلّونوا بالضو عينيي
انتي مرا ما بتعرفي تعيشي
وتا تزعّليني بتكسري الريشة
مارق عليي كتير ..من نسوان
ومتلك مرا مش مارق عليي

.

البحر...ما بيخون

شو عملت فيكي..تا الحبر يشتاق
يا ها القصيدة..البكر بكتابي
بلّشت ازعل...تا حنيني فاق
وشاف الورق مصفّر عا غيابي
وغير الأسد ما بيحكم الغابة

لا تبعتيلي حروفك ..بدونك
تا يهاجموني ..البحر ما بيخاف
الا اذا بتوجّهي عيونك
وقلام منها بيعرقوا ل شفاف
لا تصدّقي..بحري ما بيخونك

غدّار..خاين..بايع المبدا
من رفاق كانوا متل اخواتي
وحتى الرأيس الحاكم بعبدا
ما بسامحو ...وبتعرفي خواتي
بس المصيبي البحر قلبو كبير
وما بحب اتشاوف عا رفقاتي

لا تجيّشي عليي رفاق العمر
ما بحب اقسا بحبّهن شوفي
اللي بيحترق بالشوق متل الجمر
وبتعرفيني امترسي كفوفي
وغير الدهب ما بتنطق حروفي

رب الزجل

كان عندي رفيق..مني طار
لعبوا بعقلو خطيتو مسكين
وقالوا البحر ..بيخونك وغدّار
وصدّق الكذبة ...وما سأل تخمين
ليش البحر...ما تغيّر من سنين

غدّار بعرف يا زمن خليّت
بحر القصيدة يعض عا جرحو
وما كان يقبل يجرحو ب بيت
وعارف شعوري ب موقعو جرحوا

وتا يفرّقونا تنينهن ..فرحوا

لا تخاف بعدو البحر ما بيخون
وسرّك بقلبو حافظو لا تخاف
وما خان مرة ابن برحليون
وعا الكل حالو بالتحدي شاف

بس الصداقة...بتجبرو يوقاف

لا تجمّروا بالشعر اعصابي
ولا تجرّحّوا بالبحر مش قدو
ولو كان بدي طق اصحابي
بالشعر ضدي ...ـ ألف ما هدّوا

وتحت التراب كتار ما انعدوا

ليش..الجفا..!!

تغيّرت..ليش..بتكره وجودي
ونسيت كل ..الكاتبو عنّك
خايف ما تحمل يوم بارودي
خوفي عليك...!! وما خفت منّك

بيضل قلبي يهفّ...!!مع إنّك...؟

خزّق الدفتر..شيلني من البال
بالي طويل عليك...قلبي كبير
وعطري المرق عا صفحتك خيّال
شم الورد...!!ما مد ايدو ...قال..!!

وردك دبل..لما انهمل...ما زال...؟

لم شلتني..حطيّتني بفكرك
وجنّدت كل عواطفك ضدي
ما بجيب حتى بالنعس زكرك
وناسي عذابي صرت ها المدّة

وتا حس فيك..وحن...ما بدّي..؟

جرّبت تنساني ما فيك..ضعيف
وجنون حبّك عنون كتابي
وموتك تركني عيش مدري كيف
عنّك ..سكتّ...امسكت اعصابي

ضيّعتني وعم تبرم عليي
وقلبك بينزف خوف عا غيابي
..

فايق ما عندي ..عاطفة..للشعر
وعارف انا بلا عاطفة ما بعيش
وما زال كل انسان عندو سعر
وعم يرخصوا بها الشرق فقرا الشرق

والظالم الحاطت عا راسو ريش
بعدو عا دم الأبريا بيعيش

...

