ملح وسكر بحر الزجل وسليم شلهوب

سليمان طراد:
عمو سليم البحر بيجبك
وينو الأبونا وين بو طوني يجي
قررت صالحهن بليلة مبهجي
عنا العوايد بالتحدي دارجي
يتصالحوا كل الخليقة بترتجي
يا حبوب قلبي صوب بو طوني كرجي
عمرو البحر ختيار اعزب ما هجي
كل اللي نزلوا بلّجتي ماتوا غرق
ووحدك بقي عا الشط يا عمو ونجي
***
سليم شلهوب :

الخوري اللي عبالي حياتي حرقصه
بدو يجيه نهار يركع عالحصى
وقالو البحر حامل بطاقه مرخصه
ومن لجتو رواح العباد منغّصه
لمّا عرفتو عا أمر ربو عصى
وحب يلعب دور حيّه عاقصه
حملت العصا وعالشط قاعد ناطرو
حتى ن. كبّر راس شقّو بالعصا
***

سليمان طراد:

لا تضل ناطر ..عا الرمل حامي كتير
بتحرق جنابك والحرق صدّق خطير
المجرم بينطر للشنق حكم الاخير
وانتي نطرت الموت ..اهرب يا فقير
قبلك هرب ماريوسف وخلّص زغير
ولوط قلو ربنا اهرب وسير
وانتي ضروري تهرب من قصايدي
حدك جهنم شاعلي وبأس المصير
***
سليم شلهوب :
لما لقيتك بحر ما بترحم حدا
صرخت فيك وقلت موّج عالهدى
وهربت منك غيم ساحب بالمدى
وجدولت حالي نهر من بين الودا
تا إمزج بملحك حلا قطر الندى
بلكي انا وياك منبطل عدا
تاري حنينك للملح علة وجود
ضاع الحلا بالملح ومليحي سدى

إذا ما بدك تحلى رح رصك وحطك عا لايحة خوري زحله هههههههه
***
سليمان طراد:
مظبوط بحري موت ومواجي سيوف
بتكسح ب جم الريح تا تقدر تشوف
حمّل جرار وفل... يا عمو وطوف
دروب الهريبي هيّني بكل الظروف
هربان منّي ليش؟ يا وجه العطوف
هروب البطاطا من دفا وج الستّوف
علّة وجودي حكمها ملح الوحي
وملح القصيدة بيطعمك خبز الحروف

عمو سليم بتتزكر ستوف القاطرجي هههههههههههه عا ايامك
***

سليم شلهوب:
شفتك بحر عن حقد قلبك لا تسل
خيط الحلا من طعم ملحاتك نسل
ورب الوحي شلهوب من عندو نرسل
حتى يحلّي نسل من نسلك نسل
بعتت الصبايا بموج ملحك تنغسل
تاري انت ملحك معود عالكسل
سال الشهد عا مواجك من شفافها
وبقيت مالح ما دقت طعم العسل

غشيم هالبحر الله يهديه هههههه

سليمان طراد:
لما الصواري مواج بحري فلّحوا
صارو يا بو طوني الصبايا يشلحوا
وما زال جايي البحر جهلك ينصحو
وناسي الحواري عا مواجي توحوحوا
جسم المرا متل الصفيحة ملمحو
وسمكة الحسك حسكاتها ما بيجرحو
وتا فيك تاكل لوز.. وتنقي سمك
فرخ السمك لا تاكلو تا تملّحو

ههههههههه

بتعرف يا بو طوني بو شربل مسرحو
عليه الصبايا بيسرحوا وبيمرحو
ولما تصفي تحت فيّة مشلحو
قرقور كرمالك الليلة بيدبحو

انتبه يا بو طوني من الحسك هههههههههههههههههههه عا النيري يا شباب
***

سليم شلهوب:

