عدنان سعيد وبحر الزجل طوفان الاقصى

طوفان الاقصى

عدنان مع كل حدث لازم يعطي رأيو

عدنان جايي اليوم احكي و مالحو
واسأل سلاحو ليش بعدو شالحو
الطوفان بالأقصى اليهودي فالحو
واللي هجم مشلح العزّه دالحو
حتى نتنياهو اللي اوقفو مصالحو
من ثورة القسّام راسو جالحو
الشعب الفلسطين انحكينا بيزعلو
ما بعتقد كان الهجوم لصالحو
عدنان
المفروض ما نخلّلي البواب مسكره
و نحكي شو صار بحالنا و شو اللي جرى
عند العرب لو في مروءه و مقدره
عملو القدس للي غزاها مقبره
هنّي احتلّو بلادنا بالسيطره
بالنار بالبارود بسلاح انشرى
و هلق تعا و شوف الحقيقه مصوّره
و حاجي كذب عالناس حاجي زعبره
تلاتمية مليون العرب للبهوَره
مقابيل خمسه ... شوف شو هالمسخره
كل شخص منّا ان زت حجره زغيّره
وعن جد واجه هيك دوله مزوّره
كنا قضينا عاليهود الغاصبين
ورجعتلنا فلسطين حرّه محرّره
سليمان
يا بو بهاء القدس تسقط مستحيل
بتبقا القضيه وما لنا عنها بديل
ليش الحرب ما زال عارف يا زميل
رح ننقتل والحرب ما بتشفي الغليل
تأمل الضفه وأهلها وأهل الجليل
عاشو بسلام ولو بيرضو بالقليل
أهل القضيه وافقو ع الدولتين
ونحنا لهلق ما اعترفنا ب إسرائيل)
عدنان
مش بس بدّي تزول دولة هاليهود
بدّي اميركا تزول من كل الوجود
اميركا الأعطت سلاح بلا حدود
ونحنا يا عيب الشوم قدّمنا الوقود

و اليوم غزّه رجالها المتل الأسود
لما ما قبلو بعنقهن تبقى القيود
هدّو البيوت و قد ما شعبن حقود
ذبحو طفالى بعدن بسن الورود

وتا نحرر فلسطين من مجرم جحود
و ترجعلنا ارض الكرامي و الجدود
ان كنّك جبان قعود ببيتك قعود
و اترك شباب بلادنا تحمي الحدود
بكرا صلاح الدين تاني رح يجي
يما صلاح الدين ذاتو رح يعود
سليمان
يا رافع شعارات (زينكا ) ومنتحي
شيخ و فتاوى نازل بقصة جحي
صارو عشرتالاف طفل وملتحي
تحت المباني عيب لازم تستحي
وين النصر قلي تا البس مشلحي
وارقص وغني وقول يا غنفس افرحي
لكن بوهم النصر ما بسكر انا
تا شوف إسرائيل ماحيها محي
ههههه
عدنان
حدعشر ألف ماتو بنيّه طيّبي
هودي فدا الأرض السليبي المُتعبي
و واحد صفر بعدا النتيجي يا صبي
و الشوط ماشي و الشباب مأهبي
هدّو البيوت .. خلّو الاراضي مكركبي
قتلو النسا .. هانو طفولي معذّبي
وبعدو النصر ما تحقق بهالتجربي
ومش رح بتربح هيك دوله غاصبي
وما بيخسر تراب المشي عليه المسيح
و لا بيخسر الأقصى السجد فيه النبي
سليمان
حاجي تتاجر بالنبي والعيسى المسيح
متل البيتاجر بالقتيل وبالجريح
دشر رسول الله يرقد مستريح
وخلي مسيحي يشيل طفل من الضريح
اليهود اخوه بس صهيون القبيح
احتل الاراضي وقدسنا عم يستبيح
هيدا عدوك مجرم ومنو بري
فرق ما بين المجرم وبين المنيح
عدنان
مين المنيح ؟؟ و حاج لا تلتلت كتير
التنين من ذات العجيني و الخمير
و بنت الدروب و إمّها بذات السرير
اقتلهن سوى تا تكون مرتاح الضمير
بغزة قبل ما يهب هيدا الزمهرير
كان بنظرهن شعبنا مجرم خطير
وممنوع يحكي او يطالب بالحقوق
وكلما اعترض انسان بيصفّي أسير
سليمان
ايّاك تقتل ابريا وتشعر هني
كل الخطايا عند الله مدوني
غزه جريحه بس منها هيني
تقتل طفل بعدو بسن الولدني
لما القتل بيصير من باني وبني
وبيضيع عنا الحق بين جاني وجني
في وقتها فتّش عا كوكب بالفضا
وشطّب ع مفهوم العداله بها الدني
عدنان
صوت العداله بيسمعو القلبو بري
وما بيقبلو القلب الحقود البربري
و حتى التاريخ نصيغ عقدو الجوهري
إقضي عا أطماع اليهودي الخيبري
و إقطع أيادي العم سام المفتري
و إمحي من القاموس كلمة عنصري
وحتى العداله دمّها تشوفو سري
بهالكون تا الغصن الطري يعانق طري
يمّا النظام العالمي منقضي عليه
يا روح تا توابيت إلنا نشتري
ختام سليمان
عدنان حاجي موت وتوابيت
وقصف وطفالى تموت بملفه
صارو الأحبا رماد وفتافيت
فيّق ضميرك لا بقا تكفي
لا عاد بدنا المعتدي شاليت
ولا بو عبيد بوجه متخفي
هودي جماعة قرطة عكاريت
عم يدبحو وبيقتلو بخفه
واحد بتمو لغم من كبريت
وواحد عا وجو لافف اللفه
لكن الضفه ان رحت فيها وجيت
في أمن ذاتي وهيك بيكفي
وعنا اذا صابيع ديناميت
بتفقع ..بنعمل للحرب زفه
اسأل بو طوني ابن طنبوريت
مأكد انا رح يوقف بصفي
عاش الحرب وبيعرف التوقيت
وبشرق صيدا الدم شو مصفي
التمويت عم بيقابلو تمويت
وان ضل هيك الوضع بدي فل
اترك وطنا وعيش بالضفه
هههههههههههه

ختام عدنان

بالعمر عمري فز عالستين
وما شفت متل الصار بفلسطين
مدري كنت أعمى ما قادر شوف
مدري ما عندي كان ذمّه و دين

الشعب اليهودي بالغدر موصوف
و نحنا العرب عا بعضنا سلاطين
ما منربح جميلة خيطان الصوف
حتى يدقّو بوابنا كوانين

و كيف النهايي بعد مش معروف
و عا مين بكرا الدور قولو مين
جاييلنا التطبيع عالمكشوف
و عا رقابنا رح يمرق السكّين

سبعين عام و هالشعب مخطوف
و ولادنا للذبح خلقانين
و حكّامنا بأميركا بتطوف
تا يتاجرو بالنفط و البنزين
تا صار تلتين الشعب مكفوف
و التلت عم بيقول الله يعين

وما زال صرنا بهالبلاد ضيوف
يمّا سياحه عالدني جايين
و تاريخنا من المكتبه محذوف
وما زال ما بيرجع صلاح الدين
ومازال شغلتنا ندق دفوف
ومازال نحنا ناس منباعين
ومستّفين بهالدني عا رفوف
ليش تا لأميركا ننباع
يمكن روسيّا بتشتري و الصين