طلال وسليمان

هجاء سطيلة الشعر للمستشار الاعظم
ومش عارف فتح ع حالو باب جهنم
....... ..............
ألشاعر سليمان طراد
ومعقول منّي زعلت يا عكّو؟
وصرتو بغيابي ما بتتحكّو!!
ما كل عمرو البحر عم بيغيب
وبقدرتي معقول بتشكّوا؟
بحر الزجل اعصار حامل طيب
ومروج أنفاس الشعر زكّو
الإبداع مش اسفاف أو تتطييب
الإبداع ما بيوج تا تحكو
واليوم في مضاريب ومجاديب
ع ها البلاغه عيب..بيبكّوا
وقد ما اعضاء فيك تجيب
والبحر لو بيشوفهن لكّو
لا الصوت رح يشفع ولا التتطريب
منّي انتبه أو نبّه الأعضاء
قشاط الزجل رح يرجع يفكّو
..............
ردّ المستشار الأعظم :
اجا مْكاري الزجل قاطع مشاعو
ع ذوقو يرندح و يفرد متاعو
و بذات الدايره عقلو محصّر
يا ربّي هات صبرك تا يساعو
إجا من بعد ما بْجهلو تبصّر
بأنّو المارد بيلوي ذراعو
وأنا لو بشقل بْكلوة الخنصر
عواميد السما هرّوا و تداعو
نكر شعري المثل خمره تعصّر
وسكب تفل البدر مونه بِصاعو
بفرد لباس يا جويزه و أبصر
مين الشعر منكم وهم باعو
و إذا في كل عرس قدّو تخصّر
و زقيف المشتري عمّر قلاعو
على محكّ الفكر كل شيخ منصر
بدّي افضحو و اكشف قناعو
طلال الشعر عرشو تاج قيصر
عجين كماجكم قرّص طباعو
بجرن الفلسفه فكرو تنصّر
و حدود المعرفه تْخطّى شعاعو
راجع من بعد ما الشعر قصّر
ت يفتح بالمدا عمق و تجلّي
و فكر ينحت حلا الكلمه يراعو..
ويالله تنشوف

ألشاعر سليمان طراد
Colaborador destacado
يا ربّي ليش بتحب الضحايا
وعليي حابب تزيد البلايا
انصحو لطيطو لا يبطر بالقصيده
وقلّو لا بقا يهجي القوايا
يا طيطو عركتي مره ومبيدي
اذا مش قدّها بترجع بقايا
وبلا ما تنزع الليله السعيده
وتنقل قتلتك برا السرايا
الخوابي ولادها تربو ع إيدي
تا صارو يخيّلو فوق المطايا
وشو خصّك انت بمواهب عديده
صنعها الحج وبصدق النوايا
واذا بتحب بقرالك جريده
عن افضال بدر ..وفي صبايا
صارو بالخوابي بلا حسيده
يقفّو الشعر شو طلعو ذكايا
وياما نقّح ل شعرا عديده
ومتلك عيب ما طلعو وفايا
لها الاسباب بدي بل ايدي
فيك وفهّمك تحفظ جميلو
وعلّم فيك يا عكو البقايا

ألشاعر سليمان طراد
Colaborador destacado
ويا بو كماج مقرمح ومسوّد
لا تدعّي بالنحت وتداعي
عا قد ما بتكبر بتبقا قد
زغتور عم يرضع ومش واعي
مهما الدعايه تكبّرك والشد
رح يفتقك ما في إلو داعي
تبيّن قبالي تعرّم وتحتّد
قبرك بقيسو ارتاح...بدراعي
مين قال انّك شاعر بتنعد
مغرور وظروفك ما بتراعي
بتطلع اذا بدنا نقول الجد
قرطل قصب محمول بكواعي
وجاهل البحر عليك ما بينرد
تا تعتذر قدّامنا من الحج
وعليه حاجي تكرفت دواعي
ههههههههههه

