شرَّف استاذ مروان

من بَعد طُول غياب يا مروان عود *** رمشي وَتر بالمُنتدى والقلب عود
قَسّم عا ذوقك ع مقامات الخلــود *** متل صوت الريح ع كتف الجـرود
بتدق عا قلبي بتسمع دقــــــتو *** أو دق عا رمشي تا حسِّك بالوجود

من بعد مَ تْركْت الكواكب والفنا===ونْزلْت عا دنيا الوِلاده والفنا

بِنْدَه وتاري كل ما رمش انْضنى===وبِفتح ضلوعي كل ما قلب انْثنى

ولو جاي تِسْمع وصلتي بْلحن الوجود===مع كل نَهدة عاشق مْغَنّي أنا

وتارَك بعرسْ الشعر للنهدة جْهــَاز *** شو؟ مْفّتــكرْ قلبي حَجَرْ عيني قزاز
بعمر الصبا قَسّم صِبا شرقي حجَاز *** وكلما بتغمز نَجـْد. بتغار الحجاز
لاكن لا تضرب عا وَتر مش خامتك *** بخاف الأصيل تشَوهو النغمة النَشاز
[center]

بعزف على أوتار حُب تأوَّهو===نغمات بِسْرار القلوب تفَوَّهو

ولا تخاف لُ بنغمة نشاز تمَوَّهو===عن هيك رُوّاد الحقايق نَوَّهو

ال بيكون أعمى القلب مابيعرف إذا===الألحان بالنغمه النشاز تشَوَّهو

كـلما وَتـــر إحساسك بعزفو التهب *** بتكَرَّم الموهوب سبحان الــوَهـَب
وأعــمى القلب مش هم لَو فكرو ذهب *** تا يسمعك. أو من نشازك ينرَهب
اللبيهم ما تنشّز معايي بالحـــــوار *** وتقول. إنو اللون شَوَه بالدهـــــــب

لما الرمش يحتاج للتجميل ميل===ويِرْبى مابين الناس عالتدجيل جيل

صعبه تلاقي معدن بلونو الأصيل==وبيصْفى القبيح مزيّف بشكل الجميل

وحتى الذهب فيك بسهوله تشوّهو===لما يغشّ الجوهري عيارو الثقيل

الرمش الما فيها تسحرو لوحة حــَلا *** بيشبه قلب ما ترنـَّم بطعم الصلا
رح ضلْ إنحت بدهب حرف انجلا *** وحتى إذا بمعدن رخيص انـــــطلى
المفروض يا مروان تعرف رنتــو *** أو بالصياغة ما بقا عندك صـلة

الحرف اللي عن روح المعاني حاجبك==بيضَل طول العمر كاسر حاجبك

لا تعامل السامع كأنّو حاجبك===تحكي بلهجة عاجبك مش عاجبك

من واجبي أعرف الحرف ورنّتو===باقي عليك تقوم إنت بواجبك

حلووووووووووووووووووووووووووووووووووووووووووووووووووووو

مروان

اعذرني خيي حسن بيت حلووو

مشرف عدد الرسائل : 519 تاريخ التسجيل : 15/03/2008

حسون مع مروان طلعوا بشكل عام = للعبقـــــــريي فلسفي تغذي القلام
شفت الوحي ببحوركم يارفاق عــام = وليكم بيدعـي بخير يبقى كـل عام
وعن حرف لما هيك شعر بتكتــــبو = إزميل سحرالموهبي بينحت رخام

الله يعطيكن العافية شي رائع
وكل عام إنتوا بألف خير
وتنعاد على الجميع بالصحة والبركة
تحياتي إلكم

يا

شَرق من حرف انتفض بعروقــنا *** حاجب بعيـين عكاض حارس سوقنا
منشكي العـَطَش والمـَي حِملت نوقنا *** ومتل الغنم عا مسلخك بتسوقنا
تلفتت عا الدنيا بأسم الواجبــــات *** يا ريت مرة بتلتفت عا حقوقنا

كل سنة وأنتو بخير شباب وأنتظر أفضل ما في جعبكم. ينعاد على الجميع.

شكرا ياحرف ويا ليلى وكل عام وإنتو بألف خير

الله طَبَخ هالكون عَ الأخذ وعطا===مَدّ السما وعن طبختو شال الغطا

مافي شعب عا مسرح الدنيا خطى===إلاّ وأخذ عا قَد ما هوّي عطى

كيف لاك عين توَقّف وتطلب حقوق==شعب اللي قَضّى العمر زَقفه وزَلْغطه

خيي حرف ما علقّت على ردتك لانو ما منعود نخلص الديب حمّضلو عنزة أكل هوا كيف أغذا صتو تنين

أخت ليلى شكرا على مرورك

سليمان الحلو حلو وردة مروان أكتر من حلوي ومروان أكتر من شاعر
ينعاد على الجميع بالصحة والسعادة وكل عام والجميع بخير

الله أعطى الناس روحـــانيتو *** الإنــسان مـِنّو خود إنسانيتـو
وشعب الشرق تا يضّل ع شرقيتو *** وحريتــــّو تترسـّخ بعقليتــو
كلّــما راسو رفع صَوب السمـا *** يآخــد نـَفـَسْ ويزلغط لحرّيتو

