عدنان سعيد وبحر الزجل جوقة البيادر

جوقة البيادر تحت المجهر

وختام جو حرب نقد موضوعي

سليمان طراد
عدنان في عندي عتب ..جوزيف كيف
بيقبل يغني مع الرابع ..يا لطيف
جوزيف موسى شاعر العصر الظريف
غنّى مع كبار الأسامي ..مش خفيف
شعرو معتّق منظقو الشعري مخيف
وحرب قاسي بمنبرو وشاعر عنيف
هان مازن ..بعد ما الجوقه فرط
وعا ها الإهاني القالها ...دار الزقيف

عدنان سعيد
الشاعر يا بحر الشعر الله ابدعو
بالحب و الاحساس طايف منبعو
و جوزيف شاعر عا جنابو بيطلعو
الركضو ورا الشهرة تا حتى يلمعو
اما رفيقو ال عن رفيقو الودّعو
إجر كرسي ان قال عنو بمطلعو
صعبي على جوزيف و رفاقو كمان
عا هالحكي عا منبرو يغنّو معو

سليمان طراد
مفكّر اذا بجوقه بحفله بيشركو
بيصير قد المجد ..صعبه يزركو
الشعّار لما تعولموا وتأمركو
صارو جثث ما عاد فيهن يحركوا
وها الجو حرب اعلن الحرب وفبركو
عا كبار دينين الأسود بيفركوا
هان الصداقه سماع ركّز عالختام
من هيك لازم ابن موسى يتركو

عدنان سعيد
يا للأسف كيفتا المنابر بهدلو
الما بيحلمو عليها شي مرة يعتلو
كرهنا الشعر كترة ما صارو يعملو
و يتزلّفو للمجد حتى يوصلو
البيكون طش الصف لو اول بيصير
راسو يا بحر الشعر مش رح يحملو

سليمان طراد
ما كان قصدي هين جوجو بها الحوار
قصدي الغلط ..تتحجم الناس الكبار
مازن ملك عا منبرو ولو الكل غار
غنّى بجوقه مجدها حرقت كتار
عيب انو يستغيبو شب دار
يبرم على شعّار من زات العيار
شو كان بدو يضل مع رامي نعيم
صبح ومسا ...ما عاد يتحمّل نقار

عدنان سعيد
بإسف عا ناجي يكون هوني مطرحو
بجوقة عليها الفاشلين بينزحو
سليمان دخلك كيف هودي بينجحو
و من هالسخافي كيف شهره بيربحو
استحليت رب الكون يبعت عاصفي
تقش المنابر تا المقابر يفرحو

سليمان طراد
عا المجد لم غنّام فوح زهرها
الشعّار ماتت من حسدها وقهرها
مش إبنها ولا خيها ولا صهرها
هيدا متل طوفان جايي بنهرها
وعندك بعد شعّار زايد عهرها
بتهين كيف ما كان لازم نهرها
معقول ما بتتحاسب وهون الغلط
بتشدّ قولك بالنقابه ضهرها

عدنان سعيد
مافي نقابه تحط للمنبر عيار
ليش النقابة اشطر بهيكي قرار؟؟
تا نعد كم جوقة ببلدنا اليوم صار
و خلّلي " الربيع " بعيد عن هيكي بازار
"مجد" و "عمر" و "نجوم" مع "مسرح" قمار
و "قلعة" و "أرز لبنان" مع "بيدر" زرار
و "جوق الليالي" و "روكز" العلّلا العمار
تسعة بتسع ريّاس بيقولو كبار
و ما ضل في مطرح لكم شاعر كمان
نقّي شي جوقة و روح يا معتّر سهار

سليمان طراد
الجوقات كترت صح مش هون المرض
كتر الأهانه عا المنابر تنفرض
الشجّع وخطط عا الجريمه لوه غرض
يقشع المنبر من بعد حقدو انقرض
الشاعراذا بيزعل من الشاعر فرض
لازم يغنّي بتوريه تا تنعرض
لكن المؤسف بالختام اللي انقال
الكل زقّف ما شفت شخص اعترض