ما بين طعم الملح والملح الحلي
في فرق إنت بتجهلو لاكن جليّ
ملحك إنت بالموج عم يغلي غلي
وملحي عيون مكحّلي بلا مكحلي
وسمكتك إنت بحسكها مبتلي
وسمكتي حلوه مليحه مدللي
السمكه اللي بدا ملح خليها إلك
وسمكه اللي فيها ملح خليها إلي

يا بحر مهما يكون عندك مرجلي
ما فيك تعمل بو علي عا بو علي
لاكن إذا بتزورني بتعمل ولي
بسقيك دمات الوفا من منهلي
***
سليمان طراد:
يا بحر كلما الضو يفتح مبسمك
بتشوف بنت الجو عم تتقاسمك
شوف يا سليم البحر عمرو ما انهمك
بأكل السمك ..معتاد يشرب من دمك
دمعة عيونك مالحة ..وافتح فمك
تا تدوقها ..بركي الحبيبي بتفهمك
علقت بمرا .تا شحدت دمع عيونها
العلقة معي علقة الشبكة بالسمك

واوووف اووف

مجبور تفهم عا البحر تا يفهمك
بحر الزجل بسيوف موجو بيفرمك
ياما القوافي خبز اسمر زقّمك
ورش الملح عا جرح قلبك..بلسمك..!!

شوف يا سليم البحر عمرو ما انهمك
***

سليم شلهوب:

بعلق معك علقه بحلقك يا لبيب
بتعلق معي قرقور بين نياب ديب
شلهوب نكهة كلمتو بطعم الزبيب
وإنت عضمك مالح وطبعك غريب
والدمع ملّح خد محبوبي الكئيب
لاكن لا تنسى بسمتو عنبر وطيب
إسكر إنت يا بحر عا دمع العيون
وبسكر أنا من بسمة شفاف الحبيب

يا بحر لو عاينت ما بتقدر تصيب
جايي بنعيب البوم تهجي العندليب
جايي تواجه مارد الشعر المهيب
بسلاح طفله بعدها بسن الحليب
ون. كنت قاصد تجرح شعور الأديب
تأكّد بإنو اليوم ظنك رح يخيب
***
سليمان طراد:
قديّش بعدك جاهل بدمع الحريم
القطب بملحو المر جرح البصميم
قلل حلو بترتاح من سكّر أليم
وما في ولا طبخة بدون ملح بتستقيم
وشوف الفرق بيناتنا وضلك حكيم
فرق السما والأرض عن جاهل غشيم
دمع المرا بيخبّرك سر الدني
والحكم ملح الارض يا عمو سليم

يا شعر عرس القافية عا النت قيم
وخلي سليم يطق ..والله العظيم
وجبلو الخوري يمشحو حتى النعيم
يقدر يفوتو ..بواسطة بحر الكريم
انضليّت يا سلّوم عم تعمول راجيم
بلا ملح بدي آكلك تا تستقيم

اكيد يستقيم يا شباب مش يحبل ههههههههههههههههههه
***

سليم شلهوب:

يا نسل بحر الميّت الهاوي الركود
ضغطك علي عالملح ونشلو الزنود
نزّ الحلا من فوق بعناقيد سود
عيونك عليها مشوهره وقلبك حقود
وشفت الحلا بخدود من لون الورود
وبتريد ملح الدمع يحفر بالخدود
ومساقبه محروم إنت من الحلا
من هيك عندك حق تكفر بالوجود

منعيدها ومنزيدها. ههههههههه

فاشل إنت بالشعر ما بدك شهود
وشعري أنا محفور عا صخر الخلود
ومعقول تقتل مجد شعري يا حسود
لما الأرانب تحلم بقتل الأسود
مني نصيحه يا ملح عاقل قعود. هههههه
يا بدك بحرك بِ. صواريخ السكود

ما زبطت معك يا بحر. شلهوب ما بينهزم. ههههههه


سليمان طراد:
لما يا بو طوني ضافيري تقلّمو
محد الزجل للبحر الله سلّمو
بدكن حجج..من بحر فكري تعلّموا
ولا تعكّرو حوّي وعليي تفلّموا
رح فهّمو ورح علمّو ورح ألّمو
وين الملح بالأولية سلّمو
ما شفت طوني مهندس وناجح كتير
لوما شحدت الملح حتى تعلّمو

هههههههههه

سميي الهدهد بالبلاغة كلّمو
وأكبر حكيم.. .!!من الحكيم تعلّموا
رح اخبزو رح ملّحو رح طلّمو
وحتى ل عزرايل بدي سلّمو
***

سليم شلهوب:
هيك توقعت وهيك صار.

