بحر الزجل وجاد فرشوخ

‎ألشاعر سليمان طراد‎
يا شام ليلك نار ونهارك حروب
انتي ضحيّة حقد يا اخت الجنوب
لما الشعوب تجوع وبتقسا القلوب
وتعيش ما بين المعاصي والذنوب

ان كان الظلم والعار من حكَّامها
يا ويل حكام الشعوب!! من الشعوب..

جاد فرشوخ
بلاد العروبة ومهدها ووجدانها
بالشام خلقت وارتفع بنيانها
واهل التخلف لو لمع سلطانها
منطفي ببحرك المرجلة نيرانها
وحكام سوريا الاسد ما زانها
الا كرامة ارضها وانسانها
ما في حرب من دون سوريّا الاسد
وما في سلام الا سلام شجعانها

ألشاعر سليمان طراد
فرشوخ فرشختك ماعادت تنفعك
الحق ثوره من الجبانه بتقبعك
وبالون حقدك عالشعب جيبو معك
تانفقعو بوجك و هوّي يفقعك..
.صاروخ بيزتك على زبل الزمان
وصاروخ بدو ألف شقفه يقطعك

جاد فرشوخ
بفرشخ عليك وبعمل اللي بينعمل
تا يفش من قلبك كل شي عندو عمل
جرح الزرعتو بكلمتك ما بيندمل
خليك اعمى لا حياة ولا عمل
والمزبلة اللي جابنا عليها الجمل
عربان مالن حلم غير بعر الحمل
وشكلك اصولي صرت افهم هالجمل
ارخي بذقنك مكنسة كل شي انهمل
انتو سرقتو شامنا مع قدسنا
ونحنا زرعنا شعوبنا مجد وامل

جاد فرشوخ
تا يفش قلبك كل شي عندو عمل

ألشاعر سليمان طراد
لا تحلل الظلم وضميرك ترهنو
كل الحكيتو عار بدي تبرهنو
ابريق الوطن مكسور عيبي تدهنو
وتسقي بسمّك شعب كامل وتهــــبنو
وحكّامنا بالشرق كلا بلا ضمير
امجادهن عا دم ..يا مفرشخ بنّوا

نحنا انا وجاد ما بنعرف بالسياسي عم نعالج موضوع برد بعد ما ارجع من مشواري

جاد فرشوخ
ايا ظلم لو جيت ابني موطني
عالعز عالقوة الما ممكن تنحني
جرّحتني بهجوك الي وبتسبّني
ما برد عا المعتاد يهدم شو بني
ابريق الوطن مكسور جايي تهتني
ايد المقاوم رممت كل شي فني
اما انت خليك بالغرب السني
اجمع موال وذم حكام الدني
القلب اللي عم يزرع تا يحصد افتخار
غير الباع الارض حتى يذلني

ألشاعر سليمان طراد
لوما ظلم حكّامنا ما تفرشخو
المتلك ..على عرش الفساد وربّخو
حكّامك الظلام عمرن ماانتخوا
متعوّدين لحكم غربي يرضخوا
وما زال يا فرشوخ عا المنبر رخو
جلدك معي الليلة بحجة بسلخو
عا الشنق والله كل حكام العرب
كلّن ايديهن بالدماء تلطخّوا

لا تاخدوها سياسية انا وفرشوخ عم بنعالج موضوع الحاكم والشعب ارجو عدم التفسير الخاطئ

جاد فرشوخ
رح خبرك وافهام يا ابني فهام
تاريخ اهل الغرب تقتيل وظلام
انكلترا ارض الملوك بوجه عام
احتلت الهند وارضنا خمسين عام
وبلاد اوباما وبلاد العم سام
شو قتلو هنود وموهن للحرام
وبلاد هولاند العم يشمّر كمام
شو عملت بأرضك يا زغلول الحمام
ودخلك رجب ناسي بحكم الترك حام
عا بلادنا عالذل خمس قرون دام
يا مفتكر انو الغرب حب ووئام
وجايي عا اسم الفرشخة تعمل مقام
وتجرّح وتنشر بأسمي عالدوام
مش خرج حطك تحت منشرة الملام
هيدا الغرب بالدم غاطس للكمام
من بعد بغداد الابا بيريد شام
نحنا ما جينا صوبهن هني اجو
ونحنا رجال الحرب ورجال السلام

ألشاعر سليمان طراد
ما زال غنى بحضرتي فرشوخ بيك
كل العيون مفتحة الليلة عليك
مستعمر. وحرب وسلم لو قلت هيك
معناتها.كل المصايب شغل ديك
يا حاكم بأسم الشعب عيبي عليك
تمحي شعب مقهور وتغسّل يديك
عامل بطل كرتون عا شاشاتنا
وب مظاهرة من الخوف عم ترجف جريك

جاد حبيبي انت الموضوع بين الحاكم والشعب لا تضيع الموضوع بين الغرب والشرق

جاد فرشوخ
الله واكبر صاح ديك من الجلول
عامل بطل شعبي وعم يقدم حلول
بحكيك بالتاريخ بترد بخمول
وبتقسم الموضوع مش حسب الاصول
ما همني شو عم تلت وعم تقول
بيهمني ارض العروبة ما تزول
ما بعمم الاجرام عا كل الفصول
شو جاب حتى جاب ظلك شب كول
ايا ربيع بتحسبو وايا فصول
عورات مش ثورات هودي يا عَجول
لولا ما بشار الاسد يسرج خيول
صهيون من الجنوب ما ولّى ذلول
مش متل ابن سعود راخي بيضتو
وبايع بلادو للغرب بوراق بول

ألشاعر سليمان طراد
مين اللي دافع عن سعود بها الحوار
تا صرت اسمو تزت عندك انت تار
يا شعبنا المظلوم لا تنطر قرار
عنّك يشيل الظلم ويفك الحصار
نحنا على موضوع حاكم قلت جار
ما جبت سيرة حاكم الّبنان جار
ولا زكرت حاكم قلت كلّون ظالمين
وانتي مع الظلّام واقف يا كنار

هههههههههه
حبيبي جاد بحبك خليك عا الموضوع وبلا اسامي ههههههههههههه

جاد فرشوخ
نحنا شعب معروف عنو سرسري
منبيع انفسنا وغريب بيشتري
التركي حكمنا وسيّل الدم البري
والشعب خانع لابس تياب العري
ومين غير فخر الدين قلو عنجري
والارض يا عثمان قفزة ابجري
واليوم عيدي يا سنين وكرري
لو غاب فخر الدين اوعى تحصري
بيظل في حكام عز تقودنا
ونربح على الظلم وعا ابن الخيبري

ألشاعر سليمان طراد
شو بحب فيك المرجلة ..والعنفوان
وما بحب فيك تهين شعبك يا فلان
لما الفقير يقول بحلم بالأمان
ببعت ألو صواريخ ومدافع كمان
ايّا عدالة بتقبل وأيّا زمان
بيرضى بظلم الحكم وبيرفض حنان
خلّي المحبة تكون عنوان الربيع
ونرتاح من حكّامنا آن الأوان

حوار رائع والله يا جاد انت شاعر كبير لا تاخدوها سياسية هيدا الزجل بيجمع ما بيفرق

https://www.facebook.com/groups/224969897605747/

» اقوى حوارات بتاريخ الزجل بحر الزجل وحسّان البسطاطي
» بخر الزجل ومخايل لطيف رايس عصبة الزجل بسدني
» شعر الزجل !!!
» بحر الزجل
» ملهمة بحر الزجل