مارون البستاني زالبحر

ارتجالي بين مارون البستاني وبحر الزجل

مارون البستاني
يا بحر وينك طل شوف المهزلة
التجنيس خلّى بلادنا تغلي غلي
معروف عني بالشعر انّي الولي
وحضرة جنابك انت عامل بلبلي
في ناس بيعدّوك شاعر مخملي
وفي ناس مش خرجك منابر تعتلي
ومنشان انهيلك انا هالمسألة
وتصير شاعر عالمنابر أولي
جهّز ملفّك واعتلي منبر مارون
وقدّم طلب تجنيسك الليلة الي

بحر الزجل

شو خصك بقانون خالي من العطب
واضح وعيب تقول مخفيه القطب
عا كل حال ن في خطا بجمع حطب
تا احرقو ومش متلهن بترق خطب
العندو شروط بجنسو وما في مطب
وبعمل ضميري وواجبي وما بنام طب
وان كنت يا مارون ما بتوفي الشروط
تاكد من المرسوم بدك تنشطب

رون البستاني

شو باك يا سليمان مثل الاخطبوط
بتاخد بنالتي بس ما بتعرف تشوط
مينك تا تشطب انت او تمحي خطوط؟؟
الريّس انا وعهدي ما رح يعرف سقوط
مغرّب انت عم تقطع بحور وشطوط
لكن بوقت الجدّ رح احمل السوط
وبالباص رح جيبك عا ترم الانتخاب
وعليك رح ابقى انا افرض شروط

بحر الزجل
يا زاتت التهمات عا ابعد مدا
وكل همك كذبك يطلع صدا
بشطب وبمحي من سجلاتي العدا
وبحكم بعدل وبحترم دم الفدا
معقول ؟تشرط كنت حتى تنهدى
بعهود قضت عهدها رشوه وغدا
لكن اليوم سماع مني عا حدا
في عهد بعيون الاحبا بينفدى
هي اول المرات في عنا رائيس
بياخد قرار وما بيرجع ل حدا

رون بستاني

شو باك يا سليمان صاير طلطميس
بحكيك يوم السبت بترد الخميس
مظبوط عنا اليوم ببعبدا رئيس
لكن ما فيك بهالتو حالك تقيس
ميشال لو زدنا عا اسمك يا تعيس
مش بس رح تندار..رح تصبح خسيس
ومظبوط بي الكل ببعبدا حبيس
ما بيرتشي بالمال وبدرّ النفيس
لكن قرارك انت مثل المروحة
بيتغيّر بلحظات كلما اقشعت كيس
بحر الزجل
يا خجلت التاريخ من ها المستوا
بتحكي بحقي ؟ نسيت تغيير القوا
شو ها الحقد عا عهد عم يرفع لوا
مقرر يلاقي للوطن حل ودوا
عا كل حال سماع ماضيك انطوى
ان هتيتني بكياس حكيك بالهوا
يلي بيحمل كيس تايفيد الوطن
غير العا كيس الناس بيشم الهوى

مارون بستاني
حكيك يا ابن طراد عامل التباس
مثل المواقف بين فتح وبين حماس
لو في عدل مظبوط كان من الاساس
من جنّسك كنا على ايا اساس؟؟
عا فنزويلا رحت بالماضي بحماس
وفتحت متجر للشياكة باللباس
ولما الحرب ببلادنا دقّت اجراس
بان الفرق بكياسنا وشافت الناس
كياسك تعبّوا من الثياب ال عالرفوف
ونحنا سحبنا دم تا نعبّي الكياس
بحر الزجل

يا بو سحبه عتيقه ولا تطير
باوهام ما بتمرق عا طفل البسرير
كياسي كياسه ومعرفه وحكمه وضمير
وكياسك من النهب ملياني كتير
تهذب وحاجي كل ما صرح حقير
تهجي الرئاسي والوزاره والوزير
نحنا حملنا كياس تا نبني وطن
وانتوا اشتريتو الموت من كيس الفقير

