طير الفنيق رامي نعيم وبحر الزجل

حوار بحر الزجل وطير الفنيق رامي نعيم شبه ارتجالي

23 de diciembre a las 9:44 ·بحر الزجل
يا طائر الفنيق..من بعد الحريق
دربك طويله ..وجنحك المكوي طليق
بعدك يا رامي مبلّش بأول طريق
من ها الوهم يا صاحبي لازم تفيق
يا ها الحجر..جابوك من وادي سحيق
البنّاء رزلك ما بقي عندك صديق
يا كب حالك بالبحر ..تا طهّرك
يا طق قهر وموت يا طير الفنيق

ميلاد مجيد

Rami Naim
ما بموت الا بحب منبر حبني
وع وج دنيي من المواهب قبني
ولولا الظلم مدة بسجنو ضبني
السجان جوهرجي ولا مرة كبني
ولما الوحي بقالب نضافي صبني
طبيت اكبر شاعر وما طبني
اللي سبني خاف النضافي تفضحو
وهوي فضح حالو بعد ما سبني

شاعر سليمان طراد
مش حقد منّي ..أو تجنّي نزلّو
موضوع..كل الناس عم تتداولو
نصّاب..نمبر ون قالوا وعللوا
وغدّار رامي ..مرت.. الله ما إلو
وعنّك من الأصحاب مين ما بنسألو
بيقول ما بيتصاحب وما ابخلو
لا تزعل ان سبّوك اصحاب الوفا
صيتك حلو..وعندك سوابق يا حلو
هههههههه
رامي نعيم

صابك متل يلي النبي معهن ربي
٣ بعتهن ع مدينة مرتبي
الاول رجع قلو الحياة مصَاحبي
التاني رجع قلو العهر ما بيختبي
التالت رجع قلو النفوس مهذبي
قال النبي من بعد طول التجربي
يلي قصد أهل الزنى شاف الزنى
ويلي قصد أهل النبي شاف النبي

ألشاعر سليمان طراد
ما زال بتحب الصداقه .تبيّتك
كمّل معي.. تا نفهّمك خبريتك
صاير بها الأيام بين رعيّتك
خادم وداير تشحد بصينيّتك
ومن حيثنا بنعرف نقص شخصيّتك
قصدنا تا نعرف وين حاطط حيّتك
من غير قصد بتترك عيونك تشوف
ويمكن بتزني والقصد مش نيّتك

Rami Naim
الحية اللي عم بتحيلك بمعقوصها
عليي وبنية فاضحة مرصوصها
خادم صرت حوصة مجد عم حوصها
كبير وبحور الخير قادر غوصها
ومنابر الكلمة ما بدها صوصها
بدها حدا بيرص متلي حصوصها
ولصوصها سقطو بيوم فحوصها
والله بعتني ع الدني مخصوصها
احمل صليب القافية ع منبري
وطَهِّر هياكل شعرنا من لصوصها

الشاعر سليمان طراد
وحياة الله وحق مار شربل صحيح
الله بعت دجّال أعور مش منيح
وسيف الحقيقه بيدبح ولكن صريح
رح يجرحك من دون ما يردك جريح
هيكل الكلمه مسرح الشعر الفصيح
انتواالسبب تا صار منبرنا قبيح
لما اللي متلك يا علي بابا الزجل
فنّص ع حالو وقال عن حالو مسيح

Rami Naim
يلي علي بابا عملت رامي ، الأمين
ع مين بتمرق حقد عمرو سنين؟
وين الحراميي المَعْي وقصدك ع مين
في أربعين ومفتكر حالك فطين
بيجوز رامي وأهل منبرنا الحزين
صارو عصابة بعينك ومش عارفين
لكن شرفنا اكبر من الباقيين
المتلك قبال شموخنا حنيو الجبين
لا الأربعين ولا علي بابا الزجل
رح نرحمك يا ام أربعة واربعين

الشاعر سليمان طراد
مين أنتو ..مين قلّي يا فقير..؟
انتو عا باب المجد شقفه من الحصير
وبالزات انتي طلعت ما عندك ضمير
الأربعين وأربعه لشاعر قدير
مش بس عم تتطاول وتهجي الأمير
هيده لزين شعيّب عم تشفط كتير
مافيك عالتاريخ تدخل ياولد
إلا إذا انسبيت من شاعر كبير

Rami Naim
شو هالجواب الهابط وشو هالحشو
بتعطس قصد تيقلك السامع نشو
بهجي البحقي خبار قهرن لبشو
وبهجي العلى كتاف الأكابر عربشو
ويلي عليي كذب واهلو انتشو
هجيتو بشعر الله ع دفّي خرطشو
ولو مات يلي سب فيي وانقبر
لو بعد مية عام قبرو بنبشو

