محاورة مع الشاعر عصام يوسف

عصام يوسف

من زْمان بيقولوا سُـليمان الحكيم *** عمّر الهيكل و ابتدى مجدو العظيم
و إنت يا سـْـــليمان الله يســاعدك *** ما فيك تبني بيت شـعر بأورشليم

سليمان
مسكين باهت ضل لونك يا عصام***بأوّل لقا بيناتنا اعلنت الخصام
جايي تا أبني بيوت شعر وفلسفي***وخايف من الجهّال تعلن أعتصام

جنيّت يا حبوب ضيّعت الوعي***وما عرفت إنيّ بالزجل ما بدّعي
فاتح تلتّ بواب الله يساعدك***وبالكاد طاقة تقدر تسكّر معي

عصام يوسف
بيت الشــعرمش بيت "ســـنيوره" حلو *** بيت الشـعر بيت الحلا بْمشتى الحلو
و شو قيمة البيت اللي من عطر و ندي *** نْ ما كان حَوْ لو في زهور بْيــِجْهلوا

سليمان
لمّا القصيدة بتشلح تياب العفاف***ورد القوافي بيحلم بليلة زفاف
وكتر الحلو بالدم علّى السكّري***وبوّس الشقيقة مش محلل ب الشفّاف

عصام يوسف
لمّا النــــــــــوايا تفيـــــق من كابوسها *** بتبقى الطهاره عَ المدى ناموسها
الصبح .. الشمس بتبوّس شفاف القمر *** و عند المسا شفاف القمر بتبوسها
سليمان
بين القمر والشمس متعة ومصلحة***وما في أخوّي بتنزل لها المستوى
طهرالشمس معروف شفّي مجرّحة***وخد القمر محروق دينو من الهوى

عصام يوسف
شـــوف الأخوّه بين شمعه و شمعدان *** لا الشمعدان تشيطن و لا الشمع دان
بكرا إذا بْتمـــرق عَ نــهـــر الموهــبه *** بتصــــــير تفهم عا يوحنّا المعمدان
سليمان
نهرالقوافي من خيالي منبعو***معمّد من الألهام غير اللي دعوا
خايف ما تعمل معمدان الشعوذي***ونرجع مع الأيام راسك نقطعو

بعيد الشبه تكون متل يوحنا المعمدان يا خيي عصام يوحنا معمّد ربنا يسوع

عصام يوسف

"هيروديا " دفعت تمن راسي سرير *** تقدّم عَ صينيّة ملـــــــوك بْلا ضمير
و مــــش بعيده عليك تعمل متلها *** و ترهن ضميرك يا "علي بيك الكبير
سليمان
بتعرف بلاط المملكة غير الزجل***وملقى سالومي كان منّو مرتجل
رقصت الك هيروديا لكن أنا***عا منبري رح رقّصك متل الحجل
عصام يوسف
تركني بإحســــاسي كإنّي الولدني *** متل الحجل إرقص أنا والسـوسني
و بالولدني عمّر قصور من الخيال *** ترقص على شبابيكها قلوب الدني
سليمان
تركتك حجل منصاب عندو مشكلة***بقلب القفص يرقص بجرحو مبتلي
وما زالك بتهوى الرقص والشخلعة***لا تخاف رح خليك ترقص بالقلي

عصام

هالبحر مِقلي .. و إنتلى بزيت السَمار *** لْ بيلوّن الحلوين عا ضَو النهار
يا ريــت كل ما نْطرت حتّى شــــوفهن *** ضَـــــل إتقلـّى عا نار الإنتظار
سليمان

يلّي نطر عا التلج حتى ينكوي***متل النطر بالمرجلي يخسر قوي
ومنشان يرجع لونك الفاتح سما***انطار البحص عا النار بركي بيستوي

عصام يوسف

فــــــــي لون فاتح عا شـــــبابيك السما *** و في لون فاتح لوّن جروحو و سما
و في لون " فاتح " كان .. لو مرّه اندلق*** يفتح بعين الشــــــمس شاشة سينما
سليمان
ضليّت باهت ما رجع لونك إلك***ولولا فتحت السيّنما بقرص الفلك
ولو صرت فاتح جرح يسوع المسيح ***بتضل كافر متل كافور الملك
عصام
يا ريتني كافـــــــور إخشيد العنيد *** يلـّي مدحتو و بـِسْـــــت إيدو بالقصيد
من شان تعرف بالشعرشو قيمتك *** لمّا بتشـــــــــحد من كـَرم كـَف العبيد
سليمان
ب عمري ما بمدح عبد ألا بالعصا***ولا بزت مال العمر فوق الراقصة
وشعر ي أذا بيضيع عا بواب العبيد***معليش متلي الدر ضاع ب خالصة

كما قال الشاعر
لقد ضاع شعري على بابكم ***كما ضاع در على خالصة
كانت أمراءة سوداء ومشنشلي بالدهب ههههههههههههه

عصام
عندك مـلوك بْهالدنــي متل العبيد *** و عندك عبيد قلوبهن فسـتق عبيد
يا ريـــــت تتحرّر متل ما تحرّروا *** و لَ يْضل قلبك متل صندوق الحديد
سليمان
ليل الملاهي بيفتح بواب الجحيم***وفجر الصلا بيبنج رموش الغفا
والعبد لو بتكرّمو بيرجع لئيم***والقلب خزنة بتحفظ كنوز الوفا