رثاء الياس داغر

يا شاعر الصوت الحلو الفتّان
بيت القصيده الطاهره محجك
غنيّت عا منابر زجل لبنان
أجمل شعر ..واليوم بالجنه
لما صدح صوتك.. عزّف وجّك
بعرف كتار ..كتار ..قالو كان
بيقسا بشعرو ..كل ما تجلّى
انسان كنت..وين في إنسان
كامل تا فينا ..نشبّهو بالله
بعرف عزاءك كان كلمه ودف
ضليّت تحملهن على كفوفك
ومن بعد ما ضيّعت هاك الرف
حسيّت انو تعاكسو ظروفك
وعا منبرك كلما صرخت أووفك
الا حزين القلب ما نشوفك
يا بو وليد ..بيحرق غيابك
أكتر ما نار الشوق حرقتنا
طالع ..ل فوق....ولابس تيابك
باللّآه ...لا تنسا علاقتنا
سلّم على ادوار والزغلول
وبطرس واسعد مع خليل وزين
وقلّو انيس الشعر ما بيزول
وسلم عا بو منصور قلو وين
صار الزجل ..عارف شو رح بتقول..!
بدّك تقلّن ..ها العمر سفّاح
أخّر عذابي ..وجيت ت إرتاح
من ها الدني الما عاد تعنيني
مريّح ضميري ....وللصبر مفتاح
وبدك كمان تقلّهن ..وتبوح
انّو الزجل صاير عا آخر روح
ومن كتر ما قلبك نقي وحسّاس
باب السما بوجّك بقي مفتوح
يا بو وليد قصايدك تاريخ
ابعد من الغيم ومن المريخ
اوتار صوتك كلّها نايات
خلّت حناجر منبرك ما تشيخ
ضليّت تعطي ها التراث كتير
وتغني بشعرك خزنة بلادك
مشوار آخرتك خلص بكير
الله يرحم اهلنا الراحو
والله يعطي الصبر لولادك

» الياس جرجوره والبحر
» رثاء ابن الصديق جون عقل
» رثاء ابنت خالي ليلى عكاري
» مارون داغر وبحر الزجل
» عبد والله مارون داغر وسليمان طراد