تحت وفوق عدنان سعيد وبحر الزجل

ألشاعر سليمان طراد

عدنان سعيد ليلتك سودا ههه

يا ها الخوابي الما بتسقي ناسها
وبالنصر مرة ما بنشرب كاسها
لما البحر بيغيب عنها بتنتهي
وما بتعرف كعبها من راسها
هههههههههههه

Adnan R. Said
عنا الخوابي الناس فيها رابيي
وختيارة الكلمة معي متصابيي
بسقي الضيوف دموع من عين القصيد
وبسقيك ل قحاطة ال بيكعب الخابيي

ألشاعر سليمان طراد
سقيني .ما بزعل لو خمر شعرك صحيح
واغلط بحق الرب لكن ما تصيح
ومن كعب خابيه الخطييه القاتلي
اسقي الخل وقول اشرب يا مسيح
ههههههه

Adnan R. Said
يسوع ابن الرب ما بيعرف زوال
وزّع خمر مشّى الكسيح على التلال
ولما اليهودي كبّلو وشد الغلال
وحتى النبوّة تتم ويصح المقال
من تحت طلّعت الخميرة بالعجين
حتى يسوع يفرّق الخبز الحلال

ألشاعر سليمان طراد
عدنان ضاع ومحترق عندو الفيوز
وفوق السطوح غراب نحسو رح يعوز
وما زال صوبي موجّهو للمتريوز
وفوق و تحت بديو الشبيبي بالحجوز
فوق الصخور بيطلع طحالب كسل
وتحت البلاطة بس بتلاقي الكنوز
هههههه
Adnan R. Said
عدنان ما بيضيع عالي هامتو
اسمو ل جو الشعر بدرو وشامتو
ب فوق وتحت شعرك كشفنا خامتو
وتا ننتهي و نْــكِّش هلق دامتو
لوما البلاطة يزيحها عيسى المسيح
ما صحّت الدعوة ولا شفنا قيامتو

ألشاعر سليمان طراد
حوّرت بالموضوع امرك شي عجيب
وبتحوم فوقك بوم ..وبترجع تغيب
طيّب تا نحكي ب صلب عيسى الرهيب
وجبلك الحجة الما بينساها الغريب
لما لفظ يسوع روحو عا السما
كانت العدرا راكعة تحت الصليب
هههههههههههههههه

Adnan R. Said
تأمّل بعدرا كانت وبقيت بتول
منها طلع عالكون للعالم رسول
وعيسى الطلع فوق الصليب وعم تقول
القيمي لمريم ليش عم تنسى الاصول
وقّعت حالك شيل حالك واعتلي
طلعت الروح طلوع او نزلت نزول

ألشاعر سليمان طراد
عم تختبرني ..عيب قدّام الجموع
وناسي البحر ..نجم المواقع والربوع
طيّب الروح بتطلع ..وقلي الدموع
بتنزل نزول وربّنا لوادي الدموع
لما بعت يسوع تا يفدي البشر
بعتو نزول على الأرض يما طلوع
هههههههههههههههه

Adnan R. Said
لما خلق يسوع من رحم النجات
نزولو فجر طلّع حياة من الممات
وكفّا الرساله و عيّش و أحيا الرفات
ولما اختفى ثبّت حقيقة للزوات
نزول الجسد عالارض قيمي ما الو
طلوعو لعند الرب بشّر بالحياة

ألشاعر سليمان طراد
لوما نزل يسوع عا الارض البتول
سر الفدا ما تم ..وبنقدر نقول..!!!
لما بتحلم بالصعود وبالوصول
اطلع عا درجة سلّمي هيك الأصول
عين الحيا بتعلّمك تبقا خجول
وعا الراس دغري بيطلع بسرعة الكحول
فوق العروش وحوش حكمت ها الوطن
وتحت اللفافي البيض بتلاقي العقول
ههههههههههههههه

Adnan R. Said
ايّا فدا بيسوع يا طفل الصغير
لوما طلوعو عالصليب بهالمسير
وحوش اللي حكمت هالوطن اشفق كتير
من يهود الدنّسو القدس الشهير
ويا لفّة العالراس مهضومي كتير
داعش لبسها وراح تا يقرر مصير
لك نحنا العقول ولفّة البيضا سما
ووحل الدني بجسم الفني بيوم الأخير

