عدنان سعيد وبحر الزجل موضوع الدعس

عدنان سعيد (بعد رحيل بحر الزجل من لبنان) :
مش بس صار الشعر يبكي عالرحيل
دمع السما بأيلول شفتو عم يسيل
و يا ريت ما عرفناه تا صرنا نقول
تكارم بدمعو عالبحر .. حتى البخيل
سليمان طراد
مش ولدني ولا كبريا ولا مفاخره
حس روحي بسوس جهلي ناخره
كل شي عليي تكارموا ولاد التراب
ما شفت اكرم من تراب الاخره
عدنان سعيد
سآل الغيوم بهالحما و غير هالحما
و جوع الشمس يللي على البحر ارتما
بتسمع جواب بيشهد عليه التراب
لمّا بيموت البحر قبرو بالسما
سليمان طراد
لما هطل غيم البلاغه من سماه
مات البحر لكن ما عرنا انتباه
قبر الاله بيفتحو ابن السما
وقبر البحر ما بيفتحو غير الاه
عدنان سعيد
ابن السما بيفتح قبر فيه ارتما
حتى الفدا صوب السما تشوفو سما
عكّز عا قبر البحر و التاريخ قال
لوما دعس عالبحر ما طال السما
سليمان طراد
لما قفير النحل يدعس بالندى
بيكون جيشو بسرقة الشهد ابتدى
و لوما اندعس جيش التعصب بالوطن
كان على شبر تراب ما بيدعس حدا
عدنان سعيد
بفضل الإيمان الما بيترك بالنا
عيسى دعس عا مواج قد جبالنا
والنحل دعوَس عالورد بتلالنا
بفضل العزيمي و اغتنو اطفالنا
و لما اليهودي دعوَس عْلا غلالنا
روحو خطفنا تا قشعنا حالنا
ولما علينا دعوَس التركي انتهى
و تحررو بفضل البطولي رجالنا

سليمان طراد
في بيت قالو شاعر بحفلاتنا
بعدو صداه بينتفض عا زاتنا
فلسطين كيف بترجع لدياتنا
وعم نتكل، يا ناس عا، بياتنا
صح اندعسنا بس تا تراباتنا
تزهر بطوله وترتوي، بدماتنا
نحنا عملنا متل، ما مالك كتب
غير الشمس ما بتدعس بارزاتنا

عدنان سعيد
لما الشمس تدعس على الأرز المصان
وين الفضل للأرز قلّي يا فلان
متل المرا الباعت شرفها من زمان
للقائد العندو مصاري و كبر شان
ولما عليها بيعتدي جوع الزمان
بتنام بسرير المعتر و الجبان
يعني يا بحر الشعر لا تطوِّل لسان
بهيدا الحكي بهدلت أرز العنفوان
بنهارها عم تدعسو شمس الدني
و ضو القمر بالليل عم يدعس كمان

سليمان طراد
لما دعس جيش الغريب ترابنا
من بيوتنا طلعنا وتركنا تيابنا
دعسنا على احلامنا بغيابنا
والبال، فضينا ت نملي جيابنا
ولما شيطان الحب دقدق، بابنا
عا قلوبنا دعسنا تـ فاتوا حبابنا
خلي القمر والشمس عنا، يدعسوا
اشرف من اللي دعوسوا عا رقابنا

عدنان سعيد
لوما انحنينا تا وطي معيارنا
ما في حدا بيدعس علينا بدارنا
و ممنوع يدعس نملنا ببدارنا
حتى ما يبقى الجوع يئذي صغارنا
حتى الهوا لولا شي مرّه زارنا
ممنوع يدعس عا تخوت قمارنا
منفزع تا حتى عارنا يصفّي نظام
و ما تغسل دموع الندامي عارنا

سليمان طراد
موسى تا خلّص شعب عا دقنو شبر
لوما دعس بالبحر بعدو ما عبر
وما في ولا غاصب نكّل وفينا نبر
الا ب مطرح ما دعس جيشو انقبر
ما في نظام بيسلم ان عندك خبر
المهم نحنا ننتبه ناخد عبر
حتى العمر دعّاس لو بتراقبو
بيدعس على الإيام تا يطل الكبر

عدنان سعيد
مين الدعس عا جفن عيني و نعّسو
الا العلا شفافو شفافي بيخرسو
و اللي دعس عالحق ظلمك أسّـسو
تا تفرّقو الأخوي و عا بعضن مترسو
خلّي الكبر يدعس عا عمري و يمعسو
بالقبر جسمي في ملاك بيحرسو
و إسمي من التاريخ صعبي ينمحى
و ما في حدا التاريخ قادر يدعسو

