سجال كلال والبحر

السجال الشعري الارتجالي بين سليمان طراد وطلال عكو 2 بتاريخ 30/09/2023
قصيد
ألشاعر سليمان طراد ١
معقول منّي زعلت يا عكّو؟
و صرتوا بغيابي ما بتتحكّو!!
ما كلّ عمرو البحر عم بيغيب
و بقدرتي معقول بتشكّوا؟
بحر الزجل اعصار حامل طيب
و مروج أنفاس الشعر زكّو
الإبداع مش اسفاف أو تتطييب
الإبداع ما بيوجّ تا تحكّو
واليوم في مضاريب و مجاديب
ع ها البلاغه عيب.. بيبكّوا
و ق دّ ما اعضاء فيك تجيب
و البحر لو بيشوفهن لكّو
لا الصوت رح يشفع ولا التتطريب
منّي انتبه أو نبّه الأعضاء
قشاط الزجل رح يرجع يفكّو
طلال عكّو 1
اجا مْكاري الزجل قاطع مشاعو
ع ذوقو يرندح و يفرد متاعو
و بذات الدايره عقلو محصّر
يا ربّي هات صبرك تا يساعو
إجا من بعد ما بْجهلو تبصّر
بأنّو المارد بيلوي ذراعو
و أنا لو بشقل بْكلوة الخنصر
عواميد السما هرّوا و تداعوا
نكر شعري المثل خمره تعصّر
و سكب تفل البدر مونه بِصاعو
بفرد لْباس يا جويزه و أبصر
مين الشعر منكم وهم باعو
و إذا في كل عرس قدّو تخصّر
و زقيف المشتري عمّر قلاعو
على مْحكّ الفكر كل شيخ منصر
بدّي افضحو و اكشف قناعو
طلال الشعر عرشو تاج قيصر
عجين كماجكم قرّص طباعو
بجرن الفلسفه فكرو تنصّر
و حدود المعرفه تْخطّى شعاعو
راجع من بعد ما الشعر قصّر
ت يفتح بالمدا عمق و تجلّي
و فكر ينحت حلا الكلمه يراعو..
سليمان طراد 2
يا ربّي ليش بتحب الضحايا
و عليّي حابب تزيد البلايا
انصحو لطيطو لا يبطر بالقصيده
و قلّو لا بقا يهجي القوايا
يا طيطو عركتي مرّه و مبيدي
إذا مش قدّها بترجع بقايا
و بلا ما تنزع الليله السعيده
و تنقل قتلتك برّا السرايا
الخوابي ولادها تربّو ع إيدي
تا صاروا يخيّلوا فوق المطايا
وشو خصّك انت بمواهب عديده
صنعها الحجّ و بصدق النوايا
وإذا بتحبّ بقرالك جريده
عن افضال بدر ..و في صبايا
صاروا بالخوابي بلا حسيده
يقفّوا الشعر شو طلعوا ذكايا
و ياما نقّح ل شعرا عديده
و متلك عيب ما طلعوا وفايا
لها الأسباب بدّي بلّ أيدي
فيك و فهّمك تحفظ جميلو
و علّم فيك يا عكو البقايا
و يا بو كماج مقرمح و مسوّد
لا تدّعي بالنحت و تداعي
عا قدّ ما بتكبر بتبقا قد
زغتور عم يرضع و مش واعي
مهما الدعايه تكبّرك و الشد
رح يفتقك ما في إلو داعي
تبيّن قبالي تعرّم و تحتّد
قبرك بقيسو ارتاح... بذراعي
مين قال انّك شاعر بتنعد
مغرور و ظروفك ما بتراعي
بتطلع إذا بدنا نقول الجد
قرطل قصب محمول بكواعي
و جاهل البحر عليك ما بينرد
تا تعتذر قدّامنا من الحج
و عليه حاجي تكرفت دواعي
طلال عكّو 2
يا أهل الشعر دنيا الشعر عَزّوا
سوسو بيك صاغ الطيش عِزو
وإذا عا غيرنا بفلسين عرَم
بيسقط كلّ ما طْموحي ابتزّو
يا سوسو بساط عقلاتك مخرَّم
وسوسو ناهش بقمحو و رزّو
و سيدك بدر ع المثلك تكرَّم
عند ما شبّعك من خير بزّو
انت جلدك بضرباتي تورّم
وجايه ت الدهر عنقو تجزّو
قلت معليش ضاف الروض حيرم
م في داعي بنفخة ريح هزّو
زرعنا الزنبق بدربو و عجرَم
