فادي فياض وبحر الزجل تشدشد وتحلحل

فتتاح سليمان طراد :

قبل ما تبلّش العركه القويه
اسمحولي ابتديها بالتحيّه
تحيّه للأرز وبخص حنّا
اللي بعرف عند فادي لو مزيّه

يا فادي لو المتورّث تجنّى
عليك وقام حمله جهنمّيه
لا تعتب ع الجهل بتضل عنّا
أمير معزّتك بمقام خيي

قلبت الأسم للأرز المكنّى
وبحنكة شاعر ربحت القضيّه
ولأنك مذوق وبالشعر جنّى
ما رح ارميك الا بشعر صافي
حتى لو بتتنمرد عليي

-----
اسمحولي يا محبيّن البلاغه
ما اتعب عا الصناعه والصياغه
تركوني من القلب اكتب بيوتي
ما بدّي تنعتوا شعري بفراغه

انا ع الظلم ما بقبل سكوتي
لأنو الحق عندي متل آغا
وما بدي تفكروا احترقت كروتي
ولا صابغ قوافيي صباغه

انا بالحب حبي عشتروتي
وحديثي بينشرى من سوق صاغه
وحتى سطوتي مع جبرؤتي
ما قدروا يغيّرو الطفل اللي فيي
البملقى رفيق عمري اليوم كاغا

-----
انا مش حقد مني ولا تجنّي
ان قلت عنّك لا تزعل مش مغنّي
مع كبار الأسامي يا مشحّر
بحبك توصل لمجدك لأني
قليله مروتك بعرف عا منبر
وصارت بنت افكارك مسنّي
وتا تنجح جوقتك وتصير مصدر
رزق مفروض تسمع شعر مني
وترجع تعمل حسابك وتخمر
لا تبقا إتكالي قوم جنّي
اتكلت على اسم جوقه تا تكبر
طلعت بلا جميلتهن ومنّي
اسم جوق الارز بيضل اكبر
من الورّاث يا فادي وهنّي
اذا ما استدركو ها الوضع اخطر
بيدبل مجد حنا ومش تمنّي
انا بهنيك لم منعوك تحضر
على تكريم حنا وخاب ظني
رفضت بإحترام وقلت مجبر
غيّر اسم جوقي غصب عنّي
بيار اللي قبل ها الوضع مجبر
قلّي ورحمة الوالد وأكتر
ما سألوني ولا طلبو اذن مني

-----
يا فادي بالشعر تا تكون ننجي
تقّمص هندوي وما تكون زنجي
اهين تحمل السهم المروّس
وما تحمل تقل كلماتي وغنجي
تركتك من سنه مصوّب مقوس
ومعستك معس بدواليب رانجي
تا ضهرك صار يا فادي مقوّس
وتا يسكت آخك حقنتك ببنجي
ولأنو ضو فلسفتك منوّس
صرت تهجي بضو الشاعريه
وعنو تقول بالموقع فتنجي

-----
تركوني فش خلقي ولا تثوروا
عليي وتتهموني متل غورو
الشاعر عا الظلم ممنوع يخرس
لأنو العدل بيحرك شعورو

انا بالشعر من فيّاض افرس
مهما يزيد عا الشاشه ظهورو
وبطق الإرتجالي نمر اشرس
وبملقى صاحبو بيلجم غرورو

يا فادي فوق بحري انت نورس
على طيّارتي فيلت فجورو
ما بقبل فيك خلف ترد كورس
رفاقك متلك بها العصر فشلوا
لأنو حول انفسهن بيدوروا


افتتاح فادي فياض :

يا بحر نحنا ناس عادتنا
نصالح إذا هالناس عادتنا
وما منترك من الخبز ربع رغيف
حتى نحافظ عا صداقتنا
وانت وانا متل الكحل والريف
ان كنا سوا بتطول نظرتنا
الأيام مركب .. شعرنا مقاذيف
ان كنا سوا منوصل برحلتنا
خلقنا البحر والشط بالتعريف
وما في حدا بيفصل مسافتنا
معود حلا عا مواج بحرك ضيف
وانت الملح ضايف عا سفرتنا
لكن انا وبالرغم ما كيّيف
بغُض النظر عن شوك وردتنا
وانت وردة شعر راقي نضيف
وبدو إذا شوكك جرحني نهار
جرح الحبر ينزف قصيدتنا

-----
عا حالنا بتقول صرنا ندور
وجيلنا جيل انعرف مغرور
فشلنا قلت عنا بشعر راقي
وين الفشل يا بحرنا الأمور
شوف العريشي الحبها ناقي
بالرغم ما انحرست من الناطور
حبي بتطلع غلة الساقي
وحبي بتطلع غلة الدبور
لا تعمم بحكمك على رفاقي
بيصبح تعبنا عالعمر مهدور
علينا حمل منبر شعر لاقي
بكباية اللي نصها مليان
لا تمدح الفاضي وتشهد زور