بهالشرق مع كثر الكلام وقِلّتو===كل مين فينا منطوي مع شِلّتو

قنعان إنّو بس يحسب غلّتو===ثياب الإله مفصّله عا مِلّتو

ال بَدّو يداوي علّة الشرق الحزين===لازم يداوي بالبدايه عِلّتو

ان كان الشَرق ممروض والحـَاكم فَرض *** جـَورو. وبسوق الجـَهل ها الشـَعب انعـَرَض
ألفيـن عام وما تمـَّرد مـــــا اعْتـــــَرَض *** أدْمــن على أفيــــون دِ ينــــــو الما انقَـرَض
أقتل مـَرَض عشعش بذاكرة السنــيــن *** لا تقتـــل الممروض تا يـــــعــيـش المـَرَض

الإشكال مَنّو بالديانه ذاتها===ولا بلّي لحقو صيامها وصلواتها

الأديان مهما تغيّرت بدلاتها===بقلب الإله موَحّده غاياتها

بس المصيبه بِلّي صارو للبشر===بحروف جهل يفسّرو آياتها

لحـرّوف بالتفسير مُش صـَرف ونـَحو *** بسوق الصرف يا بيخّسَرّو يا بيربحو
الإنــسـَان بالدِين العدالة مـــــــطمـَحْو *** وكّل اللي باسم الدين عم يتبَــــــبجحو
كيف الشَرع والدين بيحللهن*** بيـتـــْشـــــَهــّدو وبأسم الله بيـــــــدْبـَحو

كل ما حدا ببلادنا فتْوه صَدَر===زادت عقول ولادنا جهل وخَدَر

وكل ما نخاطب غيرنا بإسم القدر===كل ما على تلاّتنا دم انهدر

ولو ما شعوب الشرق تغدر بعضها===ما كان قِدْر الأجنبي فينا غَدَر

مروان يا أنسان إنســاني *** وعـّيت فيي صوت وجدانـي
كلما الزجل لطلتك يشتاق *** بتضيفو إحســـاس ربــــانـي
من كتر ما عندك وغا وأخلاق *** تسامت بها الأخلاق قصداني
قدمت أشواقك على أطباق *** إلــها قلوب الناس عطــشاني
لا تلومني بصرخ من الأعماق *** ومعلن عا أهل الشرق عصياني
الكانو لنا إخوي وأهل ورفاق *** سلاحن بها الأيام عبراني
كيف؟ الشعب للمعرفة طَوَّاق *** وكفـَّر أمس نزار قبانـــي
وبأسم دينو سكـّر الأنفـــاق *** وغزة عا تاني مـَيل جبـّاني
يا شرق كنت النور ولأشراق *** ومن روح الله الدين روحاني
دينك بسوق المال صار وراق *** ما بتصرفو بالغرب دكاني
يا موطني يا حلم بالأحداق *** شو مفتكرني صرت طلياني
كيف بدّي صـَورك عملاق *** لما بشوفك راكع وحـــــاني
معقول إني نكثت بالميثاق *** ونسيت أهلي وكل أخوانـــي
رح ضلْ رندحلك غناني رقاق *** وإسمك يزهّر شعر عا لساني
ومروان شاعر مذوق وذواق *** شعَلتني ببركان تحـــــناني
بتشبه العاصي الهادر الرقراق *** من مويتك ضيفتني إحساس
وخليت روحي فيك سكراني

ياحسن يا ألحان ولهاني===عشق وجمال وآه ملياني
جايب من كروم السما ترياق===خلّى الكاسات تصير حلياني
***
قلبي عَ صوتك من منامو فاق===لما ببرحليون ناداني
حروفي اللّي عَ رفوف الزمن أنساق===كل مين صار يفيّق الثاني
***
مهاجر أنا وبغربتي مشتاق===لَ غصون تينه وكوز رُمّاني
بِحكي الناس بلهجة العشاق===بس اللّي حولي قلوب طَرْماني
***
يابلادنا يا قِبْلة الأشواق===كنتي عَ كتف الغيم علياني
كنتي ملاحم بالنفوس غماق===كنتي معابد نور هيماني
واليوم صرتي مصطبة أبواق===وأرضك عَ موقد نار غلياني
وأحزاب فيكي سْواق جنب سواق===وتلالك من الشمس خجلاني
***
ياكوتراني يا قلم خلاّق===سطّر معي آيات وغناني
بَلكي بوطننا تنفتح آفاق===وتِخلق بعتم قلوبنا آمال
من حروفك ال بالنور حبلاني

كيـــف الفتوي الدينيــي *** بتقتلنــي بتقتل خيــي
وكيف بيتسمىّ إنسـان *** المعــــدوم الأنسانيي
**********************
لليسار يا رفيقي دُرْ *** مفهومك نكــران الذات
مطرح ما طيفك بيمر *** للحق بترفع رايــات
الحريي ع جبين الغُر *** ما بدّها حِجة وأثبات
إلاّ بنفس الثوري الحُر *** ما بتعيــش الحريي

كيف الفتوة الدينيه===بتقتلني بتقتل خيي
وكيف بيتسمى إنسان===المعدوم الإنسانيه
***
كل واحد عقلو مفتوح===وبقلبو محبه وإيمان
بيعرف إنّو بعِلْم الروح===مابيفرق دين الإنسان
وصار بهالعصر المفضوح===كترانه علينا الأديان
فِك جروح وداوي جروح===من الفتوات العصريه

» مع مروان سليمان بمشتاوي بعد حركشي
» صفحة الشاعر مروان سليمان
» مروان سليمان وبحر الزجل صمت وسكوت