قلعنا . خْطيّ حتّى ما يغزّو
طلع فنّيص بقْوة ضبع اطرَم
و نياب الجوع عا بعضن يكزّوا
يا عنقود اللي قبْل الترم حصْرَم
انا خْموري جروح الكرم نزّوا
و إذا غْرورك بخامَك نار اضرَم
انا غزلة حريري الخيط قزّو
انت مش ندّ فكري و كان يحرّم
ع مهري يسابق خيول الكسيحه
لو ما الواجب الشعري استفزو
و كفا تبرم ع ذات الاسطواني
بأنّو ع الشعر فضلك اعاني
بدون مواخذه و معلّميه
بقصايد شعرك الأفلاس جاني
بصفّ حروف ما فيها مزيّه
ضمير الموهبه أصبح مُعاني
بّتركض من ع بكرا و من عشيّه
تتزرع خيخنه و تحصد جباني
انت يا طراد لعبه مسرحيّه
و كرت رابح بحفلات الغواني
و تتحرّك مواقعنا شويّه
سحبنا الكرت من درج الخزاني
انتصح كافيك جهل و فوضويّه
صداقاتك يا بو شربل أماني
ما عاد الوقت يسعف يا بنيّي
إذا ما رْضيت تحفظ شيب راسك
تضيّع عمرك الشعري بثواني
سليمان طراد 3
عليّي بعد ما الأحباب جارو
جبرت السيف ما تمزح شفارو
وفتحت بواب فلسفتي العتيقه
تا إستقبل بموقعنا زغارو
طلال تعيّن و ما في وثيقه
إداري و ما انعرف مين الختارو
فات بواسطه بلعبه دقيقه
قبض عدنان من عكّو دولارو
وأنا ما كنت لاقي و لا طريقه
فيها فاتشو و افهم فكارو
كان يمغمغ و هيدي الحقيقه
و لإنّو الموقع استأنف خيارو
و صداقتنا رغم منها عميقه
بدنا نطالب بتدقيق فوري
بركي بيرجع يعدّل قرارو
يا عكّو اسماع منّي يا زميلي
الاداره مش هدف هيي .وسيله
انّك تجمع الشعّار كلّا
تلات رباع اجمع ع القليله
فتت عا الموقع بأسلوب و الله
حسّ الحجّ بحقّو تقيله
ترك ها الموقع و عنّو تخلّى
و أكلو صار براتو بليله
بعد ما كان كرشو أواز تلّى
ضعفت شهوتو و صارت قليله
وانا ببعت إلو من فنزولا
محاشي و رز و شوية فوارغ
تا يبقى الحجّ خيّال الأصيله
استحي من الحج يا عكّو اعذرلو
و ظهرك بالمواقع لا تدرلو
وإذا غلّط بحقّك عيب سامح
و ذنبو بدون ما تفكّر اغفرلو
إذا بتشوف مهر الشعر جامح
سرعة حركتو بسرعه قفرلو
لإنّو الحجّ من أوّل مبارح
قلّي قبر للعكّو حفرلو
لإنّو طيفك تأكّد ان لامح
بدّو يكسّرك بالارتجالي
اسأل كلمن عركه حضرلو
طلال عكّو 3
يا سوسو كلّ ما عليٍي تعدّوا
نوايا الفيك عا ضعفك انردّوا
الأذيّه ب بحرها فايش و غارق
و زمانك سارق من الامس غدّو
آذا عكّو براسك ثقب خارق
و عصي ع المجلس الطبي يسدّو
وصيه اكتوب يا شيخ المْفارق
و على كذبة شعر يا قوم حِدّوا
افتكرتك غصن زهر الشعر وارق
و من كمامك عطور الصبح ندّوا
يا حسره طلعت مثل الغير مارق
و ضحية مثل ما غيرك انعدوا
و إذا بدرك رجع بعد المطارق
ع راسو يزحف و قاصد و بدّو
الأمانه يصونها و يحمل بيارق
انا برضا كرامة عين عدّو ( عدنان )
يا سوسو حاج واقف ع المفارق
تتضرب كمّك بمزحو و جدّو
أنا جّموحي خفايا الغيب طارق
البحر من سطوتي بجزرو و مدّو
المغارب لو بتبرم و المشارق
و بعزمك زلو مرود الجان شدّوا
رح بيبقى زطلال الشعر حارق
بعين المعرفه و عين الحقيقه
يباسة كل عقل مجتاز حَدّو .
