عدنان سعيد وبحر الزجل تخت وسهر

الصديق جون عقل
ب نظري مش ب نظري
هاي حقيقة ورح ضل قولها "لما انتو بتلتقو نجوم السما بترقص فرح وطرب"
المحكشوووووووون ألشاعر سليمان طراد و Adnan R. Saeed
تنين ملوك ما في اي نقاش ع هالصفة
سليمان
تشتك تشتك تشتك تشتك
يا شاعر.. التخت المفشكل والسرير..
جاييك بحر الموهبه بموجو الغزير
عدنان غير البحر ما عندك نصير..
تحاور معو ..تا نشوف شو بدو يصير
لبنان وضعو صار حسّاس وخطير
الله يساعد شعبنا الصفى فقير
بكرا بتجي الايام وبترجع تشوف
النسوان رجعت للفراش وللحصير
تشتك تشتك تشتك
عدنان
كب الحصيري ولا تزيد مصابنا
كبرنا و صارو بيوجعونا ركابنا
ياما ركعنا بليلنا لحبابنا
و بنهارنا لنوّابنا عا ترابنا
و تا يرجعو غيّابنا و اصحابنا
قدّيش صلّينا و فتحنا بوابنا
و لوما المصارف سارقه اتعابنا
ولوما الطفر زلغط بنص جيابنا
و لوما التخوتي شايلي هموم البشر
كنا لحقنا من سنه غيّابنا
سليمان
العملو الحصيري بيشعرو بفقر الشعوب
تا يوفرو حق التخوتي عا الجيوب
وما زال يا ختيار عاجز عا ركوب
خيول الاصيله خوف تقلب عا الدروب
في حل عندي بيعجبك ما فيه عيوب
تاتصير متل الزير تحتل القلوب
اخترعو حبوب الزرق تا تشد الركاب
استغني عن الزلوع ..وازلع بالحبوب
ههههه
عدنان
عندي رِكَب لو تحتها مهري استوى
بدّك تشوفو من الضغط جسمو استوى
لكن بدوله فاسدي بلا مستوى
للموت صارو تخوتنا و مش للهوى
ولولا شي مرّه رحت تا تشم الهوا
و جبت الدوى تا يزيدك جنون و قِوى
بالرغم ما بيكون فعّال الدوى
بعد الدما السالت بعاصمة الغوى
لولا ببالك مر شكل العاصمي
بتستسلم و بتصير ما منك نوى
سليمان
عدنان لازم تطلب الليله سماح
وترفع يديك وتنحني تسلم سلاح
اللي استسلمو بالحرب ما حبو الكفاح
التاريخ وحدو بيحكم ان كانو مناح
الحرب فيها تكتكي وخدعا ومباح
فيها التراجع بس كرمال النجاح
باريس لما قاومت هتلر انزاح
عن شعبها ظلمو النازي بكل ناح
و بيروت بقيت صامده بوج العدو
وما استسلمت رغم القصف والاجتياح
عدنان
بيروت إمشي بعد صوب الجلجلي
و شوفي صليبك ناطرك و المقصلي
و اللي على البور اعتدا بهالمرحلي
معروف ، بس السر مش رح ينجلي
و بيروت بالماضي بعزم و مرجلي
طردت يهودي بدم عم يغلي غلي
لكن اليوم بمين بدنا نبتلي ؟؟
فكّر معي حتى نحل المشكلي
طردنا العدو الخارجي و شو رح يصير
لولا اختلفنا مع عدو الداخلي ؟؟
سليمان
لمّا العدوّ الداخلي يحس بأمان
ويستسلم الشعب المعتّر والمهان
الفتنه بتوعا بين كان وبين مان
وما في حدا بلا مواخذي بيربح رهان
الرجّال بيقولو ..! وبسمع من زمان
مرتو عدّوو الداخلي ..وروحو كمان
وما بين مرا ورجّال ولعاني الدني
ورغم العداوي ما بتحرمنا الحنان
عدنان
ان كان المرا بالبيت خصمك عن صحيح
بتقتل عدوّك قبل ما ديكك يصيح ؟؟
حرّر نوايا الفيك بالعقل الرجيح
حتى يقولو الناس عن بحرك منيح
بالرغم ما يوضاس إيمانو شحيح
و هوّي العدو الداخلي بفعلو القبيح
ما شفت أمّه خالدي و ما في فدا
لولا قتلتو قبل ما يبيع المسيح
سليمان
ما في عدو بداخلك غير الشكوك
وقلة ايمان بتفضحو صياح الديوك
النسوان مهما بعذبوك ويغدروك
عا جناح فلسفة الحنان بيحملوك
وياما النسا عا تخوت همك غنجوك
وعملولك الاعياد حتى يبسطوك
من هيك يلي بس اعداؤو النسا .