توقعتك على الملح تعمل إنقلاب
وتحمل حلا الغياب بعد الإغتراب
شوف زمزم شو حلو وكيف السراب
بيلمع متل ملحك بكاسات الشراب
ما كان إبني راح وشهادات جاب
لوما يشم بموطنو عطر التراب
وما لبست تياب الحلا غصون الشجر
لولا ما يسقي شلوشها دمع السحاب

هجّر حلم موتي بظن الفيك خاب
تا ما يضلو يضحكو عليك الشباب
من ملحك شربت القلق والإكتئاب
تا صار دمك مالح وعمرك عذاب
***
سليمان طراد:

غيمك بيسقي الشلّش..؟ من ايّا سطوح
شو نسيت بحري ..الخلّصك ب فلك نوج..؟
يا غيم كلما تعطش سنينك جروح
انزل عا بحري بلل شفافك وروح
ويا عطر فتّق جرحها ..وعا التم سوح
اشرب دموع المالحة من بحر روح
ولا تسمع لسلّوم عندو سكري
عا الأنسولين معيّشو بحر الملوح

ههههههههههه
وين الملح والكاس يا وجه السموح
ايا بطاطا بتنقلا بلا ملح..بوح
هههه
شو علّقك مع بحر موجو عا السفوح
خليك شكشك بالأبر حاجي جموح
هههههه
ابكي يا ليلى من الهوى ويا قيس لوح
صاير بو طوني لا شعور ولا طموح
***

سليم شلهوب:

قالت إلي شعرك حلو يا عبقري
بفرح إذا علّى بدمّي السكري
ولما بتليت بشعر بحر الهمشري
علّم جرم ملحو على خدي الطري
يا ما تعبت تا مونك من مصدري
وطعّم حروفك من كلامي الجوهري
عا منبري ضليت قدام الحلا
تمثال ملح وقاعد على منبري

فحصت دمك يا بحر عا مجهري
المشهد حرق قلبي وبدّل مظهري
صاير عاكتر الملح عرقو مهتري
وما عرفت كنو دم أبيض او غري. ههههه
وما بين داوي علتو أو إفتري
لا قدرت بيع مصيبتو ولا إشتري

ولا عرفت مين المجرم ومين البري
***
سليمان طراد:
يا ناس يا شعّار بو طوني معي
بلّش يهلوس عم يغني بلا وعي
السكّر علي معليش منو مطمعي
وزّع حلو أو وزع وراق النعي
ههههههه
شبّهتني بتمثال شاعر ألمعي
ملح الكرامة عرّق جبينو سعي
وما كون متلك مدعّي انك بطل
وشايل جريك بسكر وعم تدعّي

ههههههههههههههه
يا ملايكة الله على الموقع تعي
شوفي البحر ملّح جروح المدعي
ولك يا سليمي تغنّجي وتشخلعي
وشيلي حواجب بس لا تحكي معي
هههههههههههههههه

يا شباب ناعم ابو طوني ما بقا اقسا عليه حرام هههههههههه
***

سليم شلهوب:
السكرّ لزقتو فوق خدك هالنحيف
من الشعر شلتو طالع مهفهف نضيف
من كتر ما معقد من الجنس اللطيف
الحوره بنت حلوه قشعتا عالرصيف
يا غصن ناعم وشوشو همس الحفيف
ذكرت الحلا مفروض ملحاتك تعيف
يا ريت متلي بتلبس تياب الربيع
قبال الحلا وبتشلح تياب الخريف

