حسن كوثراني وبحر الزجل مال وعلم

سليمان طراد
يا بو علي مشتاق رحمة والدي
مشتاق ليك ولليالي الخالده
بألمانيا صفيت عايش... حايدي؟
يما لحقت فيها ارتفاع الفايده
سمعنا الوقايه الزايده بلا فايدي
الاوباء عندك يا صديقي زايدي
شو رايك لعندي تجي مع عيلتك
بنقسم اللقمه تنينا عا المايده

حسن كوثراني
يا طراد عالترحال لكو ركابنا
منركض ورى اللقمة وتلفو عصابنا
ومن المرض حالة هلع تنتابنا
والفقر سوطو بياكل من جنابنا
من العولمة اللي واقفي ع بابنا
ونير الرساميل ال فوق رقابنا
مره بيحطو إيدهن بـ تمنا
ومره بيحطو إيدهن بجيابنا

سليمان طراد
يا بو علي غيّرت بمواعيدنا
وما سمعت منك رد ع تهديدنا
نحنا دفعنا المال تاما يبيدنا
هالداء ..اوعى تقول..الله يزيدنا
مصدر مرضنا الصين ..شو بتفيدنا..؟
ونحنا بعد ما انرفعت بواريدنا
بنعطيك فرصه عا شرط ..بدنا اللقاح
ويا اشتراكي لقمتك بـ إيدنا

حسن كوثراني
تلقح على الفرشة الليلي بتستفيد
هيدا اللقاح مجرب ومنو اكيد
...
سليمان بيكفيك تهديد ووعيد
وعن محل المش إلك مش عم تحيد
ع الصين امس وصلت يا ساعي البريد
وكوبا وغيرن مين يللي مد أيد
راهن على الأنسان والصيت الحميد
ولا تكون عبد المال مذموم وزهيد
وما زال فوق المال انسانيتي
لا تحاور الاحرار بمنطق عبيد

سليمان طراد
يا بو علي الله سالتو واقتضى
التوضيح جاوبني وما أبدالي الرضا
قال :
راهنت عا الانسان بسنين المضا
لما طلع بالعلم يسكن بالفضا
اعطيتو الزكا والمعنويه وما انقضا
فتره ..رجعت تا شوف جهدو عا فضا
لقيتو فقد عن جد انسانيتو
ولوما بعت الداء.. عا العالم قضا

حسن كوثراني
سليمان لو تسأل ضمير الالهه
إلا العدالي ما خطر ع بالها
الله الارض لما بإيدو شالها
من جنتو ودى بشر كرمالها
شوف الدني بسهولها وجبالها
ومي وهوا وذره ومجره طالها
لا تخاف ع عمر الطبيعة ينتهي
من حالها بتعود تخلق حالها

لا تعبدو ربين عيسى قالها
يا ويل أمة عم بتعبد مالها
ومن روح الله هالارض مازالها
غير بالعلم لا تعالجو جهالها

سليمان طراد
لما الرموز تغير وتبقا رموز
ما في اله بيقدر يفك الرموز
شوف الطبيعه الحاملي ورد وكنوز
الا شتاء وشمس مش ممكن تعوز
كيف الارض بتعيش حكيك لا يجوز
بتتقمص ومن حالها بترجع عجوز
لما الارض تفنا تا تخلق حالها
يعني الطبيعه حكر صارت للدروز

حسن كوثراني
ملة كريمي بقدّس رجالاتها
وبجلّ خمس حدودها وراياتها
متل المحبة العم بتعطي ذاتها
هيك الطبيعة تناسخت ذراتها
رموز الدروز شيوخها ولفاتها
لتناسخت وتوارثت عاداتها
ومفهوم روحاني عصب خلواتها
حتى التقمص صار من جيناتها
يعني .. الجماعة القدست مفهومها
غير الجماعة القدست ليراتها

سليمان طراد
بتجل خمس حدود او تالوتنا
لا تفتكر فيها اشتريت سكوتنا
لما المحبه انعطيت بملكوتنا
كانت طبيعتنا تامن قوتنا
جمعنا الكنوز الغاليه ببيوتنا
وآية بنين ومال ما بتفوتنا
نحنا اذا عا قبورنا رنو الفلوس
بنقوم اول يوم من تابوتنا