طلال مطانس عكو
Autor
Especialista del grupo
ألشاعر سليمان طراد
يا أهل الشعر دنيا الشعر عَزّوا
سوسو بيك صاغ الطيش عِزو
وإذا عا غيرنا بفلسين عرَم
بيسقط كلّ ما طْموحي ابتزّو
يا سوسو بساط عقلاتك مخرَّم
وسوسو ناهش بقمحو و رزّو
وسيدك بدر ع المثلك تكرَّم
عند ما شبّعك من خير بزّو
انت جلدك بضرباتي تورّم
وجايه ت الدهر عنقو تجزّو
قلت معليش ضاف الروض حيرم
م في داعي بنفخة ريح هزّو
زرعنا الزنبق بدربو و عجرَم
قلعنا . خْطيّ حتّى ما يغزّو
طلع فنّيص بقْوة ضبع اطرَم
و نياب الجوع عا بعضن يكزّوا
يا عنقود اللي قبْل الترم حصْرَم
انا خْموري جروح الكرم نزّوا
و إذا غْرورك بخامَك نار اضرَم
انا غزلة حريري الخيط قزّو
انت مش ندّ فكري و كان يحرّم
ع مهري يسابق خيول الكسيحه
لو ما الواجب الشعري استفزو



طلال مطانس عكو
Autor
Especialista del grupo
ألشاعر سليمان طراد
و كفا تبرم ع ذات الاسطواني
بأنّو ع الشعر فضلك اعاني
بدون مواخذه و معلّميه
بقصايد شعرك الأفلاس جاني
بصف حروف ما فيها مزيّه
ضمير الموهبه اصبح مُعاني
بّتركض من ع بكرا ومن عشيّه
تتزرع خيخنه و تحصد جباني
انت يا طراد لعبه مسرحيّه
و كرت رابح بحفلات الغواني
و تتحرّك مواقعنا شويّه
سحبنا الكرت من درج الخزاني
انتصح كافيك جهل و فوضويّه
صداقاتك يا بو شربل أماني
ما عاد الوقت يسعف يا بنيّي
إذا ما رْضيت تحفظ شيب راسك
تضيّع عمرك الشعري بثواني



ألشاعر سليمان طراد
Colaborador destacado
عليي بعد ما الأحباب جارو
جبرت السيف ما تمزح شفارو
وفتحت بواب فلسفتي العتيقه
تا إستقبل بموقعنا زغارو
طلال تعيّن وما في وثيقه
إداري وما انعرف مين الختارو
فات بواسطه بلعبه دقيقه
قبض عدنان من عكّو دولارو
وانا ما كنت لاقي ولا طريقه
فيها فاتشو وافهم فكارو
كان يمغمغ وهيده الحقيقه
ولأنو الموقع استأنف خيارو
وصداقتنا رغم منها عميقه
بدنا نطالب بتدقيق فوري
بركي بيرجع يعدّل قرارو



ألشاعر سليمان طراد
Colaborador destacado
يا عكو سماع مني يا زميلي
الاداره مش هدف هيي .وسيله
انّك تجمع الشعّار كلّا
تلات رباع اجمع ع القليله
فتت عا الموقع بأسلوب والله
حس الحج بحقو تقليه هههههههه
ترك ها الموقع وعنو تخلّى
وأكلو صار براتو بليله
بعد ما كان كرشو أواز تلّى
ضعفت شهوتو وصارت قليله
وانا ببعت الو من فنزولا
محاشي ورز وشوية فوارغ
تا يبقا الحج خيّال الأصيله



ألشاعر سليمان طراد
Colaborador destacado
استحي من الحج يا عكّو اعذرلو
وضهرك بالمواقع لا تدرلو
واذا غلّط بحقك عيب سامح
وذنبو بدون ما تفكّر اغفرلو
اذا بتشوف مهر الشعر جامح
سرعة حركتو بسرعه قفرلو
لأنو الحج من أول مبارح
قلّي قبر للعكو حفرلو
لأنو طيفك تأكد ان لامح
بدو يكسرك بالارتجالي
اسأل كلمن عركه حضرلو


طلال مطانس عكو
Autor
Especialista del grupo
ألشاعر سليمان طراد
يا سوسو كل ما عليٍي تعدّوا
نوايا الفيك عا ضعفك انردّوا
الأذيّه ب بحرها فايش و غارق
و زمانك سارق من الامس غدّو
آذا عكّو براسك ثقب خارق
و عصي عالمجلس الطبي يسدّو
وصيه اكتوب يا شيخ المْفارق
وعلى كذبة شعر يا قوم حِدّوا
افتكرتك غصن زهر الشعر وارق
ومن كمامك عطور الصبح ندّوا
يا حسره طلعت مثل الغير مارق
و ضحية مثل ما غيرك انعدوا
و إذا بدرك رجع بعد المطارق
ع راسو يزحف وقاصد و بدّو
الأمانه يصونها و يحمل بيارق
انا برضا كرامة عين عدّو ( عدنان )
يا سوسو حاج واقف عالمفارق
تتضرب كمّك بمزحو و جدّو
أنا جّموحي خفايا الغيب طارق
البحر من سطوتي بجزرو و مدّو
المغارب لو بتبرم و المشارق
و بعزمك لو مرود الجان شدّوا
رح بيبقى طلال الشعر حارق
بعين المعرفه و عين الحقيقه
يباسة كل عقل مجتاز حَدّو ...


