شروقي

موضوع: شروقي السبت يناير 12, 2013 10:57 pm

بعقلين،

صْدفه إنعزمت ب فرح عالشوف ب بعقلين
و كانت ليالي شتي و الناس مهمومي
ب سوء المعيشه وب غلا الاسعار والبنزين
و بدي ع كتفي جبل ت يحمل همومي
الغايه نويت السفر و الثلج عا صنين
صاير ع ضو القمر لوحات مرسومي
وبالليل ريح الدني تْصفُر متل شاهين
كْسرِت جناحو القدر ب سهام مسمومي
و حَنّت طيور المسا ع فراخ بردانين
و صارت نجوم السما ع بعضها تومي
قَوّيت قلبي بحذر وكبست ع السبعين
و كل المسافه جْوَر و حجار مردومي
و صوت الاذاعه فتح ع صوت مدري مين
مطرب كأنو ،غراب البين أو بومي
شلت السيجاره بعجل وبلشت بالتدخين
وروقت راسي على أنغام للرومي
وَصّلت قبل الفرح و تجمعو الحلوين
من كبر حظي أنا يا ناس مهضومي
مغروم فيها إلي شي ست سبع سنين
كانت ع ذات الفرح و العرس معزومي
و فجأه العيون التقو و تعانقو محبين
و شبعو الخدود الحمر بوسات محمومي
-------------------------------------------------------
رجعت تقللي خلص ما عاد بدي ياك
عطيني حبيبي الصور جبلي مراسيلي
و هدي كتاب الغزل و الحب بترجاك
بطل كلام الغزل و الحب يعنيلي
ما عاد بدي تجي ولا اسألك شو باك
و لا يوم إشكي أنا ولا إنت تشكيلي
تعلق بغيري خلص هالقلب ما بيهواك
و لولا بطريقي طلعت ما عاد توميلي
سكرت باب الهوى تا افتح الشباك
لما لغيرك فرح رقصو جداديلي
يا قلب وين الوفا ال بتحن عا ملقاك
وكانت تقللك أنا ما بفارقك ميلي
صارت بقلبك قصد عم تزرع الأشواك
وتقول هيدا القدر م بايدها حيله
بكرا بتحصد ندم لا تفكر بتنساك
كل ما ب فوح العطر بحرامها النيلي