زجل

انا وانيس الفغالي

اووف اووف

لا تسأل عن المنبر يا فغالي
وبالفردوس نام ولا تبالي
ولا تحكي مع خليل بها القضيه
تركو يرتاح واسألني لحالي

تعا تا خبّرك ..كلّن سويي
ما دخلو عا الزجل الا بكفالي
وفي شبيّن واحد متل خيي
محافظ عا التراث وع الأصاله

وتا احكيلك عن الغربه وعليي
قلّك في نسر بالارتجالي
لسانو مر وبيقسا شوي
وغريب الطبع بيحب القتاله

ولا تزعل يا أنيس من البقيه
اللي بقيو بعدك وحملوا الرساله
طليع وبو ربيع الشاعريه
وجريس ..للأسف وبصوت عالي

تركوا المنبر بحاله رديه
وغنّوا للبيدفع سعر غالي
وما حضنوا مواهب الشعر الغنيه
وبدهن شنق لو عنا عداله

هوني يا انيس بطيب نيي
خلقنا بالزجل موقع مثالي
الخوابي .وحدها عملت قضيه
الكل ومش انا عملتا لحالي

لها الاسباب يا فغالي برويي
لا تزعل عا الزجل باقي وغالي
ما زالو البحر حامل ها القضيه
بدو يضل منبرنا يصلّي
بحناجر روكز وابن الفغالي




حبيب بو انطون والأوتيفي

في موضوع يا جعفر لفتني
بدي اطرحو ولا تقول فتنه
جايي سدد الطابه بشجاعه
على محطة ابو انطون واتني

لاحظ كل جمعه عا الأزاعه
حفله مطنطني حضور ورعايي
سمعت مبارحه طلعت اشاعه
دافع صار تقلو عا الدعايي

سؤالي ليش غيرو ومش حسيده
بيطلع قد ربعو من صحابو
القضيه واسطه ..ومنها جديده
يمّا يا علي ناجح جنـــابو.,.’؟

انا ما قلت مش مفروض يظهر
مره بالشهر ..يظهر عا حيّو
لكن كل جمعه وقول اكتر
ما بقدر احملوهوّي وخيّو

يا بو انطون لو حفله بجمعه
كانت ناجحه وفيها موفي
ما تقبل يعرضوها كل جمعه
دشّر مطرح الغيرك بيكفّي

وانا من غيرتي عا الشعر جايي
افتح هيك سيره غصب عني
وبعرف بس يقرا ...بالنهايي
بدو يزعل المضروب مني

ويمكن عا سنه يبطل يغني

.


المنبر وانا

ما بعرف يا زمن غيّر زماني
وانقل لهفتي عا كون تاني
بعرف بس انزف جرح حرفي
على اوجاع عاشت مع كياني

الزجل ببلادنا قاعد عا شرفه
بيشرب قهوتو ومن ميل تاني
بيهرب من زمن شعّار قرفه
تا يسمع من زمانو اسطواني

الشعر فكره غميقه وكم طرفه
ومعاني مشبّعه بشهد المعاني
مش خزانه عتيقه بكم درفه
الهوا بيزكرك كانت خزانه

وانا يا منبر المنبر بعرفي
مسرح مش زهور ولا صواني
المنبر حلم مش ابداع ظرفي
وسكرة شاعر بمطلع غناني

ولأني بعيد يا منبر وظرفي
بيحكم ..عا زماني وعا مكاني
ما تبقا يا زجل ساكن بغرفه
خلّي مطرحك قصر المعنى
وأسس دولتك من عنفواني


وانا من باب حرصي عا وطنا
بقيت بغربتي منهك معنى
لانو رجعتي بتطلع خساره
على ولاد المنابر والمعنى
المنبر صار يا عالم تجاره
وناسي مين زين ومين حنا
المنبر لازمو نسر التوارى
عن الانظار تأ يرجع لعنا
وفي شعار غيرو يا غيارى
فيهم منبر الكلمه تكنى
بوطنا بيكتبو شهد العصارى
ولا نو الشعر مني ومش ممنى
جريمه نتركو ينهار مجدو
وندعم.كل شاعر بيت غنى
13