شرقيات

حسد..وغيرة؟

بيغار ..قلبو بالحقد..مليان
وبيصير عا المنبر متل سكران
ولو تعرفوا من مين عم بيغار
وبيموت غيرة وحقد وبينهار
لما بتزكر هيرة الشعّار
انّو نبي الأشعار روكز كان

شو قولكن ..بيكون ها الأنسان

يا عامل المنبر ..متل شي بار
وبتجبلنا من الزاكرة اخبار
مفروض تخرس ..عيب تعمل ديك
وتنسا ال بجوقة .مديّكي خاسيك
عا دفن ..!! ل بسينات ما بندعيك
من حيث بعدك احمر من..حمار
لا تغلط بحق النبي بوصيك
تعلّم تعلّي عالسما مداميك

قلاع المجد ما بتنبنى بحجار

يتبع
الى شاعر الجمال عصام يوسف
>
يا مارق بلبنان
جبلي عطور
غرقوا بحلا الكلمة
عا ضفّة ضو
لم الورد ..لا تضل
جولو تدور
نهور الدني بتنزل
على البحور
ونهرك غريب..!! بيطلع
على الجو

عصام شاعر الجمال الحقيقي
..

خبّي الحقيقة
وبعدها طلّي
ارواحنا
ما بتسكن بها الجو

كلما بوطنا بشوف
شي علّه
بحس الشعب مشتاق
يقشع ضو
بجنّح خيالي عا السما
بعلّي
بركي الوجع بيحل عنّي
أوّ..؟

برجع ل مطرح...!! واقعي
بصلّي
وبكب من قاموس عمري
اللّو

بحبك يا غربة ..كل
ما تغلّي

شوق الوطن ..وبتعمليلي
جو

حسّي بقا..واتطّمني عني
صرلي تلات شهور..بالعنّه
ومنّي وعليي..تاركك للعمر
بركي الجرح بيدوق طعم الجمر
وبرجع انا وبربّحك منّه

وغير الغزل ما بتسمعي مني

حلّك بقا تسترجعي حضورك
وتكسّري عا موجتي غرورك
وتتعلّمي من البحر ..درس جديد
لم غاب عنّك غاب لون العيد

وحتّى الوجع ما عاود يزورك

ألشاعر سليمان طراد نجّرت موعد رجعتي
بخازوق ضو
لقيت الوعد هربان
منّي للأبد
وغيّرت تكتي قبل
ما غيّرت جو
وقلت الوطن متل الصنم
ما بينعبد
ومن بعد يا حسرة ويا ريت
وألف لوَّ
يا بحر! قلبك ملح ..!
ما ذاق الزبد
وبلادنا جهنم الحمرا
وشاعلي

ما بتنعبد...ما بتنعبد...ما بتنعبد

بطلّت دخّن..بعد ما الدكان
البيبيعني..عم يشرب الدخان
نزلت قزيفة بحارة الفوقة
تهبّط العقد ومات بو وردان
والموت..ألف بالوطن جوقة
ما بتلتقي مع جبهة الجولان
وحاكم مشنّك متل عرنوقة
وبيقول باقي للأبد منشان
يحمي الشعب من صاحب الطغيان

مرا...خاينة..!!

حطيّت زهر قصايدي عا النار
تا فاح عطر الشوق بجروحي
وحسيّت مني رماد عمري غار
حامل هواكي ..وطاير بروحي
وييلحقك مطرح ما بتروحي

لفيّت قلبي بورقة النسيان
وطويّت شرشف لهفتي وضبيّت
وقلت المرا ما بتشبه البستان
بتشلح ورقها ..الأخضر بنيسان
آه...تلبس مرا وتنضب جوّا بالبيت

يا ها المرا الما بتعرفي تعيشي
عم تعرضي تيابك بمعرض ريح
ورسمك طلع من بعد ما الريشة
بكيت عليكي تا اشربتي منيح
غلطة حبر..ما بتقبل التصليح

قديّش فيكي جنّ ألهامي
تا تطلعي بالرسم جنيّة
انكرتي الحبر تا زعلت قلامي
وتلّونوا بالضو عينيي
انتي مرا ما بتعرفي تعيشي
وتا تزعّليني بتكسري الريشة
مارق عليي كتير ..من نسوان
ومتلك مرا مش مارق عليي

مفتاح..الصبر
.......
من كتر ماالأنسان
صبرو ضاق
بيحس حالو من النفس
مقطوع..
بيفتح طريق قصايدو
اشواق
تا يعيش بين النص
والموضوع
بيكتب جرح ..والجرح!!
ما بينطاق
بينسا الوجع..بنفكروا
موجوع
شو قولكن..!! كل الطريق
طلوع..