اللي بيسمعك بيقول شو دمك خفيف
قبال الرجوله مغنّج وخصرك نحيف
جايي تا تهجي شمخة القصر المنيف
وإنت جب الحمص وعزمك ضعيف
وجسمك متل صاج العم يقمّر رغيف
كل ما بيتخلوع عم بيحصد زقيف

جواب عالسريع مش محرزه نفكر مع البحر
***

سليمان طراد :

موسم اللوز بضيعتك ..قلي وهات
بتملّحو تا تاكلو ....بسكر نبات..؟
ههههههه
ملح الشهادة .عز وصمود وثبات
ورقص الملاهي للشباب وللبنات
تشخلع وارقص يا سليم على الرفات
وحلّي ليالي الكيف تا ما نقول مات
ودشّر تعبّنا ملح طاهر عا الجبين
تا تعيشي غزّة وجرحها ينزف حياة

يا شعر بحر الشعر عندو واجبات
يهني وطنا ..وجيشنا عا التضحيات
ولما بحري تغطس توقا الممات
علّق بعنقك للنجا طوق النجاة
ومهما كنت مغروم بلويسا .و
Ivette
رح غرّقك وحياة سيّدة النجاة
هههههههههههههههههههه
***

سليم شلهوب :
يا راس محشي خيش بالملح انتلى
بشعرك المالح ما بتوصل للعلى
شهدي بقفير النحل بيقلك هلا
وملحك بيسوى قرش بسنين الغلا
شوف الحلا بالبدر ونجوم الفلا
منها ضمير الليل بالنور نْجلى
وتمثال مايكل أنجلو المجد عْتلى
بتحكي حلا طلعة جبينو للملا
والموناليزا الخالده بعين الزمان
قلي شو خلّد رسمها غير الحلا

غزه الغمرها الموت بغبار البلا
موقف حلو بيشيلها من وإلى
وحياة ليلى وفاطمه وهند وحلا
وحياة مرتي الماتت ومرتي هلا
رح إجبر البلملح في عندو صِله
يركع شي شهر ونص عا ركابو صلا
***
سليمان طراد:
اتعس مرا بالكون بدك للصحيح
تمثال جامد بالحلا تطلّع منيح
قلب المرا اطيب من التم ومريح
بيحمل هموم الكون وبحبو صريح
وتا رجّعك للدين والفادي الجريح
تزكّر شو قال ..منيح لا تعمل فصيح
انتو ملح ها الأرض روحوا وبشرّو
وهلق شو فيك تقول عن قول المسيح
هههههههههههههههههههه
سليم شلهوب


لما المسيح على الأرض جسمو ارتمى
تعمّد بنهر الأردن ومجدو سما مش ببحر البحر
وعالجلجله هوي وعم بينزف دما
قلن سقوني ميّ تا إروي الظما
سقيوه خلّ رفيق ملحك إنّما
العلّه البعقلك ما بتفهم بالوما
سكبت الوجع بالخل عا جروح المسيح
من قبل ما يسافر بروحو عالسما

يا بحر عندك ملح في عندو سِمه
لولا وقع عالعين وقعت بالعمى
رح دوبك تا الناس منك تنحمى
وكبّك بمجرى وزتك بآخر حِمى
وتاما تضل العالم لكفرك دمى

رح إفتح بحقك يا مجرم "مَحْكَمَه ". هههههههههههه. عالمحكمه الدوليه مباشرة

ألشاعر سليمان طراد
بالشعر كل ماكتبت بيجن البيان
بحمل الأرزه بالأعالي صولجان
المواج هني وتار ملح وعالكمان
بتعزف الريح ملاحم بزند الملان
ولماعرق بيك تعمّر بيت كان
طعم العرق مالح تعلم يافلان
مافي عماده بلا ملح ممكن تصير
ومافي زجل من دون بوشربل كمان

هلق بتقلي بتعمدو بسكر وقطر ههههههههههههه تزكر المعمودية

اووف اووف
يابحر ميت ياملح كل الزمان
فيك المسيح تعمد من المعمدان