يا بو ضرغم انا بالغرب مرغم
وعمري من شقا الأيام جلغم
ما يرجع غير ع الضيعه المجيده
واخلص من سما الغربات والغم
تسكر كم شريان بنهيدي
وصدري مطبق ومليان بلغم
ولانو ذكرياتي مش بايدي
كلما بشوف لبنان الكرامه
ما بنسا يا وفي بو طي ضرغم
10

على زكر الحشبشي البحث كونو
على قد المهمه ولا تخونو
بوطنا للبقر ما ضل عيشه
وحتى الفقر طيرلوا جنونو
يعني كلنا رحنا حليشي
ووطننا ممكن نصفي بدونو
يمكن حلنا نزرع حشيشبي
اذا بيشرعوها للافاده
وطنا يمكن تمحي ديونو
12
ولانو الشعر ما بيرضى الرتابي
نقلنا من الدفوف على الكتابه
وعملنا موقع مثبت وجودو
باصحاب المواهب والأهابي
انا وعدنان بتزكر جهودو
كانت تعرق خدودو كئابي
كلما مدعي شمر زنودو
تا يستاثر بها الجيل الشبابي
ارتقينا نأسس الموقع وجودو
قلنا بيدعم الشعر وصمودو
وهيك تنينا خلقنا الخوابي
14

وعلي جعفر بعد عركه طويله
فتح مشروع فلسفتو الاصيله
وصفى ركن معنا بالخوابي
وفرض حالو ع جيلي وغير جيلي
وما بدي أزكر الجيل الشبابي
لا نو كلهن زات الفصيله
مواهب حد الله بالكتابه
ووفيا للمنابر عا القليله
ولأني بحر وبتنخر عبابي
جايي بها المسا قدم دليلي
وافتح بالزجل للكل بابي
حوارات طلبو مني وبدي
حاور كل نفسيه جميله
11

انا موسى ما قلي هيك غنّي
ولا الزغلول اخد من دروسو
انا من زغرتي مؤمن بفني
ولازم كلهن غيره ينوسو

الشعر مش نهنهه وقحه وعني
وفحول تناطح المنبر تيوس
شعر المنبري ابداع فني
ومسيح بيولد بتحضر مجوسو

الشاعر كامل ومن دون إني
على النسوان ما بيصرف فلوسو
الشاعر للصبيه وللمسني
بيتو الموهبه الكلمه عروسو

وانا شاعر غصب عنكن وعني
لازم كلكن ايدي تبوسو
لأنو ربّنا الجالس بجنه
نطرني بعرش الله السماوي
حد اجلس بساعة جلوسو

حبوا بعضكن

المحبه آخ من كلمة محبه
بتعطي زاتها وبتضل حبه
يا ريت الكل منها بيستمدو
عواطف صادقه وحياة ربّي

المنبر يا جماعه صار بدو
نضافه من الشتيمه والمسبه
بدو كلنا نوقاف حدو
ونرفع بيرقو عا كل قبّه

الشعر مش شاعر يشوبر بيدو
اللياقه المنبريه مستحبه
واذا الشعّار عا المنبر احتدو
بيبقى الذوق ضابط كل هبّي

تركونا نسمع الكلمه وأدوّا
الرساله المنبريه وما بخبي
الغنّوا..صح عا المنبر انعدوا
لها الاسباب بدنا يا جماعه
يحيا العدل وتعيش المحبه



اووف اووف

الشاعر و....