ألشاعر سليمان طراد‎

فكي المسا ...من زرار آخر ليل
فجرك طلع..ما عاد يتخبّى
تشيطن خيالي ..بالوحي من ميل
ومن ميل ...تاني بعدني مربّى

وكرمك حلا يا ظالمي معبّى

خيالك قشط ..تا تفركش خيالي
وقلبي فرط...من لهفتي عليكي
دعستي ورد تا علّم خيالي
خلفك ..مرقتي بضو عينيكي

والعطر عم يشهق حواليكي

يتبع..

ألشاعر سليمان طراد‎

شاعر..!! ما بيعرف بالشعر

بحب القصيدة..بس..ّّّسبكي ضعيف
وعملاق منبر...بس...ما بغنّي
بكتوب ..حكي موزون..مدري كيف
وما سمعت كلمة طيّبة عني

وكبير ...اسمي ..وما انحكى عني

اببكّي الورق.. تا تضحك قلامي
بخبي القصيدة ..بخاف .عا الورقة
بشحد وحي ..تا يجن الهامي
وبسرق الفكرة...متل شي برقة

ومع كل هيدا بكره السرقة

هيدا انا شاعر ما عندي شعور
بصفن سنة وببرم عا حالي شهور
تا شوف حالي بين ها الشعّار
ما بشوف جالي غير مع حالي

وجولي القصيدة كوكب وبيدور
.

ألشاعر سليمان طراد‎

قصيدة...ضايعة

وسّعت صبري عا حدود البال
لقيت الوجع .نشّال..!! ما بينشال
خزّقت جرحي براس ضافيري
وحكيّت..جمجمتي ..قبل ما سال

دم القصيدة ...الطالعة موّال

فرفطت وردة خاطري بإيدي
ولميّت عطري ..وقلت لازم روح
شفت القصيدة بعدها بعيدة
وورد الما عندو قلب ما بيفوح

عرفت الجسد خلقان قبل الروح

فضيّت زاكرتي بوادي دموع
وقرقطتت بعد الحب صابيعي
وشبّعت قلب عواطفي من الجوع
وما كنت عارف هيك بتضيعي

كرهتك انا يا خايني زيعي

الأنسان
انتوا ما كنتوا
وقت الله كان
يتعب على الأنسان
يجبل طين
بفرط معو
المسكين
يبرم عا نقطة
مي
بحري كان
فاضي
ونصّو
بالحقد مليان
اعطيتو حقد
نصّو
تا يجبل الأنسان
وامتصّو
وهيك انخلق
ها الكون
في نصّو
حقد وحسد
.. مليان
وفي نص تاني
بيركض وهربان
من نصّو

بحر الزجل

ألشاعر سليمان طراد‎

حب...كنفشاري

ما قدرت اشتقلك ما بعرف ليش
يمكن لأني ..ما كنت حبّك؟
أو طلع حبّك بالهوى فوفيش
من هيك ما قرّبت عا حبّك

وبلّشت كل قصايدي حبّك

فكّرت فيكي...!!تطلعي من البال
ما كنت عارف ساكني جروحي
وعطرك بيمرق متل شي خيّال
ومتل العطر بالريح بتروحي

وما بترجعي الا بهوى روحي

لا تحلمي بالبحر...حلمك طار
وفرصة العمر..بغدر ضيّعتي
وطير العلي بالجو عشر متار
متلو عليتي ..ولكن وقعتي

