خلاطشات شعريه

شردات بحريه

وحدي سرقت الوقت

مش ناطر حدا

يقلي لا تسرق حلم عم يركض سريع

وعا السكت خدتو

وما انسمع صوت الصدا

بلّشت افزع ..

عا العمر يرجع يضيع

يا ها الوجع ..لا تنام بسرير

الأمل

بكرى بيجي تشرين وبتندم كتير

بدرك جنين وبعد شكلو

ما اكتمل

لا تفطر على الوهم وتبيع الضمير

لون الحياة بنفسجي ...مش نرجسي

عيش العمر عمرين...

حتى ولو قسي

بستان روحك ..عصفر ..وربعن خيال

ومين قال أنو ها الدني ..مش مدرسه

هي مدرسه ..بنعيشها حب وجمال

يلبنان صوت الحق مش مسموع

والكل عم بيغيّر الموضوع

والله يساعد شعبنا المسكين

حتى الشيارى ماتت من الجوع

يا رب..ضوّي الزيت بسراجي

ونوّر طريقي ..وحلّق براجي

ولا تدشّر الإيام تغدرني

ما بحب لا العازي ولا الحاجي

كان يمّي اليوم قدّامي
قلّي بعد بكير تا تعسي
وكلما البرد بيأذأذ عضامي
بحس لاحقني على الدعسي

لما القصيده بتلبق عليكي
لا تسأليني ..عرفت...ما عليكي
وتا زكّرك مين صاحب الفكره
تحت القصيده بتقشعي ليكي

فكيت عقدة حاجبي ورخيت
دقني تا عني مؤمن يقولو
روحوا اندهو..ل بياع ل توابيت
ينجرلهن تابوت عا اصولو

يا زنبقه لونك بياض
طحين
انصع من التلجات عا صنين
و قلبك نضيف .ونيتك بيضا
وما غبر عليكي غضب تشرين

ما عاد فيي ولا بقا بدي
ايا قصيده تمر من حدي
مشغول بالي...بالسعد ..وب سعد
تا نشوف.. دورو كيف بيادي..

يعني السوره اليوم قولولي
شو حققت تا نقلها ثوره
اه حققت..طرقات مقفولي
من الرينغ حتى ساحة الدوره

لما ع نتي بالغلط فتي

تكهرب سما الابداع عا نتي

وبالاذن من عملاق عين عنوب

غيمي عمل ثوره على الحاسوب

واكتر ما شتت ها الدني مشتي

يا ورد حاجي تنق عا الايام
نقك تجني وما بقا نقبل
يا ريت متلك عا الصدر بننام
تا نضل كل العمر ما ندبل

لا تكذب عليي..تا اوثق فيك
ان كان بدك ..اعمل شريكي
شو باك قلي..كل ما بحكيك
بترد..بعد شوي بحكيكي

قديش غايب..ما عرفت قديش

عارف لهلق..صوفتي حمرا

وكلما فتحت موضوع ..كيف..وليش

من غير ما فكر بسرعه بحس

فاتح عا حالي جهنم الحمرا

بعد غيبه ..شفتها

صابيع ايديي ورد منتوف

و تياب عزي مخزقه شوفي

وعيون ختيرتي الملاني حروف

بين تعبها دم ع كفوفي

غمضت عينيي ..قصد ما شوف

وردات عمرك هيك مقطوفي

ما عاد تنفع...عاكستني ظروف!!

من هيك وعدي ما قدرت اوفي!!

وما زال خبينا العمرمصروف

بالصدر ....صفى عمرنا ثروه...

قومي اصرفيها...!! ليش مكسوفي

» حرتقات شعريه
» حرتقات شعريه
» غيره شعريه خماسيت مقلوبه
» حكمه بحريه شعريه عن الغني والفقير