صفحة الشاعر نجيب كرم

هذه القصيدة هي للشاعر البرحليوني الألمعي نجيب كرم، نظمها في إحدى المناسبات، وقالها لشاب في ريعان العمر وفي حفلة زواجه مقدما له النصيحة باسلوبه الطريف ونقده اللاذع ولكن بسبك لطيف ودعابة توحي بخفة ظله، بدأ قصيدته بمقدمة نثرية ... ثم أكمل نصائحه بهذه القصيدة العصماء، ويبقى السؤال: هل انطلق الشاعر كرم من الواقع، أم لعب الخيال الشاعري دوره في هذا المجال? أما الجواب فيحملنا إلى القول المأثور عن الشعراء " المعنى في قلب الشاعر".
قال الشاعر نجيب كرم:


وهلّق تا نعزف غير مقطوعة ++++ رجّال هلّق تا صرت أوعــا
تعمل متل ما بيأمرو النسوان ++++ وتغفى عا نغمة صوتها وتوعا
ما بحب شوفك عالدبق علقان ++++ جناحك على التحليق مطبوعة
نحنا منتميّز بكبـــر الشان ++++ وعنّا العزم بيخط موسوعــه
وأصحاب معدة تتطحن الصوان+++ ما بترتخي لْلبنة المقطوعــه
وكم ألف بيت بهالوطن خربان +++ من بيّ مستهتر وما بيوعــى
عايش على التفنيص مش سألان+++ عن أهل بيت وست نعنوعــه
وأطفال كترو وبعدهن صيصان+++ للشيطنة آلات مصنوعــــه
فوضى، بكي، تبرحش على الحيطان+ اتزحلط، عياط، تياب مقلوعـه
تنقيف مغيطة وضرب حجران +++ تجلغم وجوه كعاب مفلوعــه
واحـــد اندبّ بهيشة البلان +++ هوي ومعربش على الشعشوعه
جلّف ركابــو وجمّع الجيران +++ عا صرختو ونتّف القبوعــة
وهوني عجي بيتمردغ وحفيان+++ ببصلي عا كتف الشير مزروعه
مدمّــغ متمسح وشو شيطان +++ لا شوب بيعلّم ولا سوقوعــه
وهوني غلام متنحر وغضبان+++ منّو العيلي بتضل مسبوعــه
من فسخ باب متختخ وبليان +++ بيبصبص وعينو بس مقشوعه
وبنت زحطت تحت بالبستان +++ بتصرخ من الدبور ملدوعـه
وآخ إيدي كوعها ورمــان +++ ما انكسرت بس موجوعــه
وهوني إزاز مشعّر وتعبـان +++ وهونيك درفة باب مخلوعـه
ومطبخ معجّق زاعج السكان +++ مسطّمي بقلبو البلوعــــه
والمي بتسقسق من الخزان +++ والمغسلي من سنتين منزوعه
كبروا البنات وتنشنشو الصبيان++ الله يخلّي هيك مجموعـــه
البنت الكبيري بدها فستان +++ أتأمّل بخلقتها المبلوعــــه
مجوز، وما بتقاوش الشبان+++ بالزاويي بتضل مكتوعـــه
تزوجت ليلى وسهى وإيمان+++ وبنتهن بالخل منقوعــــه
وأكبر صبي من المدرسة هربان+ متعلق بهونيك طرطوعـــه
عاطل مبوقر والولد جهلان+++ طايش وما الهيئة رح بيوعـا
تاني صبي بخدمة علم لبنان+++ من الشقيف لتلّة القموعـــه
وحدو بمرج دابق وعنجر كان++ نفسو على التخريط مطبوعـه
تالت صبي بيفلح على الفدان++ قبل الحدش ونص ما بيوعـا
رابع وخامس للبقر رعيـان +++ قديس قتلو وحوش وضبوعـا
وتكعكر دجاجة بهل ليوان +++ تزرّق عا كرسة قش مشلوعه
وعنزات قطشت ورعة الخربان+ أفطت من شنابيق مفروعـه
وبالزاويي هايش كلب كلبان++ ومنوالجيري شبه مصروعـه
تحمّل بعد، لحّق بعد يا فلان++ لا كلمتك بالبيت مسموعــه
لا كَيْف لا موعد مع الأخوان++ لا شغل لا فواتير مدفوعــه
بالكاد عاشو شي سنة عرسان++ توعا تغيب تشفّق قطوعــا
والست هلّق طابي الفنجان +++ مشاكل البيت بعيد موضوعا
بتصبغ الست بست سبع لوان++ عليها م في حفلات ممنوعه
نصحت ومنها بيجفل القبّان ++ العرض متل الطول مربوعه
تشوّر، تشروق بهالدخــان +++ تربّش عا صافات ملطوعـه
تحمّل يا ابن الفقر والحرمان++ نفّذ وأوعا تعترض أوعــا
بدك تضل مأفلس وطفران+++ ولا تفتكر عالبيت فيك تفوت
ومرتك من الدخان مقطوعه