بحر الزجل وحسن كوثراني قطع ووصل

ألشاعر سليمان طراد‎
حسابك اجى يا حسون

قديّش صرلي يا حسن ناطر تجي
عا مجال بحر الموهبة ..عم ارتجي
تروك السياسي والكلام الحربجي
... وتسلّح بكلمة .بوجعها مبنجي
ال تدّرجوا بحرب الزجل عا مدرجي
حسابتهن بالدرج عندي مُدرجي!
المقطوع قلبو من هديري بالزجل
لا يقول إنو قطّع البحر ونجي


Hassan Kawtharani .
الكلمي السياسيي احترم ناموسها
ما زال .. إسمي بــِ صدر قاموسهـا
الكلمة .. نبوَّتها .. حرف قـدموسها
وما تــغَيرّت عــاداتها .. وطـقوسها
وكلما الموجة عربدَّت بــِ عبوسهــا
بدَّها النبوَّة ... بالعَصايي تسوسها
وبدّها تصفي متل راسك يابــسي
إجّرْ. النبي ياطراد كل ما .. تدوسها

ألشاعر سليمان طراد

يا بحر كلما رتلوا مواجك هدير
بتطلع قصيدة ضو عا شفاف الأثير
موسى النبي تا يقطع البحر الكبير
آمن بربّو بالمشيئة ! و بالمصير
وانتي السياسي لحقتها وبعت الضمير
تا تصير نايب عا الشعب يما وزير
وما قطعت بحري متل موسى بالعصا
عم تقطع الطرقات يا شيخ الأسير

بحر الزجل


..Hassan Kawtharani .
حَتىّ النبوَّة تــخَلْص من قطوعـها
دَعست ع صدر مواجك وعا ضلوعها
ولمَّا السما زَخت عليك .. دمـوعـها
صوتك طـِلع صرخة وَجع . ياسوعها
وتا أمتَّك يـــزهر فــَرح .. بربوعــها
دابر ! !! الفتني إقطع .ومشروعها
وعا الحُرّ كلما يأشَّر باصبع أســـير!!
يا طراد إيـــدو بتنقطع مــِنْ كـوعها

..ألشاعر سليمان طراد

كلما سياسي بالسياسي بينحشر
بيطّاول على الجيش ..!!تا يطالو فشر
قدموس لوما يقطع البحر ونشر
حرفو..ماوصّل ابجدية بتنّشر
قاطع عا حالك وعد تا توزع بشر
تا تصير مؤمن وصّل وصايا العشر
وبشّر متل موسى بعظمة ربّنا
حتى القداسة توصل لكل البشر

بحر الزجل

Hassan Kawtharani

الشّاعر إذا من القلب بيتو قطَّعو
يا بــحر بتغُصْ المواج... بمقطعـو
وبيتـَكْ إذا بــ دبش الكلام مقطْعو
بدّها مقاييس الجمال... تقاطعـو
لمــَّا بـِ موسى الكافرين تمقطعو
ومنشان يصدَّق باليمين القاطـعو
كيف؟ الوصايا كان بــدَّنْ يــــوصَلو
لــَوّ ما عا نـــَهر النيل ربـو قطَعـو
الشاعر سليمان طراد


وصّل الفكرة ولا تقطّع بالكلام
خلي التواصل بين حبرك والقلام
موسى قطع بالبحر من ألفين عام
وإلنا الوصايا وصَّل عليه السلام
الأجيال لوما تواصلت بالإلتزام
كان ارتفع صوت البُطل والحق نام
ونوح التبي ما قطع قطوع الغرق
لوما العلامة توصل بتم الحمام

بحر الزجل


Hassan Kawtharani .
يا بحر صوتك هادر وموجك عبي
لاكن ضحل بالمعرفي والموهبي
طير الحمام.. ساعي بريد التجربي
شو ها الفضل وصـَّل رسالة مهربي
إنت وانا جنب النبي بالمركبي
بيناتنا شوف الفرق بالمرتبي
بين حبل عم يوصل الصاري بالشراع
أو حبل سرَّه اللي انقطع جاب النبي
الشاعر سليمان طراد

ها الردة السكران من انغامها
تا تصير حجّة وصّلتها قلامها
جبهة النصره بسوريا بأحكّامها
الأسرى ما رجمت قطّعت اجسامها!!
والله يساعد سوريا مع شامها
غير التواصل ما بقي قدّامها
ومهما السما تبعت لعنا انبيا
بتبقى قداستها صلة!! أرحامها

بحر الزجل


Hassan Kawtharani .
يا طراد في.... بالشّام دجَّال وَّلــي
ومنشان تعرف شو عَليك وشو إلي
الفِتني بزناديق العَصر!!!متواصلـي
من واجبي للقطع!! أشهّر مَنجَلـي
وحتَّى الرَحم ذريتو... متسلسلـي
مِن ضلعَكْ وحلقة إنت بالسلسلي
من طـِين مُعدَّم قطَّع الرب العَــلي
ومـِنّو! وهبها روح يا تراب.. البلـي
يا كمشة تراب العدم.. بالمرحلي
تا تصير تَعرف قيمة الشعر الطَلي
لا تشـَبْه تراب الفنا ب لوّن السما
اتطّلع! على قطعة سما للسبعَلي!!

ألشاعر سليمان طراد ....
ما تواصلوا بالشام قبل الأنفجار
حبل الثقة بيناتهن شقفات صار
ودابر الفتنة لو وصلتو بالقرار
ما كان صار بشامنا الحلوة الدمار
قطع العلاقة بين اطراف الحوار
ولّد تقاطع بالمصالح للكبار
ولو يتركونا نلتقي عا الطاولة
كان الوطن واصل لعهد الأزدهار

بحر الزجل

.Hassan Kawtharani .

يا بـُوق صوتك عهر عِزّه وكفر لات!
مين وصـَّل الفتوة ! ع أرض الآلهات
ان ضليت مع أهلك قليل الواجبات
رح يوصَلو! من النيل ع حدود الفُرات
يا طراد تقطيع الوقت ل كــل ذات
صيرورتو. غوص بعمق ها البينّات
عُمر البَشر.عمر الحجر. عمر النبات
بالوقت مقياسو... ورَب الكائنـات
مرّه وهبها تراب تا تكون الدني
ومرَّه وهبها الروح تا تكون الحيات