عدنان وسليمان نقد زجلي

عدنان ..هرب هرب
لما النقد بيكون اعمى ..بلا جديد
بيصير غيره..مش نقد تا نستفيد
بدي تقلي النقد ..كيف لازم يكون
لما انتقدنا الأووف ..لامونا العديد



Adnan R. Said
لما انتقدنا الأووف كان وضعو معيب
و عن جوهر الابداع كان شعرن غريب
كل شخص منهم كان جهلو قاتلو
مجاريح شعر و كان لازمهن طبيب

ألشاعر سليمان طراد
قولك زغيب بيزعل..؟ وعنك حكي
قدام ناس وقال ها الشاعر زكي
طيّب الزعلو بيومها وشنوا الحروب
اعترفوا بانو..كم حلقه مضحكي

Adnan R. Said
هون انتفض موسى و قلّن يا بشر
مات الزجل و الأووف ودّع و انتحر
يا بتكتبو متل الرجال الماضيين
يما يا غبن الشعر و ليالي السهر

ألشاعر سليمان طراد
نحنا انتقدنا مش حسد بس انزعج
باتريك..خفنا العاملينو يفلّسوا
بيت المعنى بالوزن لولا انطعج
دفوف الدهب بالأووف ما بتجلّسو


Adnan R. Said
ضيعان زين و سيّد و موسى و طليع
بشعّار هيكي شغلهن طق الحنك
والكاس يمّا الدف بعيون الجميع
مطلي ذهب لمّاع و الباطن تنك

ألشاعر سليمان طراد
يا بو بهاء النقد شغل والتزام
ولا شاعر على شاعر يحط الملام
عنا هدف .مفروض فينا نحددو
تا تنجح الحفلات ..بادر بالكلام..
Adnan R. Said
الشعّار يا سليمان ما صانو المقام
بيكررو الحفلات و بينسو الكلام
و نحنا اللي صمنا ما فطرنا عالحلا
ضيعان هيك فطور من بعد الصياام
ألشاعر سليمان طراد
التكرار هيدا نحل ما بيجني عسل
مهما ببحر المنفعه صيتو اغتسل
البيعيد حفلاتو وما بيقدّم جديد
هيده تجاره فاشله وضعف وكسل

Adnan R. Said
خمول و كسل يمّا مديح و مسح جوخ
و ابيات عم تحتار تفهمها المخوخ
الموضوع كم ردة ؟؟ تلاتة اربعة
و شقفة قصيدي و دوخ يا سكران دوخ


ألشاعر سليمان طراد
عا ها الحكي في كتير صارو يكرهوك
وبنقدك البناء في عندن شكوك
بدهن يقولوا ما عمل جوقه زجل
بيفش خلقو بـــ خوابي الفيسبوك


Adnan R. Said
جوقة ما عندي وليش تا نزيد الضنا
ولا تفتكر من ضعف شعري و قدرتي
مازال كلما حضرت جوقة للغنا
بسمع قوافي اللي كتبها .. حضرتي
ههههههههههههههه

ألشاعر سليمان طراد
مهما الشاعر يجمع ويطرح سنين
بيضل ابن الموهبه و ابن الحنين
اللي بيكتبو سطرين صارو مألهين
واحد طلع جبران تاني بوشكين
وتا ننتقدهن مين يا عدنان مين
بيقنع بأنو الشعر رنّي مش رنين
لوكل بيت بيقدر يخلّد جبل
انتي وانا قديش صرنا كاتبين



Adnan R. Said
انت و انا لا مال بدنا ولا فلوس
منعلّم الجهّال و منعطي دروس
و كلما شهرنا شاعر ندق الكؤوس
تا يزول ليل الجهل و تشعشع شموس
منحقق الاحلام منهذّب نفوس
تا الشعر يعلى و شمخة الأرزة يبوس
ومنبشّر بأجيال ترفع قيمتو
متل المسيح البشّرو فيه المجوس

ألشاعر سليمان طراد
لو في نقد بالشعر موضوعي وصحيح
كل البيغنوا اليوم لازمهن دبيح
في كم واحد بالزجل طالع منيح
وفي ألف عاشوا عا الزقيف وعا المديح
وأصوات يغزل العين يا محلا الفحيح
والقاء زفت ..وموهبه شاعر شحيح
شعّار منبر ما بقا يخلق خلص
لولا رجع عا الارض يسوع المسيح