ارتاحوا بلا حسد ..ناجح ارتاحوا
وبيارق جوقتو بالجو لاحو
هوّي والمجد توأم سويّه
دخيلو رب ربو بأفتتاحو

يا مار شربل الدهشه المنبريه
بتطلع ضو من شبقة جناحو
وشوارد كلمتو نسمه طريه
وعواصف بحتّو الجو استباحو

يــــا عتعيت روقّها شويه
الشاعر كلمتو الحلوه سلاحو
المحبه والتواضع مش خطيه
خلّي ديكك يخفف صياحو

وانا البحر الما عندي سوء نيي
بحب الشاعر يضل بكفاحو
وما يبدل طيبتو.. ومني وعليي
بضوّي .عا نجاحو كل مده

الشاعر ما حدا بيسرق نجاحو



رساله الى المصطادين بالماء العكر

اعزريني عا غيابي يا خوابي
وبلا ما تعاتبيني عا غيابي
مرقت بوضع ..حكمتني ظروفي
وت حل مشاكلي قفّلت بابي

انا ما بحبها تبكي حروفي
لأني بحط روحي بالكتابه
وما بقبل بيت يمرق عا كفوفي
اذا بيكون طالع من عذابي

وتا ارجع بالشعر حدد وقوفي
وسدد كلمتي بصدر الرحابه
واحكي عن اسامه وحق اووفي
وشربل كامله تنين صحابي

مرق بيتين بالحفله الشغوفي
البعض بيقول عيب الاستغابي
هفوه أو غلط.. مش هون شوفي
الحقيقه يا خوابي بالمخابي

بعض شعّار عم تنقد لهوفي
بنوايا صادقه وكلّن حبابي
وبعد الناس تا تمرق بلوفي
وت تاخد تارها وهون الغرابه

والعتعيت آخد دور كوفي
بيزت سموم حقدو بنقد نابي
ولأني للعدل بشهر سيوفي
ما بقبل ينظلم شاعر عا منبر
ولو بتكون ظالمتو النقابه

ألشاعر سليمان طراد
12 horas
قصيده..ومنبر

ليش القصايد كلها تخويبن
وشاعر عا شاعر صار يتأنبر
مش هيك كان المنبر من سنين
ولا هيك بدنا تصير يا منبر

بعرف اذا بلّشت احكي كتار
رح يزعلوا ومعقول يعترضوا
رح ضل احكي..الحق.. مش تكرار
شعّارنا بنخاف ينقرضوا
المنبر بيبكي دم والأنصار
من ها الرتابي صدقوا مرضوا
خلّو القصيده متل خط النار
والشعر يطلع بس من أرضوا
علينا اعرضوا من زبدة الأشعار
مش بس عا الشاشات تنعرضوا
المنبر رسالة والشعر تزكار
ولا تطلبوا مني الرضا اهتموا
محبيّن منبر شعركن ترضوا

انا ما زعلت هنّي الزعلّوني
وقالوا يا علي ما استهضموني
وانتي بتعرف وعدنان عارف
ليش وكيف صاروا يكرهوني

انا يا شعر صرت على مشارف
نهاية غربتي وبتعرفوني
اذا قررت ارجع عمر صارف
على الخدمه وبخدم من عيوني

ولأنو كنت خريّج المعارف
ما بحكي غير لبناني اعزروني
علي وعدنان بالموقع زخارف
قصايدهن بتحكي عن شجوني

انا الريح الصحاري الجهل جارف
ما بعرف ساير الجو الجنوني
بشعري بموّل بنوكي ومصارف
بس الحظ بالغربه الحزيني
تركني بعيد عن منبر فنوني
26

الياس بو راشد ضيعانو

هي أول المرات بحكي وما بخاف
يزعل ضميري من كلامي ال ب لقفا
عن شخص رمز الآدميه والعفاف
وصاحب ضمير وموهبه وعندو وفا

تركني يا بو منصور أحكي عن صفات
ما كان غيري بيعرف ..بشخصيتّك
مش عاطفه ..!تا كنت اظهر مكرمات
وضوّي عن الأنسان بالياس الوفي
قديش كنت محب..بيضا نيّتك

غنيّت بالسلم وبعز الحرب
وما تهين مره تزين كلماتك
وكلما كنت تسمع رفاق الدرب
تحس حدن قاعد بزاتك
وتفرح اذا نجحوا وما تحكي ورب
وغير الشعر ما تكون غاياتك
ومين غيري بيعرفك عن قرب
قديش كنت تحب رفقاتك