مارون بستاني
معقول اهجي شخص سامي الاحترام
يا ما عا اسمو كنت اوعى وكنت نام؟؟
عليي انا يا طراد لا تكب الحرام
لنّي العيتاني ولا غبش يللي انلام
عندي الرئيس مكرّم وعالي المقام
ومثلو وزير الخارجية عالتمام
لكن اذا بتضل هيكي عالدوام
تفبرك ملغات وكذب للانتقام
مش بس دمك...رح لسانك اسحبو
تا حرّمك يا طراد تحريف الكلام

ختام بحر الزجل

يا رهبان الديوره والحبيسي
على مارون بخلو لا تقيسي
انا رح حل كيسي وجيب اكتر
مصاري وكمّل عمار الكنيسي

يا مارون تا مانقول اكتر
رائيس بلادنا دورو رائيسي
وما فينا كلما قانون غير
نسبّو وننعتعو بمنطق بليسي

وعلى قصة الكيس بهيك محضر
تعلّم كيف تتحمل وطيسي
وشوف البحر بالرد المجمر
بحجه بيترك سنينك تعيسي

المدا كيس انتلى من نجوم مرمر
مشعشع بس تا سامر جليسي
وجليسي كان ع ضلوعي مسمّر
انتشينا شعر بالليلة الأنيسي

الروايا كياس بالجسم المخمر
وكيس دماغك الخمر الرئيسي
اذا فضيّت كيسك يا معتر
لجهلك ممكن تصفي فريسي

انا كيس الارامل يا مشحر
عشايي بتاكلو صدّق البيسي
وانتي من البخل كيسك تسكر
بتشرب عا شهر بالبونجيسي
ها الشرق ظالم مفقّر
شعبو وسارق كنوزو النفيسي
وقلي كيف بدو الشرق يعمر
وسرقوا المال من كيسك وكيسي

يا مارون يا شويعر مشفتر
ترامبي منطقك.. أو كونداليسي!
بكيس ملبس الشامي المقطّر
حلّي تمّك ويا حروف ميسي!

البنت بشرقنا لو شب قرر
يطلب ايدها وتقول سي سي si si
بتسأل بيّها بتهذيب مخفر
بكيسو شو مخبالي عريسي
ويا احباب بالشعر الموقر
تعبنا من الحوارات التعيسي
بدنا الشعر من كيسو محرر
حلفت ما عدت حاور طلطميسي

لها الاسباب بدي فوق منبر
لم عضامك وحطن بكيسي
وربي فيك شعّار البتكبر
وطعمي للذئب لحمك وعضمك
بركي بيعملو عليهن هريسي

ختام مارون بستاني

يا سليمان يا وج القرينة
بحقي كتير الفاظك مهينة
وانا بيظهر كمالي بكل مطلع
كلما الجاهل المثلك هجيني

جايي بذئب ترعبني يا اصلع
وانا بالرغم ما صغيرة سنيني
اذا بتروح عالغابة بتقشع
الاسد تا يسكن استأجر عريني

انا ترامبي حكمت الكون اجمع
اصلي وما حدا بيلوي يميني
وصيني انت للروسي بتركع
وفرق كبير بين اصلي وصيني

وعدت الدير مالك رح بتدفع
تا تنشر بالغرب دينك وديني
طلعت من بو بكر اوسخ وابشع
وللارهاب موّلت الخزينة

انت بو كيس بالضيعة بتقطع
والسكّان كنّولك ضغينة
الطفلة عندما بإسمك بتسمع
بتبقى شهر مرعوبة وحزينة

على كل حال بدي ياك تقنع
كيسك في الو قصة مشينة
هوي بالكفر خلاك تطمع
وهوي العلقك عا عمد تينة
سليمان عا لبنان ارجع
وشوف كياسك على الشط زينة
العالم من ريحتها عم بتدمع
والامراض عمّت بالمدينة
وانا عم بنطر المرسوم يطلع
تا تتشكل حكومتنا المتينة
وتا قدّم اقتراح الناس ينفع
يا تعمل محرقة وتحرق كياسك
يا تبعتهن على الغرب بسفينة