لو تسمعي من البحر ...!1كنتي فوق
لكن عنيدة كتير .....ما اقنعتي

ألشاعر سليمان طراد‎

حرف السين

ناسي..!! تا ننسا كلنا ..وتنسي
وما تجرّبي ..!!تتزكّريني.. عسيت
آنست جنّي..!! تا هرب إنسي
وقسيّت قلبي ..تـــــا عليكي قسيت
عملتك عا دفتر خاطري برنسي
وشلّحتك..!! واحساس قلبي كسيت
وخدتك معي عا عالمي الجنسي
وخرطشت كل قصايدي عليكي
ل وج الصبح ضليت ..!!حالي نسيت

بحر الغزل

ألشاعر سليمان طراد‎

قوس قذح

ضيّعتك وما عرفت عاشق مين
سمعتك صدى ..وعنّاتك بعيدي
مارق تحت قوس القذح تخمين
تا صرت اقصر من شبر ايدي

تغيّرت يا ها الأسمر الغشّاش
وضيّعتني وضيّعت تفكيري
تحت الأرز غير الفطر ما عاش
زغيرة الدني...لا تفكّر كبيرة

رح نلتقي ...لا تخاف ..جايي يوم
تتعرّف عليي... تاتعرفني..؟
انتي وانا لصيّن..!! خلقوا توم
طوني بلير..المجرم وليفني
هههه
لا تنغرم وتجن متل التيس
وتضل متل الأهبل مبنّج
بتنهي حياتك متل ليلى وقيس
وما بينفعك بالحب تتغنّج

البينام عا محدّة قلق بيضل
مزعوج كل الليل ومصنّج..

موضوع: شق الضو الأحد أكتوبر 13, 2013 5:00 pm

[center]شَق الضَوّ.

كان الشعر .من قبل شعر الضو
مع احترامي ..مأنزع متنّك
واليوم ...في شعّار غزيّوا الجو
ووحدو البيقرا الموهبة محنّك
لا تفكّر ان بلّشت تخلق جو
بتكون شاعر...! لو انحكى عنّك
لازم تحلّق..بالقصيدة أو
كلما بسما الألهام شق ! الضو
تشوف اللي ناطر كلمتك شنّك

كانت قلامي مضيّع سطوري
لقيت نهر فلتان
طوفن ورقها بموجة شعوري
وصار الحبر غرقان
وتخرسن الجوري
من عطر طار بها الفضا
قصدان

تخرطش عا حيط الوجع

وجع الغربة

اربع قصايد صار عندي وكيف
بنسا القصيدة الطالعة ب بالي
وبيت القصيدة الحاملو عا الريف
مرتي حياتي وأم ل عيالي

ان طلّقتها ..!! رح اقتل بحالي

عا المدرسة وصلّت قصداني
بنتي الزغيرة وخيّها التاني
وشربل سألني ليش يا بيي
امي عليك كتير حرداني

جرّبت قلّو تبلكم لساني

امّك يا شربل طالعة بمشروع
نترك الغربة..؟ بعد ما توفّقت
بمشروع عمري ..الخدت من اسبوع
وانتي بتعرف ليش ما وافقت

ومنشان نرجع عا الوطن ..!! مش وقت

قلّي يا بيي انت عندك حق
وقلّي الصبي برفض..!! ب تكشيرة
هونيك كلّن..قال..نق بنق

وبيصرفو تا يشرجّوا كروتي
وما بيصرفوا عا بطنهن ليرة

حتى الولاد ...بيفهموا الموضوع
بلبنان ما بينعاش حرب وجوع
وصار الغلا ببلادنا ..مشروع
ومن بعد ما قلي الصبي ممنوع
ترجع يا بيي ..عا بلد درويش
هوني يا بيي بحب اني عيش

