النسر نسر الجنوب
سليمان شعرك مثل أوراق الحمــاس
مطلوب راسك تكتب بجُرأة وحماس
بهالمعركة ما بين غـــــــزّة وتل أبيب
بتوقف مع اليهود يمّا مع حمــــــاس
سليمان
ما زال يا فلسطين كانو الانبيا
بارضك رغم كم القداسه اشقيا
بها الحرب ما بوقف مع المتحاربين
بوقف ع قبر ولاد ماتو ابريا
كامل
شو هالجواب ل شايفو حْيادي بَخيل
لْ ما دان قاتل او حِكي بإسم القتيل
كْتار لْ حَكو بإسم الطّفالَة الأبريا
وما وجّهو مرّة إدانِة لْ إسرائيل 🤏
سليمان
ما فهمت ردي بتسأل وكيف لاك عين
ردي يا جاهل بالحرب ضد التنين
لوما تصير الحرب قلي بكربلا
بعدك لحد اليوم عم تبكي الحسين ؟
كامل
مش كل طالب حق تا لباطل يزيح
بيكون قاصد يفتح الحرب القبيح
ولما ابتدى يَزيد مكّة يستبيح
فَلّ الحُسين بكربلا تيستريح
بين الظُّلُم والحرب قوم وحطّ زيح
واقرا لحقايق كيف صارت عن صحيح
يحيَى انقطع راسو ما حارب يا فصيح
وبَيّو انقتَل وبذِمّتو ما في جَريح
وتنقول إنّو لْ حارَبو جابو البلَا
شو كان ذنبو ينصلب عيسى المسيح؟؟
سليمان
مفكر اذا بدك تغير اتجاه
موضوعنا بيصير عندك كبر جاه
يسوع ما حارب و اعطي انتباه
الا المحبه ما بتنضح من شفاه
تذكر معي ببستان زيتون الاله
يوضاس باعو وخان ما تطلع وراه
وبطرس قطع دينة الجندي والمسيح
ما قام حرب وضمد الجرح ..و شفاه
كامل
لك من منوين جايب هالحكايا نَصّها
وجاي على نســــــــر الجّنوب تقُصّها
بطـــــرس لِ ملخس دَينتو لّ قصّها
وت يردّها عيسى بعجيبة خَصّهـــــا
وبعطيك حجّةت حــــرب ركّز بُصّها
وزيتونةت دمـــــــاغك تتحلى رُصّها
تنقول رجلَك غرغـــــــــرين اقتصّها
ووصّل ع أول نُصّها وامتصّهــــــــــا
ان دشّرتها وب الطُّب ما حاربتهـــــا
معنـــاتها ترَحّم ع بـــــــــــاقي نُصّها
سليمان
شو ها الجواب الفيه خفه يا سلام
الحجه غلط لا تقولها اضرب فرام
ما الغرغرينا في سبب الها فهام
جرح عذر من حروب الانتقام
انتو اللي خضتو حروب من خمسين عام
بكابول بمصر بليبيا بفيتنام
بتحاربو كل العمر وتقاتلو
تا توصلو بالاخر وتمضو السلام
كامل
الأرض لعَـ خَصر رجالها تعَلّق رمــــــاح
غير لـ أفى زبوناتها لِـ لإنبِطـــــــــــــــاح هههه
ولما أرض حطّين شاتْيون استبــــــــاح
ب السلم أو بالحرب رجّعها صـــــــلاح؟
وتذكّر ب لبنــــــــــــــــان يوم الاجتياح
لـ وَصّل على بيروت كســــدر بِـ الجّناح
استوطن ببنت جبيــــــــل كان بكل ناح
وما في زعيــــــــم بوقتها من لبيت زاح ههه
وكيف الأراضي رِجعت وشعبك ارتـــاح
من هون بدي تركع وتطلب سمــــــــــاح
بإسم السلم ما في سيــــــــــاسي ردّها
ما ردّها إلا المقـــــاوم ب الســــــــــلاح
سليمان
نزل سلاحك ما بقا نحمل دمار
تذكر بحرب العالميه ايش صار
بلبنان نحنا ما بقا عنا خيار
الا السلام الداخلي بالاختصار
ما في وطن بيصير عندو ازدهار
وعايش وشعبو بالفقر تحت الحصار
من هيك بدنا نطلب يعم السلام
وما في طريقه غير طاولة الحوار
كامل
لا تحلم بجمعِةت حِـوار ب مائِدة
بأحــزاب محكومِة لْـ دول متعدّدِة
وما زالها الأوضــــــــاع عنّا معقّدة
وبلادنا بالأحتـــــــــــــــلال مهَدّدِة
شو نفع قوات السّلام لْـ قـــــاعِدِة
عَـ حدودنا بخمسين دولِة مجنَّدِة!
وكلما سمع مسؤول طلقة مبَولَدي
بيقول للقــــــــوّات عالبيت ردكدي
وبين الحــرب والسّلم حتى تهتدي
رح باخدك عـ محلّ تـــــاني تفتدي
تنفترض في لُصّ عـ بيتـــــك هِدي
وت يعتدي عَـ عيلتك شفتو بِـــدي
بتحاربو يا بتِتركو بإسم السّــــلام
عَـ عيلتك قـــــدّام منّك يعتدي؟؟؟
سليمان.
ثورة دفاع النفس لما تقودها
بتكون صاحب حق مش نمرودها
نار الفتن لو اومعت عامودها
ببارودتي بيولع غضب بارودها
اووف اووف
لو تهتدي اليهود في تلمودها
ما كان ها المعتوه عم بيقودها
باوطان عم بتموت فيها جنودها
في فرق شاسع بالحجج وشهودها
في شعوب ما باعت اراضي جدودها
وفي شعوب هربت من خطر عا حدوده
واليونيفل عا حدودنا ل حفظ السلام
واجب يا كامل تنشكر ع جهودها
النسر
بلشت تفهم والكلام تسرّبو
ومنطق الحرب من الأذيّة تعرّبو
ل تركو الأراضي وبالبحار تغرّبو
حكّامنا هنّي ل حياتن خرّبو
لمضيو معاهدةت السلام وجرّبو
عرفو من فلسطين كيف تهرّبو
ولوما اليهود بيعرفو ضعف العرب
كانو على فلسطين ما بيقربو
سليمان
قلبي عا غزّة بمشهد القتل انعصر
حرك دموعي وجمّد بوجي البصر
وبعرف ببقعة صغيّرة شعب انحصر
ومنطق القوة برفضو بالمختصر
ويلي طريق الحرب عالسلم اختصر
من قصر عقلو أو نظر عينو قصر
غندي بدون سلاح خلّص امتو
ومن دون ضربة كف حرر وانتصر
النسر
اسمالله عـ قلبك فظّع بـــــــــــ غنيّتو
وحــــــــــــرّر شعب غزّة بسِلِم حِنيّتو
ولك غاندي عطى شعب الهند حريّتو
لَاكن بِكره السّــــــــــــــــود بانت نيّتو
اسأل شعب افريقيـــــــــــا عن جيّتو
بالعنصُريّة بـــــــــــــــــــاع مصدقيّتو
اتطّوَّع مع بريطانيـــــــــــــــــا جنيّتو
وبالحرب ســــــــــــــــاندها بإمكانيّتو
غاندي غزى بوحشّيتو قلوب العبيــــد
ونيلسون ترَك بِالبِيض إنســــــــــانيّتو