و ع سيرة بدرك الأعوج سراطو
ضروري الفكر يحكم في نشاطو
و لشو تتروّج الكلمه العقيمه
ال بحجّة ضعفها باعوا وتعاطوا
الهجا بحروبنا زاد النميمه
و ْخصم صفّا على الماضي عياطو
لا قادر يشحذ بسيفو العزيمه
ولا يسحب أُبر من تحت باطو
داير ع الصداقات الحميمه
و بنك فلّس بأصلو و احتياطو
ما قدروا يدفعوا عنّو القسميه
إذا الثوب اهترى صعبه خياطو
وإنت يا طراد سوسو او حليمه
بقايا طبختِك ع النار شاطوا
حلّك صار تعطي الحرف قيمه
ت عرش الموهبة يعلى بلاطو
الشعر مش كنفشه وقذح وشتيمه
ولا مْسدس أذى خرطش مْشاطوا
الشعر نور و علم قيمه عظيمه
على عنق الجهل شرّع سياطو
انا بحاكيك من قلبي و صميمي
مقاسك قصَّر الفشخه بساطو
نصيحه اسماع يا نحاس الذميمه
الذهب لا تْشارع بوزنو و قيراطو
انت لنّك بوزني و لا غريمي
و ت ما أقسى على شيبة زمانك
صون لسانك و اعقد رباطو..
سليمان طراد 4
عليّي ليش تا تشهر كفاحك
و حدو الحجّ بالردّات لاحك
نصيحه لا تقرّب عا شطوطي
و لا بجبهتي تعلن فلاحك
الحجّ معلّمك يا منفلوطي
و ياما نقّح و زيّت سلاحك
احترم خطّ التماس العا خطوطي
و بلا ما انجبر ع اجتياحك
و عليكن بالزجل افرض شروطي
يا إمّا بتتطلبوا من الحجّ يرجع
يا إمّا بصدرك بشكشك رماحك
و على عدنان رح أطلق سهامي
قبض من بدر و تحمّل ملامي
و ما بعرف وين بعزقها و بزّر
مصاريف الخوابي و العلامه
عزايم ل أبو شادي الموقّر
ضروري نجبرو يدفع غرامي
أنا ما بحبّ افتنها و ما بفخر
أنّي شوف موقع شعر دامي
لاكن في عداله بحبّ تظهر
و نعمل بالخوابي اليوم لجنه
تدقّق بالإداره ع الاسامي
طلال عكّو 4
انت مينك ت تهجم عا عريني
و تلعب بالغلا بساحه متيني
كنت خلّيك طلّة بدر ناطر
بلا ما نفضح القرعه المهيني
بعلمي كان غيمك وحي ماطر
وفارس حربجي و جوهر خزيني
شو صايرلك تخلفك هيك قاطر
حمل و متاع من أهل المديني
أنا فكري جمود الجهل شاطر
ت أخلق فلسفه تعبوا سنيني
و على سقف السما مْعمّر قناطر
بفيّ ظلالها الدنيا أميني
انا ما جيت تا اكسر خواطر
ولا شعْرك يوم بالصوره عِنيني
بغير مجالنا خطّك يا شاطر
فرق بين البلاغه و الضغيني
مرق مثلك علينا من المساطر
وما قدرو غبروا حذوة هجيني
انا راس الفنا ع الريق فاطر
وألف مثلك بلقمه ما كفيني
و حقّ الربّ طِيب الذكر عاطر
ببحر الشعر ببلع كلّ ياطر
إذا موج الفكر حرّك يقيني .