طلال مطانس عكو
Autor
Especialista del grupo
ألشاعر سليمان طراد
وانت مينك ت تهجم عا عربني
و تلعب بالغلا بساحه متيني
كنت خلّيك طلّة بدر ناطر
بلا ما نفضح القرعه المهيني
بعلمي كان غيمك وحي ماطر
وفارس حربجي و جوهر خزيني
شو صايرلك تخلفك هيك قاطر
حمل و متاع من أهل المديني
أنا فكري جمود الجهل شاطر
ت أخلق فلسفه تعبوا سنيني
و على سقف السما مْعمّر قناطر
بفيّ ظلالها الدنيا أميني

انا ما جيت تا اكسر خواطر
ولا شعْرك يوم بالصوره عِنيني
بغير مجالنا خطّك يا شاطر
فرق بين البلاغه و الضغيني
مرق مثلك علينا من المساطر
وما قدرو غبرو حذوة هجيني
انا راس الفنا ع الريق فاطر
وألف مثلك بلقمه ما كفيني
وحقّ الرب طِيب الذكر عاطر
ببحر الشعر ببلع كلّ ياطر
إذا موج الفكر حرّك يقيني .



ألشاعر سليمان طراد
Colaborador destacado
عليي ليش تا تشهر كفاحك
وحدو الحج يالردات لاحك
نصيحه لا تقرّب ع شطوطي
ولا بجبهتي تعلن فلاحك
الحج معلّمك يا منفلوطي
وياما نقّح وزيّت سلاحك
احترم خط التماس العا خطوطي
وبلا ما انجبر ع اجتياحك
وعليكن بالزجل افرض شروطي
يا إما بتتطلبو من الحج يرجع
يا إمّا بصدرك بشكشك رماحك


ألشاعر سليمان طراد
Colaborador destacado
وعلى عدنان رح اطلق سهامي
قبض من بدر وتحمّل ملامي
وما بعرف وين بعزقها وبزّر
مصاريف الخوابي والعلامه
عزايم ل أبو شادي الموقر
ضروري نجبرو يدفع غرامي
انا ما بحب افتنها وما بفخر
اني شوف موقع شعر دامي
لكن في عداله بحب تظهر
ونعمل بالخوابي اليوم لجنه
تدقق بالاداره ع الاسامي


طلال مطانس عكو
Autor
Especialista del grupo
ألشاعر سليمان طراد
و ع سيرة بدرك الأعوج سراطو
ضروري الفكر يحكم في نشاطو
و لشو تتروّج الكلمه العقيمه
ال بحجّة ضعفها باعوا وتعاطوا
الهجا بحروبنا زاد النميمه
و ْخصم صفّا على الماضي عياطو
لا قادر يشحذ بسيفو العزيمه
ولا يسحب أُبر من تحت باطو
داير ع الصداقات الحميمه
و بنك فلّس بأصلو و احتياطو
ما قدروا يدفعوا عنّو القسميه
إذا الثوب اهترى صعبه خياطو
وإنت يا طراد سوسو او حليمه
بقايا طبختِك ع النار شاطوا
حلّك صار تعطي الحرف قيمه
ت عرش الموهبة يعلى بلاطو
الشعر مش كنفشه وقذح وشتيمه
ولا مْسدس أذى خرطش مْشاطوا
الشعر نور و علم قيمه عظيمه
على عنق الجهل شرّع سياطو
انا بحاكيك من قلبي و صميمي
مقاسك قصَّر الفشخه بساطو
نصيحه اسماع يا نحاس الذميمه
الذهب لا تْشارع بوزنو و قيراطو
انت لنّك بوزني و لا غريمي
و ت ما أقسى على شيبة زمانك
صون لسانك و اعقد رباطو.