ألشاعر سليمان طراد
لفّات أو جبّات ..لبسوها الجميع
رح ادبحك بهيك حجة عا السريع
شيوخ القداسة بلا عقل كانت تضيع
لوما الوحي ينزل عليها عا السريع
وغيمة شباط الفوق ضحكت عا الدني
وزهر الحقالي بشّر بملقى الربيع

Adnan R. Said
تبخّر يا بحر الشعر قدّام الجميع
و زمجر يا رعد وهات دمعك عالسريع
واطلع يا نبع الموهبي واسقي القطيع
ومشّي النهورة تضيع بالحقل الوسيع
وغيمة شباط البوسطجي الزق الشتي
ولوما طلوع الورد ما شفنا الربيع

ألشاعر سليمان طراد
لما العروس بتطلع بأكليلها
دموع امّا بتنزل مقابيلها
جتى الملابس ما بترضي جيلها
لوما بتنزل بالسنة مواديلها
والقنبلة الطلعتلنا بتقتيلها
من تحت مش من فوق قص فتيلها
وحتى الفتنة بالوطن ما تخربوا
مفروض منّا من الشروش نشيلها

Adnan R. Said
دموع الفرح لمّا بتنزل سقسقه
رح تنشف ان رجعت عا بيتا مطلّقه
وعالسوق فستان ال نِزِل للزوزقة
بيطلع عا قد الجسم حاجي حرتقه
ونحنا بلبنان و بأحلى منطقه
عشنا الفساد وليلنا هَـمْ وشقا
مش رح تروق الناس و يروق الوطن
تا يطلع المجرم عا حبل المشنقه

ألشاعر سليمان طراد
صوتك اذا شي نهار طالع عا المرا
بتنزل أهالي الحي تسأل شو جرى
شوف القلم من فوق باس المحبرة
وحبّر شفافو من بعد ما ينبرى
وموقع الورقة وين؟ قلي يا ترا
بفن الكتابة..لا ترجعنا الورا
ولوما الوحي بنزل علينا بها الحوار
لا بتنكتب رداتنا ولا بتنقرا..؟
هههههههههههههه

11
Adnan R. Said
لمّا المرا بتكون لعّوبة صبي
خلقي رح بيطلع تا شوفا مهذبي
و شو قيمة الحبر ال بمحبرتو ربي
لوما اندلق فوق الورق يا صاحبي
ومتل الوحي بينزل تا يعطي الموهبي
جبريل بالتنزيل عبّا المكتبي
و نحنا ما عنا دين كان ولا رسول
لوما قرينا الدين عا شفاف النبي
-----------
بْــرَيت القلم والحبر بالريشي عبي
كنت افتكرتو رصاص ... ما عرفتك غبي
وجسم المرا تا يضل سرّو بالخِـبي
فوقو ارتمت احلى عبايي مذهّبي

ألشاعر سليمان طراد
الرجّال ..مش رجّال لو صوتو بجنون
علّى عا مرتو...!! هيك مش لازم يكون
زاجة مرا..!! مش تا ترقّع بنطلون
ولا للعياط وجودها وجلي الصحون
ورح اسألك بترد ...!!تا ترد الديون
ونغني الحوار وموقع الكلمة نصون
تحت الجفون ..السود في ببو زغير؟
ومن دون ببو العين شو نفع العيون..؟

Adnan R. Said
بفوق وتحت خلّي الصبايا عالحياد
من فوق نقودت الحلا وجبت الولاد
وكلما النهيد يزيد بليالي الوداد
كلما لفوق طلعت خيّل عالجواد
هههههههههه
ويا جيش يا جفن الوطن لو الضرب زاد
احمي وطنّا وصون عينين البلاد
وكرمال احميكي يا عيني من الفساد
من ساعة اللي خلقت اعلنت الجهاد
و فوق البياض انحط بوبو عيوننا
خلّي بياض العين فرشي للسواد
-----------------
يا غيم من فوق الأرض هيّي العتاد
ومشّي النهوره وفجّر نبوع الجماد
و إركع يا إبن طراد قدّام العباد
ومن تحت بوس الإيد بيكفّي عناد
25 de agosto a la(s) 16:33 · Me gusta · 10
ألشاعر سليمان طراد
عا هيك حجة قلتها كلا خداع
تا افضحك عن وجك بشيل القناع
لما ببيت الحب يحصل اجتماع
من تحت مش من فوق بيتم الجماع
هههههههههه
جسم المرا مش ارض وقف ولا مشاع
ولا رزق سايب للهمج أو للرعاع
لما الدفاع يكون كرمال الشرف
من تحت أو من فوق بيكون الدفاع

ههههههههه

اوووف اووف
رح عيدها ورح زيدها

للعقل يا عدنان تا تقنع رجاع
وشوف الحقيقة بلا تحدي واندفاع
....