برسم صوَر حتى الصبايا يهودسو
ولوما نسيم الشعر ما بيتنفّسو
الكانو يجو حتى الصبا يتحسسو
صامو بغيابي يا حرام و عنّسو

سليمان طراد
مين قال كل الخبّرو والأرخوا
ما دعوسوا تواريخ حتى تأرخّوا
لا تصدّق اللي بيكتبوا ما بيرتخوا
للقرش.. دعسوا عا الكرامه ووسخّو
وحكّامنا من قرود سود استنسخوا
وتا يحرّفوها للحقيقه توبّخوا
صاروا منافخ مرجله وكذب ونفاق
لازم المنفخ تدعسو تا تنفخو

كفوفي، يا حنا من، القساوي، تفسخوا
تا يجمعو قرش النقي وما توسخوا

عدنان سعيد
يا مدوزن الدعسة على مخوخ الكبار
قوّي شويي تا يصيبن انفجار
مش دعس هودي بدهن سحق و دمار
و خازوق فيهن يدعس بأربع شبار
لكن في عنا رجال للحكمة شعار
أهل التقى و الدين صار الهن مزار
و ما زال شاطر بالدعس أعمل بطل
و إدعس اذا رجّال عا دقون الوقار

سليمان طراد
ما في كبار بها الوطن..!!أهل الوعي
ماتو وعليهن ما بينزل مدمعي
هنّي السبب..!تركوا الغشيم المدعي
يدعوس عا شعب معتّر ورح ادعي
يا شيوخ يا مطارين يا عقول اسمعي
لبنان زرتو وقلت ارضي ومرجعي
في شعب تحت الدعس ووراق النعي
انطبعت وبعدو الشعب نايم ما وعي
من بعد ما دعّست عا تراب الوطن
رايح وأخد كل دعساتي معي

ختام عدنان سعيد
يا بحر الشعر افكارك هزيلي
و مش خرج الحوارات التقيلي
و اذا بتدعس بحقل الشاعريي
شي دعسي ناقصة بْـعِـدّك هبيلي
لا تدعس عالطهارة المريميي
و على قبر القداسي و الفضيلي
و لا تدعس عالبلاغة الحيدريي
و عا نهج الأنبيا و ناس الأصيلي
وعلى تخوت الليالي المخمليي
لا تدعس عا مرا حلوة و جميلي
تعا ليها بلهفه عاطفيي
و إزحف زحف عا تلال النحيلي
انت سجادة الحمرا النديي
تا تدعسها على المتلك طويلي
ما هيدي للزعامات الغنيي
اللي سرقو الشعب والناس النبيلي
و بسجن خيام بالحرب الدنيي
ما تنسى العذّب الناس الجليلي
و رِجع عا بلادنا بدعمي قويي
قبل ما يدعس تراب القبيلي
دعسنا رقبتو و صارت قضيي
بمحاكم ما بتقبل بالرزيلي
وانت يا بحر يا غالي عليي
زميلي و مين أغلى من زميلي
بإسرائيل ارض اليعربيي
اذا بتدعس بهجمي مستحيلي
عميل منحسبك عن سوء نيي
يا إمّا شي بطل حرّر بلادو
من الغدر اليهودي الاسرائيلي

ختام سليمان طراد
عليي يا بشر حاجي تعيدو
من دقّات قلبي بتستفيدو
أول ما دعس قلبي الحبيبه
وراحت مع شخص اكتر رصيدو
رغم الكبريا وهيبة مشيبه
على نهدات روحي لا تزيدو
ولأنو اللي دعس قلبي حبيبي
قبلت بدعستو ودبت بنهيدو
العمر ألغام صفى يا شبيبي
وحقل المعرفه موسم حصيدو
حتى ندعسو بدنا كتيبه
بين لغومها نقطّف جديدو
لكن في وجع عيله كئيبه
الجد الدعوسو إبنو وحفيدو
هيدا مش دعس هيدا مصيبه
انشالله اللي دعس يشرب اسيدو
وتا نحكي بناس موهوبه واديبه
وكلمن في ورق حامل بإيدو
لوما تدعس قلام الكتيبه
ما في ولا شاعر بيكتب قصيدو
ويا عدنان عم ادفع ضريبه
تا أوصل للنجاح وقيم عيدو
ولأنو الدعس طالع من نصيبي
صرت عنقود عم يعصر نبيدو
انا تدعوست ببلاد الغريبه
حتى حساب عمري رجعت عيدو
ولما تركت ضيعتنا الحبيبه
عا قلبي دعوست من كل قلبي
لإني الفقر عمري ما بريدو