-----
لزوم التحدي والزكزكة ...
يا بحر بيكفي معي تخبيص
تقليد جايي وفي الك وشة
تقّل شعر لا تقول شعر رخيص
بيتكنس بمشوار لمقشة
ان كنو بجلدك بلش التعقيص
عملك من الديمول شي رشة
الطربوش النا وانت راس النيص
راسك وعامل عالشعب عشي
طربوش راسك شي هرم بونجيص
عليك الهرم عالمنبر تجيبو
ونحنا علينا نجبلك القشة

-----
سليمان مع فادي بتحني الراس
يا بو دماغ مشحبر مزيّت
ما بقبلك عندي من الحراس
بقصر الملك ما بتحلم تبيّت
ما فيك تخرق وحدة المتراس
مهما نوايا خبثك تبيّت
انت بحر الشر والإفلاس
ما طلعت مرة بمنبري مكيّت
كنت بقضي عليك بس الناس
خايف يقولوا حاج يا فياض
والله حرام الضرب بالميت

-----
يا طراد عيلتكن لها مشاهير
يا ريت كنت ورثت منها عروش
خزّق ورق شعر انتلا تعتير
ورشو على جروح المعاني رشوش
الشعر مش ورتة ... شقا مشاوير
وأجفان تتدهدك عا ترم دغوش
وقلب يتعذب ونوم يطير
وارض مغمورة بأنقى شلوش
ومن صرعتك يا بحر الله يجير
الشعر البحرفك خاطرو مخدوش
يا حامل جويزي فقيري كتير
وجايي تا تتمرجل على القاشوش
ان زعّلت ريس هالأرز بيصير
يضب طربوش الشعر ويجيب
تا يشدشدك عزقة مع الطربوش

-----
عندي شغل يا بحر مش فاضي
ناطور اعملك على حروفك
ان كنو ضميرك ما خلق قاضي
المفروض قاضي المحكمة يشوفك
بتنقل حكي وفياض متغاضي
ومهما عملت رح قدّر ظروفك
بتستف جرايد شعر عالفاضي
وبينكسر عالصخر شاقوفك
ان ضليت عا درب الجهل ماضي
جسمك بيشتاق لدفا صوفك
وعليك ما بيبقى حدا راضي
وجوع الندامي بياكل كواعك
ويمكن وراهن ياكل كفوفك
ألشاعر سليمان طراد
القرادي :

فادي فياض
قالولي بحر القصدان
جايي البركان يطفي
لقيتو شفة بالفنجان
كسرتو وكبيت الشفي

جبلي من شعرك الماس
ودرة بتلمع بالحارة
بجبلك طفل بيشرب كاس
وبيغني عالهوارة
جبلي البحر بكاراكاس
ما رندح بالسيارة
بجبلك دف يخش نحاس
يهزوا شاعر متوفي

سليمان طراد
الله يرحم عمك زين
اشعارو عليكن رشرش
وموسّى كمّل عا الجيلين
وبو شادي المنبر انعش
جايب فادي وكيف لو عين
طفل وردّه ما خرطش
مش عارفني غراب البين
وفردي عا خصري مخرطش
عارف عا المنبر من وين
اخد مجدو .. تا خشخش
وتا يخشخش فادي عمرين
بشلّو نحاسي من دفي

فادي فياض
ملوك المنبر موسى وزين
وبو شادي من اربابو
حملنا وصيتهن عقدين
الأرز مكمش بترابو
وكيف جايي يا غراب البين
تهاجم للجو عقابو
وفردك عا خصرك يا عين
طالع اعور لصحابو
ويا شاري دفك بالدين
عنك قلي اللي جابو
صرت مخشخش من سنتين
ومتل الأطرش بالزفة

رح زيد الردة بيتين
وللمنبر هز خشابو
وخصمي الشعري سحسوحين
الليلي عاملو حسابو

سليمان طراد
يا جايي محمّل ركّاب
مدهور وضعك ومخفّس
ما تعاديني بلا اسباب
المتلك موجي شو مرفّس

لمواجي ما حسبتو حساب
الشعر عرفتو بتنفّس
وياما طقيّت الأرباب
فرمت الكسّر والعفّس
يا جاييني بالدولاب
مدهور مخزوق منفّس
لما حس بحك ركاب
صار يضوي ويطفّي

فادي فياض
يا خوابي الشعر الميمون
جبلي شاعر مش عادي
ولا تجبلي شاعر شلفون
اغلب حكيو ولادي
بخجل تعطي برحليون
شاعر متلك لبلادي
دمو اتقل من كميون
وعقلو في عندو خفة

عفس وتنفس مليون
شاعر رددها زيادي
يا غني الشعر الموزون
يما تخسر مع فادي
يا خوابي الشعر ...