قضيت العمر شيّد قصر ذاتي
بشعري و بحنين معلقاتي
و عين النسر سهمي ظلّ صايد
و عليّي ما مرق يوم الشتماتي
اجاني طراد حمّال الشدايد
قوي قالوا فحل مثل الزيناتي
و على الشعار عامل حكم قايد
و ناوي اليوم تا ياخذ حياتي هههه
صرت داريه عا حسب العوايد
يا عاقل اسمع ان حكيوا الخواتي
لك
أنا لو متت يا زيز الحصايد
و صرت ترقص دلاعه في مماتي
وبدر سيدك معك و الخصر مايد
يخلع حنجله رايح و آتي
بعتم القبر لولا كون رايد
مجد أعماركن حبّه برفاتي
تعا يا طراد تا تجمع فوايد
بْذارك ازرع بموسم الشاتي
صيغ الجوهر و ارمي الحدايد
ع تفنيصك خجل حبري بدواتي
انا إنسان طبعي ما بكايد
على القاصر ما بقسى بجوّ عاتي
يا اعطي مثل ما بعطي قصايد
بلاغه و معرفه و معلّميٍه
يمّا حيد يا شبّ السباتي ..
سليمان طراد 5
ع شو محتّد يا فحل الغناني
ع فلسفتك ع شعرك عا الأماني
ع اسمك ع الخوابي اللي نزعتو
بكبر الراس و بزغر المعاني
يا أسعد بعتذر منّك لأنو
اخدت المطلع و طبّشت سنو
و طلال بتعرفو بالشعر أمحل
الكلّ بيعرفو و بتقول عنّو
ولد مغرور و تعلّم يهجّي
منّي خلصو الله المنجّي
و كلما بيطلب الدعمه بيصرخ
دخيلك طلّ ساعدني يا حجّي
وهلق من بعد طقّي اسمحولو
ل بحر الشعر يطلب ع اصولو
هجا مدروس بالاستاذ عكو
و فيكن متل ما بدكن تقولوا
يا مارق عا الخوابي طلّ طلّه
شوف الارتجالي و لا تخلّي
بقلبك سرّ إلّا ما تقولو
انا ما بحبّ ساعات التخلّي
انا بحبّ التحدّي عا اصولو
وبعمري ما اعتدت اترك محلّي
و محلّي قدّ ما تستفقدولو
بخلّي ب الخوابي بسّ ظلّي
وانا بها الملتقى حقّي وصلّي
صمد عكّو وطلع تلميذ شاطر
يلّا يا شبيبه زقفولوا
وانا يا حجّ مشتقلك زيادي
على سماكة الدمّ الفيك حتّى
إذا بتترك زجلنا بإعتقادي
عليك بيبرمو مرقص و متّى
تعا ارجع على الموقع و نادي
مشاكلنا بها الايّام شتّى
بلادك ضايعه وضاعت بلادي
وانت بتظل ميزان المعنّى
و طلال بيرجع بعهدك يدادي
طلال عكّو 5
أيّا محْل و الردّات بانو
مين ال بالبسبق رابح حصانو
الشعر يا طراد ما بتخدع ضميرو
بشطحه الوهم حاكيها لسانو
انت بيّنت بطويلو و قصيرو
لعي فاضي و جرد غلّ بزوانو
و أنا للمنبر الشعري اميرو
و عليّي قْطوعك انكشفو و هانوا
صرت تستنجد بأسعد يا زيرو
يا ساقط بالشعر وقت امتحانو
شو بدّك كان بالسبع و زئيرو
ما زالك أرنب و حرشو مكانو
و لموقع شعرنا عم تستجيرو
تتعطي حكمك و تلقي بيانو
قلت تلميذ عنّي يا ضريرو
و خدودك لو صخر بالكفّ لانو
أنا استاذ يا جاهل مصيرو
الاكبر منّك بْعلمي استعانوا
و شهاداتك فرزدق أو جريرو
مش محتاجها السابق زمانو
ع جوعك ردّها و البال عيرو
لردّه تقطف الوحي بأوانو
انا طموحي خصم من زمهريرو
يعصف ريح أشعارو بكيانو
و فكر ع الغيب بيودّي سفيرو
تتقطف لمعة الحرة بنانو
لا تزعل يا بحر باقي هديرو
ع غيري يخدق بموجة حنانو
انت شعرك بطيشك عم تديرو
لحتى تكسب الشهرة بموقع
و انا نحتي الأدب و العلم زانو ..