وتا شربت روحي ..عصرت قلبي دموع

7 de octubre

وصية

فتّق عراوي الخوف بجنونك
ولبّس الكلمة وفرّع غصونك
وطلاع فوق الغيم قهوة عمال
وفنجان ..شفّة بعات ممنونك
وخليّك متل الزنبقة خيّال
وحصّل معي بالشعر بنطلونك
وعمال شاعر ضو شد حبّال
وغيّر معي بالشعر قانونك
وكتوب متل الشمس .فوق جبال
ورجّع من الحفلات رعبونك
وتا تصير شاعر ضو روح انزال
عا البحر يا انطون تا يصفّي
بحري ما فيه يعيش من دونك

.. فصّلت توب قصايدي بالريح
وشكيّت ابرة خاطري بحبري
وقطبّت خيط الشاعرية منيح
ووسّعت عا مجال الفضا صبري
وضليّت شاعر ضو ما بيزيح
واقف رصد ..عم احبك الابيات
ومرّق جمل من خرم ها الأبرة

ضيّقت حالي عا مدا شرودي
وتركت جرحي يرسّم حدودي
لقيت المدا واسع عا وسع الكون
وحروف وجّوه نجوم معدودة
جرّبت اسرق من عيونو اللون
وبعّد الكذبة وقرّب شهودي
لقيت الشعر هربان منو ل هون
عا موقع الأحباب سابقني
وكل الآمال عليه معقودي

كلما القصيدة تمرق ببالي
باخد نفس من حرفها المنحوت
بشرب عرقها بصب ل حالي
وبرجع عا حالي من الكلمةبفوت
بشلح وجعها ..بعيشها حالة
بمرّق على قلامي الحبر بسكوت
بيشبع خيالي ..وبلحق خيالي
وبخاف انو الشعر مجدو يموت
برجع ل حالي ببهدل خيالي
وبفهّمو لا يكتوب بها العصر
تا يضل عايش عز بالملكوت

طفيّت جمرة غيرتي بالنار
وشعّلت قلبي خوف ينساني
ما الموت ..متل النار عندو تار
وبظن ..انو الموت انساني
بيخاف ياخدني من الاشعار
وسر الوحي يزحط عن لساني
من هيك لما الشاعر بيحتار
بين العتم والضو بدو يخاف
يهدر زمانو بعصرنا الفاني[/center]

]center]

ألشاعر سليمان طراد

الشاعر غريب بيكتوب من الروح
ما بيستف مسبّات وقوافي
الشاعر جرح بالعاطفة مفتوح
الشاعر بينزف من قلب صافي
الشاعر بيبقا وين ما بيروح
يلبّس حلا وبنقشعو حافي
متل العطر خيّال فوق سطوح
بيت الوحي المصبوب لون وروح
وعندو السما ابداع منشافي[/center]

ألشاعر سليمان طراد
بلا عنوان

يا لابسي بيوت الشعر تيّار
ومفكّرة كلما الدرب تمشي
انّو القصيدة سكيكة البليار
والبحر ممكن ينغمش غمشي
بحري مدا وقصايدي تيّار
والشمس نفخة والسما كمشي
الشعر الحقيقي هيكل ومش بار
والبحر متلي قجّة الاحلام
وانتي بتمشي بأمر من رمشي

قديّش حامل همّك وملهوف
خايف عليك تضيع بالمرّة
وتكسر الجرّة وتنكر المعروف
وما تعتّق الكلمات بالجرّة
تصّورت حد الخس والملفوف
من خيبتك مفروض تتبرا
الشاعر اذا بيبعزق المصروف
وبيصير عينو يضرب ل برا
رح نقشعو يا خطيتو منتوف
ويمكن مع الايام يتعرّا
من هيك لازم تهتدي وتشوف
كل البيغيّر صورتو عا الناس
بنهديه قرن فليفلة حرّه
ههههههههههههه
قعدوا عاقلين بدي نام .

» روحانيات بو شربل وبو علي
» أبو شربل والاستقاله
» ابني شربل
» ارتجاليات بو شربل بحر الزجل
» شربل بعيني