سليمان طراد
القراده بدها يا فريخ
خفّه ظل وخفة دم
لا خوري يبخر أو شيخ
يخطب يفتي بشرب الدم
مش مخ ولو كنت مخيخ
بشربيك على المنبر سم
بنيّخ مجدك حدي نيخ
وكل يوم بزفك زفّي

بطيخ الجوقه بشعري طيخ
ولو زعلو مشرح اهتم
مش طبيّخ ولا طبيّخ
فادي فياض بلا ذم

فادي فياض
عقلك ريشة ودم سميك
وفادي بنفسيتك أخبر
الهيئة عالأحقاد الفيك
لما نهيتك عالمنبر
ما لقينا خوري يصلّيك
ولا شيخ بألله واكبر
قلنا للنهر يوديك
احتجت عالنهر الضفة

يا بحر الشعر بعزيك
بروحك والفصل الأصفر
جينا نبيعك بالمتليك
ما لقينا شرّا يحضر
عقلك ريشة ودم ....

سليمان طراد
يا حامل شعلة ها الجيل
ومفكّر موجي هيّن
لازم تحمل شعر تقيل
تا فيك الكلمه تزيّن
احمل ريشه وجيب زميل
تا تتزغلل وتزيّن
مش معقولي جوقه تشيل
مقرر للجوقه عيّن
ريّس شاطر بالتزجيل
شيطان ومش متديّن
لازم نعملك تأهيل
ما بيّنت وتا تبيّن
يلا معنّى تا نكفّي

فادي فياض
تزيّنت تزغللت سنين
تموّست تطلّعت كتير
تسيّدت تخيّلت ومين
قدي تجريس بالتعبير
ويا ناحت شعرك بالصين
وطالع تعتير بتعتير
جوقة أرزي يا مسكين
برفض كورس فيها تصير
معدل شعرك والتلحين
طالع اوطى من الحفة .
Administrar
Me gusta · Responder · 1 min
ألشاعر سليمان طراد
ألشاعر سليمان طراد
المعنى :

سليمان طراد
زار الملك بيخبّروني بو ملك
وجايي يا فادي البحر حتى يسألك
شو خبّرك..! انو الزجل مجدو هلك؟
يا قلّك بتهذيب.. موسى..! وبهدلك
معقول قلّك بالزجل شو دخلك؟
وع المكتبه كمشك بأدنك دخلك
يما فتحلك باب من مطبخ كبير
ومتل الخدم فليّت من قصر الملك

فادي فياض
زرت الملك .. ارزات شعري ترنخو
بطوفة غيوم الشاعريي اللي انتخو
قلي يا فادي سنان عمري تكلخو
ويا ريت موسى الرب كان استنسخو
وما زال شعرك للزغيبي دوخو
احمل السيخ وكمّل على مسلخو
وقلي انتبه منبر زجلكن فخخو
طبع الغرور وعاللغم لا تفشخو
وموسى عا مكتبتو بيجو اللي تبردخو
لكن انت بيدخلك عا مطبخو
اللي بيطبخو موسى على منبر زجل
وحدك يا بن فياض قادر تطبخو

سليمان طراد
موسى طبخ....؟ شو ها الكلام العنصري
موسى ملاك الشعر! حاجي تفتري
لهلق يا فادي ما سحبتو الدفتري
تا افضح الطبخوا الحوار المنبري
كان الأنس.. والحج والجن البري
يشدشد بيوت ..وكم شاعر يشتري
والنا حديث بها الحوار وبوعدك
ليش أخدت صيت حفلة بيت مري

فادي فياض
مينك انت تا تهين غلة مرسملي
وتحكي بمنبر بو ربيع وبو علي
سكر دفاتر بالدموع مبللي
وافتح عراوي عقلك اللي مبكلي
وبالإذن من إعلان موقع مخملي
الموضوع بدي غيرو بهالمرحلي
عا سيرة يشدشد بيوت المرجلي
موضوعنا بين شدشدي وبين حلحلي
شد انتباه الناس لحروف البيوت
وحلحل عصب مشدود وانهي المسألي

منزيدها ويا خيول بالساحة اصهلي
الفارس مدرب والخيول مأصلة
ويا بحر كلما من دموعك تنتلي
بتبدا بموجك عالشواطي غربلي