بحر الشعر عا غيبتك مجروح
قول منّي اليوم شو بدك
بدّك تا افتح دفتر المشلوح
وافضح نجوم عملت عن يدك
دشّرتني وبكيّتني من الروح
يا ريت غدّي يلتقي بغدك
ولما القيامه تقوم وين بتروح
اهل الوفا الما وقفّت حدك

بمنبر زجل لبنان كنت كبير
من الموهبه والشعر تثقيفك
تحاور بحنكه تا الحوار تدير
ورقم صعب يضل تصنيفك
المنبر عا إيامك وفا وتقدير
ضلو نضيف ببركة نضيفك
وقمح الحكي المزروع بدواوير
جهدك يا بو راشد طعمت كتير
وقسّمت عا ولاد الوفا رغيفك

يتبع

رساله للشعراء

اعطيني ربع ساعه يا زماني
تا احكي كيف قلبي عم يعاني
بقشع بالوطن عا كل منبر
مصايب شعر من قاصي وداني

انا مش حقد مني ولا مقرر
اطلع عا المنابر في زماني
ولا بدي نافس الشاعر الأخطر
ويمكن ادعمو بسبك المعاني

لكن يا بشر في خط احمر
ما لازم يقطعوه بلا ضمانه
اللياقه المنبريه بكل محضر
ضروري تنحفظ متل الأمانه

والتجريح غلطه وعيب تغفر
وانتو بتعرفو ان بفلت لساني
ما بترك عا الصدر شرشف مستّر
لكن بالشعر مش بالإهاني
لها الأسباب جايي قول أكتر
كل الحب يطلع عا المنابر
يجي تا علّموا اصول الغناني

عدنان اشتقتلك

بعد ما انقال كلمه من معالي

الوزير ..وقالها ..وبصوت عالي

انا ضد التهجّم ...رغم إنّو

ما هان الأجنبي وقال العماله

يا عدنان موطنا كأنو

مصايف للأحبا وللغوالي

الأحبا طوّلوا عنّا وما حنّوا

ل وطنهن رغم ما صاروا حوالي

شي مليونين نسمه ..ما تمنّوا؟

لوطنهن يرجعوا ..لعند الأهالي

وحتى بلادنا احكيك عنّو

تعا تنيناتنا نموضع هدفنا

ونطرح مشكله كتر البطاله

اووف اووف

انا ما جيت احكي بالسياسي

ولا دافع عن صحاب الكراسي

انا حبيّت اطرح ها القضيه

بركي بينعمل عنها دراسه

وطنا صار اكتر من ضحيّه

فقرموروث من بي التعاسي

وكلما بزكر المرحوم بيي

بزكر كيف قضيّنا المآسي

السبب مش حكم ظالم عا الرعيّه

السبب ابعد من شعور الحماسي

من إيّام هاك العاميّه

المرقت بالكذب عا شعب ناسي

ولأني مؤمن بلبنان فيي

الحقيقه قولها عا قطع راسي

كل اللي حكم عندو مزيّه

عدنان بعرف حرقتك وبقول
ها الشب زاتو..بظن مش مسؤول
قبلو اجانا ع الكراسي كتار
وشفطوا الخزينه وضيعوا المحصول
ما قال فلو قال يا زوار
لبنان ما بيحمل بقا الأصول
تعودوا على أوطانكم أحرار
ت تعمروها وما تخلوا زيول
للحرب يلي دمرت آثار
وخربت وطنكم بالعرض والطول.
وين الغلط او هاجموه كتار ..
بالرغم ما وضح ومش مخجول
معقول عندن يا عزيزي تار
منو لانو بيفعل وبيقول؟
ومنشان ما تتلفّق الأخبار
من جهتي بشجع انا المسؤول
يحكي الحقيقه بدون استهتار
وما يضل يبرم حولها ويجول
ولو اشتراكي كان أو تيار
ما يسكت ولا يساير البلدان.
تا يصير في عنا سياده..نقول