Adnan R. Said
من فوق او من تحت افهم مقصدي
برد العدا وما بوقع بهالمصيّدي
أرضي وعرضي عز و عطور وندي
ان شفت الخطر يمّا الكرامي مهددي
من فوق بالميراج عزمي بيبتدي
وبحرق تحت عالارض هجمة مبولدي
يعني المرا عليها اذا تعدّا حدا
بنزل غضب وبشيلها من المعتدي
=====================
سليمان حاجي تزيد شعر وتنعِدي
و تنطنط بموضوعنا متل الجدي
معتاد نخ على صبيّة مبوردي
وشيلا لعندي وقول شو بدك خدي

ألشاعر سليمان طراد
ما زال جسما من تحت مش عاجبك..!!
غطّي عيونك....!! واحترم... من واجبك
بتحكي بفوقيّة وضميرك شاجبك
وحاطط لسانك عا بوابك حاجبك
لسان السفاهة ضل فوق القاعدة
وعين الحيا بتضل تحت حواجبك
هههه

Adnan R. Said
لسان السفاهه والنزاهه ما انحما
الا بعقل تاج اللياقة بينسما
و يا عين مهما سحرك زيادي نما
عا حاجب الإيام قدرك ما سما
وفوق العيون جفون الله مسلما
بتسكّر على العين تا تحمي الحما
مرة بغفا عينيك فوق سريرها
ومرة عند ما الروح تطلع عالسما
------------------
رح عيدها و يا ريت بيصيبك عما
ولا تكون شوكي تحت هالجوري حما
ورح طرنب بأص الديناري انما
فوق البنت تا اربحك أصّي ارتما

اووف اووف
أنا القانون يا عدنان تحتو
وتا قول الحق مرّه ما سمحتو
وأنتو فوق ع كرسي الإداره
لعبتو عا حبالو تا نجحتو
مره سمسره مره تجارة
بضاعة فاسدي السوق اكتسحتو
بو فاعور الزجل جايي زياره
تحت عين الرقابة وانفضحتو
انت بوم الوقف فوق المغارة
عم يقعي ع أهل الخير تحتو
ولأنك طير شؤم بها الزياره
منخسر كلما تمّك فتحتو
انا تحت السما متل المناره
يا أعمى القلب نور ي ما لمحتو
ع سطح الأرض عمرت الجضاره
انا الشمس ال عتم الليل زحتو
ولأني رب من غنىّ وتبارى
متل بحرالزجل لمــا تبارو
جيبو متل حرفو ومتل نحتو

عدنان
انا الحاكم انا قاضي الحميي
انا الحق و رماحي سمهريي
بيعلا الحق ما بتعلا لَ حدّو
و تحت الحق انت و هالرعيي
بِ فوق و تحت للتفكير حدّو
و تعا من تحت و تعمشق عليي
اذا بتوصل لراسي و كنت ندّو
الك من روعة افكارو هديي
انا و الفوق " عالم " ما انعدّو
نحنا المن عطا الله قضيي
نزل آدم ... و قِـلّي مين قدّو
عمل كون و انت بذرة طريي
و نزل جبريل تا الآيات ودّو
وتا شعشع نور أمّة محمديي
و انت يا مهوشل بسعيو وجدو
على الدروب الخطيي العالميي
الكفر غفيان خدّك تحت خدّو
بليالي صاخبي و جهنميي
بعتني الرب بيت الكفر هدّو
و اذا ما عرفتني بقلّك يا خيي
انا عيسى العلى كفوفي تعدّو
طلعت فوق الصليب وكل همّي
خلاصك انت من نار الخطيي

» كفر وايمان عدنان سعيد وبحر الزجل
» اشتراكيه ورأس ماليه حسن كوثراني وبحر الزجل سليمان طراد
» عدنان سعيد وبحر الزجل تخت وسهر
» عدنان سعيد وبحر الزجل جوقة البيادر
» عدنان سعيد وبحر الزجل شرايي وغنا