حسن كوثراني
فضة ودهب يا طراد ما الهن لزوم
أتبع نبيك وصلب وصلي وصوم
جبتلك كنوز الطبيعة والنجوم
أخترت الدهب وتنكرت لهالعلوم
ولما غراب البين ع روحك يحوم
وتصير بالتابوت من بعد الهجوم
مين قال ع قبرك رح نرن الدهب
رح دق ع التنكة وعمرك ما تقوم

سليمان طراد
لا تفتكر بالمعرفه قلبي انشرح
ما العلم صار اليوم عنوان الترح
والدين فتوه وكلمن فتوه اقترح
بالعلم هيدا شعور خالقنا جرح
مصدر كآابي العلم مش مصدر فرح
علم الكواكب بعد ما بجهد انشرح
صار الشعب كسلان قاعد بالبيوت
ناطر شو بدها تبشرو ماغي فرح

حسن كوثراني
ال من كل دين وفلسفة حجة امتلك
ما بيحرجو مشعوذ ولا عالم فلك
نضام شمسي ع الارض ل وصلك
ليل ونهار بدورتو ونور وحلك
ولو بالدهب يا طراد مالك شنشلك
وبإيدك كنوز الدني وأنت الملك
لما الأرض بدها تصفي حسابها
كل شي إلك بيصير إلها مش إلك

ختام سليمان طراد

يا إمي سامحيني عا غيابي
فقدتك يا حنوني بإغترابي
وتا صلّح غلطتي وترضي عليي
اسمحيلي اليوم إركع عا ركابي

انا يا بو علي تعبت جريي
تا إبقا بغربتي وعبّي جيابي
واذا بيلاحظو العالم عليي
حظّي ما حمل مني إصابي

المصاري بها الدني سلطه قويه
العلم بأمرها وما في غرابي
ويمكن لو الحريري كان بيي
ما كنت اليوم عم اخسر شبابي

بعد ما دارت الايام فيي
انحنى ضهري متل قوس الربابي
بدون المال ما في فرمشيي
ببلدنا ولا علاج ولا طبابي

وبعلم الفيزيا وشر البليّه
ما تضحك قبل ما تسمع خطابي
اختباراتن ملو الدنيا أذيه
ووباء وربّنا بلا استجابي

انت بتعمل الكوكب مطيّه
لأنك عالم و عا الحلم رابي
انا للأرض عندي جازبيه
ترابي وبعشق المجد الترابي

واذا بتعرف خديجه اليعربيه
اعترف يا مسلم بحجة جوابي
علي بالسيف بس المال هيي
انا المال.. وفرضتلك اهابي

على كل حال تا ننهي القضيه
وانت تشوف حالك عا جنابي
افتحلك شي عياده مخبريه
وخلص من كورونا شعب الله
وتكاليف الطبابي عا حسابي


ختام حسن كوثراني

أذا سليمان راكض خلف مالو
ومالو عن طريق الحق مالو
يمكن يكفر برب الشريعة
اذا يوضاس بإيدو ومالو

بلحضة كان عن ربو بقطيعة
الفضة وقت ما رهجت قبالو
وقت ما فاق ع العملي الشنيعة
بعمد تينة شنق يا طراد حالو

يا سليمان غير هالطبيعة
الغنى بالعقل والتدبير قالو
على الأنسان لو حلت فجيعة
سوى عطف وحبيب القلب مالو

المال بجيبة العالم وديعة
ومنو قد ما إيديك طالو
فيه بليس عاملك خديعة
وصعب كتير تخلص من حبالو

والإنسان بالأرض الوسيعة
بكنوز الدهب مشغول بالو
معدن قيمتو رخيصة وضيعة
ما زال من الأرض أنسان شالو

وقبل ما بدينا تعمل شريعة
وعلي اللي هلّ ع الدنيا هلالو
ال بسيفو حطم حصون المنيعة
كان الفقر من أجمل خصالو

انضر للدني نضره سريعة
بقدرة ربنا جلّ جلالو
خلق كون ومجرات وطبيعة
وتا تعمر خلق أنسان فيها
تخلد أسم ربك من خلالو
-----