زينب والزجبل

ما في ولا منبّر جوهر بحوّا ومشي
حاجي بقا شوشة غرورك تحلشي
كنتي يا زينب شاعرة حبر وورق
لوما مناخيرك بحفله تدحشي

زينب
من بعد ما عمر الزجل اصبح شقي
تعمشق على سحري وعلى كتفي لقي
عالمنبر طلعت ودفعت التضحية
حتى زجلنا بالمعاني يرتقي

ألشاعر سليمان طراد
بعرف أنا ما بتعرفي اللي بعرفو
حتى اللي كانوا بحفلتك نصن غفوا
عا المنبر طلعتي ودفعتي غلطتك
الوقفوا معك..هلق ما عادوا يوقفوا

Zainab Hmadi
عالمنبر طلعت وما حسيت بخجل
ست القوافي والقصيد المرتجل
وشو همني كم صوص عم بيديّكو
حدي النقيب وكل شعار الزجل

ألشاعر سليمان طراد
لما النقيب يصير..يوقف عا الشمال
لا تشدي الضهر...؟هيدا احتيال
لولا النقابه كلها بتوقف معك
مش رح تصيري نجم يا بنت الحلال

Zainab Hmadi
لما النقيب ب حكمتو زينب غمر
سكر دروب النقد عا كل النُمر
مش ناطرة تا صير نجمة للزجل
ما زالني عا منبري اجمل قمر

ألشاعر سليمان طراد
لا تقنعيني بزنبق وطهر وعفاف
انتي قمر مظبوط..ما في أختلاف
حمرة شفافك مش صدا نجوميتك
بتنجّمي بحروف غفيت عالشفاف

Zainab Hmadi
شعر وحلا واسلوب فيهن رايدة
وتا اقنعك ..منك انت شو الفايدة
وين الغلط لو نجم بشعر وجمال
بكون عالمنبر فضيلة زايدة

ألشاعر سليمان طراد
شو انزاد..عا المنبر وشو اتقدم سلع؟
غير الميوعه الهابطه. وخوف وهلع
انتي ما زدتي عا الزجل درهم زجل
عن جد زدتيها ....!يا زنب بالدلع

Zainab Hmadi
المنبر ب سحري وبجمالي بلهمو
حاجي بجهلك بالتدني تتهمو
الجمهور ببدادون ركّز ع الكلام
ن ما فهمت ابقى اسأل اللي بيفهمو


ألشاعر سليمان طراد
لوما رجائي ..يدفع ويطبع صور
ويمكيج الأعلان ويخبي الجور
كنا ان سألنا ..كيف كانت بالحوار
كانوا بيقولو خي يا محلا النور


Zainab Hmadi
متل النور معليش كون ب هالمجال
منيح ال انت ب حْوارنا فتحت السجال
قعدت حد ملوك اجمع رزقتي
وبالبيت قعّدت اللي بقيو من الرجال