مستور ومكشوف علي جعفر وبحر الزجل

---------
Ali H Jaafar
ياااا بحر موجك على شطي رسا
وراقت معي امواجك المتلاطمة
وحياة عينك كل اشعار النسا
مش قدر شطرة من صياغة فاطمة
ألشاعر سليمان طراد
ليشك قليل الذوق فتّح عينتيك
ولا تشك بزينب تا تحمل ها الذنوب
شوف عا التعليق نازل كم ليك
وارجاع صنّف مين شاعرة الجنوب
Ali H Jaafar
سليمان اقرا بالنحل وكتابها
بتصير تعرف لسعها لحبابها
عا كل زهرة النحل عا ارض الجنوب
لكن الملكة ملفلفة بحجابها
ألشاعر سليمان طراد
الله يرحم زين لم قلّو لطليع
متل الشمس بظهر بنوري عا الجميع
وهيك زينب شمس منها محجبه
بتظهر بفصل الصيف وبفصل الربيع
Ali H Jaafar
Ali H Jaafar
بنص الحقيقة اوعك تجبلي جواب
تذكر شو قلّو زين ببيوت العتاب
لو للبدر في اخت متلك يا قمر
بدها الشمس عا جبينها تلفّ الحجاب
ألشاعر سليمان طراد
انسا الزين وحك راس الموهبه
وجاوب بحنكة شاعر واطلب عفو
ما كان فينا نقول يسوع ونبي
سر الألوهيه اذا ما بنكشفو
Ali H Jaafar
سر الالوهية امر منو الي
لولا ظهر ما عاد سرّ.. بينجلي
الايمان يا سليمان باطن جوهرو
وكل ما تغمّق جورتو كلما علي
شاعر سليمان طراد
لما المرا ما بتظهر بمنظر أنيق
عم تنظلم من زوجها بحق وحقيق
بحد أدنى تكون حره يا علي
وما بقول عنها تروح تفلت عا الطريق
Ali H Jaafar
الاحرار .. احرار النفس والعاطفة
مش بالدلع والزنطرة و العجرفة
عا كل شطّ مواجك بتقدف صدف
بس الدراري باللجج متلفلفي
لشاعر سليمان طراد
الورده الزكيّه البلعطور مسبّحه
غير زر اللي اتلفلف واستحى
وتا نحطّها عا الصدر لازم يا علي
تنقي شي ورده تكون حمرا مفتّحه
Ali H Jaafar
الوردات عا صدور الحواري عيفها
يومين و بتدبل على ارشيفها
وتا نقول انها للهدايا مسطرة
شو قيمة هديّة بلا تغليفها؟
ألشاعر سليمان طراد
لما المرا بتصير حره وساعيه
تاخد بحق حقوقها المتداعيه
هديها السعاده كامله وشيل الغلاف
بتشوفها .. برا وجوّا وواعيه
Ali H Jaafar
لو كان عندك للمرا حبّ و ولوع
لا تشيل عنها غلافها و تطلع طلوع
سر السعادة بالقلب عند المرا
من هيك الله غلّفو بكمشة ضلوع
ألشاعر سليمان طراد
ألشاعر سليمان طراد
ما زال فايت عا العواطف والشعور
وناسي المرا شيطانها بيخفي الشرور
وتا تعرف ان كانت سعيده يا علي
عا وجّها بتظهر علامات السرور