حسن كوثراني وبحر الزجل شاي

حسن كوثراني
سليمان بعدك ع المنابر فوضوي
وبالشعر خطك اعوج ومنو سوي
قلبي عصرتو تـ الخوابي ترتوي
شاحت عيونك ع عنب مش مستوي
لبنان بـِ نار التجارب منكوي
من راس الكنيسة لعهد اسلاموي
لبنان يا بحر الزجل شو بيشبهك
بيقول عن حالو قوي ومنو قوي
سليمان طراد
يا بو علي لبنان تاريخو انضرب
لما املنا شمّع الخيط وهرب
كلما على تسليحنا شعب اقترب
بيتخوّن وبنصير نعتبرو جرب
اجتمعو علينا وقررو وفود وسرب
اخترعو دوا ولحد هلق ما انشرب
" القوه بضعفو " عنونو بخط العريض
حتى اسودي تصير خصيان العرب
حسن كوثراني
من قبل ما تبكي على فسحة امل
قد الأمل يا طراد بيكون العمل
شو عملت؟ يمكن كنت تقرا " بالعمل"
تا صار جرح المعرفة ينزف عمل
ميشال شيحا قبلك الرايي حمل
وحصة اسد اعطاك وحقوقي همل
ودشر على تاريخنا شلعة دياب
وكلما يجوع الذيب يدبحلو حمل
سليمان طراد
بقلك بذات القافيه بنشوه و ثمل
ها الصار عنا بها الوطن لا يحتمل
ميشال شيحا من الاسد حصه حمل
تا صار عنا اسود تعرف بالعمل
لكن بعد ما بحلمنا زهّر امل
واللي حكمنا حقوقنا كب وهمل
دياب السياسي ضاعت بغاب الوحوش
واول عقوبه انحطت برقبة "أمل"
حسن كوثراني
كنو "أمل" اول ضحايا التجربة
خلف اصبعتك بكفي تختبي
لما الأسد بالغاب شاف الأرنبة
قلها وقعتي فريسة بمخلبي
وصار خلفها ع البير يمشي دبدبي
ولما خيالو شاف بالميي كبي
ما بين قوة وضعف حاجي شقلبة
وتا ضلني اعلى واجل بالمرتبي
ع البير يا سليمان ناوي آخدك
منشان تعرف يا أسد انك غبي
سليمان طراد
خلف النوايا البيض روحي بتختبي
وقلبي جبل ... أصقاع الله ملعبي
عا البير آخدني متل هاك النبي
وراجع تعذّب والدك ...مين الغبي؟
أرنِب معي دينيك واسمع يا صبي
شَـيْل الأرانب كان أسوأ تجربه
أرنب الحل الناطرينو بها الوطن
دبحوه تا يسكر عليه الاجنبي
حسن كوثراني
يا أرنب الأزمة ضميرك حاجبك
عن شعبنا وضليت عاقد حاجبك
امس الفرنسي الأنبك والشاجبك
جبلك الحل وليش منو عاجبك
وتا حاورك بحضرتي شيل النبيد
وعللّي بريق الشاي واعمل واجبك
سليمان طراد
يا بادل التبغ الجنوبي بفيرسراي
وبدل ال صباح الخير صرت تقول هاي
من كتر ما منك صرخنا اي اي
رحت اشتكيت بمحكمة عدل بْلاهاي
المشكل في عنا بالوطن الفين راي
شعب باقي وشعب هاجر قال باي
نحنا شربنا نبيد دمات العدا
وانتو شربتو بنخبها كاسات شاي
حسن كوثراني
الشعب الجنوبي مع مقاومتو انسجم
وبـِ ردّ كيد المعتدي كلما هجم
وقانا الجنوب طراد عنها ليش حجم
ل بينكرك يا عرس قانا بينرجم
الضيافة بمرجعيون عنها شو نجم
لما البجم بيضيفو عالم بجم
والكل ع السيلان !! صارو معودين
مصيبة أذا بيبلشو اكرك عجم
سليمان طراد
تركلي الوطن زعلان منو وتاركو
والا مع الأحزان مش عم شاركو
عنا شعب ما تعلّم من معاركو
غشمو بجمجمة الجهاله زاركو
وحكّامنا ها الوضع تا يتداركو
دولارهن سحبو وينّو وماركو
ومرقو على حكّام عجّاز الخليج
مش من الكعبه من الريّال تباركو
حسن كوثراني
يا طراد هنت البيض بهدلت السمر
أثبت على موقف شي مره بهالعمر
صرلك من التسعين ع طبل وزمر
تا صار شعبك يشبه هنود الحمر
وأنتِ ع راس الحكم وينك يا نمر
كرامة طويل العمر بطلت الخمر
ومن بعد ما تشوي سمك وتصب شاي
ناوي تحلي ضرسك بقفة تمر
---
ختام سليمان طراد
بعد ما بو علي عليي تحشم
وتسلّح بالوفا.. تمترس ..تدشم
خسر حزبو خساره وما استنّى
فيها يعترف ..عصبّ ..وغشّم..
السياسي يا حسن بالشرق عنا
سياسي تخلجن وغيرو تنشّم
دود مخلل ..وفينا ومنّا
لها الأسباب عنا الشعب طشّم
ولأني بعرفك شاعر معنّى
وشيوعي بالنصر حالم تعشّم
لا تسأل عن الحكّام بوطنّا
مش رح يتركو الكرسي لأنو
بقفاهن يا حسن برغي مبشّم
---
ختام حسن كوثراني
يا لوعة زينب وفجعة خديجة
إذا بعد الحرب هيك النتيجي
ووقفوا الكل أفراد وجماعة
شحادين ع بواب الخليجي
الخليجي الحاكم ال عندو وضاعة
بدو صدر سوسو وخصر جيجي
وببيروت معروضة البضاعة
أجا تا يعربد بسهره بهيجي
الوطن يا طراد مش حزب واذاعة
ولا هبجة قذيفة آر. بي .جي
نسيجو الأجتماعي عن قناعة
دخلك مين يل مزق نسيجي
انا بيروت كعبة للشفاعة
زهر المعرفة بفوحة اريجي
تجار السياسي والمياعة
ما برضى يكونو من حجيجي
يا ابن طراد نحنا من الرضاعة
انمزجنا بالعروبة ومن مزيجي
اذا صنين فاخر بالنصاعة
كلما اعطشت تسقيني الفيجي !!
يا سليمان يا هيكل تداعى
لأنو بنت افكارك خديجي
انا فريد شوقي بالشجاعة
و محمود المليجي ان كان خصمي
بياكل قتل محمود المليجي