الشاعر سليمان طراد
ها الرد منك ما حدا بيتوقّعو
حتى اذا بحبر البلاغه موقعّو
رح خبّر الجمهور تاما تخدعو
والا بدليل وحق مش رح اقنعو
افضال موسى زغيب قلبك فقّعو
وكتاف داني صفيرضغطك طلّعو
كتاف الأكابر طلّعوك وبسألك
مين الترجّى عادل يغني معو

Rami Naim
موسى كبير وبكبر بإسمو الغني
نسينا المضى وفينا التسامح مغتني
وداني حبيبي وعلقتو مش هيني
وبيني وبينو مروج حب مزيني
وعادل ترجيتو ولمجدو بنحني
شاعر بيكبرني سنين ومش سني
هني كبار وقبل ما كرمن جني
كانو زغار ومجدهم عم ينبني
عبو الدني من قبل ما شرّف انا
وهلق اجا دوري انا عبي الدني

الشاعر سليمان طراد
موسى ملك ..! مين رد..!! رامي أو سميح؟
مش مصدّق .في وفا..عندك منيح
ما زال تبت و عا الهجا حطيت زيح
بالبحر بدي كبكب واعمل منيح
من الأول تعلّم ..ما تهجي ولا تصيح
كانوا الكل بيدعموك ..ومش مديح
يعني مع الإيام يا رامي الوفا
بيّن معك وحياة يسوع المسيح
هههههههههه

ميلاد مجيد القصيد بكرا
Rami Naim
بزعل بلا ما احقد وهي شيمتي
وما بكذب ولا بسكر بتعريمتي
ومش طالب يبجّل حدا بتنعيمتي
ولا بسمح يقوّس حدا ع ريمتي
بفن الشعر غالي سعر ترنيمتي
وبالمعركة بتركب غلق تبشيمتي
وع قيمتي ما بيقدر يغبر حدا
ومع مين ما بغني ما بخسر قيمتي

ختام الشاعر سليمان طراد

يا حبر الشاعريه عا وراقي
رامي نعيم عكرلي مراقي
لا تسمح تهبط الكلمه لأنو
جناسي ضيفك لهفة طباقي

يا رامي جيلك المحسوب منّو
اذا بتقارنو مش رح تلاقي
جيل بيشبهو ..تا نقول عنّو
مثال لجيل راح وجيل باقي

انتو جيل ما عرفتو تجنّوا
عا منبر كل عمرو كان راقي
يمكن عا الفشل أكتر تجنّوا
وينشف حبركن متل السواقي

واذا يا نعيم بتضلّو تزنّوا
عا راس الموهبه بمنطق زقاقي
رح يموت الزجل لما تغنّوا
ما زال الديك فيكن عم يقاقي

رجلنا من التراث الفكر فنّو
على طباقي فلشتو بجو ناقي
وانت ت تذوق طعمه شهد منو
حوّم نحل حسّك عا طباقي

الشعر آهات من كلمات أنّو
عا مفرق غصتّو مطلع فراقي
كفا تستهترو شوي تأنوا
تا فينا بجيلكن شاعر نلاقي

انا شاعر وفي من زغر سنّو
طالت غيبتي ومن إشتياقي
كتر ما عواطفي للشعر حنّوا
تقمصني بساعة انطلاقي

ما زال الشعر ما بيخيب ظنو
على كتافي الحمل تا يضل لاقي
نصيحة خي موسى حل عنّو
وعن سليمان يا رامي لانو

رامي، نعيم مش خرج التلاقي

ختام رامي نعيم
يا حاقد ع زمن زتّك بهجرو
اللي متلي حقدك من سنين هجرو
لا ميلاد الزمن موهوب عدّك
ولا عدّك زمن "تقويم هجرو"
بجيلي ما حدا ثرثار قدك
ولا قدك حدا "الخازوق" نجرو
واذا بكتب معك ما بصير ندّك
انت عتم الشعر ونعيم فجرو
انطرت ردّك ت ردي يصيب ردّك
طلع ردّك مريض وصحّ "حجرو"
وكتر ما سمّك بعقصات مدّك
جريمة ينترك برّات حُجرو
من جيلي يا حاسدنا شو بدّك
كتار بمجدنا من بعيد زجرو
شد الناس جيلي وانت شدك
بعد ما العالم من كتار ضجرو
ومع موسى الصلح يا زغير هدّك
الله يعيّشو وما نعيش اجرو
بيني وبين مجدو لزام حدّك
انا بيجوز تتناوط ع خصري
بس زغيب ما بتوصل ع اجرو
ختام

انا شاعر يا رامي رغم انفك
وما ممكن يوم توضعني بكنفك
مصنّف رقم أول بالمواقع
ورقم عاشر على المنبر بصنّفك
ولأني صرت يا ابن نعيم واقع
ومش رح يلتقي صنفي بصنفك
قطعت بحور تا غيّر الواقع
واعمل منبر ونضّف المنبر
من اسفاف بهورتك وعنفك