سليمان طراد
لما سألتك كنت بعرف بالأصول
شو قال موسى زغيب من باب الفضول
تركلي زغيب وزين تاريخ وعقول
وبلّش معي بموضوع يا فيّاض جول
ما بين شد وحلحلي عندي ميول
رخّي قشاطي واجلدك متل الخيول
وتا سامحك بدّك تقلي بها المسا
مين اللي كان يساعدك بالأووف قول

يا شعر فادي مرتخي وبلش يجول
عا مخمرة توما وفالت عا الكحول

فادي فياض
ان كان جيت تحكي بمستوى علو القشاط
اشرف الي ما انحدر للإنحطاط
شدشد شفافك بالوعي مش بالرباط
حاجي مقضي الليل تنويح وعياط
وبالأوف كنلي بالطبيعة ارتباط
نيسان يكتبلي وبيمحيلي شباط
ولو كنت معنا كان قلك بو ربيع
مقبول لكن ... احتياط الإحتياط

اسمالله الرخاوي في لها بعقلك نشاط
والريح قلي اليوم اغزلك بساط
ان ضليك هيك بإسمك بخلي النقاط
يكونو نقط من دم عا شقفة بلاط

سليمان طراد
ما زال غيم شباط هوّي الزقّمك
لوما يرخّي دكتو ما حممك
ضليّت عشر سنين حتى فهّمك
لا تشد حالك بالسباحه ...في سمك
موسى زغيب معلّمك شدشد فمك
فضلو عليك الدف هوّي السلّمك
وما كنت صرت بتفهم وحامل دفوف
لوما عليك يشد ايدو معلمك

لما عا أووف زغيب جهلك قدّمك
لا نجّمك حتى ولا خطوه قدّمك

فادي فياض
شد الأرز غصنو وحماني من الشتي
وعالبحر ضل الغيم دكة فالتي
الركبة الرخوة قيمتك مش قيمتي
وشد العزيمي يا بحر من شيمتي
شعري رسم لوحة بمعاني مزيتي
موسى عليها شد بروازو العتي
ولوما عليي يشد برواز الحنين
ما تعلقت بقلوب اهلي صورتي

يا بحر مش تاني هزيمي وتالتي
ولا رابعة يا بو فكار مشتتي
ان ما كان فكرك طيب وزندك فتي
بخليك حدي متل صخرة مفتفتة

سليمان طراد
الغيمه بترخي تقلها ومش ازدرا
بهالرد شعري لا تجنّى ولا افترى
شو مفتكر مرقت عليي ..يا ترى؟
وتعمل من الحجه الجميله مسخره
صورة زواجك رسم تحفه بتنقرا
لما برواق تعيش ما تهين المرا
سألنا أهل بيتك بسرعه جاوبوا
من كتر ما شديّت عا القرش انبرى

ان ما قدرت تعرف مين داري ومين درى
يا روح كسّر جوز يا فقّي درا

فادي فياض
شادد عا قرشي الأبيض ليوم السواد
ولا يرتخي كفي بطلب عون العباد
ولولا انبرى القرش وعليي الخير زاد
ولا تنبري روحي عند يوم الحصاد
ذكرت الزواج العائلي وبالإعتقاد
بسرعة انحني قبالي وعلى شمالي جماد
المشدود حيلو ولاد جاب على الدني
والمرتخي بهالعمر ما خلف ولاد

لولا انعرض يا طراد شعرك بالمزاد
متل السمك لمعفن بيطلع كساد
بأسف بأنو تكون من عيلة طراد
العطيت ميشال وانت اشعارك فساد

سليمان طراد
يا ها الشبيبه تعلّمي وتوبّخي
ول بحر عاش العمر لازم ترضخي
غيوم السما مبيّن عليك مبخبخي
اللي بيسمعك بيفكّرك حاتم..سخي
بقصّة غرام وعشق حاجي تنتخي
واسماع منّي وخود حجه يا أخي
ان شفت بنت وعجبتك يا بو ملك
تا تشدّها مفروض عزمك يرتخي

يا نسور مهما بعد منّي تفرّخي
ما بتوصلي لمجدي قدر ما تصرّخي

فادي فياض
يا بحر كلما بضيق عليك الخناق
بحر الهريبي بشوفك وبحر النفاق
اعمل كرامة للمرا بالإشتياق
وذكرى الزواج تلفها حبال العناق
الحب البقلبك روح شدشدلو العزاق
حاجي تضل على الشوار من اللزاق
اللي بترتخي نفسو بنزوي مارقة
بيدفع مأخر زوجتو عند الطلاق

منعيدها وانتو لنا اغلا رفاق
معكن ما بعرف عالمنابر درب شاق