طلال مطانس عكو
Autor
Especialista del grupo
قضيت العمر شيّد قصر ذاتي
بشعري و بحنين معلقاتي
و عين النسر سهمي ظلّ صايد
و عليّي ما مرق يوم الشتماتي
اجاني طراد حمّال الشدايد
قوي قالوا فحل مثل الزيناتي
و على الشعار عامل حكم قايد
و ناوي اليوم تا ياخذ حياتي هههه
صرت داريه عا حسب العوايد
يا عاقل اسمع ان حكيو الخواتي
لك
أنا لو متت يا زيز الحصايد
وصرت ترقص دلاعه في مماتي
وبدر سيدك معك والخصر مايد
يخلع حنجله رايح و آتي
بعتم القبر لولا كون رايد
مجد أعماركن حبّه برفاتي
تعا يا طراد تا تجمع فوايد
بْذارك ازرع بموسم الشاتي
صيغ الجوهر و ارمي الحدايد
ع تفنيصك خجل حبري بدواتي
انا إنسان طبعي ما بكايد
على القاصر ما بقسى بجوّ عاتي
يا اعطي مثل ما بعطي قصايد
بلاغه و معرفه و معلّميٍه
يمّا حيد يا شبّ السباتي ..


ألشاعر سليمان طراد
Colaborador destacado
ع شو محتّد يا فحل الغناني
ع فلسفتك ع شعرك عا الأماني
ع اسمك ع الخوابي اللي نزعتو
بكبر الراس وبزغر المعاني
يا أسعد بعتذر منّك لأنو
اخدت المطلع وطبّشت سنو
وطلال بتعرفو بالشعر امحل
الكل بيعرفو وبتقول عنّو
ولد مغرور وتعلّم يهجّي
مني خلصو الله المنجي
وكلما بيطلب الدعمه بيصرخ
دخيلك طل ساعدني يا حجي
وهلق من بعد طقي اسمحولو
ل بحر الشعر يطلب ع اصولو
هجا مدروس بالاستاذ عكو
وفيكن متل ما بدكن تقولو
مطلوب من الشباب يحكي عن طلال مدح او هجا المشاركه من الجمي



ألشاعر سليمان طراد
Colaborador destacado
يا مارق عا الخوابي طل طله
شوف الارتجالي ولا تخلّي
بقلبك سر إلا ما تقولو
انا ما بحب ساعات التخلّي
انا بحب التحدي ع اصولو
وبعمري ما اعتدت اترك محلي
ومحلّي قد ما تستفقدولو
بخلّي ب الخوابي بس ظلي
وانا بها الملتقى حقي وصلي
صمد عكّو وطلع تلميذ شاطر
يلا يا شبيبه زقفولو
تجديد بحر الزجل القفله ع العجز


ألشاعر سليمان طراد
Colaborador destacado
وانا يا حج مشتقلك زيادي
على سماكة الدم الفيك حتّى
اذا بتترك زجلنا بإعتقادي
عليك بيبرمو مرقص ومتّى
تعا ارجع على الموقع ونادي
مشاكلنا بها الايام شتّى
بلادك ضايعه وضاعت بلادي
وانت بتضل ميزان المعنى
وطلال بيرجع بعهدك يدادي
القفله عا العجز


طلال مطانس عكو
Autor
Especialista del grupo
ألشاعر سليمان طراد
أيّا محْل و الردّات بانو
مين ال بالبسبق رابح حصانو
الشعر يا طراد ما بتخدع ضميرو
بشطحه الوهم حاكيها لسانو
انت بيّنت بطويلو و قصيرو
لعي فاضي و جرد غلّ بزوانو
وانا للمنبر الشعري اميرو
وعليّي قْطوعك انكشفو و هانو
صرت تستنجد بأسعد يا زيرو
يا ساقط بالشعر وقت امتحانو
شو بدّك كان بالسبع و زئيرو
ما زالك أرنب و حرشو مكانو
و لموقع شعرنا عم تستجيرو
تتعطي حكمك و تلقي بيانو
قلت تلميذ عنّي يا ضريرو
و خدودك لو صخر بالكف لانو
أنا استاذ يا جاهل مصيرو
الاكبر منّك بْعلمي استعانو
و شهاداتك فرزدق او جريرو
مش محتاجها السابق زمانو
ع جوعك ردّها و البال عيرو
لردّه تقطف الوحي بأوانو
انا طموحي خصم من زمهريرو
يعصف ريح أشعارو بكيانو
و فكر ع الغيب بيودّي سفيرو
تتقطف لمعة الحرة بنانو
لا تزعل يا بحر باقي هديرو
ع غيري يخدق بموجة حنانو
انت شعرك بطيشك عم تديرو
لحتى تكسب الشهرة بموقع
و انا نحتي الأدب والعلم زانو