متلك ومتلي عيشتو عيشة ملوك
سبقتك عليها ههههههه
عدنان
مش كل مرا بيركعلها الجوع الخطير
ولا كل مرا للنوم بتقلّو يطير
بالرغم ما النسوان لزهوري غدير
و فرحة حياتي ان كنت باليوم الأخير
عندك مرا بيحتار فيها شكسبير
قلّة حلا ، قلّة فهم ، قلّة ضمير
هودي أعادي تخوت بتحب الحرير
هودي النكد و الغم ، والهم الكبير
الله ما يبلي تخوتنا بهيكي مرا
حتى ما نحلم بالفنا و عمر القصير
سليمان
ما في مرا بها الكون بتحب النقار
لوما غباوة زوجها بالاختصار
عندك مرا بالبيت بتربي الزغار
وعندك مرا مشاريعها بتهلك..كتار
ما فيك تبقا بوجها ليلا نهار
دبي اعصري وبيناتكن يوقع شجار
الاهمال يا عدنان بيخلي المرا
تبرم على على رجال تاني ولو حمار
عدنان
يا جاهل بطبع المرا و فهمك قليل
جبلي بثينه و شوف شو بيعمل جميل
ما في مرا عا تختها بتعزم بخيل
و لا بترتخي ولا بتعلق بعابر سبيل
بدها اللي متلي بينحت الخصر النحيل
بلمسه ترد الروح و بتحيي القتيل
و ما زال جايي انت عالمهنه دخيل
رح علّمك تا تقدر بحملك تشيل
لازم طويلي تكون أعلى من النخيل
و حدّك قصيري بالرغم مَنّك طويل
و آدميي تكون مع كل البشر
لكن معك زعرا ... و من عيار التقيل
سليمان
يا قاهر النسوان من ها الوهم فيق
سيف الخيانه بيدبح بحق وحقيق
المرأه ضحية حب اعمى .. يا رفيق
وعا التخت مفرش جسمها ناعم رقيق
اعشقها ..وشبّع جوعها بخبز العشيق
وخلّي تخوت الحب تضرخ زيق زيق
عا شرط اوعا ما تفرّق بالنسا
ما بين ست البيت أو بنت الطريق
عدنان
بنت الطريق اللي الفقر غنّالها
كرمال تاكل خبز باعت حالها
و زبونها لما يصفّي قبالها
متلو متل لوح الثلج عا تلالها
وحدي اللي بعرف حالها و احوالها
لما عشيي بتلتجي لأطفالها
و تشلح دنسها و ترتدي خلخالها
و تقرب بطهر عيونها للآلها
هيدي المرا لا تهينها بطول اللسان
ان باعت شرفها تا تربّي عيالها
سليمان
بنات الطريق الحبّت تعيش الضنا
وعملو ضحايا ..!! بشكك ...بصدقن انا
المرأه مرايه للسعاده.. والهنا
ممنوع يخدش حسّها جاني جنا
بيع الشرف مش تضحيه.. هيدا فنا
وأكبر مثل حكّامنا.. من دون عنا
باعو بأسم ولادنا تراب الوطن
وبعدن ما تابو من الخطيه والزنا
عدنان قصيد
انا قرمة أرز من عهد قافي
لهلق طَـق عم بتُّـطُق قافي
ما رح بيع الكرامي بقرش اصفر
و ما رح إتعب و لا بغيّر القافي
و نحنا بالجبل رايات جوهر
ما بعنا أرضنا لمخلوق لافي
و ابن جنوبنا اللي الأرض حرّر
ما باع و بقيِّت ديارو مضافي
وعلى بيروت لما الحقد قرّر
يفجّر مرفأ اصحاب الخلافي
ما في ولا بيت الا ما تدمّر
و صار الردم عالطرقات كافي
و جروح و ناس تنزف دم أحمر
و شعب يركض على الطرقات حافي
و بعد ما تشرّد الشعب المعتّر
و ما عندو صار بيت يكون دافي
و جنا عمرو بالبنوكي تبخّر
بسرقه منظّمي و العدل غافي
عليّي رد يا بحر المعوكر
شو ممكن يعملو اصحاب العوافي
اذا الرجّال راح شلّح و كسّر
و اذا بتمشي مرا بعكس النظافي
ما فيك تلوم شب ان صار أزعر
يمّا شي مرا ان باعت لطافي
لأنّو اللي بحقدو البور فجّر
بحقّو العدل حتى يكون وافي
ما تستغرب اذا للحكم أصدر
و سمح للشعب يزني فيه ... والله
بشرعي الحكم ما بيكون كافي
سليمان قصيد
اووف اووف
يا عـدنان.. ببعتلك سلامي
بعد طــوفان عا جناح الحمامه
وع مرفأ بــور بيروت الجريحه
بنشر بالوطن عرض الزعامي
ولأنو ها الوطن لبوه طريحه
غدرها الجهل ..بالحقد الظلامي
السلطه حقوق شعبا مستبيحه
كأنو للأسف باعو الكرامه
وتا نرجع للمرا ..وفيض القريحه
المرأه .بتنعرف بالإبتسامه
واذا بتضحكلك..وبتحط ريحه
بترهن بيتك بموعد غرامي
ونساء اليوم ..!!ما تقلّي منيحه؟
وبدي افضح.. وعدد أسامي
هيفا وآلسي ووننسي وسميحه
وآليسا العنقها متل النعامه
من النسوان في عندك شريحة
منها بخاف لو شفتا بمنامي
اذ بتبوسها بتشم ريحة
مش برفان بصليه. وبامي
وعا تختك لو نمت نومة مريحة
وبــــأحضانها وناديت نامي
يا عدنان بتجيبك سطيحة
بتصرخ آخ ..كسرتي عضامي
ساعة بدها كيلو سفيحة
كتير موحمي بارد .. وحامي..!!
وانتي نبعتك صارت شحيحة
مختير .كان عندك دم حامي
خايف تنتحر عن شير نيحا
اهل الشوف بيقيمو القيامي
وبيدور الندب بالساحه الفسيحه
وبتخسر خوابي الشعر قامي
الموتة ع التخت اكبر فضيحة
وعمرك قبل ما تدفع غرامة
يا مجنون أقبل هالنصيحة
ببحري كب يا عدنان حالك
تا يقولو البشر مات بكرامي